Chapter 117

sāttvikajanmāvatāro nāma sargaḥ |
saptadaśottaraśatatamaḥ sargaḥ |
rāmaḥ |
kīdṛśyo bhagavanyogabhūmikāḥ sapta siddhidāḥ |
samāseneti me brūhi sarvatattvavidāṃ vara || 1 ||
[Analyze grammar]

vasiṣṭhaḥ |
ajñānabhūḥ saptapadā jñabhūḥ saptapadaiva ca |
padāntarāṇyasaṅkhyāni bhavantyanyānyathaitayoḥ || 2 ||
[Analyze grammar]

svayatnamādhavarasānmahāsattātarau late |
ete pratipadaṃ baddhamūle svaṃ phalataḥ phalam || 3 ||
[Analyze grammar]

tatra saptaprakāratvaṃ tvamajñānabhuvaśśṛṇu |
tataḥ saptaprakāratvaṃ śroṣyasi jñānabhūmijam || 4 ||
[Analyze grammar]

svarūpāvasthitirmuktistadbhraṃśo'hantvavedanam |
etatsaṅkṣepataḥ proktaṃ tajjñatvājñatvalakṣaṇam || 5 ||
[Analyze grammar]

śuddhacinmātrasaṃvitteḥ svarūpānna calanti ye |
rāgadveṣodayābhāvātteṣāṃ nājñatvasambhavaḥ || 6 ||
[Analyze grammar]

yatsvarūpaparibhraṃśaścetyārthaparimajjanam |
etasmādaparo moho na bhūto na bhaviṣyati || 7 ||
[Analyze grammar]

arthādarthāntaraṃ citte yāte madhye hi yā sthitiḥ |
nirastamananāṅkāsau svarūpasthitirucyate || 8 ||
[Analyze grammar]

saṃśāntasarvasaṅkalpaṃ yā śilāntaravatsthitiḥ |
jāḍyanidrādinirmuktā sā svarūpasthitiḥ smṛtā || 9 ||
[Analyze grammar]

ahantādāvalaṃ śānte bhede nisspandacittatā |
ajaḍā yatpratapati tatsvarūpamiti smṛtam || 10 ||
[Analyze grammar]

bījajāgrattathā jāgranmahājāgrattathaiva ca |
jāgratsvapnastathā svapnaḥ svapnajāgratsuṣuptakam || 11 ||
[Analyze grammar]

iti saptavidho mohaḥ punareṣa parasparam |
śliṣṭo bhavatyanekākhyaṃ śṛṇu lakṣaṇamasya ca || 12 ||
[Analyze grammar]

prathamaṃ cetanaṃ yatsyādanākhyaṃ nirmalaṃ citaḥ |
bhaviṣyaccitijīvādināmaśabdārthabhājanam || 13 ||
[Analyze grammar]

bījarūpaṃ sthitaṃ jāgradbījajāgrattaducyate |
eṣā jñapternavāvasthā tvaṃ jāgratsaṃsthitiṃ śṛṇu || 14 ||
[Analyze grammar]

evaṃ prasūtasya parādayaṃ cāhamidaṃ mama |
iti yaḥ pratyayaḥ svacchastajjāgratprāgabhāvanā || 15 ||
[Analyze grammar]

ayaṃ so'hamidaṃ tanme iti janmāntaroditaḥ |
pīvaraḥ pratyayaḥ proktaṃ mahājāgraditi sphurat || 16 ||
[Analyze grammar]

arūḍhamatha vārūḍhamanidramabahirmayam |
yajjāgrato manorājyaṃ jāgratsvapnaḥ sa ucyate || 17 ||
[Analyze grammar]

dvicandraśuktikārūpyamṛgatṛṣṇādibhedataḥ |
abhyāsaṃ prāpya jāgrattvaṃ tadanekavidhaṃ bhavet || 18 ||
[Analyze grammar]

alpakālaṃ mayā dṛṣṭametanno satyamityapi |
nidrākālānubhūte'rthe nidrānte pratyayo hi yaḥ || 19 ||
[Analyze grammar]

sa svapnaḥ kathitastasya mahājāgratsthitaṃ hṛdi |
cirasandarśanābhāvādapraphultabṛhadvapuḥ || 20 ||
[Analyze grammar]

svapno jāgrattayārūḍho mahājāgratpadaṃ gataḥ |
yatkṣate vākṣate dehe svapnajāgranmataṃ hi tat || 21 ||
[Analyze grammar]

ṣaḍavasthāparityāge jaḍajīvasya yā sthitiḥ |
bhaviṣyadduḥkhabodhāḍhyā sauṣuptī socyate gatiḥ || 22 ||
[Analyze grammar]

ete tasyāmavasthāyāṃ tṛṇaloṣṭaśilādayaḥ |
padārthāḥ saṃsthitāḥ sarve purāpāścātyanūtanāḥ || 23 ||
[Analyze grammar]

saptāvasthā iti proktā mayājñānasya rāghava |
ekaikā śataśākhātra nānāvibhavarūpiṇī || 24 ||
[Analyze grammar]

jāgratsvapnaściraṃ rūḍho jāgrattāmeva gacchati |
nānāpadārthabhedena sa vikāsaṃ vijṛmbhate || 25 ||
[Analyze grammar]

asyāścāpyudare santi mahājāgraddaśādṛśaḥ |
tāsāmapyantaranyāśca santyevaṃ saṃsṛtirghanā || 26 ||
[Analyze grammar]

suṣuptasvapnakalane āsvantaradaśāsvapi |
sthite tenāyamakhilaḥ sthito mohaśśilāghanaḥ || 27 ||
[Analyze grammar]

svapnātsvapnāntaraṃ loko mohānmohāntaraṃ vrajet |
adhaḥpātijalāvarta iva yāti jalāntaram || 28 ||
[Analyze grammar]

kāścitsaṃsṛtayo dīrghasvapnajāgrattayā sthitāḥ |
kāścitpunaḥpunaḥ svapnā jāgratsvapnāstathetarāḥ || 29 ||
[Analyze grammar]

ajñānabhūmiriti saptapadā mayoktā nānāvikāradapadāntarabhedabhinnā |
asyāḥ samuttarasi cāruvicāraṇābhirdṛṣṭe prabodhavimale svayamātmanīti || 30 ||
[Analyze grammar]