Chapter 109

indrajālopakhyāne'kāṇḍavarṇanaṃ nāma sargaḥ |
navottaraśatatamaḥ sargaḥ |
rājā |
tasmiṃstadā vartamāne kaṣṭe vidhiviparyaye |
akālolbaṇakalpānte nitāntātapadāyini || 1 ||
[Analyze grammar]

janāḥ kecana niṣkramya sakalatrasuhṛjjanāḥ |
gatā deśāntaraṃ vyomnaśśaradīva payodharāḥ || 2 ||
[Analyze grammar]

dehāvayavasaṃlīnaputradārāgryabāndhavāḥ |
śīrṇāḥ kecana tatraiva cchinnā iva vane drumāḥ || 3 ||
[Analyze grammar]

bhuktāḥ kecana digvyāghrairnirgacchantaḥ svamandirāt |
ajātapakṣakāśśyenaiḥ khagā nīḍodgatā iva || 4 ||
[Analyze grammar]

praviṣṭāḥ kecidanalaṃ jvalitaṃ śalabhā iva |
kecicchvabhreṣu patitāśśilāśśailacyutā iva || 5 ||
[Analyze grammar]

ahaṃ tu tānparityajya śvaśurādīn svakāñjanān |
kalatramātramādāya kṛcchrāddeśādvinirgataḥ || 6 ||
[Analyze grammar]

analānanilāṃścaiva rakṣakānbhakṣakānapi |
vañcayitvā bhayānmṛtyoḥ sadāro'haṃ vinirgataḥ || 7 ||
[Analyze grammar]

prāpya taddeśaparyantaṃ tatra tālatarostale |
avaropya sutān skandhāttānanarthānivolbaṇān || 8 ||
[Analyze grammar]

viśrānto'smi ciraśrānto rauravādiva nirgataḥ |
grīṣmadāvanidāghārto grīṣme padma ivājalaḥ || 9 ||
[Analyze grammar]

atha caṇḍālakanyāyāṃ viśrāntāyāṃ tarostale |
suptāyāṃ śītalacchāye dvau samāliṅgya dārakau || 10 ||
[Analyze grammar]

thutthako nāma tanayo mamaikaḥ purataḥ sthitaḥ |
atyantavallabho'smākaṃ kanīyān kāntimāniti || 11 ||
[Analyze grammar]

sa māmuvāca dīnātmā bāṣpapūrṇavilocanaḥ |
āpta dehyāśu me māṃsaṃ pānaṃ ca rudhiraṃ kṣaṇāt || 12 ||
[Analyze grammar]

punaḥ punarvadannevaṃ sa bālastanayo mama |
prāṇāntikīṃ daśāṃ prāptaḥ sākrando hi punaḥ kṣudhā || 13 ||
[Analyze grammar]

tasyoktaṃ hi mayā putra māṃsaṃ nāstīti bhūriśaḥ |
tathāpi māṃsaṃ dehīti vadatyeva sudurmatiḥ || 14 ||
[Analyze grammar]

atha vātsalyamūḍhena mayā duḥkhātibhāriṇā |
tasyoktaṃ putra manmāṃsaṃ pakvaṃ sambhujyatāmiti || 15 ||
[Analyze grammar]

tadapyaṅgīkṛtaṃ tena dehīti vadatā punaḥ |
manmāṃsabhakṣaṇaṃ kṣīṇavṛttinā ślathakṛttinā || 16 ||
[Analyze grammar]

sarvaduḥkhāpanodāya snehakāruṇyamohitaḥ |
maraṇāyāttamitrāya tato'haṃ sahasotthitaḥ || 17 ||
[Analyze grammar]

grīṣmatāpopataptāni kāṣṭhānyāhṛtya jaṅgalāt |
maraṇāyātmanastatra citā viracitā mayā || 18 ||
[Analyze grammar]

lelihānānalajvālā citā prajvālitātha sā |
kṣaṇāccaṭacaṭāsphoṭaiḥ sthitā madabhikāṅkṣiṇī || 19 ||
[Analyze grammar]

mayoktaṃ tanayāsyāṃ tu citāyāṃ patitātpunaḥ |
utkṛtyotkṛtya bhoktavyaṃ matto māṃsaṃ kṣaṇāttvayā || 20 ||
[Analyze grammar]

ityuktvā yāvadātmānaṃ svaṃ citāyāṃ kṣipāmyaham |
luṭhito'smi javāttāvadasmātsiṃhāsanānnṛpaḥ || 21 ||
[Analyze grammar]

tatastūryaninādena jayaśabdena cābhitaḥ |
bhṛśameva prabuddho'haṃ smṛtyā ca valitaḥ sthitaḥ || 22 ||
[Analyze grammar]

iti śāmbarikeṇeha moha utpādito mama |
ajñāneneva jīvasya daśāśatasamanvitaḥ || 23 ||
[Analyze grammar]

ātmodantaṃ bhavatsvitthamenaṃ kathitavānaham |
mārkāṇḍeya ivānantaṃ kalpaduḥkhaṃ surājasu || 24 ||
[Analyze grammar]

vasiṣṭhaḥ |
ityuktavati rājendre lavaṇe bhūritejasi |
antardhānaṃ jagāmāsau tatra śāmbarikaḥ kṣaṇāt || 25 ||
[Analyze grammar]

athedamūcuste sabhyā vismayākulacetasaḥ |
anyo'nyālokanavyagrapadmapattranibhekṣaṇāḥ || 26 ||
[Analyze grammar]

aho nu khalu citreyaṃ māyā nanu vilakṣaṇā |
ko nu śāmbariko nāma kva cāsāvagrato gataḥ || 27 ||
[Analyze grammar]

sarvaśaktervicitrā hi śaktayaśśataśo vidheḥ |
yadvivekimano'pyeṣa vimohayati māyayā || 28 ||
[Analyze grammar]

vijñātalokavṛttāntaḥ kva nāmāyaṃ mahīpatiḥ |
kva sāmānyamanovṛttiyogyā vipulasambhramāḥ || 29 ||
[Analyze grammar]

na ca śāmbarikottheyaṃ māyā manasi mohanī |
arthasya gṛdhnavo hyete nityaṃ śāmbarikāḥ kila || 30 ||
[Analyze grammar]

yatnena prārthayante'rthaṃ nāntardhānaṃ vrajanti te |
iti sandehadolāyāṃ saṃsthitau luṭhitā vayam || 31 ||
[Analyze grammar]

sabhāyāmavasaṃ tasyāmahaṃ rāma tadā kila |
tena pratyakṣato dṛṣṭaṃ mayaitannāptataśśrūtam || 32 ||
[Analyze grammar]

atibahukalanāvivardhitāṅgaṃ naya nijacittamidaṃ śamaṃ mahātman |
śamamupagamite paraṃ svabhāve paramamupaiṣyasi pāvanaṃ padaṃ tat || 33 ||
[Analyze grammar]