Chapter 108

indrajālopākhyāna āpadvarṇanaṃ nāma sargaḥ |
aṣṭottaraśatatamaḥ sargaḥ |
rājā |
atha gacchati kāle'tra jarājarjaritāyuṣi |
tuṣārapūrṇaśaṣpaughasamaśmaśrudhṛte mayi || 1 ||
[Analyze grammar]

karmavātāvanunneṣu saraseṣvaraseṣvapi |
patatsu vāsaraugheṣu śīrṇaparṇagaṇeṣviva || 2 ||
[Analyze grammar]

ājāviva śaraugheṣu sukhaduḥkheṣvanāratam |
kalaheṣvatha kāryeṣu āgacchatsu vrajatsu ca || 3 ||
[Analyze grammar]

vikalpakalanāvartavartinīva jagadbhrame |
samudra iva kallolabhare bhramati cetasi || 4 ||
[Analyze grammar]

calaṃ cintācitaṃ cakramārūḍhe bhrānta ātmani |
prohyamāne tṛṇa iva sāvarte kālasāgare || 5 ||
[Analyze grammar]

vindhyorvīvraṇakīṭasya grāmaikaśaraṇasya ca |
dvibāhorgardabhasyātra kṣīṇa itthaṃ samāgaṇe || 6 ||
[Analyze grammar]

vismṛte mama bhūpatve śavasyeva mahājvare |
caṇḍālatve sthirībhūte chinnapakṣa ivācale || 7 ||
[Analyze grammar]

saṃsāramiva kalpānto dāvāgniriva kānanam |
sāgarormistaṭamiva śuṣkavṛkṣamivāśaniḥ || 8 ||
[Analyze grammar]

akāṇḍamaraṇoḍḍīnacaṇḍacaṇḍālamaṇḍalam |
nirannatṛṇapattrāmbu vindhyakacchaṃ tadā yayau || 9 ||
[Analyze grammar]

na varṣati ghanavrāte dṛṣṭanaṣṭe kvacitsthite |
pūtāṅgārakaṇonmiśragatau vahati mārute || 10 ||
[Analyze grammar]

śīrṇamarmaraparṇāsu dāvāgnivalitāsu ca |
vanasthalīṣu śūnyāsu cirapravrajitāsviva || 11 ||
[Analyze grammar]

akāṇḍamabhavadbhīmamuddāmadavapāvakam |
śoṣitāśeṣagahanaṃ bhasmaśeṣatṛṇolapam || 12 ||
[Analyze grammar]

pāṃsudhūsarasarvāṅgaṃ kṣudhitāśeṣamānavam |
nirannatṛṇapānīyadeśodyaddāvamaṇḍalam || 13 ||
[Analyze grammar]

kacanmarumarīcyambumajjanmahiṣamaṇḍalam |
vātotthasaikatavyūhavārivāhāvṛtāmbaram || 14 ||
[Analyze grammar]

pānīyaśabdamātraikaśravaṇotkanaravrajam |
ātapādatisaṃśoṣasīdatsakalamānavam || 15 ||
[Analyze grammar]

putragrasanasaṃrabdhakṣudhitojjhitajīvitam |
svāṅgacarvaṇasaṃrambhaluṭhaddaśanamaṇḍalam || 16 ||
[Analyze grammar]

māṃsaśaṅkānigīrṇograkhadirāgnikaṇotkaram |
maṇḍūkāśāvaśagrastavanapāṣāṇakhaṇḍakam || 17 ||
[Analyze grammar]

anyo'nyadrutasaṃsaktamātṛputrapitṛvrajam |
gṛdhrodararaṭatsāgranigīrṇavanaśārikam || 18 ||
[Analyze grammar]

parasparāṅgavicchedaraktasiktadharātalam |
harigrasanasaṃrabdhamattakṣubhitavāraṇam || 19 ||
[Analyze grammar]

darīnigiraṇaikotkasiṃhabhramaṇabhīṣaṇam |
anyo'nyagrasanodyuktalokamallakṛtāhavam || 20 ||
[Analyze grammar]

niṣpattrapādapoḍḍīnapūtāṅgāramayānilam |
raktapānotkamārjāralīḍhadhātutalāvani || 21 ||
[Analyze grammar]

jvālāghanaghanāṭopasāvataṃsavanānilam |
sarvaskhalajjvaladvahnipuñjapiñjarajaṅgalam || 22 ||
[Analyze grammar]

dagdhājagarakuñjotthadhūmamāṃsalagulmakam |
mārutāvalitajvālāsandhyābhravalitāmbaram || 23 ||
[Analyze grammar]

uḍḍāmaramarudbhrāntabhāsmanastambhamaṇḍalam |
sākrandanaradantāgraśīrṇārbhakakṛtāravam || 24 ||
[Analyze grammar]

sambhrāntapuruṣavyūhadantakṛttamahāśavam |
māṃsabhogajavagrastaraktaraktanijāṅguli || 25 ||
[Analyze grammar]

nīlapattralatāśabdapītadhūmaghanacchavi |
bhramadgṛdhranigīrṇogranabhobhrāntolmukāmiṣam || 26 ||
[Analyze grammar]

itaretarabhinnāṅgalokavidravaṇākulam |
jvalitāgniṭanatkāravidīrṇahṛdayodaram || 27 ||
[Analyze grammar]

gatamārutabhāṅkārabhīmadāvāgnivalganam |
bhītājagaraphūtkārapatadaṅgārapādapam || 28 ||
[Analyze grammar]

tadakāṇḍaṃ sphuṭaṃ prāpya sa deśaśśuṣkakoṭaraḥ |
dvādaśārkāgnidagdhasya jagato'nukṛtiṃ yayau || 29 ||
[Analyze grammar]

jvaladanalajaṭālavṛkṣaṣaṇḍaḥ prasṛtamarutprasarāpanunnalokaḥ |
jvalanatapanabhāskarātmajānāṃ ramaṇagṛhānukṛtiṃ jagāma deśaḥ || 30 ||
[Analyze grammar]