Chapter 107

caṇḍālīvivāho nāma sargaḥ |
saptottaraśatatamaḥ sargaḥ |
rājā |
bahunātra kimuktena svotsavāvarjitāśayaḥ |
tataḥprabhṛti tatrāhaṃ sampannaḥ puṣṭapukkasaḥ || 1 ||
[Analyze grammar]

saptarātrotsavasyānte kramānmāsāṣṭakaṃ gatam |
puṣpitā sātha sampannā sthitā garbhavatī tataḥ || 2 ||
[Analyze grammar]

prāsūta duḥkhadāṃ kanyāṃ vipadduḥkhakriyāmiva |
sā kanyā vavṛdhe śīghraṃ mūrkhacinteva pīvarī || 3 ||
[Analyze grammar]

punaḥ prāsūta sā varṣaistribhiḥ putramaśobhanam |
anarthamiva durbuddhirāśāpāśavidhāyakam || 4 ||
[Analyze grammar]

punaḥ prāsūta kanyāṃ ca punarapyarbhakaṃ tataḥ |
kalatravānahaṃ jāto vane jaraḍhapukkasaḥ || 5 ||
[Analyze grammar]

tayā saha samāstatra mayā bahvyo'tivāhitāḥ |
narake cintayā sārdhaṃ brahmaghneneva naśyatā || 6 ||
[Analyze grammar]

śītavātātapakleśavivaśena vanāntare |
ciraṃ vilulitaṃ vṛddhakacchapeneva palvale || 7 ||
[Analyze grammar]

kalatracintāhatayā dhiyā sandahyamānayā |
dṛṣṭāḥ kaṣṭasamārambhā diśaḥ prajvalitā iva || 8 ||
[Analyze grammar]

kṣaumānekasamākṣīṇapaṭakhaṇḍakadhāriṇā |
kāṣṭhabhāro vane vyūḍho yo mūrtamiva duṣkṛtam || 9 ||
[Analyze grammar]

yaukakīrṇajaraklinnagandhikaupīnavāsasā |
āḍhyāspadavalīkānāṃ tale nītā ghanāgamāḥ || 10 ||
[Analyze grammar]

kalatrāpūraṇotkena jarjareṇa himānilaiḥ |
hemante durdureṇeva nilīnaṃ vanakukṣiṣu || 11 ||
[Analyze grammar]

nānākalahakallolatāpaprasaravidrutāḥ |
bāṣpavyājena nirmuktā netrābhyāṃ raktabindavaḥ || 12 ||
[Analyze grammar]

yāminyo vipine klinnavarāhāmiṣabhojinā |
śilātalakuṭīkoṇe nītā jaladaviplutāḥ || 13 ||
[Analyze grammar]

kāle kṣayaṃ gate snehe kalatre'ghanatāṃ gate |
asauhārdena bandhūnāṃ kalahaiścātisantataiḥ || 14 ||
[Analyze grammar]

sarvatra jātaśaṅkena kulīlāmukharārbhake |
mayā kṛpaṇacittena nītāḥ paragṛhe samāḥ || 15 ||
[Analyze grammar]

caṇḍālīkalahodvignacaṇḍacaṇḍālatarjanaiḥ |
mukhaṃ jarjaratāṃ yātamindū rāhuradairiva || 16 ||
[Analyze grammar]

carvitāḥ kharvitoṣṭhena dvīpīpiśitapeśayaḥ |
narakāhṛtavikrītā nārakyo rasanā iva || 17 ||
[Analyze grammar]

himavatkandarodgīrṇāścaṇḍā hemantavāyavaḥ |
aṅge nirambare soḍhā mṛtyumuktā iveṣavaḥ || 18 ||
[Analyze grammar]

jarajjaraḍhamūḍhena mūlāni kṣīṇabhūruhām |
sukṛtānāmivaikena samutkhātāni bhūriśaḥ || 19 ||
[Analyze grammar]

śarāvakeṣvaṭavyāṃ ca palalaṃ pakvamādarāt |
amṛṣṭena janairbhuktaṃ kukalatravatā mayā || 20 ||
[Analyze grammar]

grahītṛtejaḥkṣataye bahuvaktravikāriṇā |
bhāgadheyamivātmīyaṃ vikrītaṃ paṇyamanyataḥ || 21 ||
[Analyze grammar]

prāṇyaṅgavapuṣaḥ svasya protkṛtyotkṛtya peśayaḥ |
āyuṣaḥ pari vikrītā vindhyapakkaṇabhūmiṣu || 22 ||
[Analyze grammar]

janmāntarasahasrotthaṃ svaṃ pāpamiva vṛddhaye |
avakīrṇaṃ ca saṅkīrṇaṃ maṇḍalārāmabhūmiṣu || 23 ||
[Analyze grammar]

dṛṣṭaṃ kuddālakaṃ dṛṣṭyā ṛjvyā snehasamutkayā |
rauravāpatiteneva tatkākaḥ snigdhatāṃ gataḥ || 24 ||
[Analyze grammar]

vindhyakandaragulmānāṃ bandhutvamiva gacchatā |
pulindavapuṣā pattrapaṅktayo'ṅge samarpitāḥ || 25 ||
[Analyze grammar]

tarpitā laguḍāsphālajitakauleyaraṃhasā |
putradārāḥ kadannena grāmyakād yācitena ca || 26 ||
[Analyze grammar]

dhārāsāraraṇatpattraśuṣkatālatale niśāḥ |
nītā raṇitadantena sārdhaṃ vipinavānaraiḥ || 27 ||
[Analyze grammar]

romabhiḥ koṭiṣu proccaiśśītenoddhṛṣitasya me |
varṣāsu muktākaṇavaddhṛtāḥ salilabindavaḥ || 28 ||
[Analyze grammar]

ajājimūlakhaṇḍārthaṃ kṣutkṣobhakṣīṇakukṣiṇā |
kalatreṇa mahāṭavyāṃ kṛtaḥ kalaha ākulaḥ || 29 ||
[Analyze grammar]

vane raṇitadantena śītakekaracakṣuṣā |
maṣīmalinagātreṇa vetālasvajanāyitam || 30 ||
[Analyze grammar]

sarittīreṣu matsyārthaṃ bhrāntaṃ baḍiśadhāriṇā |
kalpe jagatsu bhūtārthaṃ kṛtānteneva pāśinā || 31 ||
[Analyze grammar]

pītaṃ bahūpavāsena samyakkṛttānmṛgorasaḥ |
tatkālakoṣṇaṃ rudhiraṃ mātuḥ stanapayo yathā || 32 ||
[Analyze grammar]

śmaśānasaṃsthitānmatto raktaraktātpalāśinaḥ |
vidrutā vanavetālāścaṇḍikābhidrutā iva || 33 ||
[Analyze grammar]

vāgurā vipine vyuptā bandhārthaṃ mṛgapakṣiṇām |
āśā iva vivṛddhyarthaṃ putradārakalatrajāḥ || 34 ||
[Analyze grammar]

mayā māyāmayairlokāḥ sūtrajālamayaiḥ khagāḥ |
jālairjarjaratāṃ nītā diśaśca sukṛtāyuṣām || 35 ||
[Analyze grammar]

tatrātidattaprasare manaso duṣkṛtodaye |
āśā prasāritā dūraṃ prāvṛṣīva taraṅgiṇī || 36 ||
[Analyze grammar]

karabhyā iva sarpeṇa vidrutaṃ dūrato hriyā |
dūre tyaktā dayā dehādbhujaṅgeneva kañcukam || 37 ||
[Analyze grammar]

krauryaṃ mukharasaṃrambhi śaravarṣi ninādi ca |
aṅgīkṛtaṃ nidāghānte nabhasevāsitāmbudaḥ || 38 ||
[Analyze grammar]

vikāsinyo'kṣatākārā dūraṃ parihṛtā janaiḥ |
śvabhreṇeva kumañjaryaściramūḍhā mayāpadaḥ || 39 ||
[Analyze grammar]

śvakākākulakoṇāsu narakoḍḍārabhūmiṣu |
uptā duṣkṛtabījānāṃ muṣṭayo mohavṛṣṭayaḥ || 40 ||
[Analyze grammar]

vāgurāsimatā vindhyakandarasthena nirdayam |
bhūteṣviva kṛtāntena mṛgeṣu parivalgitam || 41 ||
[Analyze grammar]

pāmarīkaṇṭhakuḍyeṣu viśrāntaśirasā mayā |
suptamastavivekena śeṣāṅgeṣviva śauriṇā || 42 ||
[Analyze grammar]

vilolaparṇāmbarayā śarāvollāsidhūmayā |
mama tanvā sanīhāravindhyakacchaguhāyitam || 43 ||
[Analyze grammar]

kṛṣṇadehena yaukāḍhyā kanthā skandhe mayā ciram |
grīṣmeṣūḍhā balodbhūtā varāheṇa yathorvarā || 44 ||
[Analyze grammar]

bahuśo'haṃ vanotthāgninirdagdhaprāṇimaṇḍalaḥ |
kalpāgnibhuktajagataḥ kālasyānukṛtiṃ gataḥ || 45 ||
[Analyze grammar]

lohaliṅgā yathā rogānanarthāniva durgrahāḥ |
prasūtāstatra me dārā duḥkhānyapi sutānapi || 46 ||
[Analyze grammar]

tribālaputrikeṇaikatanayena tadā mayā |
nītā nīrandhradoṣeṇa ṣaṣṭiḥ kalpasamāḥ samāḥ || 47 ||
[Analyze grammar]

ākruṣṭamuddhataravaṃ ruditaṃ vipatsu bhuktaṃ kadannamuṣitaṃ hatapakkaṇeṣu |
kālāntaraṃ bahu mayopahatena tatra durvāsanānigaḍabandhagatena sabhyāḥ || 48 ||
[Analyze grammar]