Chapter 106

rājaprabodho nāma sargaḥ |
ṣaḍuttaraśatatamaḥ sargaḥ |
rājā |
asti tāvadayaṃ deśo nānāvananadīyutaḥ |
vasudhāmaṇḍalasyāsya sahodara ivānujaḥ || 1 ||
[Analyze grammar]

asmiṃścāyamaham rājā paurābhimatavṛttimān |
indraḥ svarga ivāsyāṃ tu sabhāyāmadya saṃsthitaḥ || 2 ||
[Analyze grammar]

yāvadabhyāgato dūrātkaścicchāmbarikastvayam |
rasātalādabhyutthito māyī maya iva svayam || 3 ||
[Analyze grammar]

anena bhrāmitaiṣeha piñchikā rājirājitā |
kalpāntapavanābhreṇa śakracāpalatā yathā || 4 ||
[Analyze grammar]

ālokyaitāmahaṃ lolāmasyāśvasya purassthiteḥ |
pṛṣṭhamārūḍhavāneka ātmanā bhrāntamānasaḥ || 5 ||
[Analyze grammar]

tato'driṃ pralayakṣubdhaṃ puṣkarāvartako yathā |
tathā calantaṃ calitaḥ svaśvamārūḍhavānaham || 6 ||
[Analyze grammar]

gantuṃ pravṛtto mṛgayāmeko'hamatha raṃhasā |
urvarāmiva nirbhettuṃ kallolaḥ pralayāmbudheḥ || 7 ||
[Analyze grammar]

tenānilavilolena dūraṃ nīto'smi vājinā |
bhogābhyāsajaḍenājño mugdhaḥ svamanasā yathā || 8 ||
[Analyze grammar]

akiñcanamanaśśūnyaṃ strīcittamiva durbhagam |
tataḥ pralayanirdagdhajagadāspadabhīṣaṇam || 9 ||
[Analyze grammar]

niṣpakṣi kṣāranīhāraṃ nirvṛkṣamajalaṃ mahat |
samprāpto'hamaparyantamaraṇyaṃ tāntavāhanaḥ || 10 ||
[Analyze grammar]

taddvitīyamivākāśaṃ tathāṣṭamamivāmbudhim |
pañcamaṃ sāgaramiva saṃśuṣkaṃ śūnyakoṭaram || 11 ||
[Analyze grammar]

jñasyeva vitataṃ ceto mūrkhasyeva ruṣo'javam |
adṛṣṭajanasaṃsargamajātatṛṇapallavam || 12 ||
[Analyze grammar]

araṇyaṃ mahadāsādya matirme khedamāgatā |
lalanevaitya dāridryaṃ nirannaphalabāndhavam || 13 ||
[Analyze grammar]

kacanmarumarīcyambupūraplutakakubmukhe |
āsūryāntaṃ dinaṃ tatra prakrāntaṃ sīdatā mayā || 14 ||
[Analyze grammar]

tadaraṇyaṃ mayātītamatikṛcchreṇa khedinā |
vivekineva saṃsāro madhyaśūnyātatākṛtiḥ || 15 ||
[Analyze grammar]

taddinenātivāhyāhaṃ prāptavāñjaṅgalaṃ mahat |
astādrisānuṃ khinnaḥ khaṃ śūnyaṃ bhrāntveva bhāskaraḥ || 16 ||
[Analyze grammar]

jambūkadambaprāyeṣu kalālāpāḥ patatriṇaḥ |
yatra sphuranti ṣaṇḍeṣu pānthānāmiva bandhavaḥ || 17 ||
[Analyze grammar]

yatra śaṣpaśikhāśreṇyo dṛśyante'viralāḥ sthale |
kadarthalakṣmyā jihmasya hṛdīvānandavṛttayaḥ || 18 ||
[Analyze grammar]

pūrvādaraṇyādarasāttaddhi kiñcitsukhāvaham |
atyantaduḥkhānmaraṇādvaraṃ vyādhirhi jantuṣu || 19 ||
[Analyze grammar]

tatra jambīraṣaṇḍasya talaṃ samprāptavānaham |
mārkāṇḍeya ivāgendramekārṇavavihārataḥ || 20 ||
[Analyze grammar]

ālambitā mayā tatra skandhasaṃsaṅginī latā |
nīlā jaladamāleva tāpataptena bhūbhṛtā || 21 ||
[Analyze grammar]

mayi pralambamāne'syāṃ prayātaḥ sa turaṅgamaḥ |
gaṅgāvalambini jane yathā duṣkṛtasañcayaḥ || 22 ||
[Analyze grammar]

ciradīrghādhvagaḥ khinnastatra viśrāntavānaham |
bhānurastācalotsaṅge tale kalpataroriva || 23 ||
[Analyze grammar]

yāvatsamastasaṃsāravyavahārabharaiḥ samam |
ravirviśramaṇāyeva niviṣṭo'stācalāṅgane || 24 ||
[Analyze grammar]

śanaiśśyāmikayā graste samaste bhuvanodare |
rātrisaṃvyavahāreṣu sampravṛtteṣu jaṅgale || 25 ||
[Analyze grammar]

ahaṃ tanutṛṇe tasminpelave ṣaṇḍakodare |
nilīno'viralālasyaḥ svanīḍe vihago yathā || 26 ||
[Analyze grammar]

vipadbhraṣṭavivekasya cchinnāśasya galatsmṛteḥ |
vikrītasyeva dīnasya magnasyevāndhakūpake || 27 ||
[Analyze grammar]

tatra kalpasamā rātrirmohamagnasya me gatā |
ekārṇavohyamānasya mārkāṇḍeyamuneriva || 28 ||
[Analyze grammar]

na snātavānna sthitavānna tadā bhuktavānaham |
kevalaṃ me gatā rātriḥ sāpadāṃ dhuri tiṣṭhataḥ || 29 ||
[Analyze grammar]

vinidrasya vidhairyasya sphurataḥ saha pallavaiḥ |
mama duḥkhātidairghyeṇa sā vyatīyāya śarvarī || 30 ||
[Analyze grammar]

tatastimiralekhāsu saha tārendukairavaiḥ |
mayīvāpadyamānāsu mlānatāmalasānanaiḥ || 31 ||
[Analyze grammar]

śāmyantīṣu ca vetālakṣveḍāsvajanajaṅgale |
saha śītārtimaddantapaṅktiṭāṅkārasītkṛtaiḥ || 32 ||
[Analyze grammar]

māmabantaranirmagnaṃ hasantīmiva dṛṣṭavān |
ahaṃ pūrvāṃ diśaṃ prātarmadhupānāruṇāmiva || 33 ||
[Analyze grammar]

kṣaṇādajña iva jñānaṃ daridra iva kāñcanam |
dṛṣṭavānahamarkaṃ khavāraṇārohaṇonmukham || 34 ||
[Analyze grammar]

utthāya vāravāṇaṃ ca tata āsphoṭitaṃ mayā |
hasticarma hareṇeva sandhyānṛttānurāgiṇā || 35 ||
[Analyze grammar]

pravṛttastāmahaṃ sphārāṃ vihartuṃ jaṅgalasthalīm |
kālo jagatkuṭīṃ kalpadagdhabhūtagaṇāmiva || 36 ||
[Analyze grammar]

na kiñciddṛśyate tatra bhūtaṃ jaraḍhajaṅgale |
abhijāto guṇalavo yathā mūrkhaśarīrake || 37 ||
[Analyze grammar]

kevalaṃ vigatāśaṅkaṃ ṣaṇḍabhramaṇacañcalāḥ |
cīcīkūcīcīvacanā viharanti vihaṅgamāḥ || 38 ||
[Analyze grammar]

athāṣṭabhāgamāpanne vyomno divasanāyake |
śuṣkāvaśyāyaleśāsu snātāsviva latāsu ca || 39 ||
[Analyze grammar]

bhramatātra mayā dṛṣṭā dārikaudanadhāriṇī |
gṛhītāmṛtasatkumbhā dānaveneva mādhavī || 40 ||
[Analyze grammar]

tarattārakanetrāṃ tāṃ śyāmāmadhavalāmbarām |
ahamabhyāgatastatra śarvarīmiva candramāḥ || 41 ||
[Analyze grammar]

mahyamodanamāśvetadbāle balavadāpade |
dehi dīnārtiharaṇātsphāratāṃ yānti sampadaḥ || 42 ||
[Analyze grammar]

kṣudantardahatīyaṃ māṃ bāle vṛddhimupeyuṣī |
kṛṣṇasarpī prasūteva koṭarasthā jaraddrumam || 43 ||
[Analyze grammar]

yācñayāpi tayā mahyamitthaṃ dattaṃ na kiñcana |
yatnaprārthitayā lakṣmyā yathā duṣkṛtine dhanam || 44 ||
[Analyze grammar]

kevalaṃ cirakālena mayyatyantānugāmini |
ṣaṇḍāt ṣaṇḍaṃ nipatati cchāyābhūte purassthite || 45 ||
[Analyze grammar]

tayokto hārakeyūriṃścaṇḍālīṃ viddhi māmiti |
rākṣasīmiva sukrūrāṃ puruṣāśvagajānanām || 46 ||
[Analyze grammar]

rājanyācanamātreṇa matto nāpnoṣi bhojanam |
grāmyādanabhijātehātsaujanyamiva sundara || 47 ||
[Analyze grammar]

ityuktavatyā gacchantyā skhalantyeva pade pade |
kuñjakeṣu nimajjantyā līlāvanatayoditam || 48 ||
[Analyze grammar]

dadāni bhojanamidaṃ bhartā bhavasi cenmama |
loko nopakarotyarthaṃ sāmānyaḥ snigdhatāṃ vinā || 49 ||
[Analyze grammar]

vāhayatyatra me dāntānuḍḍāre pukkasaḥ pitā |
śmaśāna iva vetālaḥ kṣudhito dhūlidhūsaraḥ || 50 ||
[Analyze grammar]

tasyedamannaṃ bhavati bhartṛtve dīyate sthite |
prāṇairapi hi sampūjyā vallabhāḥ puruṣā yataḥ || 51 ||
[Analyze grammar]

athoktā sā mayā bhartā bhavāmi tava suvrate |
kenāpadi vicāryante varṇadharmakulakramāḥ || 52 ||
[Analyze grammar]

tatastayaudanādardhaṃ mahyamekaṃ samarpitam |
mādhavīvāmṛtādardhamindrāyāgnimate purā || 53 ||
[Analyze grammar]

jambūphalarasaḥ pītaḥ sa bhuktaḥ pukkasaudanaḥ |
viśrāntaṃ ca mayā tatra mohāpahṛtacetasā || 54 ||
[Analyze grammar]

māṃ taḍākamivāpūrya sā prāvṛṭśyāmalā gatā |
hastena samupādāya prāṇaṃ bahiriva sthitam || 55 ||
[Analyze grammar]

durākṛtiṃ durārambhamāsasāda bhayapradam |
pitaraṃ pīvarākāramavīcimiva śāsanā || 56 ||
[Analyze grammar]

tayā madanuṣaṅgiṇyā svārthastasmai niveditaḥ |
mātaṅgāya bhramaryeva nissvanenālilagnayā || 57 ||
[Analyze grammar]

sa tasyā bāḍhamityuktvā dinānte samupasthite |
mumoca dāntāvābaddhau kṛtāntaḥ kiṅkarāviva || 58 ||
[Analyze grammar]

nīhārābhrakaḍārāsu dikṣu proddhūlitāsviva |
vetālavadvanāttasmāddinānte calitā vayam || 59 ||
[Analyze grammar]

kṣaṇena pakkaṇaṃ prāptāḥ sandhyāyāṃ dīrghajaṅgalāt |
śmaśānādiva vetālāśśmaśānamitaranmahat || 60 ||
[Analyze grammar]

vikartitavarāhāśvakapikukkuṭavāyasam |
raktasiktorvarābhāgaprabhramanmakṣikāgaṇam || 61 ||
[Analyze grammar]

śoṣārthaprasṛtārdrāntratandrījālapatatkhagam |
niṣkuṭāsthitajambīraṣaṇḍalagnaśvajāghani || 62 ||
[Analyze grammar]

śuṣyadguruvasāpiṇḍapūrṇālindalasatkhagam |
dṛtiprasaktaraktāktacarmasravadasṛglavam || 63 ||
[Analyze grammar]

bālahastasthitakravyapiṇḍāraṇitamakṣikam |
jarjarajyeṣṭhacaṇḍālatarjitāraṭitārbhakam || 64 ||
[Analyze grammar]

tatpraviṣṭā vayaṃ kīrṇaśiro'ntraṃ bhīmapakkaṇam |
mṛtabhūtaṃ jagatkalpe kṛtāntānucarā iva || 65 ||
[Analyze grammar]

sambhramopahitānalpakadalīdalapīṭhake |
ahamāsthitavāṃstatra nave śvaśuramandire || 66 ||
[Analyze grammar]

śvaśrvā me kekarākṣyāstu tenāsrulavacakṣuṣā |
jāmātāyamiti proktaṃ tayā tadabhinanditam || 67 ||
[Analyze grammar]

atha viśramya caṇḍālabhojanānyajināsane |
sañcitānyupabhuktāni duṣkṛtānīva bhūriśaḥ || 68 ||
[Analyze grammar]

anantaduḥkhabījāni namanojñatarāṇyapi |
tāni praṇayavākyāni śrutānyasubhagānyalam || 69 ||
[Analyze grammar]

nirabhrāmbaranakṣatre kasmiṃścindivase tataḥ |
taistairārambhasaṃrambhaistairvastravibhavārpaṇaiḥ || 70 ||
[Analyze grammar]

dattātha tena sā mahyaṃ kumārī bhayadāyinī |
sukṛṣṇā kṛṣṇavarṇena duṣkṛteneva śāsanā || 71 ||
[Analyze grammar]

sarabhasamabhito vineduratra prasṛtamahāmadirāsavāśśvapākāḥ |
hatapaṭupaṭahā vilāsavantaḥ svayamiva duṣkṛtarāśayo mahāntaḥ || 72 ||
[Analyze grammar]