Chapter 105

indrajālopākhyāne nṛpavyāmoho nāma sargaḥ |
pañcottaraśatatamaḥ sargaḥ |
vasiṣṭhaḥ |
muhūrtadvitayenātha bodhamāpa mahīpatiḥ |
prāvṛṣeṇyāmbunirmuktamambhoruhamivottamam || 1 ||
[Analyze grammar]

āsanātsāṅgadottaṃsaḥ prabuddho'sāvakampata |
savanābhogaśṛṅgāgro bhūkampa iva parvataḥ || 2 ||
[Analyze grammar]

babhāvardhaprabuddho'sāvāsane parikampitaḥ |
vikṣubdha iva pātālāvaraṇe mandarācalaḥ || 3 ||
[Analyze grammar]

patantaṃ dhārayāmāsustaṃ purogā nṛpaṃ bhujaiḥ |
meruṃ pralayavikṣubdhaṃ kulaśailāstaṭairiva || 4 ||
[Analyze grammar]

purogairdhāryamāṇo'sau paryākulamatirnṛpaḥ |
vīcivikṣobhitasyendorbabhāra vadane śriyam || 5 ||
[Analyze grammar]

ko'yaṃ pradeśaḥ kasyeyaṃ sabheti sa nṛpaśśanaiḥ |
dadhvāna majjadambhojakośastha iva ṣaṭpadaḥ || 6 ||
[Analyze grammar]

athovāca sabhā deva kimetaditi sādaram |
raṇanmadhukarī bhānuṃ dṛṣṭarāhumivābjinī || 7 ||
[Analyze grammar]

athainaṃ paripapracchuḥ purogā mantriṇastathā |
pralayollāsasantrastaṃ mārkāṇḍeyamivāmarāḥ || 8 ||
[Analyze grammar]

tvayītthaṃ saṃsthite deva vayamatyantamākulāḥ |
abhedyamapi bhindanti nirnimittabhramā manaḥ || 9 ||
[Analyze grammar]

āpātaramaṇīyeṣu paryantaviraseṣu ca |
bhogeṣviva vikalpeṣu keṣu te luṭhitaṃ manaḥ || 10 ||
[Analyze grammar]

satatodāravṛttāsu kathāsu pariśīlitam |
manaste nirmalaṃ kasmātsambhrameṣu nimajjati || 11 ||
[Analyze grammar]

tucchālambanamālūnaviśīrṇaṃ lokavṛttiṣu |
mano mohamupādatte na mahattvavijṛmbhitam || 12 ||
[Analyze grammar]

sātatyena hi yaivāsya manaso vṛttirutthitā |
śarīramadamattāsu tāmevānuvidhāvati || 13 ||
[Analyze grammar]

atucchālambanaṃ śuddhaṃ prabuddhaṃ guṇahāri ca |
tavāpi hi manaścitramālūnamiva lakṣyate || 14 ||
[Analyze grammar]

anabhyastavivekaṃ hi deśakālavaśānugam |
mantrauṣadhavaśaṃ yāti mano nodāravṛttimat || 15 ||
[Analyze grammar]

nityamāttavivekasya kathamālūnaśīrṇatā |
dunoti vitataṃ ceto vātyeva vibudhācalam || 16 ||
[Analyze grammar]

iti jātāsu gīrṣvasya bhūpateḥ kāntirānanam |
bhūṣayāmāsa śītāṃśuṃ māsānta iva pūrṇatā || 17 ||
[Analyze grammar]

rarāja rājā sāścaryamunmīlitavilocanaḥ |
gate himartau prollāsipuṣpaugha iva mādhavaḥ || 18 ||
[Analyze grammar]

athātisambhramāścaryakhinnasmitamukho babhau |
āsannamṛtyumālokya rāhumindurivāmbare || 19 ||
[Analyze grammar]

aindrajālikamālokya provācātha hasanniva |
babhruṃ hiṃsātmakaṃ dṛṣṭvā sarparūpīva takṣakaḥ || 20 ||
[Analyze grammar]

jālma jālaṃ jaṭālena kimetadbhavatā kṛtam |
mīnaspandāprasanno'bdhiḥ kṣaṇādeti prasannatām || 21 ||
[Analyze grammar]

citraṃ citrā hi devasya padārthaśataśaktayaḥ |
suśaktamapi me cittamābhirmohe niveśitam || 22 ||
[Analyze grammar]

kva vayaṃ lokaparyāyavṛttāntaparidevinaḥ |
kva manomohadāyinyo vitatāḥ prākṛtāpadaḥ || 23 ||
[Analyze grammar]

apyabhyastamahājñānaṃ manastiṣṭhati dehake |
kadācinmohamādatte kṣaṇaṃ matimatāmapi || 24 ||
[Analyze grammar]

idamāścaryamākhyānaṃ śṛṇutātha sabhāsadaḥ |
mama śāmbarikeṇeha yanmuhūrtaṃ pradarśitam || 25 ||
[Analyze grammar]

dṛṣṭavānahametasminbahvīḥ kāryadaśāścalāḥ |
muhūrte protthitadhvastaśakrāḥ sṛṣṭīrivābjajaḥ || 26 ||
[Analyze grammar]

ityuktvonmukhanetreṣu sabhyeṣu sa hasanniva |
rājā varṇayituṃ citraṃ vṛttāntamupacakrame || 27 ||
[Analyze grammar]

rājā |
iha vividhapadārthasaṅkulāyāṃ hradanadaparvatapattanākulāyām |
kulaśikharisamudrasaṅkaṭāyāṃ bhuvi vibhavāvalito'styayaṃ pradeśaḥ || 28 ||
[Analyze grammar]