Chapter 104

cittamāhātmyaṃ nāma sargaḥ |
caturuttaraśatatamaḥ sargaḥ |
vasiṣṭhaḥ |
atra te śṛṇu vakṣyāmi vṛttāntamimamadbhutam |
jāgatīhendrajālaśrīścittāyattā sthitā yathā || 1 ||
[Analyze grammar]

astyasminvasudhāpīṭhe nānānagavanākulaḥ |
uttarāḥ pāṇḍavā nāma sphīto janapado mahān || 2 ||
[Analyze grammar]

nīrandhranavajambīravanaviśrāntatāpasaḥ |
vidyādharīkṛtalatādolopavanapattanaḥ || 3 ||
[Analyze grammar]

vātoddhūtābjakiñjalkapuñjapiñjaraparvataḥ |
lasatkusumasambhāravanamālāvataṃsakaḥ || 4 ||
[Analyze grammar]

karañjamañjarīkuñjaguptaparyantajaṅgalaḥ |
kharjūrāntaritagrāmaghuṅghumadhvanitāmbaraḥ || 5 ||
[Analyze grammar]

pākapiṅgamilacchreṇiśālikedārapiṅgalaḥ |
nīlakaṇṭharavoddāmavanamaṇḍalamaṇḍitaḥ || 6 ||
[Analyze grammar]

sārasāravasaṃrambharaṇatkamalakānanaḥ |
tamālapaṭalānīlagirigrāmakakuṇḍalaḥ || 7 ||
[Analyze grammar]

vicitravihagavyūhavirāvāhitakākaliḥ |
nadīparisaronnidrapāribhadradrumāruṇaḥ || 8 ||
[Analyze grammar]

gāyatkalamakedāradārikāhūtamanmathaḥ |
puṣpasthalavaladvātavyādhūtakusumāmbudaḥ || 9 ||
[Analyze grammar]

darīgṛhaviniṣkrāntasiddhacāraṇavanditaḥ |
svargādiva samāhūya lāvaṇyamabhinirmitaḥ || 10 ||
[Analyze grammar]

gāyatkinnaraparyantakadalīṣaṇḍamaṇḍitaḥ |
mandānilabaloddhūtapuṣpopavanapāṇḍuraḥ || 11 ||
[Analyze grammar]

tatrāsti lavaṇo nāma rājā paramadhārmikaḥ |
hariścandrakulodbhūto bhūmāviva divākaraḥ || 12 ||
[Analyze grammar]

yadyaśaḥkusumottaṃsapāṇḍuraskandhamaṇḍalāḥ |
tatra śailā virājante harāḥ proddhūlitā iva || 13 ||
[Analyze grammar]

kṛpāṇaśakalotkṛttaniśśeṣārātimaṇḍalāt |
arātilokaḥ prāpnoti yadanusmaraṇājjvaram || 14 ||
[Analyze grammar]

yasyodārasamārambhamāryalokānupālanam |
caritaṃ saṃsmariṣyanti hareriva ciraṃ janāḥ || 15 ||
[Analyze grammar]

yasyāpsarobhiradrīndramūrdhasvamarasadmasu |
vikāsipulakollāsaṃ gīyante guṇagītayaḥ || 16 ||
[Analyze grammar]

yasya svassundarīgītā lokapālaciraśrutāḥ |
viriñcahaṃsairdhvanyante svābhyāsādguṇagītayaḥ || 17 ||
[Analyze grammar]

svapneṣvapi na sāmānyā yasyodāracamatkṛteḥ |
rāma dṛṣṭāśśrutā vāpi dainyadoṣamarīcayaḥ || 18 ||
[Analyze grammar]

jihmatāṃ yo na jānāti na dṛṣṭā yena gṛdhnutā |
udāratā yena dhṛtā brahmaṇevākṣamālikā || 19 ||
[Analyze grammar]

dināṣṭabhāga ākāśa āgate divasādhipe |
kadācitsa sabhāsthāne siṃhāsanagato'bhavat || 20 ||
[Analyze grammar]

sukhopaviṣṭe tatrāsmin rājanīndāvivāmbare |
praviśantīṣu sāmantasenāsu ca sasambhramam || 21 ||
[Analyze grammar]

gāyantīṣvatha kāntāsu sūpaviṣṭeṣu rājasu |
manoharati sāhlāde vīṇāvaṃśakalārave || 22 ||
[Analyze grammar]

cārucāmarahastāsu savilāsāsu rājani |
devāsuraguruprakhye viśrānte mantrimaṇḍale || 23 ||
[Analyze grammar]

prastuteṣu prakṛṣṭeṣu rājakāryeṣu mantribhiḥ |
proktāsu deśavārtāsu nipuṇaiścāratantribhiḥ || 24 ||
[Analyze grammar]

itihāsamaye puṇye vācyamāne ca pustake |
paṭhatsu ca stutīḥ puṇyāḥ puraḥprahveṣu vandiṣu || 25 ||
[Analyze grammar]

sabhāṃ viveśa sāṭopaḥ kaścittāmaindrajālikaḥ |
varṣaṇāhitasaṃrambho vasudhāmiva vāridaḥ || 26 ||
[Analyze grammar]

sa nanāma mahīpālaṃ śikharodārakandharam |
pādopāntagataḥ kāntaṃ śailaṃ phalataruryathā || 27 ||
[Analyze grammar]

sacchāyasyonnatāṃsasya phalinaḥ puṣpadhāriṇaḥ |
saṃviveśa puro rājñastaroragre kapiryathā || 28 ||
[Analyze grammar]

capalo lampaṭo'rthānāṃ sāmodasukhamārutam |
uvācotkandharaṃ bhūpaṃ sa padmamiva ṣaṭpadaḥ || 29 ||
[Analyze grammar]

vilokaya vibho tāvadekāmiha kharolikām |
pīṭhastha eva sāścaryāṃ vyomnaścandra ivāvanim || 30 ||
[Analyze grammar]

ityuktvā bhramitā tena piñchikā bhramadāyinī |
nānāviracanābījaṃ māyeva paramātmanā || 31 ||
[Analyze grammar]

tāṃ dadarśa mahīpālastejorekhāvirājitām |
śakraḥ suravimānasthaḥ svakārmukalatāmiva || 32 ||
[Analyze grammar]

sabhāṃ saindhavasāmanto viveśāsmin kṣaṇe tadā |
tārāpatikarākīrṇāṃ vyomavīthīmivāmbudaḥ || 33 ||
[Analyze grammar]

taṃ caivānujagāmāśvaśśasyaḥ paramavegavān |
devalokonmukhastvabdheśśakramuccaiśśravā iva || 34 ||
[Analyze grammar]

sa tamaśvamupādāya pārthivaṃ samuvāca ha |
soccaiśśravā iva kṣīrasāgaro marutāṃ patim || 35 ||
[Analyze grammar]

idamuccaiśśravaḥprakhyaṃ hayaratnaṃ mahīpate |
jave jayanaśīle tu mūrtimāniva mārutaḥ || 36 ||
[Analyze grammar]

aśvo'yamasmatprabhuṇā prabho samprahitastvayi |
rājate hi padārthaśrīrmahatāmarpaṇācchubhā || 37 ||
[Analyze grammar]

ityuktavati tasmiṃstu pratyuvācaindrajālikaḥ |
jaladastanite śānte cātako bhūdharaṃ yathā || 38 ||
[Analyze grammar]

sadaśvamenamāruhya bhuvanaṃ vihara prabho |
svapratāpāhitānalpaśobhāmurvīṃ raviryathā || 39 ||
[Analyze grammar]

aśvamālokayāmāsa tenokta iti pārthivaḥ |
nirhrādasūcitaṃ meghaṃ sa mayūra ivotsukaḥ || 40 ||
[Analyze grammar]

athānimeṣayā dṛṣṭyā rājā citropamākṛtiḥ |
babhūvālokayannaśvaṃ lipikarmārpitopamam || 41 ||
[Analyze grammar]

kṣaṇamālokya piñchāśvau tasthau sa sthagitekṣaṇaḥ |
dṛṣṭakṣubdhasamudrādrirbhīrurekataro yathā || 42 ||
[Analyze grammar]

tasthau muhūrtayugmaṃ tu dhyānāsakta ivātmani |
vītarāgo munirbuddhaḥ parānanda iva sthitaḥ || 43 ||
[Analyze grammar]

bodhitaḥ kenacinnāsau svapratāpajitorjitaḥ |
bhayātkāmapyayaṃ bhūpaścintāṃ cintayatīti ha || 44 ||
[Analyze grammar]

babhūvuḥ kevalaṃ tatra nisspandasitacāmarāḥ |
cāmariṇyo hi śarvaryaḥ stambhitendukarā iva || 45 ||
[Analyze grammar]

virejurvismayāpūrṇā nisspandāste sabhāsadaḥ |
nisspandakiñjalkadalāḥ padmāḥ paṅkakṛtā iva || 46 ||
[Analyze grammar]

praśaśāma sabhāsthāne janakolāhalaśśanaiḥ |
praśāntaprāvṛṣo vyomnaḥ sāmbhodamiva garjitam || 47 ||
[Analyze grammar]

sandehasāgaronmagnā jagmuścintāṃ sumantriṇaḥ |
viṣīdati gadāpāṇāvasurājāvivāmarāḥ || 48 ||
[Analyze grammar]

vitatavismayajihmatayā tayā janatayā bhavamohaniṣaṇṇayā |
stimitacakṣuṣi bhūmipatau sthite mukulitābjavanasya dhṛtā dyutiḥ || 49 ||
[Analyze grammar]