Chapter 97

manassañjñāvicāro nāma sargaḥ |
saptanavatitamaḥ sargaḥ |
rāmaḥ |
brahmanmanasa evedamata āḍambaraṃ smṛtam |
yatastadeva karmeti vākyārthādupalabhyate || 1 ||
[Analyze grammar]

dṛḍhabhāvoparaktena manasaivorarīkṛtam |
marucaṇḍātapeneva bhāsurāvaraṇaṃ vapuḥ || 2 ||
[Analyze grammar]

brahmanmanye jagatyasminmana evākṛtiṃ gatam |
kvacinnaratayā rūḍhaṃ kvacitsuratayoditam || 3 ||
[Analyze grammar]

kvaciddaityatayollāsi kvacid yakṣatayotthitam |
kvacidgandharvatāṃ prāptaṃ kvacitkinnararūpi ca || 4 ||
[Analyze grammar]

nānāvananagābhogapurapattanarūpayā |
manye vitatayākṛtyā mana eva vijṛmbhate || 5 ||
[Analyze grammar]

evaṃ sthite śarīraughastṛṇakāṣṭhalavopamaḥ |
tadvicāraṇayā ko'rtho vicāryaṃ mana eva naḥ || 6 ||
[Analyze grammar]

tenedaṃ sarvamābhogi jagadatyākulaṃ tatam |
manye tadvyatirekeṇa paramātmaiva śiṣyate || 7 ||
[Analyze grammar]

ātmā sarvapadātītaḥ sarvagaḥ sarvasaṃśrayaḥ |
tatprasādena saṃsāre mano dhāvati valgati || 8 ||
[Analyze grammar]

ato manye manaḥ karma taccharīreṣu kāraṇam |
jāyate mriyate taddhi nātmanīdṛgvidho guṇaḥ || 9 ||
[Analyze grammar]

mana evaṃ vicāreṇa manye vilayameṣyati |
manovilayamātreṇa tataśśreyo bhaviṣyati || 10 ||
[Analyze grammar]

manonāmni parikṣīṇe karmaṇyahitasambhrame |
mukta ityucyate jantuḥ punarnāma na jāyate || 11 ||
[Analyze grammar]

bhagavānbhavatā proktā jātayastrividhā nṛṇām |
prathamaṃ kāraṇaṃ tāsāṃ manaḥ sadasadātmakam || 12 ||
[Analyze grammar]

tatkathaṃ śuddhacinnāmnastattvācchuddhivivarjitam |
utthitaṃ sphāratāṃ yātaṃ jagaccitrakaraṃ manaḥ || 13 ||
[Analyze grammar]

vasiṣṭhaḥ |
ākāśā hi trayo nāma vidyante vitatāntarāḥ |
cittākāśaścidākāśo bhūtākāśastṛtīyakaḥ || 14 ||
[Analyze grammar]

ete hi sarvasāmānyāḥ sarvatraiva vyavasthitāḥ |
śuddhacittattvaśaktyā tu labdhasattaikatāṃ gatāḥ || 15 ||
[Analyze grammar]

sabāhyābhyantarastho yo vettā sattāvabodhakaḥ |
vyāpī samastabhūtānāṃ cidākāśaḥ sa ucyate || 16 ||
[Analyze grammar]

sarvabhūtahitaḥ sraṣṭā yaḥ kalākalanātmakaḥ |
yenedamātataṃ sarvaṃ cittākāśaḥ sa ucyate || 17 ||
[Analyze grammar]

daśadiṅmaṇḍalābhogairavyucchinnavapurhi yaḥ |
bhūtātmā so'yamākāśaḥ pavanābdādisaṃśrayaḥ || 18 ||
[Analyze grammar]

ākāśacittākāśau dvau cidākāśavaśodbhavau |
citkāraṇaṃ hi sarvasya kāryaughasya dinaṃ yathā || 19 ||
[Analyze grammar]

jaḍo'smi na jaḍo'smīti niścayo malinaścitaḥ |
yastadeva mano viddhi tenākāśādi bhāvyate || 20 ||
[Analyze grammar]

aprabuddhātmaviṣayamākāśatrayakalpanā |
kalpyate hyupadeśārthaṃ prabuddhaviṣayaṃ na tu || 21 ||
[Analyze grammar]

ekameva paraṃ brahma sarvaṃ sarvāvapūrakam |
prabuddhaṃ vimalaṃ nityaṃ kalākalanavarjitam || 22 ||
[Analyze grammar]

dvaitādvaitasamudbhedairvākyasandarbhagarbhitaiḥ |
upadiśyata evājño na prabuddhaḥ kathañcana || 23 ||
[Analyze grammar]

yāvad rāmāprabuddhatvamākāśatrayakalpanā |
tāvadevāvabodhārthaṃ mayā ta upadiśyate || 24 ||
[Analyze grammar]

ākāśacittākāśādyāścidākāśātkalaṅkitāt |
prasūtā dāvadahanād yathā marumarīcayaḥ || 25 ||
[Analyze grammar]

cito hi malinaṃ rūpaṃ cittatāṃ samupāgatam |
trijagantīndrajālāni racayatyākulātmakam || 26 ||
[Analyze grammar]

cittatvamasya malinasya cidātmakasya tattvasya dṛśyata idaṃ nanu bodhahīnaiḥ |
śuktau yathā rajatatā na tu bodhavadbhirmaurkhyeṇa bandha iha bodhabalena mokṣaḥ || 27 ||
[Analyze grammar]