Chapter 96

karmapuruṣayoraikyapratipādanaṃ nāma sargaḥ |
ṣaṇṇavatitamaḥ sargaḥ |
vasiṣṭhaḥ |
mano hi bhāvanāmātraṃ bhāvanā spandarūpiṇī |
kriyā tadbhāvitaṃ rūpaṃ phalaṃ sarvo'nudhāvati || 1 ||
[Analyze grammar]

rāmaḥ |
vistareṇa mama brahmañjaḍasyāpyajaḍākṛteḥ |
rūpamārūḍhasaṅkalpaṃ manaso vaktumarhasi || 2 ||
[Analyze grammar]

vasiṣṭhaḥ |
anantasyātmatattvasya sarvaśaktermahātmanaḥ |
saṅkalpaśaktisahitaṃ yad rūpaṃ tanmano viduḥ || 3 ||
[Analyze grammar]

jaḍājaḍadṛśormadhye dolāyitavapuḥ sthitam |
yattattvaṃ dviparāmṛṣṭaṃ tad rūpaṃ manaso viduḥ || 4 ||
[Analyze grammar]

nāhaṃ cidavabhāsātmā kṛpaṇo'smīti niścayaḥ |
yaḥ sadākrāntakalanastad rūpaṃ manaso viduḥ || 5 ||
[Analyze grammar]

bhāvaḥ sadasatormadhye nṝṇāṃ sphurati niścalaḥ |
kalanonmukhatāṃ yātastad rūpaṃ manaso viduḥ || 6 ||
[Analyze grammar]

kalanātmikayā karmaśaktyā virahitaṃ manaḥ |
na sambhavati loke'smin guṇahīno guṇī yathā || 7 ||
[Analyze grammar]

yathānalauṣṇyayoḥ sattā na sambhavati bhinnayoḥ |
tathaiva karmamanasostathātmamanasorapi || 8 ||
[Analyze grammar]

svenaiva cittarūpeṇa karmaṇā phaladharmaṇā |
saṅkalpaikaśarīreṇa nānāvistaraśālinā || 9 ||
[Analyze grammar]

yā yena vāsanā yatra latevāropitā yathā |
sā tena phalabhūstatra tadeva prāpyate tathā || 10 ||
[Analyze grammar]

karmabījaṃ manaḥ spandaḥ kathyate'thānubhūyate |
kriyāstu vividhāstasya śākhāścitraphalāstaroḥ || 11 ||
[Analyze grammar]

mano yadanusandhatte tatkarmendriyavṛttayaḥ |
sarvāḥ sampādayantyetāstasmātkarma manaḥ smṛtam || 12 ||
[Analyze grammar]

mano buddhirahaṅkāraścetaḥ karmātha kalpanā |
saṃsṛtirvāsanāvidyā prayatnaḥ smṛtireva ca || 13 ||
[Analyze grammar]

indriyaṃ prakṛtirmāyā kriyā cetītarā api |
citrāśśabdaśriyo bahvyaḥ saṃsārabhramahetavaḥ || 14 ||
[Analyze grammar]

kākatālīyayogena tyaktasphāracamatkṛteḥ |
citeścetyānupātinyaḥ kṛtāḥ paryāyavṛttayaḥ || 15 ||
[Analyze grammar]

rāmaḥ |
parāyāḥ saṃvido brahmannetāḥ paryāyavṛttayaḥ |
kalpyamānavicitrārthāḥ kathaṃ rūḍhimupāgatāḥ || 16 ||
[Analyze grammar]

vasiṣṭhaḥ |
gateva sakalaṅkatvaṃ yadā citkalanātmakam |
unmeṣarūpiṇī jātā tadaiva hi manassthitiḥ || 17 ||
[Analyze grammar]

bhāvānāmanusandhānaṃ yadā niścitya saṃsthitā |
tadaiṣā procyate buddhirniyatā grahaṇakṣamā || 18 ||
[Analyze grammar]

yadā mithyābhimānena sattāṃ kalayati svayam |
ahaṅkārābhidhā tena procyate bhavabandhanī || 19 ||
[Analyze grammar]

idaṃ tyaktvedamāyāti bālavatpelavā yadā |
vicāraṃ samparityajya tadā sā cittamucyate || 20 ||
[Analyze grammar]

yadā spandaikadharmatvātkarmapaiśunyaśaṃsinī |
ādhāvati spandaphalaṃ tadā karmetyudāhṛtā || 21 ||
[Analyze grammar]

kākatālīyayogena tyaktvaikadravyaniścayam |
yadehitaṃ kalpayati bhāvaṃ teneha kalpanā || 22 ||
[Analyze grammar]

pūrvaṃ dṛṣṭamadṛṣṭaṃ vā prāg sṛṣṭamiti niścayam |
yadaiṣehāṃ vidhatte'ntastadā smṛtirudāhṛtā || 23 ||
[Analyze grammar]

yadā padārthaśaktīnāṃ sambhuktānāmivāntare |
vasatyastamitānyehaṃ vāsaneti tadocyate || 24 ||
[Analyze grammar]

astyātmatattvaṃ vimalaṃ dvitīyā dṛṣṭiraṅkitā |
'jātā hyavidyamānaiva tadāvidyeti kathyate || 25 ||
[Analyze grammar]

sphuratyātmavināśāya vismārayati tatpadam |
mithyāvikalpajālena tanmalaṃ parikalpyate || 26 ||
[Analyze grammar]

śrutvā sṛṣṭvā ca dṛṣṭvā ca bhuktvā ghrātvā vimṛśya ca |
indramāmodayatyeṣā tenendriyamiti smṛtā || 27 ||
[Analyze grammar]

sarvasya dṛśyajālasya paramātmanyalakṣite |
prakṛtatvena bhāvānāṃ loke prakṛtirucyate || 28 ||
[Analyze grammar]

sadasattāṃ nayatyāśu sattāṃ vāsattvamañjasā |
sadvāsadvā vikalpaughaṃ tena māyeti kathyate || 29 ||
[Analyze grammar]

darśanaśravaṇasparśarasanaghrāṇakarmabhiḥ |
kriyeti kathyate loke kāryakāraṇatāṃ gatā || 30 ||
[Analyze grammar]

citaścetyānupātinyā gatāyāḥ sakalaṅkatām |
prasphuradrūpadharmiṇyā etāḥ paryāyavṛttayaḥ || 31 ||
[Analyze grammar]

cittatāmupayātāyā gatāyāḥ prākṛtaṃ padam |
svaireva saṅkalpaśatairbhṛśaṃ rūḍhimupāgatāḥ || 32 ||
[Analyze grammar]

cetanīyakalaṅkāṅkā jāḍyajālānupātinī |
saṅkhyāvibhāgakalitā svavikalpākulaiva cit || 33 ||
[Analyze grammar]

jīva ityucyate loke mana ityapi kathyate |
cittamityucyate caiva buddhirityucyate tathā || 34 ||
[Analyze grammar]

nānāsaṅkalpakalilaṃ paryāyanicayaṃ budhāḥ |
vadantyasyāḥ kalaṅkinyāścyutāyāḥ paramārthataḥ || 35 ||
[Analyze grammar]

rāmaḥ |
manaḥ kiṃ syājjaḍaṃ brahmannatha vāpi ca cetanam |
ityeko mama tattvajña niścayo'ntarna jāyate || 36 ||
[Analyze grammar]

vasiṣṭhaḥ |
mano hi na jaḍaṃ rāma nāpi cetanatāṃ gatam |
mlānā jaḍājaḍā dṛṣṭirmana ityeva kathyate || 37 ||
[Analyze grammar]

madhye sadasato rūpaṃ pratibhātaṃ yadābilam |
jagataḥ kāraṇaṃ rāma tadetaccittamucyate || 38 ||
[Analyze grammar]

śāśvatenaikarūpeṇa niścayena vinā sthitiḥ |
yeha sā cittamityuktā tasmājjātamidaṃ jagat || 39 ||
[Analyze grammar]

jaḍājaḍadṛśormadhye dolārūḍhaṃ svakalpanam |
yaccito mlānarūpiṇyastadetanmana ucyate || 40 ||
[Analyze grammar]

cinniṣyando hi malinaḥ kalaṅkavikalāntaraḥ |
mana ityucyate rāma na jaḍaṃ na ca cinmayam || 41 ||
[Analyze grammar]

tasyemāni vicitrāṇi nāmāni kalitānyalam |
ahaṅkāramanobuddhijīvādyānītarāṇyapi || 42 ||
[Analyze grammar]

yathā gacchati śailūṣo rūpāṇyatvaṃ tathaiva hi |
mano nāmānyatāmeti rāma karmāntaraṃ vrajan || 43 ||
[Analyze grammar]

citrādhikāravaśato vicitrādhikṛtābhidhām |
yathā yāti naraḥ karmavaśād yāti tathā manaḥ || 44 ||
[Analyze grammar]

yā etāḥ kathitāḥ sañjñā mayā rāghava cetasaḥ |
etā evānyathā proktā vādibhiḥ kalpanāśataiḥ || 45 ||
[Analyze grammar]

svabhāvābhimatāṃ yuktimāropya manasā kṛtāḥ |
manobuddhīndriyādīnāṃ vicitrā nāmagītayaḥ || 46 ||
[Analyze grammar]

mano hi jaḍamanyasya bhinnamanyasya jīvataḥ |
tathāhaṅkṛtiranyasya buddhiranyasya vādinaḥ || 47 ||
[Analyze grammar]

ahaṅkāramanobuddhidṛṣṭayaḥ sṛṣṭakalpanāḥ |
ekarūpatayā proktā yā mayā raghunandana || 48 ||
[Analyze grammar]

naiyāyikairitarathā tādṛśāḥ parikalpitāḥ |
anyathā kalpitāḥ sāṅkhyaiścārvākairapi cānyathā || 49 ||
[Analyze grammar]

jaiminīyairārhataiśca bauddhairvaiśeṣikaistathā |
anyairapi vicitrehaiḥ pāñcarātrādibhistathā || 50 ||
[Analyze grammar]

sarvaireva hi gantavyaṃ tatpadaṃ pāramātmikam |
vicitradeśakālotthaiḥ puramekamivādhvagaiḥ || 51 ||
[Analyze grammar]

ajñānātparamārthasya viparītāvabodhataḥ |
kevalaṃ vivadante te vikalpairārurukṣavaḥ || 52 ||
[Analyze grammar]

svaṃ mārgamabhiśaṃsanti vādinaścitrayā dṛśā |
vicitradeśakālotthā mārgaṃ svaṃ pathikā iva || 53 ||
[Analyze grammar]

tairmithyā rāghava proktāḥ karmamānasacetasām |
svavikalpārpitairarthaiḥ svāḥ svā vaicitryayuktayaḥ || 54 ||
[Analyze grammar]

yathaikaḥ puruṣaḥ snānadānādānāśanakriyāḥ |
kurvāṇaḥ kartṛvaicitryameti tadvadidaṃ manaḥ || 55 ||
[Analyze grammar]

vicitrakāryavaśato nāmabhedena kartṛtā |
manasaḥ procyate jīvavāsanākarmanāmabhiḥ || 56 ||
[Analyze grammar]

cittamevedamakhilaṃ sarveṇaivānubhūyate |
acitto hi naro loke paśyannapi na paśyati || 57 ||
[Analyze grammar]

śrutvā spṛṣṭvā ca dṛṣṭvā ca ghrātvā bhuktvā śubhāśubham |
antarharṣaṃ viṣādaṃ ca samanasko hi vindate || 58 ||
[Analyze grammar]

āloka iva rūpāṇāmarthānāṃ kāraṇaṃ manaḥ |
badhyate baddhacitto hi muktacitto hi mucyate || 59 ||
[Analyze grammar]

taṃ jaḍānāṃ varaṃ viddhi jaḍaṃ yenocyate manaḥ |
taṃ cāvagacchata jaḍaṃ mano yasya hi cetanam || 60 ||
[Analyze grammar]

na cetanaṃ na ca jaḍaṃ yadidaṃ protthitaṃ manaḥ |
vicitrasukhaduḥkhehaṃ jagadabhyutthitaṃ tataḥ || 61 ||
[Analyze grammar]

ekarūpe hi manasi saṃsāraḥ pravilīyate |
ābilaṃ kāraṇaṃ bhrānterbhrāntyā jagadupasthitam || 62 ||
[Analyze grammar]

ajaḍaṃ hi mano nāma saṃsārasya na kāraṇam |
jaḍaṃ copaladharmāpi saṃsārasya na kāraṇam || 63 ||
[Analyze grammar]

manaḥ kāraṇamarthānāṃ rūpāṇāmiva bhāsanam |
cittādṛte'nyad yadasti tadacittasya kiṃ jagat || 64 ||
[Analyze grammar]

na cetanaṃ na ca jaḍaṃ tasmājjagati rāghava |
sarvasya bhūtajātasya samagraṃ pravilīyate || 65 ||
[Analyze grammar]

nānākarmadaśāveśānmano nānābhidheyatām |
ekaṃ vicitratāmetya yāti kālo yathārtubhiḥ || 66 ||
[Analyze grammar]

yadi nāmāmanaskānāmahaṅkārendriyakriyāḥ |
kṣobhayanti śarīraṃ tatsantu jīvādayaḥ pare || 67 ||
[Analyze grammar]

darśaneṣu tu ye proktā bhedā manasi tarkataḥ |
kvacitkvacidvādakarairapavādakaraiḥ kila || 68 ||
[Analyze grammar]

te rāma na virudhyante viśiṣyante na ca kvacit |
sarvā hi śaktayo deve vidyante sarvage yataḥ || 69 ||
[Analyze grammar]

yadaivaṃ khalu śuddhāyā manāgapi hi saṃvidaḥ |
jaḍeva śaktiruditā tadā vaicitryamāgatam || 70 ||
[Analyze grammar]

ūrṇanābhād yathā tanturjāyate cetanājjaḍaḥ |
nityaṃ prabuddhātparamādbrahmaṇaḥ prakṛtistathā || 71 ||
[Analyze grammar]

avidyāvaśataścitrā bhāvanāḥ sthitimāgatāḥ |
cittaparyāyaśabdārthā bhinnāsteneha vādinām || 72 ||
[Analyze grammar]

jīvo manaśca nanu buddhirahaṅkṛtiścetyevaṃ prathāmupagateyamanirmalā cit |
saivocyate jagati cetanacittajīvasañjñāgaṇena kila nāsti vivāda eṣaḥ || 73 ||
[Analyze grammar]