Chapter 86

brahmādityasamāgamo nāma sargaḥ |
ṣaḍaśītitamaḥ sargaḥ |
bhānuḥ |
kalpanāmni mahādeva hyastane divase tava |
tale kailāsaśailasya jambudvīpaikakoṇake || 1 ||
[Analyze grammar]

suvarṇajaṭanāmnā yattvatputrairjanitaprajaiḥ |
maṇḍalaṃ kalpitaṃ śrīmadanalpasukhasundaram || 2 ||
[Analyze grammar]

tatrābhūdatidharmātmā brāhmaṇo brahmavittamaḥ |
indurnāmātiśāntātmā kaśyapasya kulodbhavaḥ || 3 ||
[Analyze grammar]

tasmiṃstadā nivasato nityaṃ svajanamaṇḍale |
na babhūvātmajastasya marubhūmestṛṇaṃ yathā || 4 ||
[Analyze grammar]

na vyarājata sā bhāryā tasya niṣphalapuṣpitā |
ṛjvī gaurī suśuddhāpi śūnyā śaralatā yathā || 5 ||
[Analyze grammar]

tau tato dampatī khinnau putrārthaṃ tapase gireḥ |
kailāsasyāṃsamārūḍhau rūḍhāviva vanadrumau || 6 ||
[Analyze grammar]

bhūtairanāvṛte śūnye tasmin kailāsakuñjake |
tepāte tau tapo ghoraṃ jalāhārau tarusthitau || 7 ||
[Analyze grammar]

ekaṃ pānīyaculakaṃ pītvā divasaparyaye |
nispandamutthitau vārkṣīṃ vṛttimāśritya saṃsthitau || 8 ||
[Analyze grammar]

tasthatustau tadā tatra tāvadvanataruvratau |
yāvattretā dvāparaśca yuge dve eva te gate || 9 ||
[Analyze grammar]

tatastuṣṭo'bhavaddevastayośśaśikalādharaḥ |
dinatāpottāpitayorinduḥ kumudayoriva || 10 ||
[Analyze grammar]

ājagāma tamuddeśaṃ yatra tau vipradampatī |
salatāpādapaṃ deśaṃ puṣpākara iveśvaraḥ || 11 ||
[Analyze grammar]

dampatī tau vṛṣārūḍhaṃ somaṃ somārdhaśekharam |
phullānanaṃ dadṛśatuḥ kumude śaśinaṃ yathā || 12 ||
[Analyze grammar]

tau taṃ praṇematurdevaṃ tuṣārāmalamīśvaram |
dyāvāpṛthivyāv uditaṃ paripūrṇamivoḍupam || 13 ||
[Analyze grammar]

tarjayanpavanādhūtanavaveṇuvanasvanam |
mṛdūddāmaṃ smitasyandi provācātha vacaśśivaḥ || 14 ||
[Analyze grammar]

īśvaraḥ |
varaṃ vipra gṛhāṇāśu tuṣṭo'smi tava vāñchitam |
madhumāsarasākrāntavṛkṣavanmudito bhava || 15 ||
[Analyze grammar]

vipraḥ |
bhagavandevadeveśa daśa putrā mahādhiyaḥ |
bhavyā bhavantu me bhūyaśśoko yena na bādhate || 16 ||
[Analyze grammar]

bhānuḥ |
athaivamastviti procya jagāmāntardhimīśvaraḥ |
vyomni vārinidhau hrādaṃ kṛtvevormirmahāvapuḥ || 17 ||
[Analyze grammar]

tatastau dampatī tuṣṭau śivātprāpya varaṃ gṛham |
gatau gīrvāṇasadṛśau khamivomāmaheśvarau || 18 ||
[Analyze grammar]

tatra sā brāhmaṇī gehe babhūvodāragarbhiṇī |
babhau pūrṇodarī śyāmā meghalekheva vāriṇā || 19 ||
[Analyze grammar]

kālena suṣuve putrānpratipaccandrakomalān |
daśa bālānmadhau mugdhā vasudheva navāṅkurān || 20 ||
[Analyze grammar]

te kṛtabrahmasaṃskārā vṛddhimīyurmahaujasaḥ |
svalpenaiva hi kālena prāvṛṣīva navāmbudāḥ || 21 ||
[Analyze grammar]

te saptavarṣavayaso babhūvurjñātavāṅmayāḥ |
virejustejasā tatra nabhasīvāmalā grahāḥ || 22 ||
[Analyze grammar]

atha kalena mahatā teṣāṃ tau pitarau tadā |
sañjagmatustanuṃ tyaktvā svāṃ gatiṃ gatikovidau || 23 ||
[Analyze grammar]

mātāpitṛbhyāṃ rahitā daśa te brāhmaṇāstataḥ |
yayuḥ kailāsaśikharaṃ gṛhaṃ santyajya dūrataḥ || 24 ||
[Analyze grammar]

tatra sañcintayāmāsurudvignāste vibāndhavāḥ |
kiṃ syātparamiha śreya ūcuścedaṃ parasparam || 25 ||
[Analyze grammar]

kimiha syātsamucitaṃ bhrātaraḥ kimaduḥkhadam |
kiṃ mahattvaṃ mahaiśvaryaṃ kiṃ mahāvibhavaṃ śubham || 26 ||
[Analyze grammar]

kiyadetadanaiśvaryaṃ sāmantā hi cireśvarāḥ |
sāmantasampatkiṃ nāma rājāno hi maheśvarāḥ || 27 ||
[Analyze grammar]

kiṃ nāma sampadbhūpānāṃ samrāḍiha maheśvaraḥ |
kiṃ nāma sampatsāmrājyamindro hīha maheśvaraḥ || 28 ||
[Analyze grammar]

kiṃ nāma vastvathendratvaṃ yanmuhūrtaṃ prajāpateḥ |
vinaśyati na yatkalpe kiṃ syāttadiha śobhanam || 29 ||
[Analyze grammar]

vadamāneṣvathaiteṣu jyeṣṭho bhrātā mahāmatiḥ |
gambhīravāguvācedaṃ mṛgayūthānmṛgo yathā || 30 ||
[Analyze grammar]

aiśvaryāṇāṃ hi sarveṣāmakalpāntavināśi yat |
rocate bhrātarastanme brahmatvamiha netarat || 31 ||
[Analyze grammar]

etattaduktamakhilā dvijaputrāstadottamāḥ |
vacobhiraindavāstatra sādhu sādhvityapūjayan || 32 ||
[Analyze grammar]

ūcuścedaṃ kathaṃ tāta sarvaduḥkhāpamarjanam |
padmāsanaṃ jagatpūjyaṃ viriñcatvamavāpnumaḥ || 33 ||
[Analyze grammar]

bhrātrā tena punaḥ proktā bhrātaro bhūritejasaḥ |
maduktaṃ sarva evaite bhavantaḥ pālayantvalam || 34 ||
[Analyze grammar]

padmāsanagato bhāsvānbrahmāhamiti cetasā |
sṛjāmi saṃharāmīti dhyānamastu cirāya vaḥ || 35 ||
[Analyze grammar]

agrajeneti kathite bāḍhaṃ kṛtvā ta uttamāḥ |
dhyānādhīnadhiyastasthuḥ sahaiva jyāyasā rasāt || 36 ||
[Analyze grammar]

lipikarmakṛtākārā dhyānāsaktā daśaiva te |
antassthenaiva manasā cintayāmāsurādṛtāḥ || 37 ||
[Analyze grammar]

ayamutphullakamalakośacakronnatāsanaḥ |
brahmāhaṃ jagataḥ sraṣṭā kartā bhoktā maheśvaraḥ || 38 ||
[Analyze grammar]

yajñakriyākramayutāḥ sāṅgopāṅgamaharddhayaḥ |
sarasvatyā sagāyatryā yuktā vedavarā ime || 39 ||
[Analyze grammar]

lokapālapurākrāntasañcaratsiddhamaṇḍalaḥ |
ayamuddāmasaubhāgyaḥ svargaḥ suravibhūṣitaḥ || 40 ||
[Analyze grammar]

parvatadvīpajaladhikānanaiḥ samalaṅkṛtam |
idaṃ bhūmaṇḍalaṃ nīlaṃ trilokīkarṇakuṇḍalam || 41 ||
[Analyze grammar]

etatpātālakuharaṃ daityadānavabhoginām |
amṛtastrīgaṇākīrṇaṃ gṛhaṃ gahanakoṭaram || 42 ||
[Analyze grammar]

ayamindro mahābāhurvajrālaṅkṛtadordrumaḥ |
trailokyanagarīmekaḥ pāti pāvanayajñabhuk || 43 ||
[Analyze grammar]

dīptijālavaratrābhiravaṣṭabhyeva diggaṇam |
krameṇa pratapantyete bhānavo bhūribhānavaḥ || 44 ||
[Analyze grammar]

lokapālā ime lokaṃ rakṣantyakṣubdhavṛttayaḥ |
maryādābhiratucchābhirgopālā gogaṇaṃ yathā || 45 ||
[Analyze grammar]

unmajjanti nimajjanti prasphuranti patanti ca |
taraṅgā iva toyānāmimāḥ pratidiśaṃ prajāḥ || 46 ||
[Analyze grammar]

sṛjāmīmamahaṃ sargaṃ saṃharāmi tathādṛtaḥ |
ayamātmani tiṣṭhāmi śāmyāmi bhuvaneśvaraḥ || 47 ||
[Analyze grammar]

ayaṃ saṃvatsaro yāta idaṃ pariṇataṃ yugam |
sṛṣṭiriyamasau kālastvayaṃ saṃharaṇasya ca || 48 ||
[Analyze grammar]

ayamadya gataḥ kalpo brāhmī rātririyaṃ tataḥ |
ayamātmani tiṣṭhāmi pūrṇātmā parameśvaraḥ || 49 ||
[Analyze grammar]

iti bhāvitayā buddhyā te dvijā aindavā daśa |
abahirvṛttayastasthuḥ samutkīrṇā ivopalāt || 50 ||
[Analyze grammar]

adhigatakamalāsanakramāste parigalitetaratucchavṛttijālāḥ |
satatagajavajarjarāsanasthāściramiti padmajakalpane virejuḥ || 51 ||
[Analyze grammar]