Chapter 78

rākṣasīvicāro nāma sargaḥ |
aṣṭasaptatitamaḥ sargaḥ |
vasiṣṭhaḥ |
atha sā rākṣasī rakṣaḥkulakānanamañjarī |
tamasyevābhralekheva gambhīraṃ ninanāda sā || 1 ||
[Analyze grammar]

nādānte samuvācedaṃ prīṅkāraparuṣaṃ vacaḥ |
garjitānantaraṃ jātakarakāśaniśabdavat || 2 ||
[Analyze grammar]

bho bho ghorāṭavīvyomapadavīśaśibhāskarau |
mahāmāyātamaḥpīṭhaśilākoṭarakīṭakau || 3 ||
[Analyze grammar]

kau bhavantau mahābuddhī durbuddhī vā samāgatau |
madgrāsapathamāpannau kṣaṇānmaraṇakovidau || 4 ||
[Analyze grammar]

rājā |
bho bho bhūtaka kiṃ syāstvaṃ kva tiṣṭhasi ca dehakam |
darśayāsyāstava giraḥ ko bibhetyalinīdhvaneḥ || 5 ||
[Analyze grammar]

siṃhavatsarvavegena patantyarthaṃ kilārthinaḥ |
samamākāraśabdābhyāṃ bhāvayāsmānbibheṣi kim |
na kiñciddīrghasūtrāṇāṃ sidhyatyātmakṣayādṛte || 6 ||
[Analyze grammar]

vasiṣṭhaḥ |
rājñetyukte ramyamuktamiti sañcintya sā tayoḥ |
prakāśāyāpyadhairyāya nanāda ca jahāsa ca || 7 ||
[Analyze grammar]

tato dadṛśatustau tāṃ śabdapūritadiggaṇām |
svāṭṭahāsaprabhāpiṇḍapūraprakaṭitākṛtim || 8 ||
[Analyze grammar]

kalpābhrāṃśanikāśena ghṛṣṭāmadritaṭīmiva |
svanetravidyudvalayāvalanājvalitāmbarām || 9 ||
[Analyze grammar]

timiraikārṇavaurvāgnijvālāvivalanāmiva |
garjadghanaghaṭāṭopapīvarāsitakandharām || 10 ||
[Analyze grammar]

raṇadvadanasaṃrambhahāhāhataniśācarām |
rodasīkajjalastambhalīlayollāsitāṃ puraḥ || 11 ||
[Analyze grammar]

ūrdhvakeśīṃ sirālāṅgīṃ kapilākṣīṃ tamomayīm |
yakṣarakṣaḥpiśācānāmapyanalpabhayapradām || 12 ||
[Analyze grammar]

darīrandhralasatsvāsyāṃ vātajhāṅkārabhīṣaṇām |
musulolūkhalālātāṃ halaśūrpakaśekharām || 13 ||
[Analyze grammar]

sphurantīmiva kalpānte vaiḍūryaśikharisthalīm |
hāsaghaṭṭitaviśveśāṃ kālarātrīmivoditām || 14 ||
[Analyze grammar]

ghanavyomāṭavīṃ sābhrāṃ kṛtadehāmivāgatām |
śarīriṇīṃ mahābhrāḍhyāṃ yāminīmiva māṃsalām || 15 ||
[Analyze grammar]

śarīrasanniveśena paṅkapīṭhīmivotthitām |
tanuṃ candrārkayuddhāya tamaseva samāśritām || 16 ||
[Analyze grammar]

indranīlataṭaśvabhralambābhrayugalopamau |
ulūkhalādihālāḍhyau dadhānāmasitau stanau || 17 ||
[Analyze grammar]

nagnāmaṅgārakāśena samālabdhamahātanum |
drumābhāspadasamiralaladbhujalatātanum || 18 ||
[Analyze grammar]

tāmavekṣya mahāvīrau tathaivākṣubhitau sthitau |
na tadasti vimohāya yadviviktasya cetasaḥ || 19 ||
[Analyze grammar]

mantrī |
mahārākṣasi saṃrambho hāsātmā kimayaṃ tava |
laghavo hyatha vā nāryo lāghave'pyatisambhramāḥ || 20 ||
[Analyze grammar]

tyaja saṃrambhamārambho nāyaṃ tava virājate |
viṣaye hi pravartante dhīmantaḥ svārthasādhakāḥ || 21 ||
[Analyze grammar]

tvādṛśīnāṃ sahasrāṇi maṣikānāmivābale |
asmākaṃ vāsanāvātyāvyūḍhāni tṛṇaparṇavat || 22 ||
[Analyze grammar]

saṃrambhajvaramutsṛjya samayā svasthayā dhiyā |
yuktyā ca vyavahāriṇyā so'rthaḥ prājñena sādhyate || 23 ||
[Analyze grammar]

svenaiva vyavahāreṇa kāryaṃ sidhyatu māthavā |
mahāniyatinītyaiva bhramasyāvasaro hi kaḥ || 24 ||
[Analyze grammar]

kathayābhimataṃ kiṃ te kimarthayasi vārthinī |
arthī svapne'pi nāsmākamaprāptārthaḥ purogataḥ || 25 ||
[Analyze grammar]

vasiṣṭhaḥ |
ityuktā sā tadā tena cintayāmāsa rākṣasī |
aho nu vimalācāraṃ sattvaṃ puruṣasiṃhayoḥ || 26 ||
[Analyze grammar]

na sāmānyāvimau manye citraiveyaṃ camatkṛtiḥ |
vacovaktrekṣaṇānyeva vadantyantarviniścayam || 27 ||
[Analyze grammar]

vacovaktrekṣitadvārairdhīmatāmāśayā mithaḥ |
ekībhavanti saritāṃ payāṃsi valanairiva || 28 ||
[Analyze grammar]

ābhyāṃ prāyaḥ parijñāto mama bhāvo'nayormayā |
na vināśyau mayemau vā svayamevāvināśinau || 29 ||
[Analyze grammar]

manye bhavata ātmajñau nātmajñānādṛte matiḥ |
pramṛṣṭasadasadbhāvā bhavatyastabhayā mṛteḥ || 30 ||
[Analyze grammar]

tadetau paripṛcchāmi kañcitsandehamutthitam |
prāpyaṃ prāpya na pṛcchanti ye kiñcitte narādhamāḥ || 31 ||
[Analyze grammar]

iti sañcintya pṛcchāyai tannānāvasaraṃ tatam |
akālakalpābhraravaṃ hāsaṃ saṃyamya sābravīt || 32 ||
[Analyze grammar]

kau bhavantau narau vīrau kathyatāmiti me'naghau |
jāyate darśanādeva maitrī viṣadacetasām || 33 ||
[Analyze grammar]

mantrī |
ayaṃ rājā kirātānāmasyāhaṃ mantritāṃ gataḥ |
udyatau rātricāreṇa tvādṛgjanavinigrahe || 34 ||
[Analyze grammar]

rājño rātrindinaṃ dharmo duṣṭabhūtavinigrahaḥ |
svadharmatyāgino ye tu te vināśānalendhanam || 35 ||
[Analyze grammar]

rākṣasī |
rājñastvamasi durmantrī durmantritvādarāḍayam |
sadbhūpasya bhavenmantrī rājā sanmantriṇā bhavet || 36 ||
[Analyze grammar]

rājaivādau vivekena yojanīyaḥ sumantriṇā |
tenāryatāmupāyāti yathā rājā tathā prajāḥ || 37 ||
[Analyze grammar]

samagraguṇajālānāmadhyātmajñānamuttamam |
tadvad rājā bhaved rājā tadvanmantrī ca mantravit || 38 ||
[Analyze grammar]

prabhutvaṃ samadṛṣṭitvaṃ tacca syād rājavidyayā |
tāmeva yo na jānāti nāsau mantrī na so'dhipaḥ || 39 ||
[Analyze grammar]

bhavantau tadvidau sādhū yadi tacchreya āpsyathaḥ |
no cedanarthadau svasyāḥ prakṛternādmyahaṃ yuvām || 40 ||
[Analyze grammar]

ekopāyena matpārśvādbālakāv uttariṣyathaḥ |
matpraśnapañjaraṃ sāraṃ cedvicārayatho dhiyā || 41 ||
[Analyze grammar]

praśnāni māṃ kathaya pārthiva nātha mantrinnatrārthinī bhṛśamahaṃ paripūrayārtham |
aṅgīkṛtārthamadadatka ivāsti loke doṣeṇa saṅkṣayakareṇa na yujyate yaḥ || 42 ||
[Analyze grammar]