Chapter 60

līlopākhyāne nirvāṇaṃ nāma sargaḥ |
ṣaṣṭitamaḥ sargaḥ |
vasiṣṭhaḥ |
etatte kathitaṃ rāma dṛśyadoṣanivṛttaye |
līlopākhyānamanagha ghanatāṃ jagatastyaja || 1 ||
[Analyze grammar]

śāntaiva dṛśyasattāsyāśśamanaṃ nopayujyate |
sato hi mārjanaṃ kleśo nāsatastu kadācana || 2 ||
[Analyze grammar]

jñānenākāśarūpeṇa dṛśyaṃ jñeyaṃ kharūpakam |
ityekībhūtamālokya jñastiṣṭhatyambaropamaḥ || 3 ||
[Analyze grammar]

pṛthvyādirahitenedaṃ cidbhāsaiva svayambhuvā |
sādhitaṃ yadasiddhena tanna dvyātma na sādhitam || 4 ||
[Analyze grammar]

saṃvid yathā yā yatate sā tathā bāhyalekhikā |
visṛtā sṛṣṭicinnadyāṃ yāvad yatnānna bodhitā || 5 ||
[Analyze grammar]

cidākāśāvabhāso'yaṃ jagadityeva budhyate |
cidvyomnaivātmani svacche paramāṇukaṇaṃ prati || 6 ||
[Analyze grammar]

evamasyā mudhābhrānteḥ kā sattā keva vāsanā |
kāsthā kā niyatiḥ kehā kāvaśyambhāvitocyatām || 7 ||
[Analyze grammar]

sarvaṃ caitad yathādṛṣṭaṃ sthitamitthamakhaṇḍitam |
māyaivaivamananteyaṃ na ca māyāsti kācana || 8 ||
[Analyze grammar]

rāmaḥ |
aho nu paramā dṛṣṭirdarśitā bhagavaṃstvayā |
dāvārcirdṛśyakakṣyāṇāṃ dāhaśāntau kalaindavī || 9 ||
[Analyze grammar]

aho nu sucireṇaitajjñātaṃ jñātavyamakṣatam |
mayā yathedaṃ yaccedaṃ yādṛkcedaṃ yato yadā || 10 ||
[Analyze grammar]

śāmyāmīva dvijaśreṣṭha nirvāmīvāvikalpanaḥ |
etadāścaryamākhyānaṃ vyākhyānaṃ śāstradṛṣṭiṣu || 11 ||
[Analyze grammar]

idaṃ me bhagavanbrūhi saṃśayaṃ sarvakovida |
tava pātuṃ na tṛpto'smi śrotrapātrairvaco'mṛtam || 12 ||
[Analyze grammar]

sa sargatritaye kālo līlābharturhi yogataḥ |
sa kvacitkimahorātraḥ kvacitkiṃ māsamātrakaḥ || 13 ||
[Analyze grammar]

kvacitkiṃ bahuvarṣāṇi kasyacitkiṃ supelavaḥ |
kasyacitkiṃ mahādīrghaḥ kasyacitkiṃ kṣaṇasthitaḥ || 14 ||
[Analyze grammar]

iti me bhagavanbrūhi tvaṃ yathāvadanugrahāt |
sakṛcchrutaṃ na viśrāntimeti loṣṭe yathā jalam || 15 ||
[Analyze grammar]

vasiṣṭhaḥ |
yena yena yadā yad yad yathā saṃvedyate'nagha |
tena tena tadā tattattathā samanubhūyate || 16 ||
[Analyze grammar]

amṛtatvaṃ viṣaṃ yāti sadaivāmṛtavedanāt |
śatrurmitratvamāyāti mitrasaṃvittivedanāt || 17 ||
[Analyze grammar]

yathābhāvitameteṣāṃ padārthānāṃ nijaṃ vapuḥ |
tadeva hi cirābhyāsānniyatervaśamāgatam || 18 ||
[Analyze grammar]

kacanaikātmikaiṣā cid yathā kacati yādṛśam |
tathā tatrāśu bhavati tatsvabhāvaikakāraṇāt || 19 ||
[Analyze grammar]

nimeṣe yadi kalpaughaṃ pravidanparivindate |
nimeṣa eva tatkalpībhavatyatra na saṃśayaḥ || 20 ||
[Analyze grammar]

kalpe yadi nimeṣatvaṃ vetti kalpo'pyasau tataḥ |
nimeṣībhavati kṣipraṃ tādṛgrūpātmikā hi cit || 21 ||
[Analyze grammar]

duḥkhitasya niśā kalpaḥ sukhinaḥ saiva ca kṣaṇaḥ |
kṣaṇaḥ svapne bhavetkalpaḥ kalpaśca bhavati kṣaṇaḥ || 22 ||
[Analyze grammar]

tathā ca mṛtvā jāto'haṃ taruṇo'hamavasthitaḥ |
yāto'smi yojanaśataṃ svapna ityanubhūyate || 23 ||
[Analyze grammar]

rātriṃ dvādaśavarṣāṇi hariścandro'nubhūtavān |
lavaṇo bhuktavānāyurekarātryāṃ samāśśatam || 24 ||
[Analyze grammar]

yo nimeṣaḥ prajeśasya sa manorjīvitaṃ muneḥ |
jīvitaṃ yadviriñcasya taddinaṃ kila cakriṇaḥ || 25 ||
[Analyze grammar]

dhyāne prakṣīṇacittasya na dināni na rātrayaḥ |
na padārthā na ca jagatsatyaṃ nātmāpi yoginaḥ || 26 ||
[Analyze grammar]

madhuraṃ kaṭutāmeti kaṭubhāvena cintitam |
kaṭvapyāyāti mādhuryaṃ madhuratvena cetitam || 27 ||
[Analyze grammar]

mitrabuddhyā dviṣanmitraṃ ripubuddhyā ripuḥ suhṛt |
bhavatīti mahābāho yathāsaṃvedanaṃ jagat || 28 ||
[Analyze grammar]

anabhyastāḥ padārthā ye śāstrapāṭhajapādayaḥ |
eṣāṃ saṃvedanābhyāsānnūnamabhyeti sātmatā || 29 ||
[Analyze grammar]

nauryāyināṃ bhramārtānāṃ vedanāttu vivartate |
avedanādbhramārtānāmapi naiṣā vivartate || 30 ||
[Analyze grammar]

śūnyamākīrṇatāmeti vedanātsvapnadṛkṣviva |
vedanātpītamānīlaṃ śuklaṃ vāpyanubhūyate || 31 ||
[Analyze grammar]

āpadvadutsavaḥ khedaṃ karoti parimohinaḥ |
kuḍye'pi kha ivācāro dṛṣṭo dhātuvikāriṇaḥ || 32 ||
[Analyze grammar]

asadyakṣo vimūḍhānāṃ prāṇānapyapakarṣati |
vedanātsvapnavanitā jāgratīva ratipradā || 33 ||
[Analyze grammar]

yad yathābhyāsamāyātaṃ tattathā sthiratāṃ gatam |
asadeva nabhasyeva nabha eva cidātmani || 34 ||
[Analyze grammar]

śatahastakhuracchāyānaṭavṛttamivātatam |
gagane mānasaṃ spandaṃ jagadviddhi na vastu tat || 35 ||
[Analyze grammar]

mithyājñānapiśācasya sandarśanamanākṛti |
kāyāmātrakamevedamarodhakamabhittimat || 36 ||
[Analyze grammar]

idaṃ bhāsvaramābhāsaṃ svapnasandarśanaṃ citaḥ |
apūrvameva suptāyā narasyevoditaṃ viduḥ || 37 ||
[Analyze grammar]

akhātāścetati stambho yādṛśaṃ sālabhañjikāḥ |
paramārthamahāstambhaḥ sṛṣṭīścetati tādṛśam || 38 ||
[Analyze grammar]

yādṛśo mānavaḥ pārśve svapne kṣubdho mahābhaṭaiḥ |
tādṛśo brahmaṇaḥ sargo buddha eva suṣuptavat || 39 ||
[Analyze grammar]

tṛṇagulmalatāyuktaśśiśirānte yathā rasaḥ |
vāsantaḥ saṃsthito bhūmau tathā sargaḥ pare pade || 40 ||
[Analyze grammar]

yathā dravatvaṃ kanake sthitamantaranunmiṣat |
tathā sthitaḥ pare sargaḥ khātmā valgannaṇāvaṇau || 41 ||
[Analyze grammar]

sanniveśo yathāṅgānāmaṅgino'nanyadātmanaḥ |
jagadevamanaṅgasya khātmanaḥ khātma brahmaṇaḥ || 42 ||
[Analyze grammar]

yādṛgekanarasvapnayuddhamanyanaraṃ prati |
tādṛśaṃ sadasadrūpaṃ khātmedaṃ vyomagaṃ jagat || 43 ||
[Analyze grammar]

mahākalpāntasargādau citsvabhāva idaṃ vapuḥ |
kāraṇatvaṃ mithaḥ paścādasadvetti na vāstavam || 44 ||
[Analyze grammar]

mukte'sminbrahmaṇi yadi brahmānyaḥ smṛtijo bhavet |
tatsmṛtirjñaptije sarge sthiteva jñaptimātrataḥ || 45 ||
[Analyze grammar]

rāmaḥ |
paurāṇāṃ mantrimukhyānāṃ vidūrathakulakramaḥ |
samameva kathaṃ tatra sarveṣāṃ pratibhāsitaḥ || 46 ||
[Analyze grammar]

vasiṣṭhaḥ |
citaḥ samanuvartante mukhyāyāḥ sarvasaṃvidaḥ |
yathā vipulavātyāyāḥ sāmānyā vātalekhikāḥ || 47 ||
[Analyze grammar]

parasparānubhāvena tathārūpeṇa saṃvidaḥ |
kacitāstāḥ prajāpālaprajāvāstavyamantriṇām || 48 ||
[Analyze grammar]

evaṃrūpātkulājjāto rājāsmākamayaṃ tvasau |
kacitā iti vāstavyavido vaidūrathe pure || 49 ||
[Analyze grammar]

kacane citsvabhāvasya na ca kāraṇamārgaṇam |
yuktaṃ mahāmaṇerbhāsāmivānyatsvasvabhāvataḥ || 50 ||
[Analyze grammar]

ahameva kulācāro rājāsyā bhuva ityapi |
vidūrathavido ratnāduditā pratibhāprabhā || 51 ||
[Analyze grammar]

yāvanto jantavo yasminye ye sarge yadā yadā |
te sarvagatvācciddhātoranyo'nyādarśatāṃ gatāḥ || 52 ||
[Analyze grammar]

tīvravegavatī yā syāttatra saṃvidakalpitā |
saivāyāti paraṃ sthairyaṃ sāmokṣatvaikarūpiṇī || 53 ||
[Analyze grammar]

balavadvidvilāsānāmanuvṛttyā parasparam |
svabhāvāḥ pratibimbanti cidādarśasvabhāvataḥ || 54 ||
[Analyze grammar]

tatrātiyatnā jayati sānyāḥ saṃvida ātmasāt |
kurvatī saridambhodhigāminīḥ sarito yathā || 55 ||
[Analyze grammar]

ye samāstvatra te tāvad yatante citsvabhāvataḥ |
yāvadeko jayettatra dvitīyaḥ sannimajjati || 56 ||
[Analyze grammar]

jāyamāneṣu naśyatsu vartamāneṣu bhūriśaḥ |
evaṃ sargasahasreṣu paramāṇukaṇaṃ prati || 57 ||
[Analyze grammar]

na kiñcitkenacidvyāptaṃ na ca kiñcitkvacitsthitam |
cidākāśamajaṃ śāntametatsarvamabhittimat || 58 ||
[Analyze grammar]

ayamābhāsate svapno nirnidro draṣṭṛvarjitaḥ |
avaśyambhāvabodhaśca so'nubhūto'pyasanmayaḥ || 59 ||
[Analyze grammar]

puṣpapattraphalāṃśātmā yathaikaḥ svāsthito drumaḥ |
anantasarvaśaktyātmā caika eva tathā vibhuḥ || 60 ||
[Analyze grammar]

mātṛmeyapramāṇādimayātmakamajaṃ padam |
buddhaṃ vismṛtimāyāti na kadācana kasyacit || 61 ||
[Analyze grammar]

śūnyodayāstamayavastu tamaḥprakāśadikkālarūpyapi sadekamanādiśuddham |
ādyantamadhyarahitaṃ sthitamacchamambusomyatvavīcivalanāḍhyamivaikameva || 62 ||
[Analyze grammar]

ahaṃ tvamityādi jagatsvarūpā viśuddhabodhaikavibhā vibhāti |
ākāśakośe nijaśūnyataiva dvaitaikyasaṅkalpavikalpanāḥ kva || 63 ||
[Analyze grammar]