Chapter 58

aṣṭapañcāśattamaḥ sargaḥ |
vasiṣṭhaḥ |
etasminnantare jñaptirjīvaṃ vaidūrathaṃ puraḥ |
saṅkalpena rurodhāśu manasaḥ spandanaṃ yathā || 1 ||
[Analyze grammar]

līlā |
vada devi kiyatkālo gato'yamiha mandire |
samādhau mayi līnāyāṃ mahīpālaśave sthite || 2 ||
[Analyze grammar]

jñaptiḥ |
iha māsastvatikrānta iha dāsyāvime ubhe |
rakṣārthaṃ vāsakagṛhe svapato vahite sthite || 3 ||
[Analyze grammar]

śṛṇu dehasya kiṃ vṛttaṃ taveha varavarṇini |
śarīraṃ kila pakṣeṇa cotklinnasnāyutāṃ gatam || 4 ||
[Analyze grammar]

nirjīvaṃ patitaṃ bhūmau saṃśuṣkamiva pallavam |
kāṣṭhakuḍyopasaṃjātaṃ śavaṃ tuhinaśītalam || 5 ||
[Analyze grammar]

tato mantribhirāgatya mṛtaiveyamiti svayam |
kledalokādvinirṇīya bhītyā niṣkālitaṃ gṛhāt || 6 ||
[Analyze grammar]

bahunātra kimuktena nītvā candanadārubhiḥ |
citau prakṣipya saghṛtaṃ sahasā bhasmasātkṛtam || 7 ||
[Analyze grammar]

tato rājñī mṛte'tyuccaiḥ kṛtvā rodanamākulaḥ |
parivārastavāśeṣaḥ kṛtavānaurdhvadehikam || 8 ||
[Analyze grammar]

idānīṃ tvāmihālokya saśarīrāmihāgatām |
paralokādāgateti mahaccitraṃ bhaviṣyati || 9 ||
[Analyze grammar]

tvaṃ tu tenaiva dehena satyasaṅkalpataḥ sute |
dṛśyase svavadātena tena cittaṃ tavopari || 10 ||
[Analyze grammar]

yadvāsanā tvamabhavo dehaṃ prati tadeva te |
rūpamabhyuditaṃ bāle tena prāksadṛśaṃ tava || 11 ||
[Analyze grammar]

svavāsanānusāreṇa sarvaḥ sarvaṃ hi paśyati |
dṛṣṭānto'trāvisaṃvādī bālavetāladarśanam || 12 ||
[Analyze grammar]

ātivāhakadehāsi sampannā siddhasundarī |
vismṛtastava deho'sau prāktano nayataḥ svayam || 13 ||
[Analyze grammar]

dṛḍhātivāhikadṛśaḥ praśāmyatyādhibhautikaḥ |
buddhasya dṛśyamāno'pi śaranmegha ivāmbare || 14 ||
[Analyze grammar]

rūḍhātivāhikībhāvaśśavo bhavati dehakaḥ |
nirjalāmbhodasadṛśo nirgandhakusumopamaḥ || 15 ||
[Analyze grammar]

adyārabhya prarūḍhāyāmātivāhikasaṃvidi |
deho vismṛtimāyāti garbhasaṃstheva yauvane || 16 ||
[Analyze grammar]

ekatriṃśe'dya divase prāptā vayamihāmbaram |
prabhāte mohite dāsyau mayaite nidrayādhunā || 17 ||
[Analyze grammar]

tadehi yāval līlāyai līle saṅkalpalīlayā |
ātmānaṃ darśayāvo'syai vyavahāraḥ pravartatām || 18 ||
[Analyze grammar]

āvāṃ tāvadime līlā paśyatvityeva cintite |
jñaptyā devyau tatastatra dṛśye dīpte babhūvatuḥ || 19 ||
[Analyze grammar]

sā vidūrathalīlātha samākulavilocanā |
gṛhamālokayāmāsa tattejaḥpuñjabhāsuram || 20 ||
[Analyze grammar]

candrabimbādivotkīrṇaṃ dhautaṃ hemadravairiva |
jvālāyā iva śītāyāḥ sumadhyamiva bhittimat || 21 ||
[Analyze grammar]

gṛhamālokya purato līlājñaptī vilokyate |
utthāya sambhramavatī tayoḥ pādeṣu sāpatat || 22 ||
[Analyze grammar]

majjayāyāgate devyau jayataṃ jīvitaprade |
iha pūrvamahaṃ prāptā bhavatyormārgaśodhinī || 23 ||
[Analyze grammar]

ityuktavatyāṃ tasyāṃ tā māninyo mattayauvanāḥ |
upāviśanviṣṭareṣu latā meruśirassviva || 24 ||
[Analyze grammar]

jñaptiḥ |
sute vada kathaṃ prāptā tvamimaṃ deśamāditaḥ |
kiṃ vṛttaṃ te tvayā dṛṣṭaṃ kimivādhvani kutra vā || 25 ||
[Analyze grammar]

vidūrathalīlā |
devi tasminpradeśe sā jātamūrchā tadābhavam |
dvitīyendukalevāhaṃ kalpāntajvālayāvṛtā || 26 ||
[Analyze grammar]

na cetitaṃ mayā kiñcitsamaṃ viṣamameva vā |
tatastaralapakṣmānte vinimīlya vilocane || 27 ||
[Analyze grammar]

tato maraṇamūrchānte paśyāmi parameśvari |
yāvadabhyutthitāsmyāśu plutā ca gaganodaram || 28 ||
[Analyze grammar]

bhūtākāśe'nilarathaṃ samārūḍhāsmyahaṃ tathā |
ānītā gandhalekheva tenāhamimamālayam || 29 ||
[Analyze grammar]

iha paśyāmi sadanaṃ nāyakenābhyalaṅkṛtam |
dīptadīpaṃ viviktaṃ ca mahārhaśayanānvitam || 30 ||
[Analyze grammar]

patimālokayāmīmaṃ yāvadeṣa vidūrathaḥ |
śete kusumaguptāṅgo madhuḥ puṣpavane yathā || 31 ||
[Analyze grammar]

atha saṅgrāmasaṃrambhaśramārto'yaṃ svapityalam |
iti nidrā mayāsyaivaṃ deveśvari na vāritā || 32 ||
[Analyze grammar]

anantaramimaṃ deśaṃ prāpte devyāvime tviti |
yathānubhūtaṃ kathitaṃ madanugrahakāriṇi || 33 ||
[Analyze grammar]

jñaptiḥ |
he haṃsahārigāminyau līle lalitalocane |
utthāpayāmo nṛpatiṃ śavatalpatalādimam || 34 ||
[Analyze grammar]

setyuktvā mumuce jīvamāmodamiva padminī |
sa samīralavākārastannāsānikaṭaṃ yayau || 35 ||
[Analyze grammar]

ghrāṇakośaṃ viveśāśu vaṃśarandhramivānilaḥ |
svavāsanāśatānyantardadhadabdhirmaṇīniva || 36 ||
[Analyze grammar]

antassthajīvaṃ vadanaṃ tasya tatkāntimāyayau |
padmasyāvagrahe padmaṃ praviṣṭamiva vāriṇi || 37 ||
[Analyze grammar]

kramādaṅgāni sarvāṇi sarasāni cakāśire |
tasya puṣpākara iva latājālāni būbhṛtaḥ || 38 ||
[Analyze grammar]

athābabhau kalāpūrṇaḥ sa rākāyāmivoḍurāṭ |
bhāsayanbhavanaṃ bhūri vadanendumarīcibhiḥ || 39 ||
[Analyze grammar]

sphārayāmāsa so'ṅgāni rasavanti mṛdūni ca |
kanakojjvalakāntīni pallavānīva mādhavaḥ || 40 ||
[Analyze grammar]

unmīlayamāsa dṛśau vimalālokakāraṇe |
hāriṇyau subhagābhoge candrārkau bhuvanaṃ yathā || 41 ||
[Analyze grammar]

uttasthau prollasatkāyo vindhyādririva vṛddhimān |
uvāca kaḥ sthita iha prabhākapiśitālayaḥ || 42 ||
[Analyze grammar]

līlādvayamathāsyāgre provācādiśyatāmiti |
sa dadarśa puro namraṃ līlādvayamavasthitam || 43 ||
[Analyze grammar]

samādhāraṃ samākāraṃ samarūpaṃ samasthiti |
samavākyaṃ samodyogaṃ samānandaṃ samodayam || 44 ||
[Analyze grammar]

kā tvaṃ keyaṃ kutaśceyamityāha sa vilokayan |
tasmai līlāha he deva śrūyatāṃ yadvadāmyaham || 45 ||
[Analyze grammar]

mahilā tava līlāhaṃ prāktanī saha vardhitā |
vāgarthasyeva saṃsaktā sthitā saṃśleṣaśālinī || 46 ||
[Analyze grammar]

iyaṃ līlā dvitīyā te mahilā helayā mayā |
upārjitā tvadarthena kathayiṣye'hamīdṛśam || 47 ||
[Analyze grammar]

śirobhāgopaviṣṭeyaṃ yeha hemamahāsanā |
eṣā sarasvatī devī trailokyajananī śivā || 48 ||
[Analyze grammar]

asmākaṃ puṇyasaṃbhārairiha sākṣādupāgatā |
anayāsi parāl lokādihānīto mahīpatiḥ || 49 ||
[Analyze grammar]

ityākarṇya samutthāya rājā rājīvalocanaḥ |
lambamālyāmbaradharaḥ papāta jñaptipādayoḥ || 50 ||
[Analyze grammar]

sarasvati namastubhyaṃ sarvalokahitaprade |
prayaccha varade medhāṃ dīrghamāyurdhanāni ca || 51 ||
[Analyze grammar]

ityuktavantaṃ hastena pasparśa jñaptidevatā |
tvaṃ putrābhimatārthāḍhyo bhaveti vacanānvitaḥ || 52 ||
[Analyze grammar]

sarasvatī |
sarvāpadaḥ sakaladuṣkṛtadṛṣṭayaśca gacchantu vaśśamamanantasukhāni samyak |
āyāntu nityamuditā janatā bhavantu rāṣṭre sthirāśca vilasantu sadaiva lakṣmyaḥ || 53 ||
[Analyze grammar]