Chapter 56

līlopākhyāne saṃsāramaraṇayor calanaṃ nāma sargaḥ |
ṣaṭpañcāśattamaḥ sargaḥ |
vasiṣṭhaḥ |
etasminnantare rājā parivṛttākṣitārakaḥ |
babhūvaikatanuprāṇaḥ sadyaśśuṣkasitādharaḥ || 1 ||
[Analyze grammar]

jīrṇaparṇasavarṇābhaḥ kṣīṇapāṇḍumukhacchaviḥ |
bhṛṅgakūjitasacchāyāśvāsakūṭāvikūṇitaḥ || 2 ||
[Analyze grammar]

mahāmaraṇamūrchāndhakūpe nipatitāśayaḥ |
antarnilīnaniśśeṣanetrādīndriyavṛttimān || 3 ||
[Analyze grammar]

citranyasta ivākāramātradṛśyo vicetanaḥ |
nisspandasarvāvayavaḥ samutkīrṇa ivopale || 4 ||
[Analyze grammar]

bahunātra kimuktena tāludeśena taṃ jahau |
prāṇaḥ pipatiṣuṃ vṛkṣaṃ supakṣīvāntarikṣagaḥ || 5 ||
[Analyze grammar]

taṃ te dadṛśaturbāle divyadṛṣṭī nabhogatam |
jīvaṃ prāṇamayaṃ saṃvidgandhaleśamivānile || 6 ||
[Analyze grammar]

sā jīvasaṃvidgaganavātenāvalitā satī |
khe dūraṃ gantumārebhe vāsanānuvidhāyinī || 7 ||
[Analyze grammar]

tāmevānusasārātha strīdvayaṃ jīvasaṃvidam |
bhramarīyugalaṃ vātalagnāṃ gandhakalāmiva || 8 ||
[Analyze grammar]

tato muhūrtamātreṇa śānte maraṇamūrchane |
sāmbare bubudhe saṃvidgandhalekheva vayunā || 9 ||
[Analyze grammar]

apaśyatpuruṣānyāmyānnīyamānaṃ ca tairvapuḥ |
bandhupiṇḍapradānena śarīraṃ jātamātmanaḥ || 10 ||
[Analyze grammar]

mārge karmaphalollāsavati dūratare sthitam |
vaivasvatapuraṃ gantuṃ pravṛttamanivāritam || 11 ||
[Analyze grammar]

prāptaṃ vaivasvatapuramādiṣṭaṃ ca tato yathā |
asya karmāṇyaśubhrāṇi naiva santi kadācana || 12 ||
[Analyze grammar]

nityamevāvadātānāṃ kartāyaṃ śubhakarmaṇām |
bhagavatyāḥ sarasvatyā vareṇāyaṃ vivardhitaḥ || 13 ||
[Analyze grammar]

prāktano'sya śavībhūto deho'sti kusumāmbaraḥ |
praviśatveṣa taṃ gatvā tyajyatāmityavekṣya saḥ || 14 ||
[Analyze grammar]

tatastyakto nabhomārgaṃ yantropala iva plutaḥ |
atha jīvakalā līlā jñaptiśceti trayaṃ nabhaḥ || 15 ||
[Analyze grammar]

pupluve jīvalekhā tvarūpiṇyete na paśyati |
tamevānusarantyau te samullaṅghya nabhastalam || 16 ||
[Analyze grammar]

lokāntarāṇyatītyātha vinirgatya jagadgṛhāt |
dvitīyaṃ jagadāsādya bhūmaṇḍalamupetya ca || 17 ||
[Analyze grammar]

kānte saṅkalparūpiṇyau saṅgate jīvalekhayā |
padmarājapuraṃ prāpya līlāntaḥpuramaṇḍapam || 18 ||
[Analyze grammar]

kṣaṇādviviśatuḥ svairaṃ vāyulekhe yathāmbudam |
sūryātapo yathāmbhojaṃ sugandhaḥ pavanaṃ yathā || 19 ||
[Analyze grammar]

rāmaḥ |
brahmanprāptaḥ kathamasau śavasya nikaṭaṃ gṛham |
kathaṃ tena parijñāto mārgo mṛtaśarīriṇā || 20 ||
[Analyze grammar]

vasiṣṭhaḥ |
tasya svavāsanāntassthamavaśyaṃ kila rāghava |
tatsarvaṃ hṛdgataṃ tasmānmāsau prāpnotu tatkatham || 21 ||
[Analyze grammar]

bhrāntimātramasaṅkhyeyaṃ jagajjīvakaṇodare |
bīje vaṭatarumiva sthitaṃ ko vai na paśyati || 22 ||
[Analyze grammar]

svabhāvabhūtaṃ cidaṇustrailokyanicayaṃ tathā |
naro yathaikadeśastho dūradeśāntarasthitam || 23 ||
[Analyze grammar]

saṃpaśyati nidhānaṃ svaṃ manasānārataṃ sadā |
yathā jīvadvapurjīvamakuraṃ hṛdi paśyati || 24 ||
[Analyze grammar]

tathā svavāsanāntassthamabhīṣṭhaṃ paripaśyati |
jīvo jātiśatāḍhyo'pi bhrame parigato'pi vā || 25 ||
[Analyze grammar]

rāmaḥ |
bhagavanpiṇḍadānādivāsanārahitākṛtiḥ |
kīdṛksaṃpadyate dehaḥ piṇḍo yasmai na dīyate || 26 ||
[Analyze grammar]

vasiṣṭhaḥ |
piṇḍo'tha dīyatāṃ mātre piṇḍo datto mameti cet |
vāsanā hṛdi saṃrūḍhā tatpiṇḍaphalabhāṅ naraḥ || 27 ||
[Analyze grammar]

yaccittastanmayo janturbhavatītyanubhūtayaḥ |
sadeheṣu videheṣu na bhavantyanyathā kvacit || 28 ||
[Analyze grammar]

sapiṇḍo'smīti saṃvittyā niṣpiṇḍo'pi hi piṇḍavān |
niṣpiṇḍo'smīti saṃvittyā sapiṇḍo'pi na piṇḍavān || 29 ||
[Analyze grammar]

yathābhāvanameteṣāṃ padārthānāṃ hi satyatā |
bhāvanā ca padārthebhyaḥ kāraṇebhya udeti hi || 30 ||
[Analyze grammar]

yathā vāsanayā jantorviṣamapyamṛtāyate |
asatyaḥ satyatāmeti padārtho bhāvanāttathā || 31 ||
[Analyze grammar]

kāraṇena vinodeti na kadācana kasyacit |
kāryatā kācidapi bho iti niścayavānbhava || 32 ||
[Analyze grammar]

kāraṇena vinā kāryamā mahāpralayaṃ kvacit |
na dṛṣṭaṃ na śrutaṃ kiñcitsvayaṃ svaikatayā ṛte || 33 ||
[Analyze grammar]

videva vāsanā saiva dhatte svapna ivārthatām |
kāryakāraṇatāmeti saivamanyeva tiṣṭhati || 34 ||
[Analyze grammar]

rāmaḥ |
dharmo nāsti mametyeva yaḥ preto vāsanānvitaḥ |
tasya cetsuhṛdā bhūridharmā kṛtvā samarpitaḥ || 35 ||
[Analyze grammar]

tatra cātra sa kiṃ dharmo naṣṭaḥ syāduta bhāvanam |
satyārthādvāpyasatyārthādbhāvanātkiṃ balādhikam || 36 ||
[Analyze grammar]

vasiṣṭhaḥ |
deśakālakriyādravyasampadbhyaśceti bhāvanā |
yatraivābhyuditā sāmyātsa dvayoradhiko jayī || 37 ||
[Analyze grammar]

dharmadātuḥ pravṛddhā cedvāsanā tattayā kṣaṇāt |
āpūryate pretamatirno cetpretadhiyāśu sā || 38 ||
[Analyze grammar]

evaṃ parasparajayo jayatyatrātivīryavān |
tasmācchubhena yatnena śubhābhyāsamupāharet || 39 ||
[Analyze grammar]

rāmaḥ |
deśakālādhikā brahmanvāsanā samudeti cet |
tanmahākalpasargādau deśakālodayaḥ kutaḥ || 40 ||
[Analyze grammar]

kāraṇaiḥ samudetīdaṃ kaistadā sahakāribhiḥ |
sahakārikāraṇānāmabhāve vāsanā kutaḥ || 41 ||
[Analyze grammar]

vasiṣṭhaḥ |
evametanmahābhāga satyātmani kadācana |
mahāpralayasargādau deśakālādi kiñcana || 42 ||
[Analyze grammar]

sahakārikāraṇānāmabhāve sati dṛśyadhīḥ |
neyamasti na cotpannā na ca sphurati kācana || 43 ||
[Analyze grammar]

dṛśyasyāsambhavāddhetoḥ kiñcid yaddṛśyate tvidam |
tadbrahmaiva kacadrūpaṃ sthitamitthamanāmayam || 44 ||
[Analyze grammar]

etaccāgre yuktiśataiḥ kathayiṣyāma eva te |
etadarthaṃ prayatno'yaṃ vartamānakathāṃ śṛṇu || 45 ||
[Analyze grammar]

tatte dadṛśatuḥ prāpte mandiraṃ sundarodaram |
kīrṇaṃ puṣpopakāreṇa vasantamiva śītalam || 46 ||
[Analyze grammar]

prabhātācārasārambharājadhānyāṃ samaṃ sthitam |
mandārakundasragdāmavṛndāmbaravalacchavam || 47 ||
[Analyze grammar]

śavaśayyāśirassthāgryapūrṇakumbhādimaṅgalam |
anivṛttagṛhadvāragavākṣakaṭhinārgalam || 48 ||
[Analyze grammar]

praśāmyaddīpikālokaśyāmalāmalabhittikam |
gṛhaikadeśasaṃsuptamukhaśvāsasasītkṛtam || 49 ||
[Analyze grammar]

sampūrṇacandraśakalodarakāntikāntasaundaryanirjitapurandaramandirarddhi |
vairiñcapadmamukulāntaracāruśobhā niśśabdamabdamiva nirmalamindukāntam || 50 ||
[Analyze grammar]