Chapter 48

līlopākhyāne vidūrathasindhusamāgamo nāma sargaḥ |
aṣṭacatvāriṃśattamaḥ sargaḥ |
vasiṣṭhaḥ |
prāpya rājā puraḥ prāptaṃ sindhumuddhurakandharam |
madhyāhnatapanābhena kopena vitato'bhavat || 1 ||
[Analyze grammar]

dhanurāsphālayāmāsa parirāvitadiṅmukham |
kalpāntapavanāsphoṭa ivāmaragirestaṭam || 2 ||
[Analyze grammar]

visasarjorjito rājā prātararkaḥ karāniva |
tūṇīrarajanībaddhāśśilīmukhaparamparāḥ || 3 ||
[Analyze grammar]

eka eva viniryāti guṇāttasya śaro mahān |
sahasraṃ patati vyomni gacchanpatati lakṣaśaḥ || 4 ||
[Analyze grammar]

sindhorapi tathaivāsīcchaktirlāghavameva ca |
raverānanasāmyaṃ vai viṣṇordhānuṣkatā tayoḥ || 5 ||
[Analyze grammar]

musulā nāma te bāṇā musulākṛtayo'mbaram |
chādayāmāsurunnādāḥ kalpāntagirayo yathā || 6 ||
[Analyze grammar]

rejuḥ kanakanārācarājayo vyomni tasya tāḥ |
śaravyāḥ kalpavātārtāḥ patantya iva tārakāḥ || 7 ||
[Analyze grammar]

vidūrathāccharāsārā ajasramabhiniryayuḥ |
abdheriva payaḥpūrāḥ sūryādiva marīcayaḥ || 8 ||
[Analyze grammar]

pracaṇḍapavanoddhūtapuṣpāṇīva mahātaroḥ |
ayaḥpiṇḍādivottaptatāḍitāḥ kaṇapaṅktayaḥ || 9 ||
[Analyze grammar]

dhārāḥ payomuca iva śīkarā iva nirjharāt |
tatpurāgnimahādāhātsphuliṅgā iva bhāsvarāḥ || 10 ||
[Analyze grammar]

tayoścaṭacaṭāsphoṭaṃ śṛṇvan kodaṇḍayordvayoḥ |
baladvayamabhūtprekṣāmūkaṃ śānta ivāmbudhiḥ || 11 ||
[Analyze grammar]

vahanti sma śarāpūrā gaṅgāpūra ivāmbare |
sindhorabhimukhaṃ yakṣaghargharāravaraṃhasaḥ || 12 ||
[Analyze grammar]

kacatkanakanārācaśaravarṣāṇyanāratam |
vahacchavaśavāśabdaṃ niryayurdhanurambudāt || 13 ||
[Analyze grammar]

bāṇamandākinīpūraṃ vrajantaṃ sindhupūraṇe |
vātāyanāttamālokya līlā tatpuravāsinī || 14 ||
[Analyze grammar]

tena bāṇasamūhena jayamāśaṅkya bhartari |
uvāca vākyamānandavikasanmukhapaṅkajā || 15 ||
[Analyze grammar]

jaya devi jayatyeṣa nātho'smākaṃ vilokaya |
kilānena śaraughena merurapyeti cūrṇatām || 16 ||
[Analyze grammar]

tasyāmevaṃ vadantyāṃ tu ghanasneharavākulam |
prekṣaṇavyagrayordevyorhasantyormānuṣaṃ hṛdā || 17 ||
[Analyze grammar]

taccharārṇavamāmattamapibatsindhuvāḍavaḥ |
śaroṣmaṇāpyagamyena jahnurmandākinīmiva || 18 ||
[Analyze grammar]

bāṇavarṣeṇa sakalaṃ sāyakaughaṃ ghanaṃ ghanam |
bhittvā tato'pyadhaḥkṛtvā cikṣepa gaganārṇave || 19 ||
[Analyze grammar]

yathā dīpasya śāntasya na parijñāyate gatiḥ |
tasya sāyakasaṅghasya na vijñātā tathā gatiḥ || 20 ||
[Analyze grammar]

taṃ chittvā sāyakāsāraṃ svaśarāmbudharaṃ ghanam |
vyomni prasārayāmāsa saracchavaśavānvitam || 21 ||
[Analyze grammar]

vidūrathastamapyāśu vyadhamatsāyakottamaiḥ |
sāmānyajaladaṃ mattakalpāntapavano yathā || 22 ||
[Analyze grammar]

kṛtapratikṛtairevaṃ bāṇavarṣairmahīpatī |
vyarthīkṛtairanayatāṃ prahāramavirāmiṇau || 23 ||
[Analyze grammar]

athādade mohanāstraṃ sindhurgandharvasauhṛdāt |
prāptaṃ tena yayurlokā vinā mohaṃ vidūratham || 24 ||
[Analyze grammar]

nyastaśastrāmbarā mūkā viṣaṇṇavadanekṣaṇāḥ |
mṛtā ivābhavanyodhāścitranyastā ivāthavā || 25 ||
[Analyze grammar]

yāvadvidūratharatho mohenāyāti mandatām |
tāvadvidūratho rājā prabodhāstramupādadhe || 26 ||
[Analyze grammar]

tataḥ prabodhamāpannā prajā prātarivābjinī |
vidūrathe'bhavatsindhuḥ kruddhotka iva rākṣase || 27 ||
[Analyze grammar]

nāgāstramādadhe bhīmaṃ pāśabandhanakhedadam |
tenābhavannabho vyāptaṃ bhogibhiḥ parvatopamaiḥ || 28 ||
[Analyze grammar]

sarpairvivalitā bhūmirmṛṇālaiḥ sarasī yathā |
sampannā girayaḥ sarve kṛṣṇapannagakambalāḥ || 29 ||
[Analyze grammar]

padārthāḥ sarva eveme pihitā ahivigrahaiḥ |
saparvatavanābhogā yayau vivaśatāṃ mahī || 30 ||
[Analyze grammar]

dhūtāṅgārakaṇākīrṇā viṣavegasya śaṃsinī |
vavuruṣṇoṣṇanīhārā vātajvalanareṇavaḥ || 31 ||
[Analyze grammar]

vidūratho'tha sauparṇamādadhe'straṃ mahāstravit |
udagurgaruḍāstena sauvarṇā iva parvatāḥ || 32 ||
[Analyze grammar]

kāñcanīkṛtasarvāśāḥ sarvāśaparipūrakāḥ |
pakṣaparvatasaṃrambhajanitapralayānilāḥ || 33 ||
[Analyze grammar]

ghoṇāvivalanākṛṣṭaśvasadbhujagamaṇḍalāḥ |
mahāgharagharārāvapūritāmbhodaṣaṇḍakāḥ || 34 ||
[Analyze grammar]

bhūpūrakaṃ tu sarpaughaṃ sa suparṇaghano'pibat |
kṛṣṭaṃ śalaśalāyantamagastya iva vāridhim || 35 ||
[Analyze grammar]

sarpakambalanirmuktaṃ bhūmaṇḍalamarājata |
viśālamiva nīrandhramiva nirvāri rāśi vā || 36 ||
[Analyze grammar]

tatastadgaruḍānīkaṃ kvāpyagacchadadṛśyatām |
dīpaugha iva vātena śaradīvābhramaṇḍalam || 37 ||
[Analyze grammar]

vajrabhītyeva pakṣāḍhyaṃ parvataprakaraṃ punaḥ |
svapnadṛṣṭaṃ jagadiva saṅkalpapurapūravat || 38 ||
[Analyze grammar]

tatastamo'stramasṛjatsindhurandhāndhakāradam |
tenāndhakāro vavṛdhe kṛṣṇābhrajaṭharopamaḥ || 39 ||
[Analyze grammar]

rodorandhre pravisṛta ekārṇava ivābhavat |
matsyā ivābhavañchailāstārāśca maṇayo'bhavan || 40 ||
[Analyze grammar]

andhakāraḥ pravavṛdhe maṣīpaṅkārṇavopamaḥ |
kajjalācalasambhāro dhutaḥ kalpāntarairapi || 41 ||
[Analyze grammar]

andhakūpe nipatitā ivāsan sakalāḥ prajāḥ |
kalpānta iva saṃśemurvyavahārā diśāṃ prati || 42 ||
[Analyze grammar]

vidūratho'tha mārtāṇḍamastraṃ brahmāṇḍamaṇḍape |
dadāvastravidāṃ śreṣṭhaḥ puṣṭamantraviceṣṭitaḥ || 43 ||
[Analyze grammar]

athoditastamo'mbhodhimarkāgastyo gabhastibhiḥ |
apibatkṛṣṇamambhodaṃ śaratkāla ivāmalaḥ || 44 ||
[Analyze grammar]

andhakārāmbaronmuktā virejuramalā diśaḥ |
bhūpateḥ purataḥ kāntā iva ramyapayodharāḥ || 45 ||
[Analyze grammar]

yayuḥ prakaṭatāmantarakhilā vanarājayaḥ |
lobhakajjalajālena muktā iva satāṃ dhiyaḥ || 46 ||
[Analyze grammar]

atha kopākulaḥ sindhū rākṣasāstraṃ mahābhayam |
kṣaṇādudīrayāmāsa mantroditaśarātmakam || 47 ||
[Analyze grammar]

udagurbhīṣaṇā digbhyaḥ saruṣo vanarākṣasāḥ |
pātālagajahūṅkārakṣubdhā iva mahārṇavāḥ || 48 ||
[Analyze grammar]

kapilordhvajaṭādhūmrāḥ sphuṭaccaṭacaṭāravāḥ |
agnayo lelihānograjihvā ardrendhanā iva || 49 ||
[Analyze grammar]

sāvartavṛttayo vyomni bhīmaḍakkāraṭāṅkṛtāḥ |
agnidāhamahādhūmavipulā iva solmukāḥ || 50 ||
[Analyze grammar]

daṃṣṭrābisāṅkurākrāntamukhapaṅkajadehakāḥ |
utthitā lomaniryātaduṣprajvālajaṭā iva || 51 ||
[Analyze grammar]

nigirantaḥ pradhāvanto garjantastarjitāśayāḥ |
jaṭojjvālitaḍitpuñjajaladāḥ sajalā iva || 52 ||
[Analyze grammar]

etasminnantare tasmiṃl līlānātho vidūrathaḥ |
nārāyaṇāstraṃ pradadau duṣṭabhūtanivāraṇam || 53 ||
[Analyze grammar]

udīryamāṇa evāsminnastrarāje tu rājayaḥ |
rākṣasānāṃ praśemustā andhakārā ivodaye || 54 ||
[Analyze grammar]

pramṛṣṭarākṣasānīkamabhavadbhuvanatrayam |
śaradīva gatāmbhodaṃ vyoma nirmalamābabhau || 55 ||
[Analyze grammar]

atha sindhurmumocāstramāgneyaṃ jvalitāmbaram |
jajvaluḥ kakubhastena kalpāgnivalitā iva || 56 ||
[Analyze grammar]

dhūmāmbudabharacchannā babhūvuḥ sakalā diśaḥ |
gaganaprotthapātālatimirākulitā iva || 57 ||
[Analyze grammar]

babhuḥ prajvālitākārā girayaḥ kāñcanā iva |
praphullanavanīrandhracaṇpakaughavanā iva || 58 ||
[Analyze grammar]

yayurvyomādridikkuñjā jvālājālajaṭālatām |
kuṅkumenotsave mṛtyoḥ samālabdhā ivāsṛjā || 59 ||
[Analyze grammar]

jvalitā janatāntaikaśaṅkināsannabhasspṛśā |
sahasrākṛtinorveṇavalitā iva sāgarāḥ || 60 ||
[Analyze grammar]

jitvā ripuṃ punarasau yathā praharate tathā |
vāruṇaṃ visasarjāstraṃ pūjayitvā vidūrathaḥ || 61 ||
[Analyze grammar]

āyayuḥ salilāpūrāstamaḥpūrā ivābhitaḥ |
adhastādūrdhvato digbhyo dravarūpā ivādrayaḥ || 62 ||
[Analyze grammar]

bhāgā iva śaradvyomno drutapātā ivāmbudāḥ |
mahārṇavā ivordhvasthāḥ kulaśailaśilā iva || 63 ||
[Analyze grammar]

tamālaughā ivoḍḍīnāḥ sañcitā iva rātrayaḥ |
kajjalaughā ivoddhūtā lokāloka ivottaṭaḥ || 64 ||
[Analyze grammar]

rasātalaguhābhogā iva vyomadidṛkṣavaḥ |
mahāghuraghurārāvaraṃhobṛṃhitamūrtayaḥ || 65 ||
[Analyze grammar]

tāpāgnisantatilatāṃ sā cacāmāmbusaṃhatiḥ |
bhuvanavyāpinī sandhyāmāśu kṛṣṇeva yāminī || 66 ||
[Analyze grammar]

tāmagnisantatiṃ pītvā pūrayāmāsa bhūtalam |
jalaśrīḥ santataṃ dehaṃ nirdravavyaktimīyuṣī || 67 ||
[Analyze grammar]

evaṃvidhānastramohānviruddhāneva netare |
mitho māyāmayānagre paśyantyanubhavanti ca || 68 ||
[Analyze grammar]

hetibhāravahāḥ sindhoścakrarakṣāstato'mbhasā |
tṛṇānīva gatāḥ prohya rathaścāsyābhavatplutaḥ || 69 ||
[Analyze grammar]

etasminnantare sindhurastraṃ sasmāra śoṣaṇam |
āpattrāṇakaraṃ devaṃ dadau ca śararūpiṇam || 70 ||
[Analyze grammar]

śaśāmāmbumayī māyā tena yāmeva bhāsvatā |
ye mṛtāste mṛtā eva babhūvuśśoṣitā bhuvaḥ || 71 ||
[Analyze grammar]

atha mūrkharuṣā tulyatāpaḥ santāpayanprajāḥ |
jajṛmbhe jarjarājīrṇavanavistārakarkaśaḥ || 72 ||
[Analyze grammar]

kacatkanakaniṣṣyandasundarāṅgacchavirdiśām |
āsīd rājavarastrīṇāmivāṅgopāṅgasaṅginī || 73 ||
[Analyze grammar]

tena gharmamayīṃ mūrchāmājagmustadvirodhinaḥ |
grīṣmadāvānalottaptā mṛdavaḥ pallavā iva || 74 ||
[Analyze grammar]

vidūratho raṇaddīrghatārakreṅkāramānasam |
kodaṇḍaṃ kuṇḍalīkṛtya parjanyāstramathādadhe || 75 ||
[Analyze grammar]

udaguḥ paṅktayo'bdānāṃ yāminya iva sañcitāḥ |
tamālavipinoḍḍīnasaṃrambhārambhamantharāḥ || 76 ||
[Analyze grammar]

vāsanāvāripūreṇa garjanoddāmasañcarāḥ |
mihikāmantharāśeṣakakubmaṇḍalakuṇḍalāḥ || 77 ||
[Analyze grammar]

vavurāvalitāsārā meghāḍambarabhedinaḥ |
kīrṇaśīkaranīhārahārodārāḥ samīraṇāḥ || 78 ||
[Analyze grammar]

prasphurustrastasauvarṇasarpāpasaraṇopamāḥ |
vidyuto divi daityastrīkaṭākṣavalanā iva || 79 ||
[Analyze grammar]

jughūrṇurgarjanocchūnapratiśrudghanakandarāḥ |
diśaścalitamātaṅgasiṃharkṣavanaghargharāḥ || 80 ||
[Analyze grammar]

mahāmusuladhārābhiḥ peturāsāravṛṣṭayaḥ |
kaṣṭaṭāṅkārakaṭhināḥ kṛtāntasyeva dṛṣṭayaḥ || 81 ||
[Analyze grammar]

udabhūtprathamaṃ bāṣpa uṣṇoṣṇo'drinibho bhuvaḥ |
pātālādabhravṛndānāṃ yuddhāyevābhravibhramāḥ || 82 ||
[Analyze grammar]

tato nimeṣamātreṇa praśemurmṛgatṛṣṇikāḥ |
parabodharasāpūrairyathā saṃsāravāsanāḥ || 83 ||
[Analyze grammar]

āsītpaṅkāṅkamakhilaṃ bhūmaṇḍalamasañcaram |
pūritaḥ pūrṇadhārābhiḥ sindhuḥ sindhumivāmbunā || 84 ||
[Analyze grammar]

vāyavyamastramasṛjadghūrṇitākāśakoṭaram |
kalpāntanṛttasaṃpannaraṇadbhairavabhīṣaṇam || 85 ||
[Analyze grammar]

vavuraśaninipātapiṇḍitāṅgā dalitaśilāśakalāḥ kakummukheṣu |
pralayasamayasūcakā bhaṭānāṃ kṛtakaṭuṭāṅkṛtaṭaṅkinaḥ samīrāḥ || 86 ||
[Analyze grammar]