Chapter 43

līlopākhyāne svapnapuruṣasatyatvanirūpaṇaṃ nāma sargaḥ |
tricatvāriṃśattamaḥ sargaḥ |
sarasvatī |
asmin raṇavare rājanmṛtavyaṃ bhavatādhunā |
prāptavyaṃ prāktanaṃ rājyametatpratyakṣameva me || 1 ||
[Analyze grammar]

kumāryā mantriṇā caiva tvayā ca prāktanaṃ puram |
āgantavyaṃ śavībhūtaṃ prāptavyaṃ taccharīrakam || 2 ||
[Analyze grammar]

āvāṃ yāvo yathāyātaṃ vātarūpeṇa ca tvayā |
āgantavyaśca taddeśaḥ kumāryā mantriṇāpi ca || 3 ||
[Analyze grammar]

anyaiva gatiraśvasya gatiranyā kharoṣṭrayoḥ |
madaklinnakapolasya gatiranyaiva dantinaḥ || 4 ||
[Analyze grammar]

prastuteti kathā yāvanmitho madhurabhāṣiṇoḥ |
tāvadpraviśya sambhrānta uvācordhvaṃ sthito naraḥ || 5 ||
[Analyze grammar]

deva sāyakacakrāsigadāparighavṛṣṭimat |
mahatparabalaṃ prāptamekārṇava ivoddhataḥ || 6 ||
[Analyze grammar]

kalpakālāniloddhūtakulācalaśilopamaḥ |
gadāśaktibhusuṇḍīnāṃ vṛṣṭīnmuñcati vṛṣṭivat || 7 ||
[Analyze grammar]

nagare nagasaṅkāśe lagno'gnirvyāptadiktaṭaḥ |
dahaṃścaṭacaṭāsphoṭaiḥ pātayatyuttamāḥ purīḥ || 8 ||
[Analyze grammar]

kalpāmbudaghaṭātulyā vyomni dhūmamahādrayaḥ |
balātproḍḍayanaṃ kartuṃ pravṛttā garuḍā iva || 9 ||
[Analyze grammar]

vasiṣṭhaḥ |
sasambhramaṃ vadantyevaṃ puruṣe paruṣārave |
udabhūtpūrayannāśā bahiḥ kolāhalo mahān || 10 ||
[Analyze grammar]

balādākṛṣṭakarṇānāṃ dhanuṣāṃ śaravarṣiṇām |
bṛhatāṃ mattamattānāṃ kuñjarāṇāṃ tarasvinām || 11 ||
[Analyze grammar]

pure caṭacaṭāsphoṭairvellatāṃ jātavedasām |
paurāṇāṃ dagdhadārāṇāṃ mahāhalahalāravaiḥ || 12 ||
[Analyze grammar]

taratāmagnikhaṇḍānāṃ ṣvakkārakaṭhināravam |
jvalantīnāṃ parispandāddhvagadhvagiti cārciṣām || 13 ||
[Analyze grammar]

atha vātāyanāddevyau mantrī rājā vidūrathaḥ |
dadṛśuḥ pronnamannādaṃ mahāniśi mahāpuram || 14 ||
[Analyze grammar]

pralayānilasaṅkṣubdhapūrṇaikārṇavaraṃhasā |
pūrṇaṃ parabalenograhetimeghataraṅgiṇā || 15 ||
[Analyze grammar]

kalpāntavahnivigalandehabhūdharabhāsuraiḥ |
dahyamānaṃ mahājvālājālairambarapūrakaiḥ || 16 ||
[Analyze grammar]

muṣṭigrāhyamahāmeghagarjasantarjanorjitaiḥ |
ghoraṃ kalakalārāvairmāṃsalairmantrijalpitaiḥ || 17 ||
[Analyze grammar]

puṣkarāvartasaṅkāśadhūmābhrapihitāmbaram |
proḍḍīnahemābhranibhajvālāpuñjairnirantaram || 18 ||
[Analyze grammar]

taradulmukakhaṇḍoghatārātaralitāmbaram |
anyo'nyadehasadmaughaprajvalajjvālanākulam || 19 ||
[Analyze grammar]

hatasainyapurāpātadhūtāṅgārābhrakoṭaram |
karkaśākrandanirdagdhalokapūrogragarjitam || 20 ||
[Analyze grammar]

kṛśānukaṇanārācanirantaratarāmbaram |
bṛhadagniśikhājālaluṭhaddagdhapurotkaram || 21 ||
[Analyze grammar]

raṇaddviradasaṅghaṭṭakuṭṭitodbhaṭasadbhaṭam |
vidravattaskaracchedamārgakīrṇamahādhanam || 22 ||
[Analyze grammar]

aṅgārarāśinipatannaranāryugrarodanam |
sphuṭaccaṭacaṭāśabdapraluṭhatpluṣṭakāṣṭakam || 23 ||
[Analyze grammar]

vipulālātacakraughaśatasūryanabhastalam |
aṅgāraśikharākīrṇasamastavasudhātalam || 24 ||
[Analyze grammar]

dagdhāgnikāṣṭhakreṅkāraraṇajjvalanavaiṇikam |
dagdhajantuparākrandarudatsakalasairibham || 25 ||
[Analyze grammar]

paṭaviśrāntarājastrīvṛddhotsannahṛtāśanam |
sakalagrasanārambhasodyogāgnimahāśikham || 26 ||
[Analyze grammar]

kaṭacchākkāradukkārakaṭhināgniraṇadgṛham |
anantajantubhojyānnavahnimuktendhanaspṛham || 27 ||
[Analyze grammar]

atha śuśrāva tatrāsau giro rājā vidūrathaḥ |
yodhānāṃ dahyamānānāṃ paśyatāmabhidhāvatām || 28 ||
[Analyze grammar]

hā mattamarudūrdhvasthānaṅgāragṛhapādapān |
raṇatkhagavaralīnajvalanānpātayan sthitaḥ || 29 ||
[Analyze grammar]

hā khaḍgadhārā prāleyaśītā deheṣu dantinām |
lagnā manassu mahatāmiva vijñānasūktayaḥ || 30 ||
[Analyze grammar]

hā tāta hetayo lagnāstaruṇīkavarītṛṇe |
jvalanti śuṣkaparṇaughā iva vīrānaleritāḥ || 31 ||
[Analyze grammar]

āvartavartinī dīrghā vahatyūrdhvaṃ taraṅginī |
paśyeyaṃ dhūmayamunā vyomagaṅgāṃ pradhāvati || 32 ||
[Analyze grammar]

vahadulmukakāṣṭaurdhvagāminī dhūmanimnagā |
vaimānikānandhayati paśyāgnikaṇabudbudā || 33 ||
[Analyze grammar]

asya mātā pitā bhrātā jāmātā tanayaḥ sutā |
asmin sadmani nirdagdhā dagdhaiṣāmantamicchati || 34 ||
[Analyze grammar]

hā hā hā gaccha bhośśīghrametadaṅgāramandiram |
itaḥ pravṛttaṃ patituṃ sumerośśikharaṃ yathā || 35 ||
[Analyze grammar]

aho śaraśilāśaktikuntaprāsāsihetayaḥ |
jvālāsandhyabhrapaṭalaṃ viśanti śalabhā iva || 36 ||
[Analyze grammar]

hetipravāhā jvalanaṃ nabhaḥ sarve viśantyaho |
vaḍavānalamujjvālamarṇaḥpūrā ivārṇavāt || 37 ||
[Analyze grammar]

dhūmāyante mahābhrāṇi jvālāśikharakoṭiṣu |
sarasānyapi śuṣyanti hṛdayānīva rāginām || 38 ||
[Analyze grammar]

ālānatvaruṣaivaitā dantibhirvṛkṣapaṅktayaḥ |
sphuṭatkaṭakaṭārāvaṃ pātyante kṛtapītkṛtaiḥ || 39 ||
[Analyze grammar]

pluṣṭapuṣpaphalaskandhagandhaśrīkā gṛhadrumāḥ |
gatā nirdagdhasarvasvā gṛhasthā iva dīnatām || 40 ||
[Analyze grammar]

mātāpitṛvinirmuktā bālakāstimirāvalīḥ |
mathnanto'ṅgeṣu rathyāsu kuḍyapātena hā hatāḥ || 41 ||
[Analyze grammar]

vata vidrāvitāndhasya kariṇo raṇamūrdhani |
patadaṅgārakāgārabhāriṇaḥ kaṭukūjitam || 42 ||
[Analyze grammar]

hā kaṣṭhamasinirbhinnaskandhe sannadṛḍholmuke |
patito yantrapāṣāṇaḥ puruṣasyāśaniryathā || 43 ||
[Analyze grammar]

gavāśvamahiṣājoṣṭraśvaśṛgālavṛkairaho |
ghoro raṇa ihārabdho mārgarodhaka ākulaiḥ || 44 ||
[Analyze grammar]

paṭaiḥ paṭapaṭāśabdairjvalajjvālālimārutaiḥ |
ākrandinyaḥ striyo yānti sthalapadmācitā iva || 45 ||
[Analyze grammar]

strīṇāṃ jvālālavāḥ paśya lihantyalakavallarīḥ |
kurvanto'śokapuṣpābhāṃ karabhā iva pannagīḥ || 46 ||
[Analyze grammar]

hā hā hariṇaśāvākṣyāḥ pakṣmalekṣaṇapakṣmasu |
kuśāgreṣviva viśrāntimeti kārṣāṇavī śikhā || 47 ||
[Analyze grammar]

dahyamāno'pi niryāti na kalatraṃ vinā naraḥ |
aho bata durucchedāḥ prāṇināṃ snehavāgurāḥ || 48 ||
[Analyze grammar]

karī rabhasanirbhinnajvaladaṅgārapādapaiḥ |
pluṣṭapuṣkarakaḥ kopānmathnātyutpuṣkaraṃ saraḥ || 49 ||
[Analyze grammar]

dhūmo'mbudapadaṃ prāpya lolālātataḍillatam |
jvaladaṅgāranārācanikaraṃ parivarṣati || 50 ||
[Analyze grammar]

iha dhūmaḥ sphuradvahnikaṇa āvartavṛttimān |
sthita āpīḍavānvyomni ratnapūra ivāmbare || 51 ||
[Analyze grammar]

gauramambaramābhāti jvālāśikharatejasā |
mṛtyorivotsave dattaḥ kuṅkumāṅkaḥ kadarthakaḥ || 52 ||
[Analyze grammar]

aho nu viṣamaṃ vairaṃ vartate vṛttivarjitam |
hriyante rājanāryo'pi varavīrairudāyudhaiḥ || 53 ||
[Analyze grammar]

lolasragdāmakusumairmārgaprakarakārikāḥ |
ardhanirdagdhakavarīkīrṇavakṣassthalāmbarāḥ || 54 ||
[Analyze grammar]

ālolāmbarasaṃlakṣyanitambajaghanasthalāḥ |
patanmāṇikyavalayā valitāvanimaṇḍalāḥ || 55 ||
[Analyze grammar]

chinnahāralatājālavikīrṇāmalamauktikāḥ |
dṛṣṭādṛṣṭastanaśroṇipārśvodyatkanakaprabhāḥ || 56 ||
[Analyze grammar]

kurarīkarkaśākrandamandīkṛtaraṇāravāḥ |
dhārāpātyasrunārācabhinnapārśvasthacetanāḥ || 57 ||
[Analyze grammar]

raktakardamabāṣpāmbuklinnagrathitavāsasaḥ |
bhujamūlārpitabhujairnīyamānā balānnṛbhiḥ || 58 ||
[Analyze grammar]

ka ivāsmatparitrātā syādityādīnavīkṣitaiḥ |
utpalairiva varṣadbhiḥ pariroditasainikāḥ || 59 ||
[Analyze grammar]

mṛṇālakomalācchorumūlajālaiḥ sunirmalaiḥ |
svacchāmbaratalālakṣyairākāśanalinīnibhāḥ || 60 ||
[Analyze grammar]

ālolamālyavasanābharaṇāṅgarāgā īrṣyākulānanacalālakavallarīkāḥ |
ānandasundaraniraṅkuśamathyamānātkāmārṇavātsamuditā iva rājalakṣmyaḥ || 61 ||
[Analyze grammar]