Chapter 42

līlopākhyāne bhrāntivicāro nāma sargaḥ |
dvicatvāriṃśattamaḥ sargaḥ |
yastvabuddhamatirmūḍho rūḍho na vitate pade |
vajrasāramidaṃ tasya jagadastyasadeva sat || 1 ||
[Analyze grammar]

yathā bālasya vetālo mṛtiparyantaduḥkhadaḥ |
asadeva sadākāraṃ tathā mūḍhamaterjagat || 2 ||
[Analyze grammar]

tāpa eva yathā vāri mṛgāṇāṃ bhramakāraṇam |
asatyameva satyābhaṃ tathā mūḍhadhiyāṃ jagat || 3 ||
[Analyze grammar]

yathā svapne mṛtirjantorasatyā satyarūpiṇī |
nārthakriyākarī bhāti tathedaṃ durvidāṃ jagat || 4 ||
[Analyze grammar]

avyutpannasya kanake kānake kaṭake yathā |
kaṭakajñaptirevāsti na manāgapi hemadhīḥ || 5 ||
[Analyze grammar]

yathājñasya purāgāranaganāgendrakalpanā |
iyaṃ dṛśyadṛgevāsti na tvanyā paramārthadṛk || 6 ||
[Analyze grammar]

yathā nabhasi muktālīpiñchakeśoṇḍukādayaḥ |
asatyāḥ satyatāṃ yātā tathedaṃ durdṛśāṃ jagat || 7 ||
[Analyze grammar]

dīrghasvapnamidam viśvaṃ viddhyahantādisaṃyutam |
atrānye svapnapuruṣā yathā satyāstathā śṛṇu || 8 ||
[Analyze grammar]

asti sarvagataṃ śāntaṃ paramārthaghanaṃ śuci |
acetyacinmātravapuḥ paramākāśamātatam || 9 ||
[Analyze grammar]

tatsarvagaṃ sarvaśakti sarvaṃ sarvātmakaṃ svayam |
yatra yatra yathodeti tathāste tatra tatra vai || 10 ||
[Analyze grammar]

tena svapnapure draṣṭā yānvetti puravāsinaḥ |
narāniti narā eva kṣaṇāttasya bhavanti te || 11 ||
[Analyze grammar]

yaddraṣṭuścitsvarūpaṃ tatsvapnākāśāntarasthitam |
svapnākāśacitāhaṃ hi naro'neneti bhāvitam || 12 ||
[Analyze grammar]

citpakṣataikyavaśato narataivāvabudhyate |
ātmanyato digdvayena dvayorapyeti satyatā || 13 ||
[Analyze grammar]

rāmaḥ |
svapne te svapnapuruṣā na satyāḥ syurmune yadā |
vada tatko bhaveddoṣo māyāmātraśarīriṇi || 14 ||
[Analyze grammar]

vasiṣṭhaḥ |
svapne'nyapuravāstavyā vastutaḥ satyarūpiṇaḥ |
pramāṇamatra śṛṇu me pratyakṣaṃ nāma netarat || 15 ||
[Analyze grammar]

sargādāvātmabhūrbhāti svapnābho'nubhavātmakaḥ |
tatsaṅkalpakalā viśvamevaṃ svapnābhameva tat || 16 ||
[Analyze grammar]

evaṃ viśvamidaṃ svapnastatra satyaṃ bhavānmama |
yathaiva tvaṃ tathaivānye svapne svapnaṃ tathā nṛṇām || 17 ||
[Analyze grammar]

svapne nagaravāstavyāḥ satyā na syurime yadi |
tadihāpi tadākāre na satyaṃ me bhavānapi || 18 ||
[Analyze grammar]

yathāhaṃ tava satyātmā satyamevaṃ bhavānmama |
svapnopalambhe saṃsāre mithaḥ siddhyai prathedṛśī || 19 ||
[Analyze grammar]

saṃsāravipule svapne yathā satyamahaṃ tava |
tathā tvamapi me satyaṃ sarvasvapneṣviti kramaḥ || 20 ||
[Analyze grammar]

rāmaḥ |
svapnadraṣṭari nirnidre taddṛṣṭaṃ svapnapattanam |
sadrūpatvāttathaivāste mamaivaṃ bhagavanmatiḥ || 21 ||
[Analyze grammar]

vasiṣṭhaḥ |
evametattathaivāste satyatvātsvapnapattanam |
svapnadraṣṭari nirnidre'pyākāśaviṣadākṛtiḥ || 22 ||
[Analyze grammar]

etadāstāmidaṃ tāvad yajjāgraditi manyase |
viddhi tatsvapnamevāntardeśakālādyapūrakam || 23 ||
[Analyze grammar]

evaṃ sarvamidaṃ bhāti na satyaṃ satyavatsthitam |
rañjayatyapi mithyaiva svapnastrīsuratopamam || 24 ||
[Analyze grammar]

sarvatra vartate sarvaṃ dehasyāntarbahistathā |
yattu vetti yathā saṃvittattathāśveva paśyati || 25 ||
[Analyze grammar]

yatkośe vidyate dravyaṃ taddṛṣṭvā labhyate yathā |
tathāsti sarvaṃ cidvyomni labhyate yatpracetyate || 26 ||
[Analyze grammar]

vasiṣṭhaḥ |
anantaramuvācedaṃ devī jñaptirvidūratham |
kṛtvā bodhāmṛtāsekairvivekāṅkurasundaram || 27 ||
[Analyze grammar]

sarasvatī |
tadevameṣa rājaṃstvaṃ līlārthamupavarṇitaḥ |
svasti te'stu gamiṣyāvo dṛṣṭā dṛṣṭāntadṛṣṭayaḥ || 28 ||
[Analyze grammar]

vasiṣṭhaḥ |
iti proktaṃ sarasvatyā girā madhuravarṇayā |
uvāca vacanaṃ dhīmānbhūmipālo vidūrathaḥ || 29 ||
[Analyze grammar]

mamāpi darśanaṃ devi moghaṃ bhavati nārthini |
mahāphalapradāyāstu kathaṃ tava bhaviṣyati || 30 ||
[Analyze grammar]

ahaṃ dehaṃ samutsṛjya lokāntaramitaḥ param |
nijamāyāmi he devi svapnātsvapnāntaraṃ yathā || 31 ||
[Analyze grammar]

atrādiśāśu māṃ mātaḥ prapannaṃ śaraṇāgatam |
bhakte'vahelā varade mahatāṃ na virājate || 32 ||
[Analyze grammar]

yaṃ pradeśamaham yāmi tamevāyātvayaṃ mama |
mantrī kumārī caiveyaṃ bāleti kuru me dayām || 33 ||
[Analyze grammar]

sarasvatī |
āgaccha rājyamucitāṅgavicāracāru prāgjanmamaṇḍalavare kuru nirviśaṅkam |
asmābhirarthijanakāmanirākṛtirhi dṛṣṭā na kācana kadācidapīti viddhi || 34 ||
[Analyze grammar]