Chapter 40

līlopākhyāne niśācarākularātriraṇāṅganasthānavarṇavaṃ nāma sargaḥ |
catvāriṃśatsargaḥ |
vasiṣṭhaḥ |
evaṃ niśācarācāraciraghore raṇāṅgane |
ullasantīṣu vetālakṣveḍāsūḍḍāmarāravaiḥ || 1 ||
[Analyze grammar]

nabhaḥprekṣakasenāsu pragatāsu yathāgatam |
viśrānteṣviva bhūpeṣu rathādiṣu nijāspade || 2 ||
[Analyze grammar]

mahāsarojala iva jane dṛśye raṇāṅgane |
ahanīva janācāre sthite śyāmācarehite || 3 ||
[Analyze grammar]

hastahāryatamaḥpiṇḍasphuṭakuḍye niśāgṛhe |
lābhotsavocchalaccitte bhūtasaṅghe pranṛtyati || 4 ||
[Analyze grammar]

niśśabdaśāntasañcāre nidrāmudre kakubgaṇe |
līlāpatirudārātmā kiñcitkhinnamanā iva || 5 ||
[Analyze grammar]

prātaḥkāryaṃ vicāryāśu mantribhirmantrakovidaiḥ |
dīrghacandrasamākāre śayane himaśītale || 6 ||
[Analyze grammar]

candrodayanibhe vāsagṛhe śiśirakoṭare |
nidrāṃ muhūrtamagamanmudritekṣaṇapuṣkaraḥ || 7 ||
[Analyze grammar]

atha te lalane vyoma tatparityajya tadgṛham |
randhrairviviśaturvātalekho'bjamukulaṃ yathā || 8 ||
[Analyze grammar]

rāmaḥ |
iyanmātramidaṃ sthūlaṃ śarīraṃ vāgvidāṃ vara |
randhreṇa tantutanunā kathaṃ praviśati prabho || 9 ||
[Analyze grammar]

vasiṣṭhaḥ |
ādhibhautikadeho'yamiti yasya matibhramaḥ |
tasyāsāvaṇurandhreṇa gantuṃ śaknoti nānagha || 10 ||
[Analyze grammar]

rodhito'hamaneneti na māmyatreti yasya dhīḥ |
anubhūtānubhavinī bhavatītyanubhūyate || 11 ||
[Analyze grammar]

yenānubhūtaṃ pūrvārdhaṃ gacchāmīti sa tatkriyaḥ |
kathaṃ bhavati paścārdhagamanonmukhacetanaḥ || 12 ||
[Analyze grammar]

vāri naivordhvamāyāti nādho gacchati pāvakaḥ |
yā yathaiva pravṛttā citsā tathaivāvatiṣṭhate || 13 ||
[Analyze grammar]

chāyāyāmupaviṣṭasya kutastāpānubhūtayaḥ |
anyasaṃvedano'nyo'rthaḥ kenacinnānubhūyate || 14 ||
[Analyze grammar]

yā yathā sampravṛttā citsā tathaiva sthitiṃ gatā |
parameṇa prayatnena nīyate'nyāṃ daśāṃ punaḥ || 15 ||
[Analyze grammar]

sarpaikapratyayo rajjvāmasatyapratyayādbalāt |
nivartate'nyathā tveṣa tiṣṭhatyeva yathāsthitam || 16 ||
[Analyze grammar]

yathā saṃvittathā cittaṃ yathā cittaṃ tathehitam |
bālaṃ pratyapi saṃsiddhametatko nānubhūyate || 17 ||
[Analyze grammar]

yaḥ punaḥ svapnasaṅkalpapuruṣapratimākṛtiḥ |
ākāśamātrakākāraḥ sa kathaṃ kena rodhyate || 18 ||
[Analyze grammar]

cittamātraśarīraṃ tu sarvasyaiva hi sarvataḥ |
vidyate vedanātve tatkvacidetīva hṛdgatāt || 19 ||
[Analyze grammar]

yathābhimatamevāsya bhavatyastamayodayam |
ādisarge svabhāvotthaṃ paścāddvaitaikyabhāvanam || 20 ||
[Analyze grammar]

cittākāśaṃ cidākāśamākāśaṃ ca tṛtīyakam |
viddhyetattrayamevaikamavinābhāvatāvaśāt || 21 ||
[Analyze grammar]

etaccittaśarīraṃ tvaṃ viddhi sarvagatodayam |
yathā saṃvedanecchatvād yathā saṃvedanodayam || 22 ||
[Analyze grammar]

vasati trasareṇvantarnīyate gaganodare |
līyate'ṅkurakośeṣu rasībhavati pallave || 23 ||
[Analyze grammar]

ullasatyambuvīcitve pranṛtyati śilodare |
pravarṣatyambudo bhūtvā śilībhūyāvatiṣṭhate || 24 ||
[Analyze grammar]

yathecchamambare yāti jaṭhare'pi ca bhūbhṛtām |
anantamākāśavapurdhatte'tha paramāṇutām || 25 ||
[Analyze grammar]

bhavatyadrivarādhāro baddhapīṭho nabhaśśiraḥ |
dehasyāntarbahirapi dadhadvaratanūruham || 26 ||
[Analyze grammar]

bhavatyākāśamādhatte koṭīḥ padmajasadmanām |
ananyāḥ svātmanāmbhodhirāvartaracana iva || 27 ||
[Analyze grammar]

anudbhinnaprabodho'sau sargādau cittadehakaḥ |
ākāśātmā mahānbhūtvā vetti prakṛtitāṃ gataḥ || 28 ||
[Analyze grammar]

asatyameva vāritvaṃ buddhvodetīva tattayā |
vandhyāputro'yamasmīti yathā svapnabhrame naraḥ || 29 ||
[Analyze grammar]

rāmaḥ |
kiṃ cittametadbhavati kiṃ vā bhavati no katham |
kathamevaṃmayād rūpānnānyadbhavati vā kṣaṇāt || 30 ||
[Analyze grammar]

vasiṣṭhaḥ |
pratyekameva yaccittaṃ tadevaṃrūpaśaktimat |
pṛthakpratyekamuditāḥ praticittaṃ jagadbhramāḥ || 31 ||
[Analyze grammar]

kṣaṇakalpajagatsaṅgātsamudyanti galanti ca |
nimeṣātkasyacitkalpātkasyacittatkramaṃ śṛṇu || 32 ||
[Analyze grammar]

maraṇādermahāmohādanantaramiyaṃ sthitiḥ |
kṣaṇāccirādvodetyāśu tatremaṃ tvaṃ kramaṃ śṛṇu || 33 ||
[Analyze grammar]

maraṇādimayī mūrchā pratyekenānubhūyate |
yaivaitāṃ viddhi sumate mahāpralayayāminīm || 34 ||
[Analyze grammar]

tadante tanute sargaṃ sarva eva pṛthakpṛthak |
sahajasvapnasaṅkalpasambhramācalavṛttivat || 35 ||
[Analyze grammar]

mahāpralayarātryante virāḍātmā manovapuḥ |
yathedaṃ tanute tadvatpratyekaṃ mṛtyanantaram || 36 ||
[Analyze grammar]

rāmaḥ |
mṛteranantaraṃ sargo yathā smṛtyānubhūyate |
virāṭ tathānubhavati nāto viśvamakāraṇam || 37 ||
[Analyze grammar]

vasiṣṭhaḥ |
mahati pralaye rāma sarve hariharādayaḥ |
videhamuktatāṃ yānti smṛteḥ ka iva sambhavaḥ || 38 ||
[Analyze grammar]

asmadādiprabuddhātmā kilāvaśyaṃ vimucyate |
kathaṃ bhavantu vāmuktā videhāḥ padmajādayaḥ || 39 ||
[Analyze grammar]

adyatve te hi ye jīvāsteṣāṃ maraṇajanmasu |
smṛtiḥ kāraṇatāmeti mokṣābhāvavaśādiha || 40 ||
[Analyze grammar]

jīvo hi mṛtimūrchānte yadantaḥ pronmiṣanniva |
anunmiṣita evāste tatpradhānamudāhṛtam || 41 ||
[Analyze grammar]

tadvyoma prakṛtiḥ soktā tadavyaktaṃ jaḍājaḍam |
saṃsṛterasmṛteścaiva krama eṣa bhavodaye || 42 ||
[Analyze grammar]

bodhonmukhatve hi mahattatprabuddhaṃ yadā bhavet |
tadā tanmātradikkālakriyābhūtādyudeti khāt || 43 ||
[Analyze grammar]

tadevocchūnamābuddhaṃ bhavatīndriyapañcakam |
tadeva budhyate dehaṃ sa eṣo'styātivāhikaḥ || 44 ||
[Analyze grammar]

cirakālapratyayataḥ kalpanāparipīvaraḥ |
ādhibhautikatābodhamādhatte'thaiṣa eva vaḥ || 45 ||
[Analyze grammar]

tato dikkālakalanāstadādhāratayā sthitāḥ |
udyantyanuditā eva vāyau spandakriyā iva || 46 ||
[Analyze grammar]

vṛddhimitthamayaṃ yāto mudhaiva bhuvanabhramaḥ |
svapnāṅganāsaṅgasamaḥ svanubhūto'pyasanmayaḥ || 46 || yadaiva mriyate jantuḥ paśyatyāśu tadaiva saḥ |
tatraiva bhuvanābhogamidamitthamavasthitam || 47 ||
[Analyze grammar]

vyomnaivānubhavatyacchamahaṃ jagaditi bhramam |
vyomarūpaṃ vyomarūpī jīvo jāta ivātmavān || 48 ||
[Analyze grammar]

purapattanaśailārkatārānikaradanturam |
jarāmaraṇavaiklavyavyādhisaṅkaṭakoṭaram || 49 ||
[Analyze grammar]

sabhāvābhāvasaṃrambhasthūlasūkṣmacalācalam |
sādridyūrvīnadīśāhorātrikalpakṣayodayam || 50 ||
[Analyze grammar]

ahaṃ jāto'munā pitrā kilātretyāttaniścayam |
iyaṃ mātā dhanamidaṃ mametyuditavāsanam || 51 ||
[Analyze grammar]

sukṛtaṃ duṣkṛtaṃ ceti mameti kṛtakalpanam |
bālo'bhūvamahaṃ tvadya yuveti vilasan hṛdi || 52 ||
[Analyze grammar]

pratyekamevamuditaḥ saṃsāravanaṣaṇḍakaḥ |
tārākusumito nīlameghacañcalapallavaḥ || 53 ||
[Analyze grammar]

carannaramṛgānīkaḥ surāsuravihaṅgamaḥ |
sālokakausumarajomāyāgahanakuñjakaḥ || 54 ||
[Analyze grammar]

abdhipuṣkariṇīpūrṇo mervādyacalaloṣṭakaḥ |
cittapuṣkarabīje'ntarnilīnānubhavāṅkuraḥ || 55 ||
[Analyze grammar]

yatraiṣa mriyate jīvastatraivaṃ paśyati kṣaṇāt |
pratyekamuditeṣvevaṃ jagatṣaṇḍeṣu bhūriśaḥ || 56 ||
[Analyze grammar]

koṭayo brahmarudrendramarudviṣṇuvivasvatām |
mervabdhimaṇḍaladvīpalokāntaradṛśaṃ gatāḥ || 57 ||
[Analyze grammar]

yātā yāsyanti yāntyetā dṛṣtayo'naṣṭarūpiṇi |
yā brahmaṇyupabṛṃhāḍhye tāḥ ke gaṇayituṃ kṣamāḥ || 58 ||
[Analyze grammar]

evaṃ kuḍyamayaṃ viśvaṃ nāstyeva mananādṛte |
mananaṃ ca khamevātastadidānīṃ vicāraya || 59 ||
[Analyze grammar]

yadeva taccidākāśaṃ tadeva paramaṃ smṛtaṃ |
mananaṃ ca cidākāśaṃ tadeva paramaṃ padam || 60 ||
[Analyze grammar]

yadevāmbu sa āvarto na tvastyāvarta vastusat |
dṛṣṭvaivāste dṛśyamiva dṛśyaṃ na tvasti vastusat || 61 ||
[Analyze grammar]

cidvyomno bhūtanabhasi kacanaṃ yanmaṇeriva |
tajjagadbhāti nānātmaratnaṃ śvabhramivāmbare || 62 ||
[Analyze grammar]

madbuddhārtho jagacchabdo vidyate paramaṃ padam |
tvadbuddhārthastu nāstyeva tvamahaṃśabdakāvapi || 63 ||
[Analyze grammar]

tasmāl līlāsarasvatyāvākāśavapuṣau sthite |
sarvage paramātmācche sarvatrāpratighe'naghe || 64 ||
[Analyze grammar]

yatra tatra tadā vyomni yathākāśaṃ yathepsitam |
udayaṃ kurutastena tadgṛhe te sthitiṃ gate || 65 ||
[Analyze grammar]

sarvatra sambhavati cidgaganaṃ tadantastadvedanaṃ kalanamāmananaṃ visāri |
taccātivāhikamihāhurakuḍyameva dehaṃ kathaṃ ka iva taṃ vada kiṃ ruṇaddhi || 66 ||
[Analyze grammar]