Chapter 36

līlopākhyāne raṇavarṇanaṃ nāma sargaḥ |
ṣaṭtriṃśaḥ sargaḥ |
vasiṣṭhaḥ |
atha śṛṅgopamāneṣu sthiteṣu śavarādiṣu |
gaṅgātulyāsu jātāsu vahadraktanadīṣu ca || 1 ||
[Analyze grammar]

nṛtyatsu loladordaṇḍaṃ kabandheṣu sabandhuṣu |
bruḍatsu narahastyaśvaratheṣu rudhirāmbhasi || 2 ||
[Analyze grammar]

sarvasainyeṣu yāteṣu viralatvaṃ visāriṣu |
sarvabhīruṣu bhagneṣu vidruteṣu diśo daśa || 3 ||
[Analyze grammar]

mātaṅgaśavaśaileṣu viśrāntāmbudapaṅktiṣu |
yakṣarakṣaḥpiśāceṣu krīḍatsu rudhirārṇave || 4 ||
[Analyze grammar]

mahatāṃ dharmaniṣṭhānāṃ śīlaujassattvaśālinām |
śuddhānāṃ kulapadmānāṃ vīrāṇāmanivartinām || 5 ||
[Analyze grammar]

dvandvayuddhāni jātāni meghānāmiva garjatām |
mitho nigaraṇotkāni milatsāgarapūravat || 6 ||
[Analyze grammar]

sapañjaraḥ pañjariṇā gajaughena gajoccayaḥ |
savanaḥ savanenādriradriṇevāmiladbalāt || 7 ||
[Analyze grammar]

aśvaugho'miladaśvānāṃ vṛndenārāviraṃhasā |
taraṅgoghena ghoreṇa taraṅgogha ivārṇave || 8 ||
[Analyze grammar]

narānīko narānīkaṃ samāyudhamayodhayat |
veṇvaughamiva veṇvaugho marullolo maruccalam || 9 ||
[Analyze grammar]

rathaughaśca rathaughena niṣpipeṣākhilaṃ vapuḥ |
nagaraṃ nagareṇeva daivenoḍḍīnamambaram || 10 ||
[Analyze grammar]

saraccharabharāsāraracitāpūrvavāridam |
yuyudhe sthagitākāśā dhanurdharapatākinī || 11 ||
[Analyze grammar]

viṣamāyudhayuddheṣu yoddhāraḥ pelavāśayāḥ |
yadā yuktyā palāyante raṇakalpānale tadā || 12 ||
[Analyze grammar]

militāścakriṇaścakrairdhanurdhārairdhanurdharāḥ |
khaḍgibhiḥ khaḍgayoddhāro bhusuṇḍībhirbhusuṇḍinaḥ || 13 ||
[Analyze grammar]

musulairmusuloddhārāḥ kuntinaḥ kuntadhāribhiḥ |
ṛṣṭyāyudhā ṛṣṭidharaiḥ prāsibhiḥ prāsapāṇayaḥ || 14 ||
[Analyze grammar]

samudgarā mudgaribhiḥ sagadairvilasadgadāḥ |
prāsamārgavidaḥ prāsaiḥ paraśūtkāḥ paraśvadhaiḥ || 15 ||
[Analyze grammar]

laguḍaughairlaguḍina upalairupalāyudhāḥ |
pāśibhiḥ pāśaparamāśśaṅkubhiśśaṅkudhāriṇaḥ || 16 ||
[Analyze grammar]

kṣurikābhiḥ sakṣurikā bhiṇḍipālaiśca tadbhṛtaḥ |
vajramuṣṭidharāstatsthairaṅkuśairaṅkuśoddhṛtāḥ || 17 ||
[Analyze grammar]

halairhalanikāṣajñāstriśūlaiśca triśūlinaḥ |
śṛṅkhalājālino jālaiśśārṅkhalairalikomalaiḥ || 18 ||
[Analyze grammar]

śāktīkaiśśaktiyoddhāraśśūlaiśśūlaviśāradāḥ |
kṣubhitāḥ kalpavikṣubdhasāgarormighaṭā iva || 19 ||
[Analyze grammar]

kṣubdhaścakrajalāvartaiśśaraśīkaramārutaiḥ |
prabhramaddhetimakaro vyomaikārṇava ābabhau || 20 ||
[Analyze grammar]

utphālāyudhakallolaḥ senākulajalecaraḥ |
rodhorandhrasamudro'sau babhūvāmaradustaraḥ || 21 ||
[Analyze grammar]

digaṣṭakajanānīkaṃ pakṣadvayatayā tayā |
ardhenārdhena kuṣitaṃ bhūpālābhyāṃ tathā sthitam || 22 ||
[Analyze grammar]

paśya deśādisaṅkhyena prāgdigbhāgagatānimān |
līlānāthasya padmasya pakṣe janapadāñchṛṇu || 23 ||
[Analyze grammar]

pūrvasyāṃ kāśimagadhāḥ kosalā mithilotkalāḥ |
mekalāḥ kavaṭāḥ puṇḍrāstathauṇḍrāḥ samagauḍakāḥ || 24 ||
[Analyze grammar]

drimayo madrasuhmāśca tāmraliptāstathaiva ca |
prāgjyotiṣā vājimukhā ambaṣṭhāḥ puruṣādakāḥ || 25 ||
[Analyze grammar]

karṇākṣaṣṭhā aviśrotrā āmamīnāśanāstathā |
vyāghravaktrāḥ kirātāśca śavarā ekapādakāḥ || 26 ||
[Analyze grammar]

mālyavānnāma śailo'tra śibivāñjñāna eva ca |
vṛṣabhadhvajapadmādyāstathodayakaro giriḥ || 27 ||
[Analyze grammar]

atha prāgdakṣiṇāyāṃ tu ime vindhyādrivāsinaḥ |
cedayo vatsadāśārṇā aṅgavaṅgopavaṅgakāḥ || 28 ||
[Analyze grammar]

kaliṅgapuṇḍrajaṭharā vidarbhā mekhalāstathā |
śavarā nagnaparṇāśca kaṇṭhatripurapūrakāḥ || 29 ||
[Analyze grammar]

kaṇṭakasthalanāmānaḥ pṛthudvīpakakomalāḥ |
kaṇṭhadrāśśoṇikāścaiva tathā carmaṇvatā api || 30 ||
[Analyze grammar]

kokakā hemakuḍyāśca tathā śmaśrudharā iti |
baligrīvamahāgrīvāḥ kiṣkindhā nārikelinaḥ || 31 ||
[Analyze grammar]

atha līlāpaterasya dakṣiṇasyāmime'drayaḥ |
vindhyo'tha kusumāpīḍo mahendro dundurastathā || 32 ||
[Analyze grammar]

malayaḥ sūryavāṃścaiva gaṇarājyanṛrājyakāḥ |
avantiriti vikhyātā tathā sāmbavatīti ca || 33 ||
[Analyze grammar]

daśapuryā ekakacchā ṛṣikāsturuṣkāśśakāḥ |
vanavāsopagirayaste bhadragirayastathā || 34 ||
[Analyze grammar]

nāgarā daṇḍakāścaiva gaṇarājyā nṛrājyakāḥ |
sahārā ṛṣyamūkāśca kārkoṭā vanatimbilāḥ || 35 ||
[Analyze grammar]

padmā nivāsinaścaiva caurakāḥ karkavīrakāḥ |
vairikāḥ pāśikāścaiva dharmapattanapāṃsikāḥ || 36 ||
[Analyze grammar]

śākikāḥ kṛṣṇacelūrā nārmadāstāmraparṇakāḥ |
gonandāḥ kanakāścaiva cīnapattananāmakāḥ || 37 ||
[Analyze grammar]

tālīkaṭāḥ saritkīrṇā rahakā veṇṇakārhaṇāḥ |
vaivuṇḍakāstumbavanā lājinadvīpakarṇakāḥ || 38 ||
[Analyze grammar]

karṇikārāśca śivayaḥ kuṅkuṇāścitrakūṭakāḥ |
karṇāṭamañcakaṭakā mahākaṭavikāstathā || 39 ||
[Analyze grammar]

āndhrāśca kollaśinayaśśivātakacavairikāḥ |
baladevāḥ pattanakāḥ krauñcāṣṭīvāstathaiva ca || 40 ||
[Analyze grammar]

śilākṣā radato nandanandanāmalayābhidhāḥ |
te citrakūṭaśikharā laṅkārakṣogaṇāspadāḥ || 41 ||
[Analyze grammar]

atha pratyagdakṣiṇāyāṃ mahārāṣṭrasurāṣṭrakāḥ |
sindhusauvīraśūdrākhyā ābhīrā dramiḍāstathā || 42 ||
[Analyze grammar]

koṭakāṣṣaṇḍasindhvākhyāstathā kaliruhā api |
atra hemagiriśśailastathā raivatako giriḥ || 43 ||
[Analyze grammar]

nabhukākhyaṃ mayavanaṃ yavanāstatra jantavaḥ |
pahlavā mārgaṇāvartā dhūmrāmbaṣṭhakanāmakāḥ || 44 ||
[Analyze grammar]

tathā lājakaṇāścaiva tathāmragirivāsinaḥ |
tato'bdhiraurvāgniyutā ete līlāpaterjanāḥ || 45 ||
[Analyze grammar]

atha tatpratipakṣasthānimāñjanapadāñchṛṇu |
paścimāyāṃ diśi prauḍhā ime tāvanmahādrayaḥ || 46 ||
[Analyze grammar]

matimānnāma śailendraḥ kṣurārpaṇagiristathā |
vanaukahā meghavāṃśca cakravānastaparvataḥ || 47 ||
[Analyze grammar]

janāḥ pañcanadā nāma kāśā brahmāvasātakāḥ |
tathaiva tārakṣatayaḥ pāravāśśāntikāstathā || 48 ||
[Analyze grammar]

pārśve vatakapokrāṇāṃ girivānavamāstathā |
santyaktadharmamaryādāste'dhamā mlecchajātayaḥ || 49 ||
[Analyze grammar]

tato janapadā bhūmiryojanānāṃ śatadvayam |
tato mahendraśikharī muktā maṇimayāvaniḥ || 50 ||
[Analyze grammar]

vṛto mahīdharaśatairathāsto nāma parvataḥ |
tato mahārṇavo bhīmāḥ pāriyātragirestaṭe || 51 ||
[Analyze grammar]

paścimottaradigbhāge deśo girimatiḥ sthitaḥ |
tathā veṇumatiścaiva tatasturamatirmahī || 52 ||
[Analyze grammar]

tathā phalgunakāścaiva māṇḍavyā ekanetrakāḥ |
purukundāstukhārāśca tālamallalahāvahāḥ || 53 ||
[Analyze grammar]

vandilā navilā vālā dīrghakeśāṅgabāhavaḥ |
raṅgāḥ khamūnikāḥ kampā guruhāścāruhāstathā || 54 ||
[Analyze grammar]

tataḥ strīrājyamatulaṃ govṛṣāpatyabhājanam |
athottarasyāṃ himavān kāñjo'tha madhumān giriḥ || 55 ||
[Analyze grammar]

kailāso vasumānmerustatpatheṣu janā ime |
madrapauravayaudheyā mālavāśśūrasenakāḥ || 56 ||
[Analyze grammar]

rājanyāśca tathāśvinyā arjunāvanayastathā |
trigartakekayaḥ kṣudramācelāścūstavāsinaḥ || 57 ||
[Analyze grammar]

ambalāḥ prasthalāśśākāḥ kṣemadhūrtaya eva ca |
antaradvīpagāndhārastathā vandivaṭastavaḥ || 58 ||
[Analyze grammar]

atha takṣaśilā nāma tato'pi lavaṇāvatī |
puṣkalāvatideśaśca yaśovatimahī tataḥ || 59 ||
[Analyze grammar]

tato maṇimatī bhūmiśśyāmākā khacarāstathā |
dāśadānā gavyasanā daṇḍahavyasanāstathā || 60 ||
[Analyze grammar]

dānadāśśūrakāścaiva vāṭādhārāstathaiva ca |
kohakaṃ nagaraṃ caiva surabhūtipuraṃ tathā || 61 ||
[Analyze grammar]

tato vai taṭakādarśā danturādarśa eva ca |
tataḥ piṇḍalamālavyayāyaneyābhidhānakāḥ || 62 ||
[Analyze grammar]

mālahālā hūnahematālāśvāḥ svamukhāstathā |
himavānvasumān kauñjaḥ kailāsaścetyagāstathā || 63 ||
[Analyze grammar]

tato janapadā bhūmiraśītiśatayojanā |
atha prāguttarasyāṃ tvamimāñjanapadāñchṛṇu || 64 ||
[Analyze grammar]

kaulūtā brahmaputrāśca kuvindāśca dinādanāḥ |
maḍavā naṣṭarājyāśca vanarāṣṭrāstathaiva ca || 65 ||
[Analyze grammar]

kaiḍabhallāḥ siṃhapurāstathā cāmavataṅganāḥ |
sārpātakāḥ pārvatakāḥ kaśmīrā daradāstathā || 66 ||
[Analyze grammar]

abhisārajadārvākāḥ pallolukaciroḍunāḥ |
kirātāḥ paśupālāśca cīnāḥ svarṇamahī tataḥ || 67 ||
[Analyze grammar]

devasthalopavanabhūstadanūditaśrīrviśvāvasostadanu mandiramuttamarddhi |
kailāsabhūstadanu muñjavanaśca śailo vidyādharāmaravihāravimānabhūmiḥ || 68 ||
[Analyze grammar]