Chapter 21

maṇḍapopākhyāne līlopākhyānāparanāmni jagataḥ paramārthatvapratipādanaṃ nāma sargaḥ |
ekaviṃśaḥ sargaḥ |
devī |
pratibhānti jagantyāśu mṛtimohādanantaram |
jīvasyonmīlanādakṣṇo rūpāṇīvākhilānyalam || 1 ||
[Analyze grammar]

dikkālakalanākāśadharmakarmamayāni ca |
parisphārāṇyanantāni kalpāntasthairyavanti ca || 2 ||
[Analyze grammar]

nānubhūtaṃ na yaddṛṣṭaṃ tanmayā kṛtamityapi |
tatkṣaṇātsmṛtitāmeti svapne svamaraṇaṃ yathā || 3 ||
[Analyze grammar]

bhrāntirevamananteyaṃ cidvyomavyomni bhāsurā |
apakuḍyā jagannāmnī nagarīkalpanātmikā || 4 ||
[Analyze grammar]

ahaṃ jagadiyaṃ sargasmṛtireveti jṛmbhati |
dūrakalpakṣaṇābhyāsaviparyāsaikakāriṇī || 5 ||
[Analyze grammar]

nānubhūtānubhūtā ca jñaptiritthaṃ dvirūpiṇī |
pūrvaṃ kāraṇarikteva cidrūpaiva pravartate || 6 ||
[Analyze grammar]

nānubhūte'nubhūtatvaṃ saṃvido'ntarudetyapi |
svapnabhramādananyasminpitarīva pitṛsmṛtiḥ || 7 ||
[Analyze grammar]

kadācitsmṛtitām tyaktvā pratibhāmātrameva sat |
bhāti prathamasargeśarūpeṇa tadanu kramāt || 8 ||
[Analyze grammar]

dṛśyaṃ tribhuvanādīdamanubhūtasmṛtau sthitam |
keṣāñcittanvi keṣāñcinnānubhūtasmṛtau sthitam || 9 ||
[Analyze grammar]

pratibhāsata evedaṃ keṣāñcitsmaraṇaṃ vinā |
cidaṇūnāṃ prajeśatvaṃ kākatālīyavad yataḥ || 10 ||
[Analyze grammar]

atyantavismṛtaṃ dṛśyaṃ mokṣa ityabhidhīyate |
īpsitānīpsite tatra na staḥ kecana kasyacit || 11 ||
[Analyze grammar]

atyantābhāvasampattiṃ vināhantvajagatsthiteḥ |
anutpādamayīmeva nodetyeva vimuktatā || 12 ||
[Analyze grammar]

rajjvāṃ sarpabhramaḥ sarpaśabdārthāsambhavaṃ vinā |
anutpādamayo nityaṃ śānto'pi na hi śāmyati || 13 ||
[Analyze grammar]

ardhaśānto na śānto'sau sametyanyatayā punaḥ |
udetyekapiśācānte piśāco'nyo'pyadhīmataḥ || 14 ||
[Analyze grammar]

saṃsāraścāyamābhogī parameveti niścayaḥ |
kāraṇābhāvato bhāti yadihābhāvameti tat || 15 ||
[Analyze grammar]

līlā |
brāhmaṇabrāhmaṇīrūpe sarge yā kāraṇaṃ smṛtiḥ |
kathamabhyuditā sā syātsmaraṇīyamidaṃ vinā || 16 ||
[Analyze grammar]

devī |
pitāmahasmṛtistatra kāraṇaṃ tasya ca smṛtiḥ |
pūrvaṃ na sambhavatyeva muktatvātpūrvajanmanaḥ || 17 ||
[Analyze grammar]

pūrvaṃ na sambhavatyeva smaraṇīyā citiḥ svayam |
padmajāditvamāyāti cetanasya yathāsthiteḥ || 18 ||
[Analyze grammar]

abhūvamahamityanyaḥ prajānāthaḥ prajāyate |
kākatālīyavatkaścidbhavati pratibhāmayaḥ || 19 ||
[Analyze grammar]

evamabhyudite loke na kiñcinna kadācana |
kvacidabhyuditaṃ nāma kevalaṃ cinnabhaḥ sthitam || 20 ||
[Analyze grammar]

dvividhāyāḥ smṛterasyāḥ kāraṇaṃ paramaṃ padam |
kāryakāraṇabhāvo'sāvekameva cidambaram || 21 ||
[Analyze grammar]

kāryakāraṇayoḥ sattā kāraṇaiḥ sahakāribhiḥ |
kāryakāraṇayoraikyaṃ tadabhāvānna śāmyati || 22 ||
[Analyze grammar]

mahācidrūpamevedaṃ smaraṇādviddhi vedanam |
kāryakāraṇabhāvo'tra tena śabdo na vāstavaḥ || 23 ||
[Analyze grammar]

evaṃ na kiñcidutpannaṃ dṛśyaṃ trijagadādyapi |
cidākāśaṃ cidākāśe kevalaṃ svātmani sthitam || 24 ||
[Analyze grammar]

līlā |
aho nu paramā dṛṣṭirdarśitā devi me tvayā |
rūpaśrīrjāgatī prātaḥprabhayevekṣaṇadyuteḥ || 25 ||
[Analyze grammar]

idānīmahametasyāṃ yāvatpariṇatā dṛśi |
nābhyāsena vinā tāvadbhinddhīmaṃ devi kautukam || 26 ||
[Analyze grammar]

yatrāsau brāhmaṇo gehe brāhmaṇyā sahito'bhavat |
taṃ sargaṃ taṃ girigrāmaṃ naya māṃ samavekṣitum || 27 ||
[Analyze grammar]

devī |
acetyacidrūpamayīṃ paramāṃ pāvanīṃ dṛśam |
avalambyemamākāramavamucya bhavāmalā || 28 ||
[Analyze grammar]

tataḥ prāpsyasyasandehaṃ vyomātmānaṃ nabhassthitam |
bhūmiṣṭhanarasaṅkalpo gaganāntaḥ puraṃ yathā || 29 ||
[Analyze grammar]

evaṃsthitaṃ taṃ paśyāvaḥ saha sargamanantaram |
evaṃ taddarśanadvāre deho hi paramārgalā || 30 ||
[Analyze grammar]

līlā |
amunā devi dehena jagadanyadavāpyate |
na vā kasmādatra yuktiṃ kathayānugrahagrahāt || 31 ||
[Analyze grammar]

devī |
jagantīmānyamūrtāni mūrtimanti mudhāgrahāt |
bhavadbhiravabuddhāni hemanīvormikādhiyā || 32 ||
[Analyze grammar]

hemnyūrmikārūpavane'pyūrmikātvaṃ na vidyate |
yathā tathā jagadrūpe jagattvaṃ nāsti citpade || 33 ||
[Analyze grammar]

jagadākāśamevedaṃ brahmaiva na tu dṛśyatā |
dṛśyate kācidapyatra dhūlirambunidhāviva || 34 ||
[Analyze grammar]

brahmaiva paśyati brahma nābrahma brahma paśyati |
sargādināmnā prathitaḥ svabhāvo'syaivamīdṛśaḥ || 35 ||
[Analyze grammar]

na brahmajagatorasti kāryakāraṇatodayaḥ |
kāraṇānāmabhāvena sarveṣāṃ sahakāriṇām || 36 ||
[Analyze grammar]

yāvadabhyāsayogena na śāntā bhedadhīstava |
nūnaṃ tāvadatadrūpā na brahma paripaśyasi || 37 ||
[Analyze grammar]

tatra rūḍhimupāyātā ime ye tvasmadādayaḥ |
abhyāsādbrahmasaṃvitteḥ paśyāmaste hi tatpadam || 38 ||
[Analyze grammar]

saṅkalpanagarasyeva mamākaśamayaṃ vapuḥ |
brahmaiva vātaḥ paśyāmi dehenānena tatpadam || 39 ||
[Analyze grammar]

viśuddhajñānadehāhaṃ yathaite padmajādayaḥ |
brahmātmajagadādīdamaṅgamasmākamaṅgane || 40 ||
[Analyze grammar]

tavābhyāsaṃ vinā bālo nākāro brahmatāṃ gataḥ |
sthitaḥ kalanarūpātmā tena tannānupaśyasi || 41 ||
[Analyze grammar]

yatra svasaṅkalpapuraṃ svadehe nānulabhyate |
tatrānyasaṅkalpapuraṃ svadehe nānulabhyate || 42 ||
[Analyze grammar]

tasmādenaṃ parityajya dehaṃ cidvyomarūpiṇī |
tatpaśyasyetadevāśu kuru kāryavidāṃ vare || 43 ||
[Analyze grammar]

saṅkalpanagaraṃ satyaṃ yathā saṅkalpinaṃ prati |
sadehaṃ vā videhaṃ vā netaraṃ prati kiñcana || 44 ||
[Analyze grammar]

ādisarge jagadbhrāntiryatheyaṃ sthitimāgatā |
tathā tadāprabhṛtyeva niyatiḥ prauḍhimāgatā || 45 ||
[Analyze grammar]

līlā |
tvayoktaṃ devi gacchāvo brāhmaṇabrāhmaṇīgṛham |
sahetīdamahaṃ vacmi kathaṃ gantavyamamba he || 46 ||
[Analyze grammar]

iha dehaṃ imaṃ nyasya śuddhasattvānupātinā |
cetasā tatparaṃ yāmi lokaṃ tvaṃ kathayeti tu || 47 ||
[Analyze grammar]

devī |
saṅkalpavyomavṛkṣaste yathā sannapi khātmakaḥ |
na kuḍyātmā na kuḍyena rodhyate nāpi kuḍyahā || 48 ||
[Analyze grammar]

śuddhaikasattvanirmāṇacittarūpasya tatkila |
pratibhānamatastasmādparamādbhidyate manāk || 49 ||
[Analyze grammar]

so'yametādṛśo deho nainaṃ santyajya yāmyaham |
anenaiva tamāpnomi deśaṃ gandhamivānilaḥ || 50 ||
[Analyze grammar]

yathā jalaṃ jalairvāgniragninā vāyunānilaḥ |
milatyevaṃ manodeho dehairanyairmanomayaiḥ || 51 ||
[Analyze grammar]

na hi pārthivatāṃ saṃvidetyapārthivasaṃvidā |
ekatvaṃ kalpanāśailaśailayoḥ kvāhatirmithaḥ || 52 ||
[Analyze grammar]

ātivāhika evāyaṃ tvādṛśaścittadehakaḥ |
ādhibhautikabuddhyā tu gṛhītaścirabhāvanāt || 53 ||
[Analyze grammar]

yathā svapne yathā dīrghakāladhyāne yathā bhramaiḥ |
yathā vyasanisaṅkalpe yathā gandharvapattane || 54 ||
[Analyze grammar]

vāsanātānavaṃ nūnaṃ yadā te sthitimeṣyati |
tadādhibhautikībhāvaṃ punareti na dehakaḥ || 55 ||
[Analyze grammar]

līlā |
ātivāhikadehatvapratyaye ghanatāṃ gate |
tamavāpnotyayaṃ deho daśāmohe vinaśyati || 56 ||
[Analyze grammar]

devī |
yadasti nāma tatraiṣa nāśānāśakramo bhavet |
vastuto nāsti yattveva nāśaḥ syāttatra kīdṛśaḥ || 57 ||
[Analyze grammar]

rajjvāṃ sarpabhrame naṣṭe satyabodhavaśātsute |
sarpo na naṣṭastannaṣṭo vetyevaṃ keva saṅkathā || 58 ||
[Analyze grammar]

yathā satyaparijñānāddṛśyate nādhibhautikaḥ |
tathātivāhikajñānāddṛśyate nādhibhautikaḥ || 59 ||
[Analyze grammar]

kalpanā vinivarteta kalpitā yadi kenacit |
sā śilā samapāstaiva yā nehāsti kadācana || 60 ||
[Analyze grammar]

parasparaṃ parāpūrṇamidaṃ dehādikaṃ sthitam |
iti satyaṃ vayaṃ bhadre paśyāmo nāsi paśyasi || 61 ||
[Analyze grammar]

ādisarge bhaveccittvaṃ kalpanākalitaṃ yadā |
tadā tataḥprabhṛtyekaṃ svatvaṃ dṛśyamivekṣyate || 62 ||
[Analyze grammar]

līlā |
ekasminneva saṃśānte dikkālādyavibhāgini |
vidyamāne pare tattve kalpanāvasaraḥ kutaḥ || 63 ||
[Analyze grammar]

devī |
kaṭakatvaṃ yathā hemni taraṅgatvaṃ yathāmbhasi |
satyatvaṃ ca yathā svapnasaṅkalpanagarādiṣu || 64 ||
[Analyze grammar]

nāstyeva satyānubhave tathā nāstyeva citpade |
kalpanaṃ vyatiriktātma tatsvabhāvādanāmayāt || 65 ||
[Analyze grammar]

yathā nāstyambare pāṃsuḥ pare nāsti tathā kalā |
akalākalanaṃ śāntamidamekamajaṃ tataḥ || 66 ||
[Analyze grammar]

yadvedaṃ bhāsate kiñcittattasyaiva nirāmayam |
kacanaṃ kāñcanākhyānakāntasyātimaṇeriva || 67 ||
[Analyze grammar]

līlā |
etāvantaṃ ciraṃ kālamevaṃ devi vayaṃ vada |
bhrāmitāḥ ke ca nāmeme dvaitādvaitavikalpanaiḥ || 68 ||
[Analyze grammar]

devī |
avicāreṇa tarale bhrāntāsi ciramākulā |
avicāraḥ svabhāvotthaḥ sa vicārādvinaśyati || 69 ||
[Analyze grammar]

avicāro vicāreṇa nimeṣādeva naśyati |
eṣo'sanneva tenāntaravidyaiṣā na vidyate || 70 ||
[Analyze grammar]

tasmānnaivāvicāro'sti nāvidyā naiva bandhanam |
na mokṣo'sti nirābādhaṃ śuddhabodhastvidaṃ jagat || 71 ||
[Analyze grammar]

etāvantaṃ yadā kālaṃ tvayaitanna vicāritam |
tadā na samprabuddhā tvaṃ bhrāntaivārṇava ākulā || 72 ||
[Analyze grammar]

adyaprabhṛti buddhāsi vimuktāsi vivekinī |
vāsanātānave bījaṃ patitaṃ tava cetasi || 73 ||
[Analyze grammar]

ādāveva hi notpannaṃ dṛśyaṃ saṃsāranāṭakam |
yadā tadā kathaṃ kena vāsyate vāsanāpi kā || 74 ||
[Analyze grammar]

atyantābhāvasampattau draṣṭṛdṛśyadṛśāmataḥ |
ekadhyāne paraṃ rūḍhe nirvikalpasamādhini || 75 ||
[Analyze grammar]

vāsanākṣayabīje'smin kiñcidaṅkurite hṛdi |
kramānnodayameṣyanti rāgadveṣādikā dṛśaḥ || 76 ||
[Analyze grammar]

saṃsārasambhavaścāyaṃ nirmūlatvamupaiṣyati |
nirvikalpasamādhānaṃ pratiṣṭhāmalameṣyati || 77 ||
[Analyze grammar]

vigatakalanakālimākalaṅkā gaganakalāntaranirmalā balena |
sakalakaraṇakāryakāraṇāntaḥ katipayakāryavaśādbhaviṣyasīti || 78 ||
[Analyze grammar]