Chapter 17

maṇḍapopākhyāne rājñīparidevanaṃ nāma sargaḥ |
saptadaśaḥ sargaḥ |
sarasvatī |
śavībhūtamimaṃ vatse bhartāraṃ puṣpakambalaiḥ |
ācchādya sthāpayeha tvaṃ punarenamavāpsyasi || 1 ||
[Analyze grammar]

puṣpāṇi mlānimeṣyanti no na caiṣa vinaṅkṣyati |
bhūyaśca tava bhartāyamacireṇa bhaviṣyati || 2 ||
[Analyze grammar]

etadīyaśca jīvo'sāvākāśaviśadastava |
na nirgamiṣyati kṣipramapyantaḥpuramaṇḍapāt || 3 ||
[Analyze grammar]

vasiṣṭhaḥ |
ṣaṭpadaśreṇinayanā samākarṇyeti bandhubhiḥ |
sā samāśvāsitāgatya payobhiriva padminī || 4 ||
[Analyze grammar]

patiṃ saṃsthāpya tatraiva puṣpapūrapragopitam |
kiñcidāśvāsitātiṣṭhatkṛpaṇeva nidhāninī || 5 ||
[Analyze grammar]

tasminneva dine saikā tasmiñchuddhāntamaṇḍape |
ardharātraṃ parijane sarvasminnidrayā hṛte || 6 ||
[Analyze grammar]

jñaptiṃ bhagavatīṃ devīṃ śuddhajñānamahādhiyā |
duḥkhādāhvāyayāmāsa sovaca samupetya tām || 7 ||
[Analyze grammar]

sarasvatī |
kiṃ smṛtāsmi tvayā vatse dhatse kimiti śokitām |
saṃsāre bhrāntayo bhānti mṛgatṛṣṇāmbuvanmudhā || 8 ||
[Analyze grammar]

līlā |
kva mamāmba sthito bhartā kiṃ karotyatha kīdṛśaḥ |
samīpaṃ naya māṃ tasya naikā śaknomi jīvitum || 9 ||
[Analyze grammar]

devī |
cittākāśaṃ cidākāśamākāśaṃ ca tṛtīyakam |
tebhyaśśūnyatamaṃ viddhi cidākāśaṃ varānane || 10 ||
[Analyze grammar]

śūnyamevedamakhilaṃ jagattatra vyavasthitam |
ahaṃ tvamiti dṛśyātma nānānānaiva nirvapuḥ || 11 ||
[Analyze grammar]

abhittimayamevedaṃ kalpanārūpitaṃ jagat |
jñaptibhāmātrakaṃ deśatulāpūraṇavarjitam || 12 ||
[Analyze grammar]

taccidākāśakośātmā cidākāśaikyabhāvanāt |
avidyamānamapyāśu dṛśyate'thānubhūyate || 13 ||
[Analyze grammar]

deśāddeśāntaraprāptau saṃvido madhyameva yat |
nimeṣeṇa cidākāśaṃ tadviddhi varavarṇini || 14 ||
[Analyze grammar]

tasminnirastaniśśeṣasaṅkalpasthitimeṣi cet |
sarvātmakapadaṃ tattaddṛṣṭvā prāpnoṣyasaṃśayam || 15 ||
[Analyze grammar]

atyantābhāvasaṃvittyā jagatastvetadāpyate |
nānyathā madvareṇāśu tvaṃ tu prāpsyasi sundari || 16 ||
[Analyze grammar]

vasiṣṭhaḥ |
ityuktvā sā yayau devī divyamātmīyamāspadam |
līlā tu līlayaivāsīnnirvikalpasamādhibhāk || 17 ||
[Analyze grammar]

tattatyāja nimeṣeṇa sāntaḥkaraṇapañjaram |
svadehaṃ khamivoḍḍīnā nijanīḍaṃ vihaṅgamī || 18 ||
[Analyze grammar]

dadarśa ca svabhartāraṃ tasminnevālayāmbare |
saṃsthitaṃ pṛthivīpālamāsthāne bahurājake || 19 ||
[Analyze grammar]

siṃhāsanasamārūḍhaṃ jaya jīveti saṃstutam |
prastutaṃ maṇḍalānekakāryamāhartumādṛtam || 20 ||
[Analyze grammar]

patākāmañjarīkīrṇarājadhānīgṛhasthitam |
pūrvadvārasthitāsaṅkhyamuniviprarṣimaṇḍalam || 21 ||
[Analyze grammar]

dakṣiṇadvāragāsaṅkhyalalanālokamaṇḍalam |
paścimadvāragāsaṅkhyarājarājeśamaṇḍalam || 22 ||
[Analyze grammar]

uttaradvāragāsaṅkhyarathahastyaśvasaṅkulam |
ekabhṛtyavinirṇītadakṣiṇāpathavigraham || 23 ||
[Analyze grammar]

karṇāṭanātharacitapūrvadeśakriyākramam |
surāṣṭrādhipanirṇītasarvamlecchottarāpatham || 24 ||
[Analyze grammar]

mālaveśasamākrāntasarvapāścātyataṅgaṇam |
dakṣiṇābdhitaṭāyātalaṅkādūtavinoditam || 25 ||
[Analyze grammar]

pūrvābdhitaṭamāhendrasiddhoktagaganāpagam |
uttarābdhitaṭāyātadūtavarṇitaguhyakam || 26 ||
[Analyze grammar]

paścimābdhitaṭīlokavarṇitāstamayakramam |
asaṅkhyabaddhabhūpālakarākīrṇākhilājiram || 27 ||
[Analyze grammar]

yajñavāṭapaṭhadviprajitatūryogranissvanam |
vandikolāhalollāsapratiśrudghanakandaram || 28 ||
[Analyze grammar]

geyavādyodyatadhvānapradhvanadgaganāntaram |
hayahastirathāvārirajomeghaghanāmbaram || 29 ||
[Analyze grammar]

puṣpakarpūradhūmotthagandhāmoditaparvatam |
sarvamaṇḍalasambhāraracitānekaśāsanam || 30 ||
[Analyze grammar]

yaśaḥkarpūrajaladhisuśuklāmbaraparṣadam |
rodasīstambhabhūtaikasvaprabhāvajitārkakam || 31 ||
[Analyze grammar]

ārambhamantharodārakāryasaṃvyagrabhūmipam |
nānānagaranirmāṇasodyogasthapatīśvaram || 32 ||
[Analyze grammar]

papātātha mahārambhāṃ sā tāṃ narapateḥ sabhām |
vyomātmikā vyomamayīṃ mihikevāmbarāṭavīm || 33 ||
[Analyze grammar]

bhramantīṃ tatra tāmagre dadṛśuste na kecana |
anyasaṅkalparacitāṃ puruṣāḥ kāminīmiva || 34 ||
[Analyze grammar]

tathā te tāṃ na dadṛśuḥ sañcarantīṃ purogatām |
anyasaṅkalparacitāṃ madhye svanagarīṃ yathā || 35 ||
[Analyze grammar]

prāktanāneva tān sarvān sā dadarśa purogatān |
bhūbhṛtaiva samaṃ prāptānnagarānnagarāntaram || 36 ||
[Analyze grammar]

tadveśāṃstanmayācārāṃstathā tāneva bālakān |
tā eva bālavanitāstāṃstāneva ca mantriṇaḥ || 37 ||
[Analyze grammar]

tāneva bhuvi bhūpālāṃstāṃstāneva ca paṇḍitān |
tāneva narmasacivānbhṛtyāṃstāneva tādṛśān || 38 ||
[Analyze grammar]

athānyānanyapūrvāṃśca paṇḍitān suhṛdastathā |
vyavahārāṃstathā cānyānpaurānanyāṃstathaiva ca || 39 ||
[Analyze grammar]

madhyāhnakālaṃ divasaṃ ghanagharmākulā diśaḥ |
antarikṣaṃ sacandrārkaṃ sāmbhodapavanadhvani || 40 ||
[Analyze grammar]

mahīṃ hradanadīśailapurapattanamaṇḍitām |
nānānagaravinyāsajaṅgalagrāmasaṅkulām || 41 ||
[Analyze grammar]

dviraṣṭavarṣaṃ bhūpālaṃ prāktanyā jarasojjhitam |
prāktanīṃ janatāṃ sarvāṃ samastān grāmavāsinaḥ || 42 ||
[Analyze grammar]

sā tānālokya lalanā cintāparavaśābhavat |
te'sminnagaravāstavyāḥ kaṣṭaṃ sarve mṛtā iti || 43 ||
[Analyze grammar]

punaḥprajñaptibodhena prāktanāntaḥpurāntaram |
ājagāma dadarśātra sārdharātraṃ tathaiva tat || 44 ||
[Analyze grammar]

śavarūpaṃ svabhartāraṃ puṣpasambhāragopitam |
nidrākulaṃ parijanasanniveśaṃ tathaiva tam || 45 ||
[Analyze grammar]

atha sotthāpayāmāsa nidrākrāntaṃ sakhījanam |
āha cātīva me duḥkhamāsthānaṃ dīyatāmiti || 46 ||
[Analyze grammar]

bhartuḥ siṃhāsanasyāsya pārśve tiṣṭhāmyahaṃ yadi |
paśyantī sabhyasaṅghātaṃ tatprajīvāmi nānyathā || 47 ||
[Analyze grammar]

sa rājaparivāro'tha tayetyukto yathākramam |
āsīdanidraḥ suvyagraḥ sarvaḥ sarvasvakarmasu || 48 ||
[Analyze grammar]

paurān sabhyān samānetuṃ yayuryāṣṭīkapaṅktayaḥ |
vyavahāraṃ kalayitumurvīmarkakarā iva || 49 ||
[Analyze grammar]

āsthānabhūmiṃ bhṛtyāśca mārjayāmāsurādṛtāḥ |
prāvṛṭpayodamalinaṃ khaṃ śaradvāsarā iva || 50 ||
[Analyze grammar]

aṅganaṃ prati dīpaughāstasthuḥ pītatamo'mbhasaḥ |
āścāryadarśanāyeva prāptā nakṣatrapaṅktayaḥ || 51 ||
[Analyze grammar]

janatāḥ pūrayāmāsuḥ pūrairajirabhūmikāḥ |
abdhīnpralayasaṃśuṣkānpurāsarge ivāmbhasā || 52 ||
[Analyze grammar]

ājagmurmantrisāmantāḥ svaṃ svaṃ sthānamaninditāḥ |
trailokye punarutpanne lokapālā yathā diśaḥ || 53 ||
[Analyze grammar]

vavurākīrṇakarpūrasāndrā malayaśītalāḥ |
utphullakusumodvāntamāṃsalāmodino'nilāḥ || 54 ||
[Analyze grammar]

paryanteṣu pratīhārāstasthurdhavalavāsasaḥ |
vṛṣṭamūkārkatāpāntameghamālā ivādriṣu || 55 ||
[Analyze grammar]

prabhāpītatamaḥpuñjāḥ petuḥ puṣpotkarā bhuvi |
meghamārutavidhvastāstārakānikarā iva || 56 ||
[Analyze grammar]

āsthānaṃ pūrayāmāsurmahīpālānuyāyinaḥ |
utphullakamalākīrṇaṃ haṃsā iva sarovaram || 57 ||
[Analyze grammar]

siṃhāsanasamīpasthe haimavetrāsane śubhe |
upāviśadasau līlā līleva smaracetasi || 58 ||
[Analyze grammar]

dadarśa tānnṛpānbhṛtyān sarvāneva yathāsthitān |
gurūnāryān sakhīnbhṛtyān suhṛtsambandhibāndhavān || 59 ||
[Analyze grammar]

sakalameva hi pūrvavadeva sā samavalokya mudaṃ paramāṃ yayau |
nṛpatirāṣṭrajanaḥ khalu jīvatītyuditayā ca babhau śaśivacchriyā || 60 ||
[Analyze grammar]