Chapter 14

śamanirūpaṇaṃ nāma sargaḥ |
caturdaśaḥ sargaḥ |
vasiṣṭhaḥ |
śāstrāvabodhāmalayā dhiyā paramapūtayā |
kartavyaḥ kāraṇajñena vicāro niyatātmanā || 1 ||
[Analyze grammar]

vicārāttīkṣṇatāmetya dhīḥ paśyati paraṃ padam |
dīrghasaṃsārarogasya vicāro hi mahauṣadham || 2 ||
[Analyze grammar]

āpadvanamanantehāparipallavitākṛti |
vicārakrakacacchinnaṃ naiva bhūyaḥ prarohati || 3 ||
[Analyze grammar]

moheṣu bandhunāśeṣu saṅkaṭeṣu bhrameṣu ca |
sarveṣveva mahāprājña vicāro hi satāṃ gatiḥ || 4 ||
[Analyze grammar]

na vicāraṃ vinā kaścidupāyo'sti vipacchame |
vicārādaśubhaṃ tyaktvā śubhamāyāti dhīḥ satām || 5 ||
[Analyze grammar]

balaṃ buddhiśca tejaśca pratipattiḥ kriyāphalam |
phalantyetāni sarvāṇi vicāreṇaiva dhīmataḥ || 6 ||
[Analyze grammar]

yuktāyuktamahādīpamabhivāñchitasādhakam |
sphāraṃ vicāramāśritya saṃsārajaladhiṃ taret || 7 ||
[Analyze grammar]

ālūnahṛdayāmbhojaṃ mahāmohamataṅgajam |
vidārayati śuddhātmā vicārodārakesarī || 8 ||
[Analyze grammar]

mūḍhāḥ kālavaśeneha yadgatāḥ paramaṃ padam |
tadvicārapradīpasya vijṛmbhitamanuttamam || 9 ||
[Analyze grammar]

rājyāni sampadaḥ sphāro bhogo mokṣaśca śāśvataḥ |
vicārakalpavṛkṣasya phalānyetāni rāghava || 10 ||
[Analyze grammar]

yā vivekavilāsinyo matayo mahatāmiha |
na tā vipadi majjanti tumbakānīva vāriṇi || 11 ||
[Analyze grammar]

vicārodayahāriṇyā dhiyā vyavaharanti ye |
phalānāmatyudārāṇāṃ bhājanaṃ hi bhavanti te || 12 ||
[Analyze grammar]

mūrkhahṛtkānanasthānāmāśāprasararodhinām |
avicārakarañjānāṃ mañjaryo duḥkharītayaḥ || 13 ||
[Analyze grammar]

kajjalakṣodamalinā madirāmodadharmiṇī |
avicāramayī nidrā yātu te rāghava kṣayam || 14 ||
[Analyze grammar]

mahāpadyapi dīrgheṣu sadvicāraparo naraḥ |
na nimajjati moheṣu tejorāśistamassviva || 15 ||
[Analyze grammar]

mānase sarasi svacche vicārakamalotkaraḥ |
nūnaṃ vikasito yasya himavāniva bhāti saḥ || 16 ||
[Analyze grammar]

vicāravikalā yasya matirmāndyamupeyuṣaḥ |
tasyodetyaśaniścandrānmudhā yakṣaśśiśoriva || 17 ||
[Analyze grammar]

duḥkhaṣaṇḍakavalmīkaṃ vipannavalatāmadhuḥ |
rāma dūre parityājyo nirviveko narādhamaḥ || 18 ||
[Analyze grammar]

ye kecana durārambhā durācārā durādhayaḥ |
avicāreṇa te bhānti vetālāstamasā yathā || 19 ||
[Analyze grammar]

avicāriṇamekāntajaraddrumasadharmiṇam |
akṣamaṃ sādhukāryeṣu dūre kuru raghūdvaha || 20 ||
[Analyze grammar]

viviktaṃ hi mano jantorāśāvaivaśyavarjitam |
parāṃ nirvṛtimabhyeti pūrṇaścandra ivātmani || 21 ||
[Analyze grammar]

vivekitoditā dehaṃ sarvaṃ śītalayatyalam |
alaṅkaroti cātyantaṃ jyotsneva bhuvanaṃ navā || 22 ||
[Analyze grammar]

paramārthapatākāyā dhiyo dhavalacāmaram |
vicāro rājate janto rajanyāmiva candramāḥ || 23 ||
[Analyze grammar]

vicāracāravo bhāvā bhāsayanto diśo daśa |
bhānti bhāskaravadbhagnabhūyobhavabhayāmayāḥ || 24 ||
[Analyze grammar]

bālasya svamanomohakalpitaḥ prāṇahārakaḥ |
rātrau tamasi vetālo vicāreṇa vilīyate || 25 ||
[Analyze grammar]

sarva eva jagadbhāvā avicāraṇacāravaḥ |
avidyamānasadbhāvā vicāraviśarāravaḥ || 26 ||
[Analyze grammar]

puṃso nijamanomohakalpito'nalpaduḥkhadaḥ |
saṃsāraciravetālo vicāreṇa vilīyate || 27 ||
[Analyze grammar]

samasvacchaṃ nirābādhamanantamanapāśrayam |
viddhīmaṃ kevalībhāvaṃ vicārogrataroḥ phalam || 28 ||
[Analyze grammar]

acalasthitinodāraprakaṭābhogatejasā |
tena niṣkāmatodeti śītatevoditendunā || 29 ||
[Analyze grammar]

cintājvaramahauṣadhyā sādhucittaniṣaṇṇayā |
tayottamatvapradayā nābhivāñchati nojjhati || 30 ||
[Analyze grammar]

tatsadālambanaṃ cetaḥ sphāramābhāsamāgatam |
nāstameti na codeti khamivātitatāntaram || 31 ||
[Analyze grammar]

na jahāti na cādatte na tāmyati na śāmyati |
kevalaṃ sākṣivatpaśyañjagadātmani tiṣṭhati || 32 ||
[Analyze grammar]

na ca śāmyati nāpyantarnāpi bāhye'vatiṣṭhati |
na ca naiṣkarmyamādatte na ca karmaṇi majjati || 33 ||
[Analyze grammar]

upekṣate gataṃ vastu samprāptamanuvartate |
na kṣubdho nāti cākṣubdho bhāti pūrṇa ivārṇavaḥ || 34 ||
[Analyze grammar]

evaṃrūpeṇa manasā mahātmāno mahāśayāḥ |
jīvanmuktā jagatyasminviharanti hi yoginaḥ || 35 ||
[Analyze grammar]

uṣitvā suciraṃ kālaṃ dhīrāste yāvadīpsitam |
tanumante parityajya yānti kevalatāṃ tatām || 36 ||
[Analyze grammar]

ko'haṃ kasya ca saṃsāra ityāpadyapi dhīmatā |
cintanīyaṃ prayatnena sapratīkāramātmanā || 37 ||
[Analyze grammar]

kāryasaṅkaṭasandehaṃ rājā jānāti rāghava |
niṣphalaṃ saphalaṃ vāpi vicāreṇaiva nānyathā || 38 ||
[Analyze grammar]

vedavedāntasiddhāntasthitayaḥ sthitikāraṇam |
nirṇīyante vicāreṇa dīpeneva bhuvo niśi || 39 ||
[Analyze grammar]

anaṣṭamandhakāreṣu bahutejassvajihmitam |
paśyatyapi vyavahitaṃ vicāraccārulocanam || 40 ||
[Analyze grammar]

vivekāndho hi jātyandhaśśocyaś sarvasya durmatiḥ |
divyacakṣurvivekātmā jayatyakhilavastuṣu || 41 ||
[Analyze grammar]

paramātmamayī pālyā mahānandaikasādhanī |
kṣaṇamekaṃ parityājyā na vicāracamatkṛtiḥ || 42 ||
[Analyze grammar]

vicāracāruḥ puruṣo mahatāmapi rocate |
paripakvaṃ camatkāri sahakāraphalaṃ yathā || 43 ||
[Analyze grammar]

vicārakāntamatayo nānekeṣu punaḥ punaḥ |
patanti duḥkhagarteṣu jñātordhvagatayo narāḥ || 44 ||
[Analyze grammar]

na virauti tathā rogī nānarthaśatajarjaraḥ |
avicāravinaṣṭātmā yathājñaḥ pariroditi || 45 ||
[Analyze grammar]

varaṃ kardamakīṭatvaṃ śvabhrakaṇṭakatā varam |
varamandhaguhāhitvaṃ na narasyāvicāritā || 46 ||
[Analyze grammar]

sarvānarthanijāvāsaṃ sarvasādhutiraskṛtam |
sarvadaussthityasīmāntamavicāraṃ parityajet || 47 ||
[Analyze grammar]

nityaṃ vicārayuktena bhavitavyaṃ mahātmanā |
bhavāndhakūpe patatāṃ vicāro hyavalambanam || 48 ||
[Analyze grammar]

svayamevātmanātmānamavaṣṭabhya vicārataḥ |
saṃsāramohajaladhestārayetsvamanomṛgam || 49 ||
[Analyze grammar]

ko'haṃ kathamayaṃ doṣaḥ saṃsārākhya upāgataḥ |
nyāyeneti parāmarśo vicāra iti kathyate || 50 ||
[Analyze grammar]

andhāndhamohamukharaṃ ciraṃ duḥkhāya kevalam |
kṛtaṃ śilāyā hṛdayaṃ durmateścāvicāriṇaḥ || 51 ||
[Analyze grammar]

bhāvābhāvagrahotsargadṛśāmiha hi rāghava |
na vicārādṛte tattvaṃ jñāyate sādhu kiñcana || 52 ||
[Analyze grammar]

vicārājjñāyate tattvaṃ tattvādviśrāntirātmani |
tato manasi śānte tu sarvaduḥkhaparikṣayaḥ || 53 ||
[Analyze grammar]

saphalatā phalate bhuvi karmaṇāṃ prakaṭatāṃ kila gacchata uttamāt |
sphuṭavicāradṛśaiva vicāritā śamavate bhavate'pi virocatām || 54 ||
[Analyze grammar]