Chapter 29

sakalapadārthānāsthāpratipādanaṃ nāma sargaḥ |
ekonatriṃśaḥ sargaḥ |
rāmaḥ |
evamabhyutthitānarthasārthasaṅkaṭakoṭaram |
jagadālokya nirmagnaṃ mano mananakardame || 1 ||
[Analyze grammar]

mano me bhramatīvedaṃ sambhramaścopajāyate |
gātrāṇi parikampante pattrāṇīva jarattaroḥ || 2 ||
[Analyze grammar]

anāptottamasantoṣacaryotsaṅgākulā matiḥ |
śūnyāspadā bibhetīha bālevālpabaleśvarā || 3 ||
[Analyze grammar]

vikalpebhyo luṭhantyetāścāntaḥkaraṇavṛttayaḥ |
śvabhrebhya iva sāraṅgyastucchālambaviḍambitāḥ || 4 ||
[Analyze grammar]

avivekāspadabhraṣṭāḥ kaṣṭe rūḍhā na satpade |
andhakūpamivāpannā varākāścakṣurādayaḥ || 5 ||
[Analyze grammar]

nāvasthitimupāyāti na ca yāti yathepsitam |
cintā jīveśvarāyattā kāntevāpriyasadmani || 6 ||
[Analyze grammar]

jarjarīkṛtya vastūni tyajantī bibhratī tathā |
mārgaśīrṣāntavallīva dhṛtirvidhuratāṃ gatā || 7 ||
[Analyze grammar]

apahastitasarvārthamanavasthitirāsthitā |
gṛhītvotsṛjya cātmānamavasthitiravasthitā || 8 ||
[Analyze grammar]

calitācalitenāntaravaṣṭambhena me matiḥ |
daridrācchinnavṛkṣasya mūleneva viḍambyate || 9 ||
[Analyze grammar]

cetaścañcalamābhogi bhuvanāntarvihāri ca |
sambhramaṃ na jahātīdaṃ svavimānamivāmaraḥ || 10 ||
[Analyze grammar]

ato'tucchamanāyāsamanupādhi gatabhramam |
kiṃ tatsthitipadaṃ sādhu yatra śaṅkā na vidyate || 11 ||
[Analyze grammar]

sarvārambhasamārambhāḥ sujanā janakādayaḥ |
vyavahāraparā eva kathamuttamatāṃ gatāḥ || 12 ||
[Analyze grammar]

lagnenāpi kilāṅgeṣu bahunā bahumānada |
kathaṃ saṃsārapaṅkena pumāniha na lipyate || 13 ||
[Analyze grammar]

kāṃ dṛṣṭiṃ samupāśritya bhavanto vītakalmaṣāḥ |
mahānto vicarantīha jīvanmuktā mahāśayāḥ || 14 ||
[Analyze grammar]

lobhayanto bhayāyaiva viṣayā bhogabhoginaḥ |
bhaṅgurākāravibhavāḥ kathamāyānti bhavyatām || 15 ||
[Analyze grammar]

mohamātaṅgamṛditā kalaṅkakalitāntarā |
paraṃ prasādamāyāti śemuṣīsarasī katham || 16 ||
[Analyze grammar]

saṃsāra eva nivasañjano vyavaharannapi |
na bandhaṃ kathamāyāti padmapattre payo yathā || 17 ||
[Analyze grammar]

ātmavattṛṇavadvedaṃ sakalaṃ janayañjagat |
kathamuttamatāmeti manomanmathamaspṛśan || 18 ||
[Analyze grammar]

kaṃ mahāpuruṣaṃ pāramupayātaṃ bhavodadheḥ |
ācāreṇānusṛtyāyaṃ jano yāti na duṣkṛtam || 19 ||
[Analyze grammar]

kiṃ tad yaducitaṃ śreyaḥ kiṃ tatsyāducitaṃ phalam |
vartitavyaṃ ca saṃsāre kathaṃ nāmāsamañjase || 20 ||
[Analyze grammar]

tattvaṃ kathaya me kiñcid yenāsya jagataḥ prabho |
vedmi pūrvāparāṃ dhātuśceṣṭitasyāsamasthitim || 21 ||
[Analyze grammar]

hṛdayākāśaśaśinaścetaso malamārjanam |
yathā me jāyatāṃ brahmaṃstathā nirvighnamācara || 22 ||
[Analyze grammar]

kimiha syādupādeyaṃ kiṃ vā heyamathetarat |
kathaṃ viśrāntimāyātu cetaścapalamadrivat || 23 ||
[Analyze grammar]

kena pāvanamantreṇa dussaṃsṛtiviṣūcikā |
śāmyatīyamanāyāsamāyāsaśatakāriṇī || 24 ||
[Analyze grammar]

kathaṃ śītalatāmantarānandatarumañjarīm |
pūrṇacandra ivākṣīṇāṃ rākāmāsādayāmyaham || 25 ||
[Analyze grammar]

prāpyāntaḥpūrṇatāmantarna śocāmi yathā punaḥ |
santo bhavantastattvajñāstathaivopadiśantu mām || 26 ||
[Analyze grammar]

anuttamānandapadapradhānaviśrāntiriktaṃ hi mano mahātman |
kadarthayantīha bhṛśaṃ vikalpāśśvāno vane dehamivālpajīvam || 27 ||
[Analyze grammar]