Verse 11.176

Medhātithi Manubhāṣya

viśeṣeṇa praduṣṭāṃ nirundhyāt patnīkāryebhyo nirvartayet “arthasya saṃgrahe cainām” (Manusmṛti or Mānava-dharmaśāstra 9.11) ityādibhyaḥ | ekaveśmanīti nigaḍabandhe kartavyā | na svairaṃ bhartṛgṛhe vihartuṃ labheta | tatra niruddhāṃ prāyaścittaṃ kārayet |

• kiṃ punaḥ |

• yat puṃsaḥ paradāreṣu prāyaścittam upapātakaṃ brāhmaṇasya tatsamānahīnajātīyāsu pāradāryam iti | varṇāntarāṇāṃ tad eva | uttamāgamane tu dviguṇaṃ vaiśyasya triguṇaṃ brāhmaṇyāṃ kṣatriyasya | tathāyaṃ viśeṣo dve paradāre trīṇi śrotriyasyeti | śūdrasya brāhmaṇīgamane mahāpātakaprāyaścittam | vaiśyasya kṣatriyāgamana upapātakaṃ dviguṇaṃ triguṇam | kecit tūttamāgamane śūdrasya brāhmaṇīvad icchanti | “prātilomye vadhaḥ puṃsām” (ydh 2.288) iti liṅgadarśanāt, etad uktam | daṇḍeṣv api viśeṣo darśitaḥ | yathaivottamāgamane puṃsāṃ vyavasthā tathaiva strīṇāṃ hīnajātīyapuruṣasaṃparke ceti | doṣe'pi strīṇām ardhaṃ prāyaścittam |

• prāyaścittārdham arhanti striyo rogiṇa eva ca |

• bālaś cā ṣoḍaśād varṣād aśītiparataḥ pumān ||

• tathā dṛṣṭavyabhicārāyāṃ gamane laghīyaḥ | svairiṇyāṃ vṛṣalyām avakīrṇaḥ sacailasnānād udakumbhaṃ dadyād brāhmaṇāya | vaiśyāyāṃ caturthakālāhāro brāhmaṇaṃ bhojayet | kṣatriyāyāṃ trirātropoṣaṇaṃ yavāḍhakaṃ dadyāt | vaiśyavad ity api smaryate | tadvac chūdram āryāyāṃ draṣṭavyam | ṛtau vā gacchato garbham ādadhato vā |

• brāhmaṇakṣatriyaviśāṃ striyaḥ śūdreṇa saṃgatāḥ |

• aprajātā viśudhyeyuḥ prāyaścitteta netarā || (vadh 21.12)

• atha vā yā etā na kenacid ūhyante, vaiśyena caranti, tadgamane'sti prāyaścittaṃ neti saṃdehaḥ |

• kutaḥ saṃśayaḥ |

• dāraśabdasya saṃskāraśabdatvāt | asati vivāhe na tā asya dārā iti vyapadeśam arhanti | pāradārye ca prāyaścittam | ato nāstīty avagacchāmaḥ | yatas tu “svadāranirataḥ” (Manusmṛti or Mānava-dharmaśāstra 3.45) iti niyamo vihito'to bhavatīti manyāmahe |

• kiṃ punar atra yuktam |

• astīti |

• kutaḥ |

• niyamasya vihitatvāt | “akurvan vihitam” (Manusmṛti or Mānava-dharmaśāstra 11.43) ityādi, tadatikrame prāyaścittasmaraṇāt | mā bhūn nāmopapātakam | na tāvatā prāyaścittābhāvaḥ prāyaścittārtham upapātakajātibhraṃśakarādi parigaṇitam | sāmānyaṃ tu nimittaṃ sarvatrākurvan vihitam ityādi |

• uktaṃ ca prāk “svairiṇītyādi” |

• nanu mṛtabhartṛpakṣeṇa pitṛpakṣeṇa vā saṃbaddhaiva paradāravyapadeśyā | adhikām avihāritvāt svairiṇyaḥ |

• satyam | veśyāsv api svātantryāvalaṃbanaḥ svairiśabdo na virudhyate |

• ataś ca tāsāṃ sacailasnānodakumbhādidānam |

• tatra kecid āhuḥ | vratam etat | tasya “vratam” (Manusmṛti or Mānava-dharmaśāstra 3.1) ity upakramya “vratānīmāni dhārayet” (Manusmṛti or Mānava-dharmaśāstra 4.13) iti ca yāni vihitāni tāni snātakavratāni, na sarvapuruṣadharmaḥ || 11.176 ||