Verse 10.126

Medhātithi Manubhāṣya

sarvo'yam anuvādaślokaḥ | yad asyāhatyaśṛṅgagrāhikayā na pratiṣiddham, yathā hiṃsāsteyādy anādṛtavarṇaviśeṣaṃ sāmānyaśāstrapratiṣiddham, na tadvyatikramād asya pāpam utpadyate | śrutam evāsya śabdena yathā hiṃsāsteyādis tatrāsya bhavaty eva doṣaḥ | na ca saṃskāram upanayanalakṣaṇam arhati | tad uktam “trayo varṇā dvijātayaḥ” (Manusmṛti or Mānava-dharmaśāstra 10.4) iti | evaṃ nāsyādhikāro dharme'sti snānopavāsadevatārcanādau nāsya nityo'dhikāro'sti | akaraṇe na pratyavaiti | na dharmāt pratiṣedhanam | yeṣu snānopavāsavratādiṣu nityādikāro nāsti, akaraṇe pratyavāyābhāvaḥ, atha niṣedho nāsti, tādṛśebhyo dharmebhyo na pratiṣedhaḥ | na cedṛśād asya pratiṣedhaḥ, ataḥ śiṣṭapratiṣiddhatvād abhyudayakāmasya tadanuṣṭhānaṃ yujyate | evaṃ laśunādibhakṣaṇanivṛttir apy abhyudayāyāsya veditavyā | sāmānyaśāstravihitam “nivṛttis tu mahāphalā” (Manusmṛti or Mānava-dharmaśāstra 5.56) iti | ato na dharmāt pratiṣedhanam iti yatrārambhaḥ || 10.126 ||