Verse 9.182-202

[English text for this chapter is available]

bhātṝṇām ekajātānām ekaś cet putravān bhavet |
sarvāṃs tāṃś tena putreṇa putriṇo manur abravīt || Verse 9.182 ||
sarvāsām ekapatnīnām ekā cet putriṇī bhavet |
sarvās tās tena putreṇa prāha putravatīr manuḥ || Verse 9.183 ||
śreyasaḥ śreyaso'lābhe pāpīyān riktham arhati |
bahavaś cet tu sadṛśā sarve rikthasya bhāginaḥ || Verse 9.184 ||
na bhrātaro na pitaraḥ putrā rikthaharāḥ pituḥ |
pitā hared aputrasya rikthaṃ bhrātara eva ca || Verse 9.185 ||
trayāṇām udakaṃ kāryaṃ triṣu piṇḍaḥ pravartate |
caturthaḥ saṃpradātaiṣāṃ pañcamo nopadayate || Verse 9.186 ||
anantaraḥ sapiṇḍādyas tasya tasya dhanaṃ bhavet |
ata ūrdhvaṃ sakulyaḥ syād ācāryaḥ śiṣya eva vā || Verse 9.187 ||
sarveṣām apy abhāve tu brāhmaṇā rikthabhāginaḥ |
taividyāḥ śucayo dāntās tathā dharmo na hīyate || Verse 9.188 ||
ahāryaṃ brāhmaṇadravyaṃ rājñā nityam iti sthitiḥ |
itareṣāṃ tu varṇānāṃ sarvābhāve haren nṛpaḥ || Verse 9.189 ||
saṃsthitasyānapatyasya sagotrāt putram āharet |
tatra yad rikthajātaṃ syāt tat tasmin pratipādayet || Verse 9.190 ||
dvau tu yau vivadeyātāṃ dvābhyāṃ jātau striyā dhane |
tayor yad yasya pitryaṃ syāt tat sa gṛhṇīta netaraḥ || Verse 9.191 ||
jananyāṃ saṃsthitāyāṃ tu samaṃ sarve sahodarāḥ |
bhajeran mātṛkaṃ rikthaṃ bhaginyaś ca sanābhayaḥ || Verse 9.192 ||
yās tāsāṃ syur duhitaras tāsām api yathārhataḥ |
mātāmahyā dhanāt kiṃcit pradeyaṃ prītipūrvakam || Verse 9.193 ||
adhyagnyadhyāvāhanikaṃ dattaṃ ca prītikarmaṇi |
bhrātṛmātṛpitṛprāptaṃ ṣaḍvidhaṃ strīdhanaṃ smṛtam || Verse 9.194 ||
anvādheyaṃ ca yad dattaṃ patyā prītena caiva yat |
patyau jīvati vṛttāyāḥ prajāyās taddhanaṃ bhavet || Verse 9.195 ||
brāhmadaivārṣagāndharvaprājāpatyeṣu yad vasu |
aprajāyām atītāyāṃ bhartur eva tad iṣyate || Verse 9.196 ||
yat tv asyāḥ syād dhanaṃ dattaṃ vivāheṣv āsurādiṣu |
aprajāyām atītāyāṃ mātāpitros tad iṣyate || Verse 9.197 ||
striyās[^524] tu yad bhaved vittaṃ pitrā dattaṃ kathaṃcana |
brāhmaṇī tad dharet kanyā tadapatyasya vā bhavet || Verse 9.198 ||
na nirhāraṃ striyaḥ kuryuḥ kuṭumbād bahumadhyagāt |
svakād api ca vittād dhi svasya bhartur anājñayā || Verse 9.199 ||
patyau jīvati yaḥ strībhir alaṃkāro dhṛto bhavet |
na taṃ bhajeran dāyādā bhajamānāḥ patanti te || Verse 9.200 ||
anaṃśau klībapatitau jātyandhabadhirau tathā |
unmattajaḍamūkāś ca ye ca kecin nirindriyāḥ || Verse 9.201 ||
sarveṣām api tu nyāyyaṃ dātuṃ śaktyā manīṣiṇā |
grāsācchādanam atyantaṃ patito hy adadad bhavet || Verse 9.202 ||