Verse 9.136

Medhātithi Manubhāṣya

adhastanoparitanavākyaparyālocanayā putrikāputraviṣaya evāyam atiśayoktyā pratīyate | akṛtāyā api duhituḥ putro mātāmahadhanabhāg ity uktam, kiṃ punaḥ kṛtāyā, ity evam anyaśeṣatvāt putrikāyā vidhiṣv ānarthakyaprasaṅgān na dauhitrasya rikthaprāptyarthaḥ |

• nanu ca smṛtyantare dauhitramātrasya piṇḍadānādhikāraḥ śrūyate—“mātāmahānām apy evam” (ydh 1.226) iti | ihāpi prakaraṇaṃ hitvā śrutivākyasāmarthyena dauhitramātraviṣayataiva pratipattuṃ nyāyyā—dadyāt piṇḍaṃ hared dhanam iti | tathāparam uktam—“dauhitro hy akhilaṃ riktham” (Manusmṛti or Mānava-dharmaśāstra 9.132) ityādi |

• atrocyate | yad uktaṃ “mātāmahānām” (ydh 1.226) iti, tad bahuvacanaṃ kiṃ vyaktyapekṣyam uta lakṣaṇayā pramātāmāhādyabhiprāyeṇa | vyaktipakṣa ekasyaiva mātāmahasya piṇḍadānaṃ prāpnoti śrāddhādivat | tac ca sapiṇḍīkaraṇe kṛte viruddham | evaṃ hy āhuḥ “ata ūrdhvaṃ tribhyo dadyāt” iti | athāpi pitur anyasya sapiṇḍīkaraṇam eva na kariṣyata ity ucyate | tad api na niṣedhābhāvāt | lakṣaṇāyāḥ saṃnikarṣo viśeṣābhāvāl lakṣaṇaviśeṣāparijñāne'navagatvam eva smṛtyādibalena ca prakaraṇatyāgasyeti virodhaprasaṅgas tadviśeṣo hi padārthaḥ prakaraṇād utkṛṣyate, dvādaśopasado'hīnasyetivat (cr | Pūrva Mīmāṃsā Sūtra 3.3.15–16) | akṛtā vā ity asya cānyaparatvam uktam | tasmāt pautrikeyaviṣayam etat || 9.136 ||