Verse 8.4-7

Medhātithi Manubhāṣya

pāṭhakramāpekṣam ṛṇādānasyādyatvaṃ prāthamyam | atha vā mukhyam ādyam | anena hi vanavāsino'pi spṛśyante | ṛṇādānānuṣaktam anṛṇādānam eva ca | yathā “ṛṇaṃ te mayā dattaṃ śuddhilekhyaṃ prayaccha” ityādi | naitad ṛṇādānam, anuktaṃ tu tatreti tad vyapadeśyam | tathā

• ṛṇaṃ deyam adeyaṃ ca yena yatra yathā ca yat |

• dānagrahaṇadharmāś ca | (Nārada Smṛti 1.1) iti |

tatra deyam ṛṇaṃ svakṛtaṃ pitṛkṛtaṃ ca yaya ca ṛkthaṃ haret | adeyaṃ svakrtaṃ dviguṇād adhikaṃ pitṛkṛtaṃ ca dyūtādibhāgeneti putraṇ bhartrā pitrā ceti | tathā,

• na strī patikṛtaṃ dadyād ṛṇaṃ putrakṛtaṃ tathā |

• abhyupetād ṛte yad vā saha patyā kṛtaṃ bhavet || (Nārada Smṛti 1.13)

yady api deyam ity atraitad antarbhūtaṃ tathāpi dyūtādikṛtaṃ viśeṣānapekṣaṃ svarūpato deyam, idaṃ tu kartṛniyamād iti gobalīvardavad bhavati ced bhedo yāvad iti dvaiguṇyaparyantaṃ tatrāpi bhedaḥ pūrvavat | “yatra” iti pāṭhe deśakālagrahaṇam | yatraiva gṛhītaṃ tatraiva deyam | satyāṃ dhanikecchāyāṃ deśāntare'pi | sati saṃbhave kālo'pi | śarady anicchetty uktam | “graiṣme vā satsu sasyeṣu yadā vāsya dhanāgamaṃ manyeta” iti | “yathā” sati saṃbhave sarvam | asati kaścid aṃśo yāvat krameṇa saṃśuddham iti | sarvabhāvena parikṣīṇena “karmaṇāpi samam” (Manusmṛti or Mānava-dharmaśāstra 8.177) iti | “dānagrahaṇadharmāḥ” iti sākṣilekhyādayaḥ |

pāruṣye daṇḍavācike iti | daṇḍaś ca vāk ca daṇḍavācaṃ “dvandvāc cudaṣahāntāt” (Pāṇini, Aṣṭādhyāyī 5.4.106) iti samāsāntas tad asyāstīti “ata ini ṭhanau” (pān 5.2.115) iti ṭhan | strīpuṃdharma iti | strīsahitaḥ pumān iti śākapārthivādivat samāsaḥ | strī ca pumāṃś ceti vigrahe strīpuṃsasharma iti syāt || 8.4–6 ||