Verse 4.195

Medhātithi Manubhāṣya

upacāreṇaitau śabdau prayujyete | anekasmiṃś copacārahetau sa eva saṃbhavati yannimittaṃ prayogas tadavadhāraṇapratiṣedhaviṣayaprakḷptyartham |

• dharmo dhvajam iva | vyāghrāder ākṛtigaṇatvāt samāsaḥ (Pāṇini, Aṣṭādhyāyī 2.1.56) | kadācit karmadhārayaḥ sarvadhanādyartha iti | tataḥ so'syāstīti matvarthīyaḥ | yaḥ khyātyartham eva dharmaṃ karoti na śāstraparatayā sa evam ucyate | yas tatraiva dharmaṃ karoti yatra janāh paśyanti svapuruṣaiś ca khyāpayanti “dhārmikatvaprasiddhyā pratigrahādi lapsye” iti |

• lubdho matsarī kṛpaṇaś ca | lokaṃ dabhnoti vañcayati lokadambhakaḥ | chadmanā carati chādmikaḥ | chadma vyājaḥ | prakāśaṃ dhārmiko rahasi nikṣiptam apaharaty aprakāśyaṃ prakāśayati | dhārmiko'yam etasya yat samakṣaṃ kathitaṃ tan nānyatra yātīti kenacid viśvasya kathitaṃ dṛśyate yāvad yata eva gopyaṃ tasyaivābhimukhe kathitam iti paradrohaḥ | sarveṣāṃ cābhisaṃdhātākṣepakaḥ paraguṇān na sahate | īdṛśo baiḍālavratiko jñeyaḥ | abhisaṃdhakaḥ abhisaṃdhatta iti | “ātaś copasargaḥ” (Pāṇini, Aṣṭādhyāyī 3.1.136) iti kaḥ | tataḥ svārthe kaḥ | sarveṣām abhisaṃdhaka iti ṣaṣṭhīsamāsaḥ |

• kecid atra ślokaṃ paṭhanti |

yasya dharmadhvajo nityaṃ suradhvaja ivocchritaḥ |
pracchannāni ca pāpāni baiḍālaṃ nāma tad vratam || iti |

eṣa evārthaḥ saṃkṣepeṇa kathyate | ekaikaguṇasaṃbandhe baiḍālavratiko jñeyaḥ | asmād eva ślokād evam anumīyate | pracchannāni ca pāpānīti viśeṣāśravaṇāt sarveṣāṃ caiṣāṃ pāpatvād ubhayathācāryeṇa śiṣyāḥ pratipāditāḥ |

• kecid imaṃ ślokam adhyāpitāḥ kecit pūrvam | ubhayaṃ ca pramāṇam | tena yady api “aṅgadī kuṇḍalī pīnaskandhaḥ pṛthuvakṣā devadattaḥ” iti samuditānāṃ lakṣaṇatvaṃ pratīyate, tathāpīha pratyekam etāni lakṣaṇāni || 4.195 ||