Verse 1.30

Medhātithi Manubhāṣya

atra dṛṣṭāntaḥ | acetanā api yathā bhāvās tanmaryādayaiva vyavasthitasvabhāvāḥ evaṃ cetanā api puruṣakṛtakarmasahāyena prajāpatinā kṛtāṃ maryādāṃ nātikrāmanti, yasyāṃ jātau jātās tad eva kurvanti nānyad icchanto'pi śaknuvanti kartum |

• ṛtavo vasantādayaḥ | svaliṅgāni cihnāni patraphalakusumaśītoṣṇavarṣādīni | paryaye | yasyartor yaḥ paryāyaḥ svakāryāvasaras tasmin sa ṛtus taṃ dharmaṃ svayam eva pratipadyate, na puruṣaprayatnam apekṣate | cūtamañjaryo vasante svayam eva puṣyanti, na mūle salilasekam apekṣante | evaṃ puruṣakarmāṇy adṛṣṭāni | nāsti sa padārtho yo na karmāpekṣate | tathā hi | varṣāṇāṃ svasvabhāvo yo vṛṣṭipradaḥ, bhavati ca rājadoṣād rāṣṭradoṣād vā kadācid avagrahaḥ | tasmāt karmaśaktir evānapasāryā | vṛttānurodhād asakṛd anugrahaṇam |

• anye tu ślokatrayam apy anyathā vyācakṣate | karmaśaktīnāṃ svabhāvaniyamo'nenocyata ity āhuḥ |

• (1.28) yat phalaṃ yasmin karmaṇy āhitaṃ prajāpatinā sa karmaviśeṣaḥ punaḥ punaḥ sṛjyamāno'nuṣṭhīyamānaḥ svayaṃ tat phalaṃ bhajate dadātīty arthaḥ | tena yāgaḥ kṛto yadā phaliṣyati na tadā kiṃcid anyad apekṣata iti pratipāditaṃ bhavati | sevā hi svakṛtā api mantripurohitādivākyam apekṣate | naivaṃ yāgaḥ | dṛṣṭas tu vyāpāras tenāpekṣyate | dṛṣṭādṛṣṭakāraṇadvayajanyatvāt sarvasya kāryasyādṛṣṭāntarāpekṣā niṣidhyate tadānīm |

• (1.29) karmāṇīṣṭāniṣṭaphalapradāni vidhipratiṣedhaviṣayāṇi | karmāṇi dviśa udāharati | hiṃsrāhiṃsre iti | hiṃsā pratiṣiddhā | tasyā narakādiphalapradānaṃ niyamitam | yo brāhmaṇāyāvaguret yo māmakāyāvaguret taṃ śatena yātayād iti vākyaśeṣebhyaḥ | sā tataḥ svabhāvān na cyavate | prāyaścitteṣu viśeṣaṃ vakṣyāmaḥ | ahiṃsraṃ vihitam | tasyāpi neṣṭaphaladānāt svabhāvacyutir asti | dharmādharmayor eva viśeṣāyate | vihitaṃ karma dharmaḥ, pratiṣiddham adharmaḥ, tayor viśeṣāḥ satyānṛtādayaḥ | satyaṃ vihitam anṛtaṃ pratiṣiddham | evaṃ sarvāṇi pūrvottarapadāni vihitapratiṣiddhaviśeṣapradarśanāni |

• (1.30) avyabhicaritadṛṣṭakāryakāraṇasaṃbandhīni karmāṇi | dṛṣṭāntaḥ yathartuliṅgānīti | śeṣaṃ samānam || 1.30 ||