Manusmriti [sanskrit]

by Ganganatha Jha | 1920 | 23,875 words | ISBN-10: 8120811550 | ISBN-13: 9788120811553

This is the Sanskrit text of the Manusmriti, which is a collection of verses dealing with ‘Dharma-Shastra’—the ancient Indian science of Law, Spritual life, Politics and Ethics.. The edition of this text is based on Ganganatha Jha’s translation of the same text.

Chapter 12

cāturvarṇyasya kṛtsno'yamukto dharmastvayā'naghaḥ |
karmaṇāṃ phalanirvṛttiṃ śaṃsa nastattvataḥ parām || 1 ||
[Analyze grammar]

sa tānuvāca dharmātmā maharṣīnmānavo bhṛguḥ |
asya sarvasya śṛṇuta karmayogasya nirṇayam || 2 ||
[Analyze grammar]

śubhāśubhaphalaṃ karma manovāgdehasambhavam |
karmajā gatayo nṝṇāmuttamādhamamadhyamaḥ || 3 ||
[Analyze grammar]

tasyaiha trividhasyāpi tryadhiṣṭhānasya dehinaḥ |
daśalakṣaṇayuktasya mano vidyātpravartakam || 4 ||
[Analyze grammar]

paradravyeṣvabhidhyānaṃ manasā'niṣṭacintanam |
vitathābhiniveśaśca trividhaṃ karma mānasam || 5 ||
[Analyze grammar]

pāruṣyamanṛtaṃ caiva paiśunyaṃ cāpi sarvaśaḥ |
asambaddhapralāpaśca vāṅmayaṃ syāccaturvidham || 6 ||
[Analyze grammar]

adattānāmupādānaṃ hiṃsā caivāvidhānataḥ |
paradāropasevā ca śārīraṃ trividhaṃ smṛtam || 7 ||
[Analyze grammar]

mānasaṃ manasevāyamupabhuṅkte śubhāśubham |
vācā vācā kṛtaṃ karma kāyeneva ca kāyikam || 8 ||
[Analyze grammar]

śarīrajaiḥ karmadoṣairyāti sthāvaratāṃ naraḥ |
vācikaiḥ pakṣimṛgatāṃ mānasairantyajātitām || 9 ||
[Analyze grammar]

vāgdaṇḍo'tha manodaṇḍaḥ kāyadaṇḍastathaiva ca |
yasyaite nihitā buddhau tridaṇḍīti sa ucyate || 10 ||
[Analyze grammar]

tridaṇḍametannikṣipya sarvabhūteṣu mānavaḥ |
kāmakrodhau tu saṃyamya tataḥ siddhiṃ niyacchati || 11 ||
[Analyze grammar]

yo'syātmanaḥ kārayitā taṃ kṣetrajñaṃ pracakṣate |
yaḥ karoti tu karmāṇi sa bhūtātmocyate budhaiḥ || 12 ||
[Analyze grammar]

jīvasañjño'ntarātmā'nyaḥ sahajaḥ sarvadehinām |
yena vedayate sarvaṃ sukhaṃ duḥkhaṃ ca janmasu || 13 ||
[Analyze grammar]

tāvubhau bhūtasampṛktau mahān kṣetrajña eva ca |
uccāvaceṣu bhūteṣu sthitaṃ taṃ vyāpya tiṣṭhataḥ || 14 ||
[Analyze grammar]

asaṅkhyā mūrtayastasya niṣpatanti śarīrataḥ |
uccāvacāni bhūtāni satataṃ ceṣṭayanti yāḥ || 15 ||
[Analyze grammar]

pañcabhya eva mātrābhyaḥ pretya duṣkṛtināṃ nṛṇām |
śarīraṃ yātanārthīyamanyadutpadyate dhruvam || 16 ||
[Analyze grammar]

tenānubhūya tā yāmīḥ śarīreṇaiha yātanāḥ |
tāsveva bhūtamātrāsu pralīyante vibhāgaśaḥ || 17 ||
[Analyze grammar]

so'nubhūyāsukhodarkāndoṣānviṣayasaṅgajān |
vyapetakalmaṣo'bhyeti tāvevobhau mahaujasau || 18 ||
[Analyze grammar]

tau dharmaṃ paśyatastasya pāpaṃ cātandritau saha |
yābhyāṃ prāpnoti sampṛktaḥ pretyeha ca sukhāsukham || 19 ||
[Analyze grammar]

yadyācarati dharmaṃ sa prāyaśo'dharmamalpaśaḥ |
taireva cāvṛto bhūtaiḥ svarge sukhamupāśnute || 20 ||
[Analyze grammar]

yadi tu prāyaśo'dharmaṃ sevate dharmamalpaśaḥ |
tairbhūtaiḥ sa parityakto yāmīḥ prāpnoti yātanāḥ || 21 ||
[Analyze grammar]

yāmīstā yātanāḥ prāpya sa jīvo vītakalmaṣaḥ |
tānyeva pañca bhūtāni punarapyeti bhāgaśaḥ || 22 ||
[Analyze grammar]

etā dṛṣṭvā'sya jīvasya gatīḥ svenaiva cetasā |
dharmato'dharmataścaiva dharme dadhyātsadā manaḥ || 23 ||
[Analyze grammar]

sattvaṃ rajastamaścaiva trīnvidyādātmano guṇān |
yairvyāpyaimān sthito bhāvānmahān sarvānaśeṣataḥ || 24 ||
[Analyze grammar]

yo yadeṣāṃ guṇo dehe sākalyenātiricyate |
sa tadā tadguṇaprāyaṃ taṃ karoti śarīriṇam || 25 ||
[Analyze grammar]

sattvaṃ jñānaṃ tamo'jñānaṃ rāgadveṣau rajaḥ smṛtam |
etadvyāptimadeteṣāṃ sarvabhūtāśritaṃ vapuḥ || 26 ||
[Analyze grammar]

tatra yatprītisaṃyuktaṃ kiṃ cidātmani lakṣayet |
praśāntamiva śuddhābhaṃ sattvaṃ tadupadhārayet || 27 ||
[Analyze grammar]

yattu duḥkhasamāyuktamaprītikaramātmanaḥ |
tad rajo pratīpaṃ vidyātsatataṃ hāri dehinām || 28 ||
[Analyze grammar]

yattu syānmohasaṃyuktamavyaktaṃ viṣayātmakam |
apratarkyamavijñeyaṃ tamastadupadhārayet || 29 ||
[Analyze grammar]

trayāṇāmapi caiteṣāṃ guṇānāṃ yaḥ phalodayaḥ |
agryo madhyo jaghanyaśca taṃ pravakṣyāmyaśeṣataḥ || 30 ||
[Analyze grammar]

vedābhyāsastapo jñānaṃ śaucamindriyanigrahaḥ |
dharmakriyā'tmacintā ca sāttvikaṃ guṇalakṣaṇam || 31 ||
[Analyze grammar]

ārambharucitā'dhairyamasatkāryaparigrahaḥ |
viṣayopasevā cājasraṃ rājasaṃ guṇalakṣaṇam || 32 ||
[Analyze grammar]

lobhaḥ svapno'dhṛtiḥ krauryaṃ nāstikyaṃ bhinnavṛttitā |
yāciṣṇutā pramādaśca tāmasaṃ guṇalakṣaṇam || 33 ||
[Analyze grammar]

trayāṇāmapi caiteṣāṃ guṇānāṃ triṣu tiṣṭhatām |
idaṃ sāmāsikaṃ jñeyaṃ kramaśo guṇalakṣaṇam || 34 ||
[Analyze grammar]

yatkarma kṛtvā kurvaṃśca kariṣyaṃścaiva lajjati |
tajjñeyaṃ viduṣā sarvaṃ tāmasaṃ guṇalakṣaṇam || 35 ||
[Analyze grammar]

yenāsmin karmaṇā loke khyātimicchati puṣkalām |
na ca śocatyasampattau tadvijñeyaṃ tu rājasam || 36 ||
[Analyze grammar]

yatsarveṇecchati jñātuṃ yanna lajjati cācaran |
yena tuṣyati cātmā'sya tatsattvaguṇalakṣaṇam || 37 ||
[Analyze grammar]

tamaso lakṣaṇaṃ kāmo rajasastvartha ucyate |
sattvasya lakṣaṇaṃ dharmaḥ śraiṣṭhyameṣāṃ yathottaram || 38 ||
[Analyze grammar]

yena yastu guṇenaiṣāṃ saṃsarānpratipadyate |
tān samāsena vakṣyāmi sarvasyāsya yathākramam || 39 ||
[Analyze grammar]

devatvaṃ sāttvikā yānti manuṣyatvaṃ ca rājasāḥ |
tiryaktvaṃ tāmasā nityamityeṣā trividhā gatiḥ || 40 ||
[Analyze grammar]

trividhā trividhaiṣā tu vijñeyā gauṇikī gatiḥ |
adhamā madhyamāgryā ca karmavidyāviśeṣataḥ || 41 ||
[Analyze grammar]

sthāvarāḥ kṛmikīṭāśca matsyāḥ sarpāḥ sakacchapāḥ |
paśavaśca mṛgāścaiva jaghanyā tāmasī gatiḥ || 42 ||
[Analyze grammar]

hastinaśca turaṅgāśca śūdrā mlecchāśca garhitāḥ |
siṃhā vyāghrā varāhāśca madhyamā tāmasī gatiḥ || 43 ||
[Analyze grammar]

cāraṇāśca suparṇāśca puruṣāścaiva dāmbhikāḥ |
rakṣāṃsi ca piśācāśca tāmasīṣūttamā gatiḥ || 44 ||
[Analyze grammar]

jhallā mallā naṭāścaiva puruṣāḥ śastravṛttayaḥ |
dyūtapānaprasaktāśca jaghanyā rājasī gatiḥ || 45 ||
[Analyze grammar]

rājānaḥ kṣatriyāścaiva rājñāṃ caiva purohitāḥ |
vādayuddhapradhānāśca madhyamā rājasī gatiḥ || 46 ||
[Analyze grammar]

gandharvā guhyakā yakṣā vibudhānucarāśca ye |
tathaivāpsarasaḥ sarvā rājasīṣūttamā gatiḥ || 47 ||
[Analyze grammar]

tāpasā yatayo viprā ye ca vaimānikā gaṇāḥ |
nakṣatrāṇi ca daityāśca prathamā sāttvikī gatiḥ || 48 ||
[Analyze grammar]

yajvāna ṛṣayo devā vedā jyotīṃṣi vatsarāḥ |
pitaraścaiva sādhyāśca dvitīyā sāttvikī gatiḥ || 49 ||
[Analyze grammar]

brahmā viśvasṛjo dharmo mahānavyaktameva ca |
uttamāṃ sāttvikīmetāṃ gatimāhurmanīṣiṇaḥ || 50 ||
[Analyze grammar]

eṣa sarvaḥ samuddiṣṭastriprakārasya karmaṇaḥ |
trividhastrividhaḥ kṛtsnaḥ saṃsāraḥ sārvabhautikaḥ || 51 ||
[Analyze grammar]

indriyāṇāṃ prasaṅgena dharmasyāsevanena ca |
pāpān saṃyānti saṃsārānavidvāṃso narādhamāḥ || 52 ||
[Analyze grammar]

yāṃ yāṃ yoniṃ tu jīvo'yaṃ yena yenaiha karmaṇā |
kramaśo yāti loke'smiṃstattatsarvaṃ nibodhata || 53 ||
[Analyze grammar]

bahūnvarṣagaṇān ghorānnarakānprāpya tatkṣayāt |
saṃsārānpratipadyante mahāpātakinastvimān || 54 ||
[Analyze grammar]

śvasūkarakharoṣṭrāṇāṃ go'jāvimṛgapakṣiṇām |
caṇḍālapukkasānāṃ ca brahmahā yonimṛcchati || 55 ||
[Analyze grammar]

kṛmikīṭapataṅgānāṃ viḍbhujāṃ caiva pakṣiṇām |
hiṃsrāṇāṃ caiva sattvānāṃ surāpo brāhmaṇo vrajet || 56 ||
[Analyze grammar]

lūtā'hisaraṭānāṃ ca tiraścāṃ cāmbucāriṇām |
hiṃsrāṇāṃ ca piśācānāṃ steno vipraḥ sahasraśaḥ || 57 ||
[Analyze grammar]

tṛṇagulmalatānāṃ ca kravyādāṃ daṃṣṭriṇāmapi |
krūrakarmakṛtāṃ caiva śataśo gurutalpagaḥ || 58 ||
[Analyze grammar]

hiṃsrā bhavanti kravyādāḥ kṛmayo'medhyabhakṣiṇaḥ |
parasparādinaḥ stenāḥ pretyāntyastrīniṣeviṇaḥ || 59 ||
[Analyze grammar]

saṃyogaṃ patitairgatvā parasyaiva ca yoṣitam |
apahṛtya ca viprasvaṃ bhavati brahmarākṣasaḥ || 60 ||
[Analyze grammar]

maṇimuktāpravālāni hṛtvā lobhena mānavaḥ |
vividhāṇi ca ratnāni jāyate hemakartṛṣu || 61 ||
[Analyze grammar]

dhānyaṃ hṛtvā bhavatyākhuḥ kāṃsyaṃ haṃso jalaṃ plavaḥ |
madhu daṃśaḥ payaḥ kāko rasaṃ śvā nakulo ghṛtam || 62 ||
[Analyze grammar]

māṃsaṃ gṛdhro vapāṃ madgustailaṃ tailapakaḥ khagaḥ |
cīrīvākastu lavaṇaṃ balākā śakunirdadhi || 63 ||
[Analyze grammar]

kauśeyaṃ tittirirhṛtvā kṣaumaṃ hṛtvā tu darduraḥ |
kārpāsatāntavaṃ krauñco godhā gāṃ vāggudo guḍam || 64 ||
[Analyze grammar]

chucchundariḥ śubhān gandhānpatraśākaṃ tu barhiṇaḥ |
śvāvitkṛtānnaṃ vividhamakṛtānnaṃ tu śalyakaḥ || 65 ||
[Analyze grammar]

bako bhavati hṛtvā'gniṃ gṛhakārī hyupaskaram |
raktāni hṛtvā vāsāṃsi jāyate jīvajīvakaḥ || 66 ||
[Analyze grammar]

vṛko mṛgaibhaṃ vyāghro'śvaṃ phalamūlaṃ tu markaṭaḥ |
strīṃ ṛkṣaḥ stokako vāri yānānyuṣṭraḥ paśūnajaḥ || 67 ||
[Analyze grammar]

yadvā tadvā paradravyamapahṛtya balānnaraḥ |
avaśyaṃ yāti tiryaktvaṃ jagdhvā caivāhutaṃ haviḥ || 68 ||
[Analyze grammar]

striyo'pyetena kalpena hṛtvā doṣamavāpnuyuḥ |
eteṣāmeva jantūnāṃ bhāryātvamupayānti tāḥ || 69 ||
[Analyze grammar]

svebhyaḥ svebhyastu karmabhyaścyutā varṇā hyanāpadi |
pāpān saṃsṛtya saṃsārānpreṣyatāṃ yānti śatruṣu || 70 ||
[Analyze grammar]

vāntāśyulkāmukhaḥ preto vipro dharmātsvakāccyutaḥ |
amedhyakuṇapāśī ca kṣatriyaḥ kaṭapūtanaḥ || 71 ||
[Analyze grammar]

maitrākṣajyotikaḥ preto vaiśyo bhavati pūyabhuk |
cailāśakaśca bhavati śūdro dharmātsvakāccyutaḥ || 72 ||
[Analyze grammar]

yathā yathā niṣevante viṣayānviṣayātmakāḥ |
tathā tathā kuśalatā teṣāṃ teṣūpajāyate || 73 ||
[Analyze grammar]

te'bhyāsātkarmaṇāṃ teṣāṃ pāpānāmalpabuddhayaḥ |
samprāpnuvanti duḥkhāni tāsu tāsviha yoniṣu || 74 ||
[Analyze grammar]

tāmisrādiṣu cogreṣu narakeṣu vivartanam |
asipatravanādīni bandhanachedanāni ca || 75 ||
[Analyze grammar]

vividhāścaiva sampīḍāḥ kākolūkaiśca bhakṣaṇam |
karambhavālukātāpān kumbhīpākāṃśca dāruṇān || 76 ||
[Analyze grammar]

sambhavāṃśca viyonīṣu duḥkhaprāyāsu nityaśaḥ |
śītātapābhighātāṃśca vividhāni bhayāni ca || 77 ||
[Analyze grammar]

asakṛdgarbhavāseṣu vāsaṃ janma ca dāruṇam |
bandhanāni ca kāṣṭhāni parapreṣyatvameva ca || 78 ||
[Analyze grammar]

bandhupriyaviyogāṃśca saṃvāsaṃ caiva durjanaiḥ |
dravyārjanaṃ ca nāśaṃ ca mitrāmitrasya cārjanam || 79 ||
[Analyze grammar]

jarāṃ caivāpratīkārāṃ vyādhibhiścopapīḍanam |
kleśāṃśca vividhāṃstāṃstānmṛtyumeva ca durjayam || 80 ||
[Analyze grammar]

yādṛśena tu bhāvena yadyatkarma niṣevate |
tādṛśena śarīreṇa tattatphalamupāśnute || 81 ||
[Analyze grammar]

eṣa sarvaḥ samuddiṣṭaḥ karmaṇāṃ vaḥ phalodayaḥ |
naiḥśreyasakaraṃ karma viprasyedaṃ nibodhata || 82 ||
[Analyze grammar]

vedābhyāsastapo jñānamindriyāṇāṃ ca saṃyamaḥ |
ahiṃsā gurusevā ca niḥśreyasakaraṃ param || 83 ||
[Analyze grammar]

sarveṣāmapi caiteṣāṃ śubhānāmiha karmaṇām |
kiṃ citśreyaskarataraṃ karmoktaṃ puruṣaṃ prati || 84 ||
[Analyze grammar]

sarveṣāmapi caiteṣāmātmajñānaṃ paraṃ smṛtam |
tad hyagryaṃ sarvavidyānāṃ prāpyate hyamṛtaṃ tataḥ || 85 ||
[Analyze grammar]

ṣaṇṇāmeṣāṃ tu sarveṣāṃ karmaṇāṃ pretya caiha ca |
śreyaskarataraṃ jñeyaṃ sarvadā karma vaidikam || 86 ||
[Analyze grammar]

vaidike karmayoge tu sarvāṇyetānyaśeṣataḥ |
antarbhavanti kramaśastasmiṃstasmin kriyāvidhau || 87 ||
[Analyze grammar]

sukhābhyudayikaṃ caiva naiḥśreyasikameva ca |
pravṛttaṃ ca nivṛttaṃ ca dvividhaṃ karma vaidikam || 88 ||
[Analyze grammar]

iha cāmutra vā kāmyaṃ pravṛttaṃ karma kīrtyate |
niṣkāmaṃ jñātapūrvaṃ tu nivṛttamupadiśyate || 89 ||
[Analyze grammar]

pravṛttaṃ karma saṃsevyaṃ devānāmeti sāmyatām |
nivṛttaṃ sevamānastu bhūtānyatyeti pañca vai || 90 ||
[Analyze grammar]

sarvabhūteṣu cātmānaṃ sarvabhūtāni cātmani |
samaṃ paśyannātmayājī svārājyamadhigacchati || 91 ||
[Analyze grammar]

yathoktānyapi karmāṇi parihāya dvijottamaḥ |
ātmajñāne śame ca syādvedābhyāse ca yatnavān || 92 ||
[Analyze grammar]

etad hi janmasāphalyaṃ brāhmaṇasya viśeṣataḥ |
prāpyaitatkṛtakṛtyo hi dvijo bhavati nānyathā || 93 ||
[Analyze grammar]

pitṛdevamanuṣyāṇāṃ vedaścakṣuḥ sanātanam |
aśakyaṃ cāprameyaṃ ca vedaśāstramiti sthitiḥ || 94 ||
[Analyze grammar]

yā vedabāhyāḥ smṛtayo yāśca kāśca kudṛṣṭayaḥ |
sarvāstā niṣphalāḥ pretya tamoniṣṭhā hi tāḥ smṛtāḥ || 95 ||
[Analyze grammar]

utpadyante cyavante ca yānyato'nyāni kāni cit |
tānyarvākkālikatayā niṣphalānyanṛtāni ca || 96 ||
[Analyze grammar]

cāturvarṇyaṃ trayo lokāścatvāraścāśramāḥ pṛthak |
bhūtaṃ bhavyaṃ bhaviṣyaṃ ca sarvaṃ vedātprasidhyati || 97 ||
[Analyze grammar]

śabdaḥ sparśaśca rūpaṃ ca raso gandhaśca pañcamaḥ |
vedādeva prasūyante prasūtirguṇakarmataḥ || 98 ||
[Analyze grammar]

bibharti sarvabhūtāni vedaśāstraṃ sanātanam |
tasmādetatparaṃ manye yatjantorasya sādhanam || 99 ||
[Analyze grammar]

senāpatyaṃ ca rājyaṃ ca daṇḍanetṛtvameva ca |
sarvalokādhipatyaṃ ca vedaśāstravidarhati || 100 ||
[Analyze grammar]

yathā jātabalo vahnirdahatyārdrānapi drumān |
tathā dahati vedajñaḥ karmajaṃ doṣamātmanaḥ || 101 ||
[Analyze grammar]

vedaśāstrārthatattvajño yatra tatrāśrame vasan |
ihaiva loke tiṣṭhan sa brahmabhūyāya kalpate || 102 ||
[Analyze grammar]

ajñebhyo granthinaḥ śreṣṭhā granthibhyo dhāriṇo varāḥ |
dhāribhyo jñāninaḥ śreṣṭhā jñānibhyo vyavasāyinaḥ || 103 ||
[Analyze grammar]

tapo vidyā ca viprasya niḥśreyasakaraṃ param |
tapasā kilbiṣaṃ hanti vidyayā'mṛtamaśnute || 104 ||
[Analyze grammar]

pratyakṣaṃ cānumānaṃ ca śāstraṃ ca vividhā''gamam |
trayaṃ suviditaṃ kāryaṃ dharmaśuddhimabhīpsatā || 105 ||
[Analyze grammar]

ārṣaṃ dharmopadeśaṃ ca vedaśāstrāvirodhinā |
yastarkeṇānusandhatte sa dharmaṃ veda naitaraḥ || 106 ||
[Analyze grammar]

naiḥśreyasamidaṃ karma yathoditamaśeṣataḥ |
mānavasyāsya śāstrasya rahasyamupadiśyate || 107 ||
[Analyze grammar]

anāmnāteṣu dharmeṣu kathaṃ syāditi cedbhavet |
yaṃ śiṣṭā brāhmaṇā brūyuḥ sa dharmaḥ syādaśaṅkitaḥ || 108 ||
[Analyze grammar]

dharmeṇādhigato yaistu vedaḥ saparibṛṃhaṇaḥ |
te śiṣṭā brāhmaṇā jñeyāḥ śrutipratyakṣahetavaḥ || 109 ||
[Analyze grammar]

daśāvarā vā pariṣadyaṃ dharmaṃ parikalpayet |
try'varā vā'pi vṛttasthā taṃ dharmaṃ na vicālayet || 110 ||
[Analyze grammar]

traividyo hetukastarkī nairukto dharmapāṭhakaḥ |
trayaścāśramiṇaḥ pūrve pariṣatsyāddaśāvarā || 111 ||
[Analyze grammar]

ṛgvedavidyajurvidca sāmavedavideva ca |
try'varā pariṣadjñeyā dharmasaṃśayanirṇaye || 112 ||
[Analyze grammar]

eko'pi vedaviddharmaṃ yaṃ vyavasyeddvijottamaḥ |
sa vijñeyaḥ paro dharmo nājñānāmudito'yutaiḥ || 113 ||
[Analyze grammar]

avratānāmamantrāṇāṃ jātimātropajīvinām |
sahasraśaḥ sametānāṃ pariṣattvaṃ na vidyate || 114 ||
[Analyze grammar]

yaṃ vadanti tamobhūtā mūrkhā dharmamatadvidaḥ |
tatpāpaṃ śatadhā bhūtvā tadvaktṝnanugacchati || 115 ||
[Analyze grammar]

etadvo'bhihitaṃ sarvaṃ niḥśreyasakaraṃ param |
asmādapracyuto vipraḥ prāpnoti paramāṃ gatim || 116 ||
[Analyze grammar]

evaṃ sa bhagavāndevo lokānāṃ hitakāmyayā |
dharmasya paramaṃ guhyaṃ mamedaṃ sarvamuktavān || 117 ||
[Analyze grammar]

sarvamātmani sampaśyetsatcāsatca samāhitaḥ |
sarvaṃ hyātmani sampaśyannādharme kurute manaḥ || 118 ||
[Analyze grammar]

ātmaiva devatāḥ sarvāḥ sarvamātmanyavasthitam |
ātmā hi janayatyeṣāṃ karmayogaṃ śarīriṇām || 119 ||
[Analyze grammar]

khaṃ saṃniveśayetkheṣu ceṣṭanasparśane'nilam |
paktidṛṣṭyoḥ paraṃ tejaḥ snehe'po gāṃ ca mūrtiṣu || 120 ||
[Analyze grammar]

manasīnduṃ diśaḥ śrotre krānte viṣṇuṃ bale haram |
vācyagniṃ mitramutsarge prajane ca prajāpatim || 121 ||
[Analyze grammar]

praśāsitāraṃ sarveṣāmaṇīyāṃsamaṇorapi |
rukmābhaṃ svapnadhīgamyaṃ vidyāttaṃ puruṣaṃ param || 122 ||
[Analyze grammar]

etameke vadantyagniṃ manumanye prajāpatim |
indrameke pare prāṇamapare brahma śāśvatam || 123 ||
[Analyze grammar]

eṣa sarvāṇi bhūtāni pañcabhirvyāpya mūrtibhiḥ |
janmavṛddhikṣayairnityaṃ saṃsārayati cakravat || 124 ||
[Analyze grammar]

evaṃ yaḥ sarvabhūteṣu paśyatyātmānamātmanā |
sa sarvasamatāmetya brahmābhyeti paraṃ padam || 125 ||
[Analyze grammar]

ityetanmānavaṃ śāstraṃ bhṛguproktaṃ paṭhandvijaḥ |
bhavatyācāravānnityaṃ yatheṣṭāṃ prāpnuyādgatim || 126 ||
[Analyze grammar]

Other editions:

Also see the following editions of the Sanskrit text or (alternative) English translations of the Chapter 12

Cover of edition (1999)

Manusmrti (Sanskrit and English)
by Ganganath Jha (1999)

Publisher: Motilal Banarsidass Publishers Pvt. Ltd.; ISBN-10: 8120811550; ISBN-13: 9788120811553.

Buy now!
Let's grow together!

I humbly request your help to keep doing what I do best: provide the world with unbiased sources, definitions and images. Your donation direclty influences the quality and quantity of knowledge, wisdom and spiritual insight the world is exposed to.

Let's make the world a better place together!

Like what you read? Consider supporting this website: