Chapter 13

saṃjaya uvāca |
tataḥ sa pāṇḍavānīke janayaṃstumulaṃ mahat |
vyacaratpāṇḍavāndroṇo dahankakṣamivānalaḥ || 1 ||
[Analyze grammar]

nirdahantamanīkāni sākṣādagnimivotthitam |
dṛṣṭvā rukmarathaṃ yuddhe samakampanta sṛñjayāḥ || 2 ||
[Analyze grammar]

pratataṃ cāsyamānasya dhanuṣo'syāśukāriṇaḥ |
jyāghoṣaḥ śrūyate'tyarthaṃ visphūrjitamivāśaneḥ || 3 ||
[Analyze grammar]

rathinaḥ sādinaścaiva nāgānaśvānpadātinaḥ |
raudrā hastavatā muktāḥ pramathnanti sma sāyakāḥ || 4 ||
[Analyze grammar]

nānadyamānaḥ parjanyaḥ sānilaḥ śucisaṃkṣaye |
aśmavarṣamivāvarṣatpareṣāmāvahadbhayam || 5 ||
[Analyze grammar]

vyacaratsa tadā rājansenāṃ vikṣobhayanprabhuḥ |
vardhayāmāsa saṃtrāsaṃ śātravāṇāmamānuṣam || 6 ||
[Analyze grammar]

tasya vidyudivābhreṣu cāpaṃ hemapariṣkṛtam |
bhramadrathāmbude tasmindṛśyate sma punaḥ punaḥ || 7 ||
[Analyze grammar]

sa vīraḥ satyavānprājño dharmanityaḥ sudāruṇaḥ |
yugāntakāle yanteva raudrāṃ prāskandayannadīm || 8 ||
[Analyze grammar]

amarṣavegaprabhavāṃ kravyādagaṇasaṃkulām |
balaughaiḥ sarvataḥ pūrṇāṃ vīravṛkṣāpahāriṇīm || 9 ||
[Analyze grammar]

śoṇitodāṃ rathāvartāṃ hastyaśvakṛtarodhasam |
kavacoḍupasaṃyuktāṃ māṃsapaṅkasamākulām || 10 ||
[Analyze grammar]

medomajjāsthisikatāmuṣṇīṣavaraphenilām |
saṃgrāmajaladāpūrṇāṃ prāsamatsyasamākulām || 11 ||
[Analyze grammar]

naranāgāśvasaṃbhūtāṃ śaravegaughavāhinīm |
śarīradāruśṛṅgāṭāṃ bhujanāgasamākulām || 12 ||
[Analyze grammar]

uttamāṅgopalatalāṃ nistriṃśajhaṣasevitām |
rathanāgahradopetāṃ nānābharaṇanīrajām || 13 ||
[Analyze grammar]

mahārathaśatāvartāṃ bhūmireṇūrmimālinīm |
mahāvīryavatāṃ saṃkhye sutarāṃ bhīrudustarām || 14 ||
[Analyze grammar]

śūravyālasamākīrṇāṃ prāṇivāṇijasevitām |
chinnacchatramahāhaṃsāṃ mukuṭāṇḍajasaṃkulām || 15 ||
[Analyze grammar]

cakrakūrmāṃ gadānakrāṃ śarakṣudrajhaṣākulām |
baḍagṛdhrasṛgālānāṃ ghorasaṃghairniṣevitām || 16 ||
[Analyze grammar]

nihatānprāṇinaḥ saṃkhye droṇena balinā śaraiḥ |
vahantīṃ pitṛlokāya śataśo rājasattama || 17 ||
[Analyze grammar]

śarīraśatasaṃbādhāṃ keśaśaivalaśādvalām |
nadīṃ prāvartayadrājanbhīrūṇāṃ bhayavardhinīm || 18 ||
[Analyze grammar]

taṃ jayantamanīkāni tāni tānyeva bhārata |
sarvato'bhyadravandroṇaṃ yudhiṣṭhirapurogamāḥ || 19 ||
[Analyze grammar]

tānabhidravataḥ śūrāṃstāvakā dṛḍhakārmukāḥ |
sarvataḥ pratyagṛhṇanta tadabhūllomaharṣaṇam || 20 ||
[Analyze grammar]

śatamāyastu śakuniḥ sahadevaṃ samādravat |
saniyantṛdhvajarathaṃ vivyādha niśitaiḥ śaraiḥ || 21 ||
[Analyze grammar]

tasya mādrīsutaḥ ketuṃ dhanuḥ sūtaṃ hayānapi |
nātikruddhaḥ śaraiśchittvā ṣaṣṭyā vivyādha mātulam || 22 ||
[Analyze grammar]

saubalastu gadāṃ gṛhya pracaskanda rathottamāt |
sa tasya gadayā rājanrathātsūtamapātayat || 23 ||
[Analyze grammar]

tatastau virathau rājangadāhastau mahābalau |
cikrīḍatū raṇe śūrau saśṛṅgāviva parvatau || 24 ||
[Analyze grammar]

droṇaḥ pāñcālarājānaṃ viddhvā daśabhirāśugaiḥ |
bahubhistena cābhyastastaṃ vivyādha śatādhikaiḥ || 25 ||
[Analyze grammar]

viviṃśatiṃ bhīmaseno viṃśatyā niśitaiḥ śaraiḥ |
viddhvā nākampayadvīrastadadbhutamivābhavat || 26 ||
[Analyze grammar]

viviṃśatistu sahasā vyaśvaketuśarāsanam |
bhīmaṃ cakre mahārāja tataḥ sainyānyapūjayan || 27 ||
[Analyze grammar]

sa tanna mamṛṣe vīraḥ śatrorvijayamāhave |
tato'sya gadayā dāntānhayānsarvānapātayat || 28 ||
[Analyze grammar]

śalyastu nakulaṃ vīraḥ svasrīyaṃ priyamātmanaḥ |
vivyādha prahasanbāṇairlāḍayankopayanniva || 29 ||
[Analyze grammar]

tasyāśvānātapatraṃ ca dhvajaṃ sūtamatho dhanuḥ |
nipātya nakulaḥ saṃkhye śaṅkhaṃ dadhmau pratāpavān || 30 ||
[Analyze grammar]

dhṛṣṭaketuḥ kṛpenāstāñchittvā bahuvidhāñśarān |
kṛpaṃ vivyādha saptatyā lakṣma cāsyāharattribhiḥ || 31 ||
[Analyze grammar]

taṃ kṛpaḥ śaravarṣeṇa mahatā samavākirat |
nivārya ca raṇe vipro dhṛṣṭaketumayodhayat || 32 ||
[Analyze grammar]

sātyakiḥ kṛtavarmāṇaṃ nārācena stanāntare |
viddhvā vivyādha saptatyā punaranyaiḥ smayanniva || 33 ||
[Analyze grammar]

saptasaptatibhirbhojastaṃ viddhvā niśitaiḥ śaraiḥ |
nākampayata śaineyaṃ śīghro vāyurivācalam || 34 ||
[Analyze grammar]

senāpatiḥ suśarmāṇaṃ śīghraṃ marmasvatāḍayat |
sa cāpi taṃ tomareṇa jatrudeśe atāḍayat || 35 ||
[Analyze grammar]

vaikartanaṃ tu samare virāṭaḥ pratyavārayat |
saha matsyairmahāvīryaistadadbhutamivābhavat || 36 ||
[Analyze grammar]

tatpauruṣamabhūttatra sūtaputrasya dāruṇam |
yatsainyaṃ vārayāmāsa śaraiḥ saṃnataparvabhiḥ || 37 ||
[Analyze grammar]

drupadastu svayaṃ rājā bhagadattena saṃgataḥ |
tayoryuddhaṃ mahārāja citrarūpamivābhavat |
bhūtānāṃ trāsajananaṃ cakrāte'straviśāradau || 38 ||
[Analyze grammar]

bhūriśravā raṇe rājanyājñaseniṃ mahāratham |
mahatā sāyakaughena chādayāmāsa vīryavān || 39 ||
[Analyze grammar]

śikhaṇḍī tu tataḥ kruddhaḥ saumadattiṃ viśāṃ pate |
navatyā sāyakānāṃ tu kampayāmāsa bhārata || 40 ||
[Analyze grammar]

rākṣasau bhīmakarmāṇau haiḍimbālambusāvubhau |
cakrāte'tyadbhutaṃ yuddhaṃ parasparavadhaiṣiṇau || 41 ||
[Analyze grammar]

māyāśatasṛjau dṛptau māyābhiritaretaram |
antarhitau ceratustau bhṛśaṃ vismayakāriṇau || 42 ||
[Analyze grammar]

cekitāno'nuvindena yuyudhe tvatibhairavam |
yathā devāsure yuddhe balaśakrau mahābalau || 43 ||
[Analyze grammar]

lakṣmaṇaḥ kṣatradevena vimardamakarodbhṛśam |
yathā viṣṇuḥ purā rājanhiraṇyākṣeṇa saṃyuge || 44 ||
[Analyze grammar]

tataḥ prajavitāśvena vidhivatkalpitena ca |
rathenābhyapatadrājansaubhadraṃ pauravo nadan || 45 ||
[Analyze grammar]

tato'bhiyāya tvarito yuddhākāṅkṣī mahābalaḥ |
tena cakre mahadyuddhamabhimanyurariṃdamaḥ || 46 ||
[Analyze grammar]

pauravastvatha saubhadraṃ śaravrātairavākirat |
tasyārjunirdhvajaṃ chatraṃ dhanuścorvyāmapātayat || 47 ||
[Analyze grammar]

saubhadraḥ pauravaṃ tvanyairviddhvā saptabhirāśugaiḥ |
pañcabhistasya vivyādha hayānsūtaṃ ca sāyakaiḥ || 48 ||
[Analyze grammar]

tataḥ saṃharṣayansenāṃ siṃhavadvinadanmuhuḥ |
samādattārjunistūrṇaṃ pauravāntakaraṃ śaram || 49 ||
[Analyze grammar]

dvābhyāṃ śarābhyāṃ hārdikyaścakarta saśaraṃ dhanuḥ |
tadutsṛjya dhanuśchinnaṃ saubhadraḥ paravīrahā |
udbabarha sitaṃ khaḍgamādadānaḥ śarāvaram || 50 ||
[Analyze grammar]

sa tenānekatāreṇa carmaṇā kṛtahastavat |
bhrāntāsiracaranmārgāndarśayanvīryamātmanaḥ || 51 ||
[Analyze grammar]

bhrāmitaṃ punarudbhrāntamādhūtaṃ punarucchritam |
carmanistriṃśayo rājannirviśeṣamadṛśyata || 52 ||
[Analyze grammar]

sa pauravarathasyeṣāmāplutya sahasā nadan |
pauravaṃ rathamāsthāya keśapakṣe parāmṛśat || 53 ||
[Analyze grammar]

jaghānāsya padā sūtamasināpātayaddhvajam |
vikṣobhyāmbhonidhiṃ tārkṣyastaṃ nāgamiva cākṣipat || 54 ||
[Analyze grammar]

tamākalitakeśāntaṃ dadṛśuḥ sarvapārthivāḥ |
ukṣāṇamiva siṃhena pātyamānamacetanam || 55 ||
[Analyze grammar]

tamārjunivaśaṃ prāptaṃ kṛṣyamāṇamanāthavat |
pauravaṃ patitaṃ dṛṣṭvā nāmṛṣyata jayadrathaḥ || 56 ||
[Analyze grammar]

sa barhiṇamahāvājaṃ kiṅkiṇīśatajālavat |
carma cādāya khaḍgaṃ ca nadanparyapatadrathāt || 57 ||
[Analyze grammar]

tataḥ saindhavamālokya kārṣṇirutsṛjya pauravam |
utpapāta rathāttūrṇaṃ śyenavannipapāta ca || 58 ||
[Analyze grammar]

prāsapaṭṭiśanistriṃśāñśatrubhiḥ saṃpraveritān |
cicchedāthāsinā kārṣṇiścarmaṇā saṃrurodha ca || 59 ||
[Analyze grammar]

sa darśayitvā sainyānāṃ svabāhubalamātmanaḥ |
tamudyamya mahākhaḍgaṃ carma cātha punarbalī || 60 ||
[Analyze grammar]

vṛddhakṣatrasya dāyādaṃ pituratyantavairiṇam |
sasārābhimukhaḥ śūraḥ śārdūla iva kuñjaram || 61 ||
[Analyze grammar]

tau parasparamāsādya khaḍgadantanakhāyudhau |
hṛṣṭavatsaṃprajahrāte vyāghrakesariṇāviva || 62 ||
[Analyze grammar]

saṃpāteṣvabhipāteṣu nipāteṣvasicarmaṇoḥ |
na tayorantaraṃ kaściddadarśa narasiṃhayoḥ || 63 ||
[Analyze grammar]

avakṣepo'sinirhrādaḥ śastrāntaranidarśanam |
bāhyāntaranipātaśca nirviśeṣamadṛśyata || 64 ||
[Analyze grammar]

bāhyamābhyantaraṃ caiva carantau mārgamuttamam |
dadṛśāte mahātmānau sapakṣāviva parvatau || 65 ||
[Analyze grammar]

tato vikṣipataḥ khaḍgaṃ saubhadrasya yaśasvinaḥ |
śarāvaraṇapakṣānte prajahāra jayadrathaḥ || 66 ||
[Analyze grammar]

rukmapakṣāntare saktastasmiṃścarmaṇi bhāsvare |
sindhurājabaloddhūtaḥ so'bhajyata mahānasiḥ || 67 ||
[Analyze grammar]

bhagnamājñāya nistriṃśamavaplutya padāni ṣaṭ |
so'dṛśyata nimeṣeṇa svarathaṃ punarāsthitaḥ || 68 ||
[Analyze grammar]

taṃ kārṣṇiṃ samarānmuktamāsthitaṃ rathamuttamam |
sahitāḥ sarvarājānaḥ parivavruḥ samantataḥ || 69 ||
[Analyze grammar]

tataścarma ca khaḍgaṃ ca samutkṣipya mahābalaḥ |
nanādārjunadāyādaḥ prekṣamāṇo jayadratham || 70 ||
[Analyze grammar]

sindhurājaṃ parityajya saubhadraḥ paravīrahā |
tāpayāmāsa tatsainyaṃ bhuvanaṃ bhāskaro yathā || 71 ||
[Analyze grammar]

tasya sarvāyasīṃ śaktiṃ śalyaḥ kanakabhūṣaṇām |
cikṣepa samare ghorāṃ dīptāmagniśikhāmiva || 72 ||
[Analyze grammar]

tāmavaplutya jagrāha sakośaṃ cākarodasim |
vainateyo yathā kārṣṇiḥ patantamuragottamam || 73 ||
[Analyze grammar]

tasya lāghavamājñāya sattvaṃ cāmitatejasaḥ |
sahitāḥ sarvarājānaḥ siṃhanādamathānadan || 74 ||
[Analyze grammar]

tatastāmeva śalyasya saubhadraḥ paravīrahā |
mumoca bhujavīryeṇa vaiḍūryavikṛtājirām || 75 ||
[Analyze grammar]

sā tasya rathamāsādya nirmuktabhujagopamā |
jaghāna sūtaṃ śalyasya rathāccainamapātayat || 76 ||
[Analyze grammar]

tato virāṭadrupadau dhṛṣṭaketuryudhiṣṭhiraḥ |
sātyakiḥ kekayā bhīmo dhṛṣṭadyumnaśikhaṇḍinau |
yamau ca draupadeyāśca sādhu sādhviti cukruśuḥ || 77 ||
[Analyze grammar]

bāṇaśabdāśca vividhāḥ siṃhanādāśca puṣkalāḥ |
prādurāsanharṣayantaḥ saubhadramapalāyinam |
tannāmṛṣyanta putrāste śatrorvijayalakṣaṇam || 78 ||
[Analyze grammar]

athainaṃ sahasā sarve samantānniśitaiḥ śaraiḥ |
abhyākiranmahārāja jaladā iva parvatam || 79 ||
[Analyze grammar]

teṣāṃ ca priyamanvicchansūtasya ca parābhavāt |
ārtāyaniramitraghnaḥ kruddhaḥ saubhadramabhyayāt || 80 ||
[Analyze grammar]