Chapter 2

saṃjaya uvāca |
hataṃ bhīṣmamādhirathirviditvā bhinnāṃ nāvamivātyagādhe kurūṇām |
sodaryavadvyasanātsūtaputraḥ saṃtārayiṣyaṃstava putrasya senām || 1 ||
[Analyze grammar]

śrutvā tu karṇaḥ puruṣendramacyutaṃ nipātitaṃ śāṃtanavaṃ mahāratham |
athopāyāttūrṇamamitrakarśano dhanurdharāṇāṃ pravarastadā vṛṣaḥ || 2 ||
[Analyze grammar]

hate tu bhīṣme rathasattame parairnimajjatīṃ nāvamivārṇave kurūn |
piteva putrāṃstvarito'bhyayāttataḥ saṃtārayiṣyaṃstava putrasya senām || 3 ||
[Analyze grammar]

karṇa uvāca |
yasmindhṛtirbuddhiparākramaujo damaḥ satyaṃ vīraguṇāśca sarve |
astrāṇi divyānyatha saṃnatirhrīḥ priyā ca vāganapāyīni bhīṣme || 4 ||
[Analyze grammar]

brahmadviṣaghne satataṃ kṛtajñe sanātanaṃ candramasīva lakṣma |
sa cetpraśāntaḥ paravīrahantā manye hatāneva hi sarvayodhān || 5 ||
[Analyze grammar]

neha dhruvaṃ kiṃcana jātu vidyate asmiṃlloke karmaṇo'nityayogāt |
sūryodaye ko hi vimuktasaṃśayo bhāvaṃ kurvītādya mahāvrate hate || 6 ||
[Analyze grammar]

vasuprabhāve vasuvīryasaṃbhave gate vasūneva vasuṃdharādhipe |
vasūni putrāṃśca vasuṃdharāṃ tathā kurūṃśca śocadhvamimāṃ ca vāhinīm || 7 ||
[Analyze grammar]

saṃjaya uvāca |
mahāprabhāve varade nipātite lokaśreṣṭhe śāṃtanave mahaujasi |
parājiteṣu bharateṣu durmanāḥ karṇo bhṛśaṃ nyaśvasadaśru vartayan || 8 ||
[Analyze grammar]

idaṃ tu rādheyavaco niśamya te sutāśca rājaṃstava sainikāśca ha |
parasparaṃ cukruśurārtijaṃ bhṛśaṃ tadāśru netrairmumucurhi śabdavat || 9 ||
[Analyze grammar]

pravartamāne tu punarmahāhave vigāhyamānāsu camūṣu pārthivaiḥ |
athābravīddharṣakaraṃ vacastadā ratharṣabhānsarvamahāratharṣabhaḥ || 10 ||
[Analyze grammar]

karṇa uvāca |
jagatyanitye satataṃ pradhāvati pracintayannasthiramadya lakṣaye |
bhavatsu tiṣṭhatsviha pātito raṇe giriprakāśaḥ kurupuṃgavaḥ katham || 11 ||
[Analyze grammar]

nipātite śāṃtanave mahārathe divākare bhūtalamāsthite yathā |
na pārthivāḥ soḍhumalaṃ dhanaṃjayaṃ giripravoḍhāramivānilaṃ drumāḥ || 12 ||
[Analyze grammar]

hatapradhānaṃ tvidamārtarūpaṃ parairhatotsāhamanāthamadya vai |
mayā kurūṇāṃ paripālyamāhave balaṃ yathā tena mahātmanā tathā || 13 ||
[Analyze grammar]

samāhitaṃ cātmani bhāramīdṛśaṃ jagattathānityamidaṃ ca lakṣaye |
nipātitaṃ cāhavaśauṇḍamāhave kathaṃ nu kuryāmahamāhave bhayam || 14 ||
[Analyze grammar]

ahaṃ tu tānkuruvṛṣabhānajihmagaiḥ praverayanyamasadanaṃ raṇe caran |
yaśaḥ paraṃ jagati vibhāvya vartitā parairhato yudhi śayitātha vā punaḥ || 15 ||
[Analyze grammar]

yudhiṣṭhiro dhṛtimatidharmatattvavānvṛkodaro gajaśatatulyavikramaḥ |
tathārjunastridaśavarātmajo yato na tadbalaṃ sujayamathāmarairapi || 16 ||
[Analyze grammar]

yamau raṇe yatra yamopamau bale sasātyakiryatra ca devakīsutaḥ |
na tadbalaṃ kāpuruṣo'bhyupeyivānnivartate mṛtyumukhādivāsakṛt || 17 ||
[Analyze grammar]

tapo'bhyudīrṇaṃ tapasaiva gamyate balaṃ balenāpi tathā manasvibhiḥ |
manaśca me śatrunivāraṇe dhruvaṃ svarakṣaṇe cācalavadvyavasthitam || 18 ||
[Analyze grammar]

evaṃ caiṣāṃ budhyamānaḥ prabhāvaṃ gatvaivāhaṃ tāñjayāmyadya sūta |
mitradroho marṣaṇīyo na me'yaṃ bhagne sainye yaḥ sahāyaḥ sa mitram || 19 ||
[Analyze grammar]

kartāsmyetatsatpuruṣāryakarma tyaktvā prāṇānanuyāsyāmi bhīṣmam |
sarvānsaṃkhye śatrusaṃghānhaniṣye hatastairvā vīralokaṃ gamiṣye || 20 ||
[Analyze grammar]

saṃprākruṣṭe ruditastrīkumāre parābhūte pauruṣe dhārtarāṣṭre |
mayā kṛtyamiti jānāmi sūta tasmācchatrūndhārtarāṣṭrasya jeṣye || 21 ||
[Analyze grammar]

kurūnrakṣanpāṇḍuputrāñjighāṃsaṃstyaktvā prāṇānghorarūpe raṇe'smin |
sarvānsaṃkhye śatrusaṃghānnihatya dāsyāmyahaṃ dhārtarāṣṭrāya rājyam || 22 ||
[Analyze grammar]

nibadhyatāṃ me kavacaṃ vicitraṃ haimaṃ śubhraṃ maṇiratnāvabhāsi |
śirastrāṇaṃ cārkasamānabhāsaṃ dhanuḥ śarāṃścāpi viṣāhikalpān || 23 ||
[Analyze grammar]

upāsaṅgānṣoḍaśa yojayantu dhanūṃṣi divyāni tathāharantu |
asīṃśca śaktīśca gadāśca gurvīḥ śaṅkhaṃ ca jāmbūnadacitrabhāsam || 24 ||
[Analyze grammar]

etāṃ raukmīṃ nāgakakṣyāṃ ca jaitrīṃ jaitraṃ ca me dhvajamindīvarābham |
ślakṣṇairvastrairvipramṛjyānayasva citrāṃ mālāṃ cātra baddhvā sajālām || 25 ||
[Analyze grammar]

aśvānagryānpāṇḍurābhraprakāśānpuṣṭānsnātānmantrapūtābhiradbhiḥ |
taptairbhāṇḍaiḥ kāñcanairabhyupetāñśīghrāñśīghraṃ sūtaputrānayasva || 26 ||
[Analyze grammar]

rathaṃ cāgryaṃ hemajālāvanaddhaṃ ratnaiścitraṃ candrasūryaprakāśaiḥ |
dravyairyuktaṃ saṃprahāropapannairvāhairyuktaṃ tūrṇamāvartayasva || 27 ||
[Analyze grammar]

citrāṇi cāpāni ca vegavanti jyāścottamāḥ saṃhananopapannāḥ |
tūṇāṃśca pūrṇānmahataḥ śarāṇāmāsajya gātrāvaraṇāni caiva || 28 ||
[Analyze grammar]

prāyātrikaṃ cānayatāśu sarvaṃ kanyāḥ pūrṇaṃ vīrakāṃsyaṃ ca haimam |
ānīya mālāmavabadhya cāṅge pravādayantvāśu jayāya bherīḥ || 29 ||
[Analyze grammar]

prayāhi sūtāśu yataḥ kirīṭī vṛkodaro dharmasuto yamau ca |
tānvā haniṣyāmi sametya saṃkhye bhīṣmāya vaiṣyāmi hato dviṣadbhiḥ || 30 ||
[Analyze grammar]

yasminrājā satyadhṛtiryudhiṣṭhiraḥ samāsthito bhīmasenārjunau ca |
vāsudevaḥ sātyakiḥ sṛñjayāśca manye balaṃ tadajayyaṃ mahīpaiḥ || 31 ||
[Analyze grammar]

taṃ cenmṛtyuḥ sarvaharo'bhirakṣetsadāpramattaḥ samare kirīṭinam |
tathāpi hantāsmi sametya saṃkhye yāsyāmi vā bhīṣmapathā yamāya || 32 ||
[Analyze grammar]

na tvevāhaṃ na gamiṣyāmi teṣāṃ madhye śūrāṇāṃ tattathāhaṃ bravīmi |
mitradruho durbalabhaktayo ye pāpātmāno na mamaite sahāyāḥ || 33 ||
[Analyze grammar]

saṃjaya uvāca |
sa siddhimantaṃ rathamuttamaṃ dṛḍhaṃ sakūbaraṃ hemapariṣkṛtaṃ śubham |
patākinaṃ vātajavairhayottamairyuktaṃ samāsthāya yayau jayāya || 34 ||
[Analyze grammar]

saṃpūjyamānaḥ kurubhirmahātmā ratharṣabhaḥ pāṇḍuravājiyātā |
yayau tadāyodhanamugradhanvā yatrāvasānaṃ bharatarṣabhasya || 35 ||
[Analyze grammar]

varūthinā mahatā sadhvajena suvarṇamuktāmaṇivajraśālinā |
sadaśvayuktena rathena karṇo meghasvanenārka ivāmitaujāḥ || 36 ||
[Analyze grammar]

hutāśanābhaḥ sa hutāśanaprabhe śubhaḥ śubhe vai svarathe dhanurdharaḥ |
sthito rarājādhirathirmahārathaḥ svayaṃ vimāne surarāḍiva sthitaḥ || 37 ||
[Analyze grammar]