Chapter 116

saṃjaya uvāca |
vyuṣṭāyāṃ tu mahārāja rajanyāṃ sarvapārthivāḥ |
pāṇḍavā dhārtarāṣṭrāśca abhijagmuḥ pitāmaham || 1 ||
[Analyze grammar]

taṃ vīraśayane vīraṃ śayānaṃ kurusattamam |
abhivādyopatasthurvai kṣatriyāḥ kṣatriyarṣabham || 2 ||
[Analyze grammar]

kanyāścandanacūrṇaiśca lājairmālyaiśca sarvaśaḥ |
striyo bālāstathā vṛddhāḥ prekṣakāśca pṛthagjanāḥ |
samabhyayuḥ śāṃtanavaṃ bhūtānīva tamonudam || 3 ||
[Analyze grammar]

tūryāṇi gaṇikā vārāstathaiva naṭanartakāḥ |
upānṛtyañjaguścaiva vṛddhaṃ kurupitāmaham || 4 ||
[Analyze grammar]

upāramya ca yuddhebhyaḥ saṃnāhānvipramucya ca |
āyudhāni ca nikṣipya sahitāḥ kurupāṇḍavāḥ || 5 ||
[Analyze grammar]

anvāsata durādharṣaṃ devavratamariṃdamam |
anyonyaṃ prītimantaste yathāpūrvaṃ yathāvayaḥ || 6 ||
[Analyze grammar]

sā pārthivaśatākīrṇā samitirbhīṣmaśobhitā |
śuśubhe bhāratī dīptā divīvādityamaṇḍalam || 7 ||
[Analyze grammar]

vibabhau ca nṛpāṇāṃ sā pitāmahamupāsatām |
devānāmiva deveśaṃ pitāmahamupāsatām || 8 ||
[Analyze grammar]

bhīṣmastu vedanāṃ dhairyānnigṛhya bharatarṣabha |
abhitaptaḥ śaraiścaiva nātihṛṣṭamanābravīt || 9 ||
[Analyze grammar]

śarābhitaptakāyo'haṃ śarasaṃtāpamūrchitaḥ |
pānīyamabhikāṅkṣe'haṃ rājñastānpratyabhāṣata || 10 ||
[Analyze grammar]

tataste kṣatriyā rājansamājahruḥ samantataḥ |
bhakṣyānuccāvacāṃstatra vārikumbhāṃśca śītalān || 11 ||
[Analyze grammar]

upanītaṃ ca taddṛṣṭvā bhīṣmaḥ śāṃtanavo'bravīt |
nādya tāta mayā śakyaṃ bhogānkāṃścana mānuṣān || 12 ||
[Analyze grammar]

upabhoktuṃ manuṣyebhyaḥ śaraśayyāgato hyaham |
pratīkṣamāṇastiṣṭhāmi nivṛttiṃ śaśisūryayoḥ || 13 ||
[Analyze grammar]

evamuktvā śāṃtanavo dīnavāksarvapārthivān |
dhanaṃjayaṃ mahābāhumabhyabhāṣata bhārata || 14 ||
[Analyze grammar]

athopetya mahābāhurabhivādya pitāmaham |
atiṣṭhatprāñjaliḥ prahvaḥ kiṃ karomīti cābravīt || 15 ||
[Analyze grammar]

taṃ dṛṣṭvā pāṇḍavaṃ rājannabhivādyāgrataḥ sthitam |
abhyabhāṣata dharmātmā bhīṣmaḥ prīto dhanaṃjayam || 16 ||
[Analyze grammar]

dahyate'daḥ śarīraṃ me saṃsyūto'smi maheṣubhiḥ |
marmāṇi paridūyante vadanaṃ mama śuṣyati || 17 ||
[Analyze grammar]

hlādanārthaṃ śarīrasya prayacchāpo mamārjuna |
tvaṃ hi śakto maheṣvāsa dātumambho yathāvidhi || 18 ||
[Analyze grammar]

arjunastu tathetyuktvā rathamāruhya vīryavān |
adhijyaṃ balavatkṛtvā gāṇḍīvaṃ vyākṣipaddhanuḥ || 19 ||
[Analyze grammar]

tasya jyātalanirghoṣaṃ visphūrjitamivāśaneḥ |
vitresuḥ sarvabhūtāni śrutvā sarve ca pārthivāḥ || 20 ||
[Analyze grammar]

tataḥ pradakṣiṇaṃ kṛtvā rathena rathināṃ varaḥ |
śayānaṃ bharataśreṣṭhaṃ sarvaśastrabhṛtāṃ varam || 21 ||
[Analyze grammar]

saṃdhāya ca śaraṃ dīptamabhimantrya mahāyaśāḥ |
parjanyāstreṇa saṃyojya sarvalokasya paśyataḥ |
avidhyatpṛthivīṃ pārthaḥ pārśve bhīṣmasya dakṣiṇe || 22 ||
[Analyze grammar]

utpapāta tato dhārā vimalā vāriṇaḥ śivā |
śītasyāmṛtakalpasya divyagandharasasya ca || 23 ||
[Analyze grammar]

atarpayattataḥ pārthaḥ śītayā vāridhārayā |
bhīṣmaṃ kurūṇāmṛṣabhaṃ divyakarmaparākramaḥ || 24 ||
[Analyze grammar]

karmaṇā tena pārthasya śakraṣyeva vikurvataḥ |
vismayaṃ paramaṃ jagmustataste vasudhādhipāḥ || 25 ||
[Analyze grammar]

tatkarma prekṣya bībhatsoratimānuṣamadbhutam |
saṃprāvepanta kuravo gāvaḥ śītārditā iva || 26 ||
[Analyze grammar]

vismayāccottarīyāṇi vyāvidhyansarvato nṛpāḥ |
śaṅkhadundubhinirghoṣaistumulaṃ sarvato'bhavat || 27 ||
[Analyze grammar]

tṛptaḥ śāṃtanavaścāpi rājanbībhatsumabravīt |
sarvapārthivavīrāṇāṃ saṃnidhau pūjayanniva || 28 ||
[Analyze grammar]

naitaccitraṃ mahābāho tvayi kauravanandana |
kathito nāradenāsi pūrvarṣiramitadyutiḥ || 29 ||
[Analyze grammar]

vāsudevasahāyastvaṃ mahatkarma kariṣyasi |
yannotsahati devendraḥ saha devairapi dhruvam || 30 ||
[Analyze grammar]

vidustvāṃ nidhanaṃ pārtha sarvakṣatrasya tadvidaḥ |
dhanurdharāṇāmekastvaṃ pṛthivyāṃ pravaro nṛṣu || 31 ||
[Analyze grammar]

manuṣyā jagati śreṣṭhāḥ pakṣiṇāṃ garuḍo varaḥ |
sarasāṃ sāgaraḥ śreṣṭho gaurvariṣṭhā catuṣpadām || 32 ||
[Analyze grammar]

ādityastejasāṃ śreṣṭho girīṇāṃ himavānvaraḥ |
jātīnāṃ brāhmaṇaḥ śreṣṭhaḥ śreṣṭhastvamasi dhanvinām || 33 ||
[Analyze grammar]

na vai śrutaṃ dhārtarāṣṭreṇa vākyaṃ saṃbodhyamānaṃ vidureṇa caiva |
droṇena rāmeṇa janārdanena muhurmuhuḥ saṃjayenāpi coktam || 34 ||
[Analyze grammar]

parītabuddhirhi visaṃjñakalpo duryodhano nābhyanandadvaco me |
sa śeṣyate vai nihataścirāya śāstrātigo bhīmabalābhibhūtaḥ || 35 ||
[Analyze grammar]

tataḥ śrutvā tadvacaḥ kauravendro duryodhano dīnamanā babhūva |
tamabravīcchāṃtanavo'bhivīkṣya nibodha rājanbhava vītamanyuḥ || 36 ||
[Analyze grammar]

dṛṣṭaṃ duryodhanedaṃ te yathā pārthena dhīmatā |
jalasya dhārā janitā śītasyāmṛtagandhinaḥ |
etasya kartā loke'sminnānyaḥ kaścana vidyate || 37 ||
[Analyze grammar]

āgneyaṃ vāruṇaṃ saumyaṃ vāyavyamatha vaiṣṇavam |
aindraṃ pāśupataṃ brāhmaṃ pārameṣṭhyaṃ prajāpateḥ |
dhātustvaṣṭuśca saviturdivyānyastrāṇi sarvaśaḥ || 38 ||
[Analyze grammar]

sarvasminmānuṣe loke vettyeko hi dhanaṃjayaḥ |
kṛṣṇo vā devakīputro nānyo vai veda kaścana |
na śakyāḥ pāṇḍavāstāta yuddhe jetuṃ kathaṃcana || 39 ||
[Analyze grammar]

amānuṣāṇi karmāṇi yasyaitāni mahātmanaḥ |
tena sattvavatā saṃkhye śūreṇāhavaśobhinā |
kṛtinā samare rājansaṃdhiste tāta yujyatām || 40 ||
[Analyze grammar]

yāvatkṛṣṇo mahābāhuḥ svādhīnaḥ kurusaṃsadi |
tāvatpārthena śūreṇa saṃdhiste tāta yujyatām || 41 ||
[Analyze grammar]

yāvaccamūṃ na te śeṣāṃ śaraiḥ saṃnataparvabhiḥ |
nāśayatyarjunastāvatsaṃdhiste tāta yujyatām || 42 ||
[Analyze grammar]

yāvattiṣṭhanti samare hataśeṣāḥ sahodarāḥ |
nṛpāśca bahavo rājaṃstāvatsaṃdhiḥ prayujyatām || 43 ||
[Analyze grammar]

na nirdahati te yāvatkrodhadīptekṣaṇaścamūm |
yudhiṣṭhiro hi tāvadvai saṃdhiste tāta yujyatām || 44 ||
[Analyze grammar]

nakulaḥ sahadevaśca bhīmasenaśca pāṇḍavaḥ |
yāvaccamūṃ mahārāja nāśayanti na sarvaśaḥ |
tāvatte pāṇḍavaiḥ sārdhaṃ saubhrātraṃ tāta rocatām || 45 ||
[Analyze grammar]

yuddhaṃ madantamevāstu tāta saṃśāmya pāṇḍavaiḥ |
etatte rocatāṃ vākyaṃ yadukto'si mayānagha |
etatkṣemamahaṃ manye tava caiva kulasya ca || 46 ||
[Analyze grammar]

tyaktvā manyumupaśāmyasva pārthaiḥ paryāptametadyatkṛtaṃ phalgunena |
bhīṣmasyāntādastu vaḥ sauhṛdaṃ vā saṃpraśleṣaḥ sādhu rājanprasīda || 47 ||
[Analyze grammar]

rājyasyārdhaṃ dīyatāṃ pāṇḍavānāmindraprasthaṃ dharmarājo'nuśāstu |
mā mitradhrukpārthivānāṃ jaghanyaḥ pāpāṃ kīrtiṃ prāpsyase kauravendra || 48 ||
[Analyze grammar]

mamāvasānācchāntirastu prajānāṃ saṃgacchantāṃ pārthivāḥ prītimantaḥ |
pitā putraṃ mātulaṃ bhāgineyo bhrātā caiva bhrātaraṃ praitu rājan || 49 ||
[Analyze grammar]

na cedevaṃ prāptakālaṃ vaco me mohāviṣṭaḥ pratipatsyasyabuddhyā |
bhīṣmasyāntādetadantāḥ stha sarve satyāmetāṃ bhāratīmīrayāmi || 50 ||
[Analyze grammar]

etadvākyaṃ sauhṛdādāpageyo madhye rājñāṃ bhārataṃ śrāvayitvā |
tūṣṇīmāsīcchalyasaṃtaptamarmā yatvātmānaṃ vedanāṃ saṃnigṛhya || 51 ||
[Analyze grammar]