Chapter 115

dhṛtarāṣṭra uvāca |
kathamāsaṃstadā yodhā hīnā bhīṣmeṇa saṃjaya |
balinā devakalpena gurvarthe brahmacāriṇā || 1 ||
[Analyze grammar]

tadaiva nihatānmanye kurūnanyāṃśca pārthivān |
na prāharadyadā bhīṣmo ghṛṇitvāddrupadātmaje || 2 ||
[Analyze grammar]

tato duḥkhataraṃ manye kimanyatprabhaviṣyati |
yadadya pitaraṃ śrutvā nihataṃ mama durmateḥ || 3 ||
[Analyze grammar]

aśmasāramayaṃ nūnaṃ hṛdayaṃ mama saṃjaya |
śrutvā vinihataṃ bhīṣmaṃ śatadhā yanna dīryate || 4 ||
[Analyze grammar]

punaḥ punarna mṛṣyāmi hataṃ devavrataṃ raṇe |
na hato jāmadagnyena divyairastraiḥ sma yaḥ purā || 5 ||
[Analyze grammar]

yadadya nihatenājau bhīṣmeṇa jayamicchatā |
ceṣṭitaṃ narasiṃhena tanme kathaya saṃjaya || 6 ||
[Analyze grammar]

saṃjaya uvāca |
sāyāhne nyapatadbhūmau dhārtarāṣṭrānviṣādayan |
pāñcālānāṃ dadaddharṣaṃ kuruvṛddhaḥ pitāmahaḥ || 7 ||
[Analyze grammar]

sa śete śaratalpastho medinīmaspṛśaṃstadā |
bhīṣmo rathātprapatitaḥ pracyuto dharaṇītale || 8 ||
[Analyze grammar]

hā heti tumulaḥ śabdo bhūtānāṃ samapadyata |
sīmāvṛkṣe nipatite kurūṇāṃ samitikṣaye || 9 ||
[Analyze grammar]

ubhayoḥ senayo rājankṣatriyānbhayamāviśat |
bhīṣmaṃ śaṃtanavaṃ dṛṣṭvā viśīrṇakavacadhvajam |
kuravaḥ paryavartanta pāṇḍavāśca viśāṃ pate || 10 ||
[Analyze grammar]

khaṃ tamovṛtamāsīcca nāsīdbhānumataḥ prabhā |
rarāsa pṛthivī caiva bhīṣme śāṃtanave hate || 11 ||
[Analyze grammar]

ayaṃ brahmavidāṃ śreṣṭho ayaṃ brahmavidāṃ gatiḥ |
ityabhāṣanta bhūtāni śayānaṃ bharatarṣabham || 12 ||
[Analyze grammar]

ayaṃ pitaramājñāya kāmārtaṃ śaṃtanuṃ purā |
ūrdhvaretasamātmānaṃ cakāra puruṣarṣabhaḥ || 13 ||
[Analyze grammar]

iti sma śaratalpasthaṃ bharatānāmamadhyamam |
ṛṣayaḥ paryadhāvanta sahitāḥ siddhacāraṇaiḥ || 14 ||
[Analyze grammar]

hate śāṃtanave bhīṣme bharatānāṃ pitāmahe |
na kiṃcitpratyapadyanta putrāstava ca bhārata || 15 ||
[Analyze grammar]

vivarṇavadanāścāsangataśrīkāśca bhārata |
atiṣṭhanvrīḍitāścaiva hriyā yuktā hyadhomukhāḥ || 16 ||
[Analyze grammar]

pāṇḍavāśca jayaṃ labdhvā saṃgrāmaśirasi sthitāḥ |
sarve dadhmurmahāśaṅkhānhemajālapariṣkṛtān || 17 ||
[Analyze grammar]

bhṛśaṃ tūryaninādeṣu vādyamāneṣu cānagha |
apaśyāma raṇe rājanbhīmasenaṃ mahābalam |
ākrīḍamānaṃ kaunteyaṃ harṣeṇa mahatā yutam || 18 ||
[Analyze grammar]

nihatya samare śatrūnmahābalasamanvitān |
saṃmohaścāpi tumulaḥ kurūṇāmabhavattadā || 19 ||
[Analyze grammar]

karṇaduryodhanau cāpi niḥśvasetāṃ muhurmuhuḥ |
tathā nipatite bhīṣme kauravāṇāṃ dhuraṃdhare |
hāhākāramabhūtsarvaṃ nirmaryādamavartata || 20 ||
[Analyze grammar]

dṛṣṭvā ca patitaṃ bhīṣmaṃ putro duḥśāsanastava |
uttamaṃ javamāsthāya droṇānīkaṃ samādravat || 21 ||
[Analyze grammar]

bhrātrā prasthāpito vīraḥ svenānīkena daṃśitaḥ |
prayayau puruṣavyāghraḥ svasainyamabhicodayan || 22 ||
[Analyze grammar]

tamāyāntamabhiprekṣya kuravaḥ paryavārayan |
duḥśāsanaṃ mahārāja kimayaṃ vakṣyatīti vai || 23 ||
[Analyze grammar]

tato droṇāya nihataṃ bhīṣmamācaṣṭa kauravaḥ |
droṇastadapriyaṃ śrutvā sahasā nyapatadrathāt || 24 ||
[Analyze grammar]

sa saṃjñāmupalabhyātha bhāradvājaḥ pratāpavān |
nivārayāmāsa tadā svānyanīkāni māriṣa || 25 ||
[Analyze grammar]

vinivṛttānkurūndṛṣṭvā pāṇḍavāpi svasainikān |
dūtaiḥ śīghrāśvasaṃyuktairavahāramakārayan || 26 ||
[Analyze grammar]

vinivṛtteṣu sainyeṣu pāraṃparyeṇa sarvaśaḥ |
vimuktakavacāḥ sarve bhīṣmamīyurnarādhipāḥ || 27 ||
[Analyze grammar]

vyupāramya tato yuddhādyodhāḥ śatasahasraśaḥ |
upatasthurmahātmānaṃ prajāpatimivāmarāḥ || 28 ||
[Analyze grammar]

te tu bhīṣmaṃ samāsādya śayānaṃ bharatarṣabham |
abhivādya vyatiṣṭhanta pāṇḍavāḥ kurubhiḥ saha || 29 ||
[Analyze grammar]

atha pāṇḍūnkurūṃścaiva praṇipatyāgrataḥ sthitān |
abhyabhāṣata dharmātmā bhīṣmaḥ śāṃtanavastadā || 30 ||
[Analyze grammar]

svāgataṃ vo mahābhāgāḥ svāgataṃ vo mahārathāḥ |
tuṣyāmi darśanāccāhaṃ yuṣmākamamaropamāḥ || 31 ||
[Analyze grammar]

abhinandya sa tānevaṃ śirasā lambatābravīt |
śiro me lambate'tyarthamupadhānaṃ pradīyatām || 32 ||
[Analyze grammar]

tato nṛpāḥ samājahrustanūni ca mṛdūni ca |
upadhānāni mukhyāni naicchattāni pitāmahaḥ || 33 ||
[Analyze grammar]

abravīcca naravyāghraḥ prahasanniva tānnṛpān |
naitāni vīraśayyāsu yuktarūpāṇi pārthivāḥ || 34 ||
[Analyze grammar]

tato vīkṣya naraśreṣṭhamabhyabhāṣata pāṇḍavam |
dhanaṃjayaṃ dīrghabāhuṃ sarvalokamahāratham || 35 ||
[Analyze grammar]

dhanaṃjaya mahābāho śiraso me'sya lambataḥ |
dīyatāmupadhānaṃ vai yadyuktamiha manyase || 36 ||
[Analyze grammar]

sa saṃnyasya mahaccāpamabhivādya pitāmaham |
netrābhyāmaśrupūrṇābhyāmidaṃ vacanamabravīt || 37 ||
[Analyze grammar]

ājñāpaya kuruśreṣṭha sarvaśastrabhṛtāṃ vara |
preṣyo'haṃ tava durdharṣa kriyatāṃ kiṃ pitāmaha || 38 ||
[Analyze grammar]

tamabravīcchāṃtanavaḥ śiro me tāta lambate |
upadhānaṃ kuruśreṣṭha phalgunopanayasva me |
śayanasyānurūpaṃ hi śīghraṃ vīra prayaccha me || 39 ||
[Analyze grammar]

tvaṃ hi pārtha mahābāho śreṣṭhaḥ sarvadhanuṣmatām |
kṣatradharmasya vettā ca buddhisattvaguṇānvitaḥ || 40 ||
[Analyze grammar]

phalgunastu tathetyuktvā vyavasāyapurojavaḥ |
pragṛhyāmantrya gāṇḍīvaṃ śarāṃśca nataparvaṇaḥ || 41 ||
[Analyze grammar]

anumānya mahātmānaṃ bharatānāmamadhyamam |
tribhistīkṣṇairmahāvegairudagṛhṇācchiraḥ śaraiḥ || 42 ||
[Analyze grammar]

abhiprāye tu vidite dharmātmā savyasācinā |
atuṣyadbharataśreṣṭho bhīṣmo dharmārthatattvavit || 43 ||
[Analyze grammar]

upadhānena dattena pratyanandaddhanaṃjayam |
kuntīputraṃ yudhāṃ śreṣṭhaṃ suhṛdāṃ prītivardhanam || 44 ||
[Analyze grammar]

anurūpaṃ śayānasya pāṇḍavopahitaṃ tvayā |
yadyanyathā pravartethāḥ śapeyaṃ tvāmahaṃ ruṣā || 45 ||
[Analyze grammar]

evametanmahābāho dharmeṣu pariniṣṭhitam |
svaptavyaṃ kṣatriyeṇājau śaratalpagatena vai || 46 ||
[Analyze grammar]

evamuktvā tu bībhatsuṃ sarvāṃstānabravīdvacaḥ |
rājñaśca rājaputrāṃśca pāṇḍavenābhi saṃsthitān || 47 ||
[Analyze grammar]

śayeyamasyāṃ śayyāyāṃ yāvadāvartanaṃ raveḥ |
ye tadā pārayiṣyanti te māṃ drakṣyanti vai nṛpāḥ || 48 ||
[Analyze grammar]

diśaṃ vaiśravaṇākrāntāṃ yadā gantā divākaraḥ |
arciṣmānpratapaṃllokānrathenottamatejasā |
vimokṣye'haṃ tadā prāṇānsuhṛdaḥ supriyānapi || 49 ||
[Analyze grammar]

parikhā khanyatāmatra mamāvasadane nṛpāḥ |
upāsiṣye vivasvantamevaṃ śaraśatācitaḥ |
upāramadhvaṃ saṃgrāmādvairāṇyutsṛjya pārthivāḥ || 50 ||
[Analyze grammar]

upātiṣṭhannatho vaidyāḥ śalyoddharaṇakovidāḥ |
sarvopakaraṇairyuktāḥ kuśalāste suśikṣitāḥ || 51 ||
[Analyze grammar]

tāndṛṣṭvā jāhnavīputraḥ provāca vacanaṃ tadā |
dattadeyā visṛjyantāṃ pūjayitvā cikitsakāḥ || 52 ||
[Analyze grammar]

evaṃgate na hīdānīṃ vaidyaiḥ kāryamihāsti me |
kṣatradharmapraśastāṃ hi prāpto'smi paramāṃ gatim || 53 ||
[Analyze grammar]

naiṣa dharmo mahīpālāḥ śaratalpagatasya me |
etaireva śaraiścāhaṃ dagdhavyo'nte narādhipāḥ || 54 ||
[Analyze grammar]

tacchrutvā vacanaṃ tasya putro duryodhanastava |
vaidyānvisarjayāmāsa pūjayitvā yathārhataḥ || 55 ||
[Analyze grammar]

tataste vismayaṃ jagmurnānājanapadeśvarāḥ |
sthitiṃ dharme parāṃ dṛṣṭvā bhīṣmasyāmitatejasaḥ || 56 ||
[Analyze grammar]

upadhānaṃ tato dattvā pitustava janeśvara |
sahitāḥ pāṇḍavāḥ sarve kuravaśca mahārathāḥ || 57 ||
[Analyze grammar]

upagamya mahātmānaṃ śayānaṃ śayane śubhe |
te'bhivādya tato bhīṣmaṃ kṛtvā cābhipradakṣiṇam || 58 ||
[Analyze grammar]

vidhāya rakṣāṃ bhīṣmasya sarva eva samantataḥ |
vīrāḥ svaśibirāṇyeva dhyāyantaḥ paramāturāḥ |
niveśāyābhyupāgacchansāyāhne rudhirokṣitāḥ || 59 ||
[Analyze grammar]

niviṣṭānpāṇḍavāṃścāpi prīyamāṇānmahārathān |
bhīṣmasya patanāddhṛṣṭānupagamya mahārathān |
uvāca yādavaḥ kāle dharmaputraṃ yudhiṣṭhiram || 60 ||
[Analyze grammar]

diṣṭyā jayasi kauravya diṣṭyā bhīṣmo nipātitaḥ |
avadhyo mānuṣaireṣa satyasaṃdho mahārathaḥ || 61 ||
[Analyze grammar]

atha vā daivataiḥ pārtha sarvaśastrāstrapāragaḥ |
tvāṃ tu cakṣurhaṇaṃ prāpya dagdho ghoreṇa cakṣuṣā || 62 ||
[Analyze grammar]

evamukto dharmarājaḥ pratyuvāca janārdanam |
tava prasādādvijayaḥ krodhāttava parājayaḥ |
tvaṃ hi naḥ śaraṇaṃ kṛṣṇa bhaktānāmabhayaṃkaraḥ || 63 ||
[Analyze grammar]

anāścaryo jayasteṣāṃ yeṣāṃ tvamasi keśava |
rakṣitā samare nityaṃ nityaṃ cāpi hite rataḥ |
sarvathā tvāṃ samāsādya nāścaryamiti me matiḥ || 64 ||
[Analyze grammar]

evamuktaḥ pratyuvāca smayamāno janārdanaḥ |
tvayyevaitadyuktarūpaṃ vacanaṃ pārthivottama || 65 ||
[Analyze grammar]