Chapter 111

dhṛtarāṣṭra uvāca |
kathaṃ śāṃtanavo bhīṣmo daśame'hani saṃjaya |
ayudhyata mahāvīryaiḥ pāṇḍavaiḥ sahasṛñjayaiḥ || 1 ||
[Analyze grammar]

kuravaśca kathaṃ yuddhe pāṇḍavānpratyavārayan |
ācakṣva me mahāyuddhaṃ bhīṣmasyāhavaśobhinaḥ || 2 ||
[Analyze grammar]

saṃjaya uvāca |
kuravaḥ pāṇḍavaiḥ sārdhaṃ yathāyudhyanta bhārata |
yathā ca tadabhūdyuddhaṃ tatte vakṣyāmi śṛṇvataḥ || 3 ||
[Analyze grammar]

preṣitāḥ paralokāya paramāstraiḥ kirīṭinā |
ahanyahani saṃprāptāstāvakānāṃ rathavrajāḥ || 4 ||
[Analyze grammar]

yathāpratijñaṃ kauravyaḥ sa cāpi samitiṃjayaḥ |
pārthānāmakarodbhīṣmaḥ satataṃ samitikṣayam || 5 ||
[Analyze grammar]

kurubhiḥ sahitaṃ bhīṣmaṃ yudhyamānaṃ mahāratham |
arjunaṃ ca sapāñcālyaṃ dṛṣṭvā saṃśayitā janāḥ || 6 ||
[Analyze grammar]

daśame'hani tasmiṃstu bhīṣmārjunasamāgame |
avartata mahāraudraḥ satataṃ samitikṣayaḥ || 7 ||
[Analyze grammar]

tasminnayutaśo rājanbhūyaśca sa paraṃtapaḥ |
bhīṣmaḥ śāṃtanavo yodhāñjaghāna paramāstravit || 8 ||
[Analyze grammar]

yeṣāmajñātakalpāni nāmagotrāṇi pārthiva |
te hatāstatra bhīṣmeṇa śūrāḥ sarve'nivartinaḥ || 9 ||
[Analyze grammar]

daśāhāni tatastaptvā bhīṣmaḥ pāṇḍavavāhinīm |
niravidyata dharmātmā jīvitena paraṃtapaḥ || 10 ||
[Analyze grammar]

sa kṣipraṃ vadhamanvicchannātmano'bhimukhaṃ raṇe |
na hanyāṃ mānavaśreṣṭhānsaṃgrāme'bhimukhāniti || 11 ||
[Analyze grammar]

cintayitvā mahābāhuḥ pitā devavratastava |
abhyāśasthaṃ mahārāja pāṇḍavaṃ vākyamabravīt || 12 ||
[Analyze grammar]

yudhiṣṭhira mahāprājña sarvaśāstraviśārada |
śṛṇu me vacanaṃ tāta dharmyaṃ svargyaṃ ca jalpataḥ || 13 ||
[Analyze grammar]

nirviṇṇo'smi bhṛśaṃ tāta dehenānena bhārata |
ghnataśca me gataḥ kālaḥ subahūnprāṇino raṇe || 14 ||
[Analyze grammar]

tasmātpārthaṃ purodhāya pāñcālānsṛñjayāṃstathā |
madvadhe kriyatāṃ yatno mama cedicchasi priyam || 15 ||
[Analyze grammar]

tasya tanmatamājñāya pāṇḍavaḥ satyadarśanaḥ |
bhīṣmaṃ pratiyayau yattaḥ saṃgrāme saha sṛñjayaiḥ || 16 ||
[Analyze grammar]

dhṛṣṭadyumnastato rājanpāṇḍavaśca yudhiṣṭhiraḥ |
śrutvā bhīṣmasya tāṃ vācaṃ codayāmāsaturbalam || 17 ||
[Analyze grammar]

abhidravata yudhyadhvaṃ bhīṣmaṃ jayata saṃyuge |
rakṣitāḥ satyasaṃdhena jiṣṇunā ripujiṣṇunā || 18 ||
[Analyze grammar]

ayaṃ cāpi maheṣvāsaḥ pārṣato vāhinīpatiḥ |
bhīmasenaśca samare pālayiṣyati vo dhruvam || 19 ||
[Analyze grammar]

na vai bhīṣmādbhayaṃ kiṃcitkartavyaṃ yudhi sṛñjayāḥ |
dhruvaṃ bhīṣmaṃ vijeṣyāmaḥ puraskṛtya śikhaṇḍinam || 20 ||
[Analyze grammar]

tathā tu samayaṃ kṛtvā daśame'hani pāṇḍavāḥ |
brahmalokaparā bhūtvā saṃjagmuḥ krodhamūrchitāḥ || 21 ||
[Analyze grammar]

śikhaṇḍinaṃ puraskṛtya pāṇḍavaṃ ca dhanaṃjayam |
bhīṣmasya pātane yatnaṃ paramaṃ te samāsthitāḥ || 22 ||
[Analyze grammar]

tatastava sutādiṣṭā nānājanapadeśvarāḥ |
droṇena sahaputreṇa sahasenā mahābalāḥ || 23 ||
[Analyze grammar]

duḥśāsanaśca balavānsaha sarvaiḥ sahodaraiḥ |
bhīṣmaṃ samaramadhyasthaṃ pālayāṃ cakrire tadā || 24 ||
[Analyze grammar]

tatastu tāvakāḥ śūrāḥ puraskṛtya yatavratam |
śikhaṇḍipramukhānpārthānyodhayanti sma saṃyuge || 25 ||
[Analyze grammar]

cedibhiśca sapāñcālaiḥ sahito vānaradhvajaḥ |
yayau śāṃtanavaṃ bhīṣmaṃ puraskṛtya śikhaṇḍinam || 26 ||
[Analyze grammar]

droṇaputraṃ śinernaptā dhṛṣṭaketustu pauravam |
yudhāmanyuḥ sahāmātyaṃ duryodhanamayodhayat || 27 ||
[Analyze grammar]

virāṭastu sahānīkaḥ sahasenaṃ jayadratham |
vṛddhakṣatrasya dāyādamāsasāda paraṃtapaḥ || 28 ||
[Analyze grammar]

madrarājaṃ maheṣvāsaṃ sahasainyaṃ yudhiṣṭhiraḥ |
bhīmasenābhiguptaśca nāgānīkamupādravat || 29 ||
[Analyze grammar]

apradhṛṣyamanāvāryaṃ sarvaśastrabhṛtāṃ varam |
droṇaṃ prati yayau yattaḥ pāñcālyaḥ saha somakaiḥ || 30 ||
[Analyze grammar]

karṇikāradhvajaṃ cāpi siṃhaketurariṃdamaḥ |
pratyujjagāma saubhadraṃ rājaputro bṛhadbalaḥ || 31 ||
[Analyze grammar]

śikhaṇḍinaṃ ca putrāste pāṇḍavaṃ ca dhanaṃjayam |
rājabhiḥ samare sārdhamabhipeturjighāṃsavaḥ || 32 ||
[Analyze grammar]

tasminnatimahābhīme senayorvai parākrame |
saṃpradhāvatsvanīkeṣu medinī samakampata || 33 ||
[Analyze grammar]

tānyanīkānyanīkeṣu samasajjanta bhārata |
tāvakānāṃ pareṣāṃ ca dṛṣṭvā śāṃtanavaṃ raṇe || 34 ||
[Analyze grammar]

tatasteṣāṃ prayatatāmanyonyamabhidhāvatām |
prādurāsīnmahāñśabdo dikṣu sarvāsu bhārata || 35 ||
[Analyze grammar]

śaṅkhadundubhighoṣaiśca vāraṇānāṃ ca bṛṃhitaiḥ |
siṃhanādaiśca sainyānāṃ dāruṇaḥ samapadyata || 36 ||
[Analyze grammar]

sā ca sarvanarendrāṇāṃ candrārkasadṛśī prabhā |
vīrāṅgadakirīṭeṣu niṣprabhā samapadyata || 37 ||
[Analyze grammar]

rajomeghāśca saṃjajñuḥ śastravidyudbhirāvṛtāḥ |
dhanuṣāṃ caiva nirghoṣo dāruṇaḥ samapadyata || 38 ||
[Analyze grammar]

bāṇaśaṅkhapraṇādāśca bherīṇāṃ ca mahāsvanāḥ |
rathaghoṣaśca saṃjagmuḥ senayorubhayorapi || 39 ||
[Analyze grammar]

prāsaśaktyṛṣṭisaṃghaiśca bāṇaughaiśca samākulam |
niṣprakāśamivākāśaṃ senayoḥ samapadyata || 40 ||
[Analyze grammar]

anyonyaṃ rathinaḥ peturvājinaśca mahāhave |
kuñjarāḥ kuñjarāñjaghnuḥ padātīṃśca padātayaḥ || 41 ||
[Analyze grammar]

tadāsītsumahadyuddhaṃ kurūṇāṃ pāṇḍavaiḥ saha |
bhīṣmahetornaravyāghra śyenayorāmiṣe yathā || 42 ||
[Analyze grammar]

tayoḥ samāgamo ghoro babhūva yudhi bhārata |
anyonyasya vadhārthāya jigīṣūṇāṃ raṇājire || 43 ||
[Analyze grammar]