Chapter 103

saṃjaya uvāca |
yudhyatāmeva teṣāṃ tu bhāskare'stamupāgate |
saṃdhyā samabhavadghorā nāpaśyāma tato raṇam || 1 ||
[Analyze grammar]

tato yudhiṣṭhiro rājā saṃdhyāṃ saṃdṛśya bhārata |
vadhyamānaṃ balaṃ cāpi bhīṣmeṇāmitraghātinā || 2 ||
[Analyze grammar]

muktaśastraṃ parāvṛttaṃ palāyanaparāyaṇam |
bhīṣmaṃ ca yudhi saṃrabdhamanuyāntaṃ mahārathān || 3 ||
[Analyze grammar]

somakāṃśca jitāndṛṣṭvā nirutsāhānmahārathān |
cintayitvā ciraṃ dhyātvā avahāramarocayat || 4 ||
[Analyze grammar]

tato'vahāraṃ sainyānāṃ cakre rājā yudhiṣṭhiraḥ |
tathaiva tava sainyānāmavahāro hyabhūttadā || 5 ||
[Analyze grammar]

tato'vahāraṃ sainyānāṃ kṛtvā tatra mahārathāḥ |
nyaviśanta kuruśreṣṭha saṃgrāme kṣatavikṣatāḥ || 6 ||
[Analyze grammar]

bhīṣmasya samare karma cintayānāstu pāṇḍavāḥ |
nālabhanta tadā śāntiṃ bhṛśaṃ bhīṣmeṇa pīḍitāḥ || 7 ||
[Analyze grammar]

bhīṣmo'pi samare jitvā pāṇḍavānsaha sṛñjayaiḥ |
pūjyamānastava sutairvandyamānaśca bhārata || 8 ||
[Analyze grammar]

nyaviśatkurubhiḥ sārdhaṃ hṛṣṭarūpaiḥ samantataḥ |
tato rātriḥ samabhavatsarvabhūtapramohinī || 9 ||
[Analyze grammar]

tasminrātrimukhe ghore pāṇḍavā vṛṣṇibhiḥ saha |
sṛñjayāśca durādharṣā mantrāya samupāviśan || 10 ||
[Analyze grammar]

ātmaniḥśreyasaṃ sarve prāptakālaṃ mahābalāḥ |
mantrayāmāsuravyagrā mantraniścayakovidāḥ || 11 ||
[Analyze grammar]

tato yudhiṣṭhiro rājā mantrayitvā ciraṃ nṛpa |
vāsudevaṃ samudvīkṣya vākyametaduvāca ha || 12 ||
[Analyze grammar]

paśya kṛṣṇa mahātmānaṃ bhīṣmaṃ bhīmaparākramam |
gajaṃ nalavanānīva vimṛdnantaṃ balaṃ mama || 13 ||
[Analyze grammar]

na caivainaṃ mahātmānamutsahāmo nirīkṣitum |
lelihyamānaṃ sainyeṣu pravṛddhamiva pāvakam || 14 ||
[Analyze grammar]

yathā ghoro mahānāgastakṣako vai viṣolbaṇaḥ |
tathā bhīṣmo raṇe kṛṣṇa tīkṣṇaśastraḥ pratāpavān || 15 ||
[Analyze grammar]

gṛhītacāpaḥ samare vimuñcaṃśca śitāñśarān |
śakyo jetuṃ yamaḥ kruddho vajrapāṇiśca devarāṭ || 16 ||
[Analyze grammar]

varuṇaḥ pāśabhṛdvāpi sagado vā dhaneśvaraḥ |
na tu bhīṣmaḥ susaṃkruddhaḥ śakyo jetuṃ mahāhave || 17 ||
[Analyze grammar]

so'hamevaṃ gate kṛṣṇa nimagnaḥ śokasāgare |
ātmano buddhidaurbalyādbhīṣmamāsādya saṃyuge || 18 ||
[Analyze grammar]

vanaṃ yāsyāmi durdharṣa śreyo me tatra vai gatam |
na yuddhaṃ rocaye kṛṣṇa hanti bhīṣmo hi naḥ sadā || 19 ||
[Analyze grammar]

yathā prajvalitaṃ vahniṃ pataṃgaḥ samabhidravan |
ekato mṛtyumabhyeti tathāhaṃ bhīṣmamīyivān || 20 ||
[Analyze grammar]

kṣayaṃ nīto'smi vārṣṇeya rājyahetoḥ parākramī |
bhrātaraścaiva me śūrāḥ sāyakairbhṛśapīḍitāḥ || 21 ||
[Analyze grammar]

matkṛte bhrātṛsauhārdādrājyātprabhraṃśanaṃ gatāḥ |
parikliṣṭā tathā kṛṣṇā matkṛte madhusūdana || 22 ||
[Analyze grammar]

jīvitaṃ bahu manye'haṃ jīvitaṃ hyadya durlabham |
jīvitasyādya śeṣeṇa cariṣye dharmamuttamam || 23 ||
[Analyze grammar]

yadi te'hamanugrāhyo bhrātṛbhiḥ saha keśava |
svadharmasyāvirodhena tadudāhara keśava || 24 ||
[Analyze grammar]

etacchrutvā vacastasya kāruṇyādbahuvistaram |
pratyuvāca tataḥ kṛṣṇaḥ sāntvayāno yudhiṣṭhiram || 25 ||
[Analyze grammar]

dharmaputra viṣādaṃ tvaṃ mā kṛthāḥ satyasaṃgara |
yasya te bhrātaraḥ śūrā durjayāḥ śatrusūdanāḥ || 26 ||
[Analyze grammar]

arjuno bhīmasenaśca vāyvagnisamatejasau |
mādrīputrau ca vikrāntau tridaśānāmiveśvarau || 27 ||
[Analyze grammar]

māṃ vā niyuṅkṣva sauhārdādyotsye bhīṣmeṇa pāṇḍava |
tvatprayukto hyahaṃ rājankiṃ na kuryāṃ mahāhave || 28 ||
[Analyze grammar]

haniṣyāmi raṇe bhīṣmamāhūya puruṣarṣabham |
paśyatāṃ dhārtarāṣṭrāṇāṃ yadi necchati phalgunaḥ || 29 ||
[Analyze grammar]

yadi bhīṣme hate rājañjayaṃ paśyasi pāṇḍava |
hantāsmyekarathenādya kuruvṛddhaṃ pitāmaham || 30 ||
[Analyze grammar]

paśya me vikramaṃ rājanmahendrasyeva saṃyuge |
vimuñcantaṃ mahāstrāṇi pātayiṣyāmi taṃ rathāt || 31 ||
[Analyze grammar]

yaḥ śatruḥ pāṇḍuputrāṇāṃ macchatruḥ sa na saṃśayaḥ |
madarthā bhavadarthā ye ye madīyāstavaiva te || 32 ||
[Analyze grammar]

tava bhrātā mama sakhā saṃbandhī śiṣya eva ca |
māṃsānyutkṛtya vai dadyāmarjunārthe mahīpate || 33 ||
[Analyze grammar]

eṣa cāpi naravyāghro matkṛte jīvitaṃ tyajet |
eṣa naḥ samayastāta tārayema parasparam |
sa māṃ niyuṅkṣva rājendra yāvaddvīpo bhavāmyaham || 34 ||
[Analyze grammar]

pratijñātamupaplavye yattatpārthena pūrvataḥ |
ghātayiṣyāmi gāṅgeyamityulūkasya saṃnidhau || 35 ||
[Analyze grammar]

parirakṣyaṃ ca mama tadvacaḥ pārthasya dhīmataḥ |
anujñātaṃ tu pārthena mayā kāryaṃ na saṃśayaḥ || 36 ||
[Analyze grammar]

atha vā phalgunasyaiṣa bhāraḥ parimito raṇe |
nihaniṣyati saṃgrāme bhīṣmaṃ parapuraṃjayam || 37 ||
[Analyze grammar]

aśakyamapi kuryāddhi raṇe pārthaḥ samudyataḥ |
tridaśānvā samudyuktānsahitāndaityadānavaiḥ |
nihanyādarjunaḥ saṃkhye kimu bhīṣmaṃ narādhipa || 38 ||
[Analyze grammar]

viparīto mahāvīryo gatasattvo'lpajīvitaḥ |
bhīṣmaḥ śāṃtanavo nūnaṃ kartavyaṃ nāvabudhyate || 39 ||
[Analyze grammar]

yudhiṣṭhira uvāca |
evametanmahābāho yathā vadasi mādhava |
sarve hyete na paryāptāstava veganivāraṇe || 40 ||
[Analyze grammar]

niyataṃ samavāpsyāmi sarvameva yathepsitam |
yasya me puruṣavyāghra bhavānnātho mahābalaḥ || 41 ||
[Analyze grammar]

sendrānapi raṇe devāñjayeyaṃ jayatāṃ vara |
tvayā nāthena govinda kimu bhīṣmaṃ mahāhave || 42 ||
[Analyze grammar]

na tu tvāmanṛtaṃ kartumutsahe svārthagauravāt |
ayudhyamānaḥ sāhāyyaṃ yathoktaṃ kuru mādhava || 43 ||
[Analyze grammar]

samayastu kṛtaḥ kaścidbhīṣmeṇa mama mādhava |
mantrayiṣye tavārthāya na tu yotsye kathaṃcana |
duryodhanārthe yotsyāmi satyametaditi prabho || 44 ||
[Analyze grammar]

sa hi rājyasya me dātā mantrasyaiva ca mādhava |
tasmāddevavrataṃ bhūyo vadhopāyārthamātmanaḥ |
bhavatā sahitāḥ sarve pṛcchāmo madhusūdana || 45 ||
[Analyze grammar]

tadvayaṃ sahitā gatvā bhīṣmamāśu narottamam |
rucite tava vārṣṇeya mantraṃ pṛcchāma kauravam || 46 ||
[Analyze grammar]

sa vakṣyati hitaṃ vākyaṃ tathyaṃ caiva janārdana |
yathā sa vakṣyate kṛṣṇa tathā kartāsmi saṃyuge || 47 ||
[Analyze grammar]

sa no jayasya dātā ca mantrasya ca dhṛtavrataḥ |
bālāḥ pitrā vihīnāśca tena saṃvardhitā vayam || 48 ||
[Analyze grammar]

taṃ cetpitāmahaṃ vṛddhaṃ hantumicchāmi mādhava |
pituḥ pitaramiṣṭaṃ vai dhigastu kṣatrajīvikām || 49 ||
[Analyze grammar]

saṃjaya uvāca |
tato'bravīnmahārāja vārṣṇeyaḥ kurunandanam |
rocate me mahābāho satataṃ tava bhāṣitam || 50 ||
[Analyze grammar]

devavrataḥ kṛtī bhīṣmaḥ prekṣitenāpi nirdahet |
gamyatāṃ sa vadhopāyaṃ praṣṭuṃ sāgaragāsutaḥ |
vaktumarhati satyaṃ sa tvayā pṛṣṭo viśeṣataḥ || 51 ||
[Analyze grammar]

te vayaṃ tatra gacchāmaḥ praṣṭuṃ kurupitāmaham |
praṇamya śirasā cainaṃ mantraṃ pṛcchāma mādhava |
sa no dāsyati yaṃ mantraṃ tena yotsyāmahe parān || 52 ||
[Analyze grammar]

evaṃ saṃmantrya vai vīrāḥ pāṇḍavāḥ pāṇḍupūrvaja |
jagmuste sahitāḥ sarve vāsudevaśca vīryavān |
vimuktaśastrakavacā bhīṣmasya sadanaṃ prati || 53 ||
[Analyze grammar]

praviśya ca tadā bhīṣmaṃ śirobhiḥ pratipedire |
pūjayanto mahārāja pāṇḍavā bharatarṣabha |
praṇamya śirasā cainaṃ bhīṣmaṃ śaraṇamanvayuḥ || 54 ||
[Analyze grammar]

tānuvāca mahābāhurbhīṣmaḥ kurupitāmahaḥ |
svāgataṃ tava vārṣṇeya svāgataṃ te dhanaṃjaya |
svāgataṃ dharmaputrāya bhīmāya yamayostathā || 55 ||
[Analyze grammar]

kiṃ kāryaṃ vaḥ karomyadya yuṣmatprītivivardhanam |
sarvātmanā ca kartāsmi yadyapi syātsuduṣkaram || 56 ||
[Analyze grammar]

tathā bruvāṇaṃ gāṅgeyaṃ prītiyuktaṃ punaḥ punaḥ |
uvāca vākyaṃ dīnātmā dharmaputro yudhiṣṭhiraḥ || 57 ||
[Analyze grammar]

kathaṃ jayema dharmajña kathaṃ rājyaṃ labhemahi |
prajānāṃ saṃkṣayo na syātkathaṃ tanme vadābhibho || 58 ||
[Analyze grammar]

bhavānhi no vadhopāyaṃ bravītu svayamātmanaḥ |
bhavantaṃ samare rājanviṣahema kathaṃ vayam || 59 ||
[Analyze grammar]

na hi te sūkṣmamapyasti randhraṃ kurupitāmaha |
maṇḍalenaiva dhanuṣā sadā dṛśyo'si saṃyuge || 60 ||
[Analyze grammar]

nādadānaṃ saṃdadhānaṃ vikarṣantaṃ dhanurna ca |
paśyāmastvā mahābāho rathe sūryamiva sthitam || 61 ||
[Analyze grammar]

narāśvarathanāgānāṃ hantāraṃ paravīrahan |
ka ivotsahate hantuṃ tvāṃ pumānbharatarṣabha || 62 ||
[Analyze grammar]

varṣatā śaravarṣāṇi mahānti puruṣottama |
kṣayaṃ nītā hi pṛtanā bhavatā mahatī mama || 63 ||
[Analyze grammar]

yathā yudhi jayeyaṃ tvāṃ yathā rājyaṃ bhavenmama |
bhavetsainyasya vā śāntistanme brūhi pitāmaha || 64 ||
[Analyze grammar]

tato'bravīcchāṃtanavaḥ pāṇḍavānpāṇḍupūrvaja |
na kathaṃcana kaunteya mayi jīvati saṃyuge |
yuṣmāsu dṛśyate vṛddhiḥ satyametadbravīmi vaḥ || 65 ||
[Analyze grammar]

nirjite mayi yuddhe tu dhruvaṃ jeṣyatha kauravān |
kṣipraṃ mayi praharata yadīcchatha raṇe jayam |
anujānāmi vaḥ pārthāḥ praharadhvaṃ yathāsukham || 66 ||
[Analyze grammar]

evaṃ hi sukṛtaṃ manye bhavatāṃ vidito hyaham |
hate mayi hataṃ sarvaṃ tasmādevaṃ vidhīyatām || 67 ||
[Analyze grammar]

yudhiṣṭhira uvāca |
brūhi tasmādupāyaṃ no yathā yuddhe jayemahi |
bhavantaṃ samare kruddhaṃ daṇḍapāṇimivāntakam || 68 ||
[Analyze grammar]

śakyo vajradharo jetuṃ varuṇo'tha yamastathā |
na bhavānsamare śakyaḥ sendrairapi surāsuraiḥ || 69 ||
[Analyze grammar]

bhīṣma uvāca |
satyametanmahābāho yathā vadasi pāṇḍava |
nāhaṃ śakyo raṇe jetuṃ sendrairapi surāsuraiḥ || 70 ||
[Analyze grammar]

āttaśastro raṇe yatto gṛhītavarakārmukaḥ |
nyastaśastraṃ tu māṃ rājanhanyuryudhi mahārathāḥ || 71 ||
[Analyze grammar]

nikṣiptaśastre patite vimuktakavacadhvaje |
dravamāṇe ca bhīte ca tavāsmīti ca vādini || 72 ||
[Analyze grammar]

striyāṃ strīnāmadheye ca vikale caikaputrake |
aprasūte ca duṣprekṣye na yuddhaṃ rocate mama || 73 ||
[Analyze grammar]

imaṃ ca śṛṇu me pārtha saṃkalpaṃ pūrvacintitam |
amaṅgalyadhvajaṃ dṛṣṭvā na yudhyeyaṃ kathaṃcana || 74 ||
[Analyze grammar]

ya eṣa draupado rājaṃstava sainye mahārathaḥ |
śikhaṇḍī samarākāṅkṣī śūraśca samitiṃjayaḥ || 75 ||
[Analyze grammar]

yathābhavacca strī pūrvaṃ paścātpuṃstvamupāgataḥ |
jānanti ca bhavanto'pi sarvametadyathātatham || 76 ||
[Analyze grammar]

arjunaḥ samare śūraḥ puraskṛtya śikhaṇḍinam |
māmeva viśikhaistūrṇamabhidravatu daṃśitaḥ || 77 ||
[Analyze grammar]

amaṅgalyadhvaje tasminstrīpūrve ca viśeṣataḥ |
na prahartumabhīpsāmi gṛhīteṣuṃ kathaṃcana || 78 ||
[Analyze grammar]

tadantaraṃ samāsādya pāṇḍavo māṃ dhanaṃjayaḥ |
śarairghātayatu kṣipraṃ samantādbharatarṣabha || 79 ||
[Analyze grammar]

na taṃ paśyāmi lokeṣu yo māṃ hanyātsamudyatam |
ṛte kṛṣṇānmahābhāgātpāṇḍavādvā dhanaṃjayāt || 80 ||
[Analyze grammar]

eṣa tasmātpurodhāya kaṃcidanyaṃ mamāgrataḥ |
māṃ pātayatu bībhatsurevaṃ te vijayo bhavet || 81 ||
[Analyze grammar]

etatkuruṣva kaunteya yathoktaṃ vacanaṃ mama |
tato jeṣyasi saṃgrāme dhārtarāṣṭrānsamāgatān || 82 ||
[Analyze grammar]

saṃjaya uvāca |
te'nujñātāstataḥ pārthā jagmuḥ svaśibiraṃ prati |
abhivādya mahātmānaṃ bhīṣmaṃ kurupitāmaham || 83 ||
[Analyze grammar]

tathoktavati gāṅgeye paralokāya dīkṣite |
arjuno duḥkhasaṃtaptaḥ savrīḍamidamabravīt || 84 ||
[Analyze grammar]

guruṇā kulavṛddhena kṛtaprajñena dhīmatā |
pitāmahena saṃgrāme kathaṃ yotsyāmi mādhava || 85 ||
[Analyze grammar]

krīḍatā hi mayā bālye vāsudeva mahāmanāḥ |
pāṃsurūṣitagātreṇa mahātmā paruṣīkṛtaḥ || 86 ||
[Analyze grammar]

yasyāhamadhiruhyāṅkaṃ bālaḥ kila gadāgraja |
tātetyavocaṃ pitaraṃ pituḥ pāṇḍormahātmanaḥ || 87 ||
[Analyze grammar]

nāhaṃ tātastava pitustāto'smi tava bhārata |
iti māmabravīdbālye yaḥ sa vadhyaḥ kathaṃ mayā || 88 ||
[Analyze grammar]

kāmaṃ vadhyatu me sainyaṃ nāhaṃ yotsye mahātmanā |
jayo vāstu vadho vā me kathaṃ vā kṛṣṇa manyase || 89 ||
[Analyze grammar]

śrīkṛṣṇa uvāca |
pratijñāya vadhaṃ jiṣṇo purā bhīṣmasya saṃyuge |
kṣatradharme sthitaḥ pārtha kathaṃ nainaṃ haniṣyasi || 90 ||
[Analyze grammar]

pātayainaṃ rathātpārtha vajrāhatamiva drumam |
nāhatvā yudhi gāṅgeyaṃ vijayaste bhaviṣyati || 91 ||
[Analyze grammar]

diṣṭametatpurā devairbhaviṣyatyavaśasya te |
hantā bhīṣmasya pūrvendra iti tanna tadanyathā || 92 ||
[Analyze grammar]

na hi bhīṣmaṃ durādharṣaṃ vyāttānanamivāntakam |
tvadanyaḥ śaknuyāddhantumapi vajradharaḥ svayam || 93 ||
[Analyze grammar]

jahi bhīṣmaṃ mahābāho śṛṇu cedaṃ vaco mama |
yathovāca purā śakraṃ mahābuddhirbṛhaspatiḥ || 94 ||
[Analyze grammar]

jyāyāṃsamapi cecchakra guṇairapi samanvitam |
ātatāyinamāmantrya hanyādghātakamāgatam || 95 ||
[Analyze grammar]

śāśvato'yaṃ sthito dharmaḥ kṣatriyāṇāṃ dhanaṃjaya |
yoddhavyaṃ rakṣitavyaṃ ca yaṣṭavyaṃ cānasūyubhiḥ || 96 ||
[Analyze grammar]

arjuna uvāca |
śikhaṇḍī nidhanaṃ kṛṣṇa bhīṣmasya bhavitā dhruvam |
dṛṣṭvaiva hi sadā bhīṣmaḥ pāñcālyaṃ vinivartate || 97 ||
[Analyze grammar]

te vayaṃ pramukhe tasya sthāpayitvā śikhaṇḍinam |
gāṅgeyaṃ pātayiṣyāma upāyeneti me matiḥ || 98 ||
[Analyze grammar]

ahamanyānmaheṣvāsānvārayiṣyāmi sāyakaiḥ |
śikhaṇḍyapi yudhāṃ śreṣṭho bhīṣmamevābhiyāsyatu || 99 ||
[Analyze grammar]

śrutaṃ te kurumukhyasya nāhaṃ hanyāṃ śikhaṇḍinam |
kanyā hyeṣā purā jātā puruṣaḥ samapadyata || 100 ||
[Analyze grammar]

saṃjaya uvāca |
ityevaṃ niścayaṃ kṛtvā pāṇḍavāḥ sahamādhavāḥ |
śayanāni yathāsvāni bhejire puruṣarṣabhāḥ || 101 ||
[Analyze grammar]