Chapter 92

saṃjaya uvāca |
putraṃ tu nihataṃ śrutvā irāvantaṃ dhanaṃjayaḥ |
duḥkhena mahatāviṣṭo niḥśvasanpannago yathā || 1 ||
[Analyze grammar]

abravītsamare rājanvāsudevamidaṃ vacaḥ |
idaṃ nūnaṃ mahāprājño viduro dṛṣṭavānpurā || 2 ||
[Analyze grammar]

kurūṇāṃ pāṇḍavānāṃ ca kṣayaṃ ghoraṃ mahāmatiḥ |
tato nivārayitavāndhṛtarāṣṭraṃ janeśvaram || 3 ||
[Analyze grammar]

avadhyā bahavo vīrāḥ saṃgrāme madhusūdana |
nihatāḥ kauravaiḥ saṃkhye tathāsmābhiśca te hatāḥ || 4 ||
[Analyze grammar]

arthahetornaraśreṣṭha kriyate karma kutsitam |
dhigarthānyatkṛte hyevaṃ kriyate jñātisaṃkṣayaḥ || 5 ||
[Analyze grammar]

adhanasya mṛtaṃ śreyo na ca jñātivadhāddhanam |
kiṃ nu prāpsyāmahe kṛṣṇa hatvā jñātīnsamāgatān || 6 ||
[Analyze grammar]

duryodhanāparādhena śakuneḥ saubalasya ca |
kṣatriyā nidhanaṃ yānti karṇadurmantritena ca || 7 ||
[Analyze grammar]

idānīṃ ca vijānāmi sukṛtaṃ madhusūdana |
kṛtaṃ rājñā mahābāho yācatā sma suyodhanam |
rājyārdhaṃ pañca vā grāmānnākārṣītsa ca durmatiḥ || 8 ||
[Analyze grammar]

dṛṣṭvā hi kṣatriyāñśūrāñśayānāndharaṇītale |
nindāmi bhṛśamātmānaṃ dhigastu kṣatrajīvikām || 9 ||
[Analyze grammar]

aśaktamiti māmete jñāsyanti kṣatriyā raṇe |
yuddhaṃ mamaibhirucitaṃ jñātibhirmadhusūdana || 10 ||
[Analyze grammar]

saṃcodaya hayānkṣipraṃ dhārtarāṣṭracamūṃ prati |
pratariṣye mahāpāraṃ bhujābhyāṃ samarodadhim |
nāyaṃ klībayituṃ kālo vidyate mādhava kvacit || 11 ||
[Analyze grammar]

evamuktastu pārthena keśavaḥ paravīrahā |
codayāmāsa tānaśvānpāṇḍurānvātaraṃhasaḥ || 12 ||
[Analyze grammar]

atha śabdo mahānāsīttava sainyasya bhārata |
mārutoddhūtavegasya sāgarasyeva parvaṇi || 13 ||
[Analyze grammar]

aparāhṇe mahārāja saṃgrāmaḥ samapadyata |
parjanyasamanirghoṣo bhīṣmasya saha pāṇḍavaiḥ || 14 ||
[Analyze grammar]

tato rājaṃstava sutā bhīmasenamupādravan |
parivārya raṇe droṇaṃ vasavo vāsavaṃ yathā || 15 ||
[Analyze grammar]

tataḥ śāṃtanavo bhīṣmaḥ kṛpaśca rathināṃ varaḥ |
bhagadattaḥ suśarmā ca dhanaṃjayamupādravan || 16 ||
[Analyze grammar]

hārdikyo bāhlikaścaiva sātyakiṃ samabhidrutau |
ambaṣṭhakastu nṛpatirabhimanyumavārayat || 17 ||
[Analyze grammar]

śeṣāstvanye mahārāja śeṣāneva mahārathān |
tataḥ pravavṛte yuddhaṃ ghorarūpaṃ bhayāvaham || 18 ||
[Analyze grammar]

bhīmasenastu saṃprekṣya putrāṃstava janeśvara |
prajajvāla raṇe kruddho haviṣā havyavāḍiva || 19 ||
[Analyze grammar]

putrāstu tava kaunteyaṃ chādayāṃ cakrire śaraiḥ |
prāvṛṣīva mahārāja jaladāḥ parvataṃ yathā || 20 ||
[Analyze grammar]

sa cchādyamāno bahudhā putraistava viśāṃ pate |
sṛkkiṇī vilihanvīraḥ śārdūla iva darpitaḥ || 21 ||
[Analyze grammar]

vyūḍhoraskaṃ tato bhīmaḥ pātayāmāsa pārthiva |
kṣurapreṇa sutīkṣṇena so'bhavadgatajīvitaḥ || 22 ||
[Analyze grammar]

apareṇa tu bhallena pītena niśitena ca |
apātayatkuṇḍalinaṃ siṃhaḥ kṣudramṛgaṃ yathā || 23 ||
[Analyze grammar]

tataḥ suniśitānpītānsamādatta śilīmukhān |
sa sapta tvarayā yuktaḥ putrāṃste prāpya māriṣa || 24 ||
[Analyze grammar]

preṣitā bhīmasenena śarāste dṛḍhadhanvanā |
apātayanta putrāṃste rathebhyaḥ sumahārathān || 25 ||
[Analyze grammar]

anādhṛṣṭiṃ kuṇḍabhedaṃ vairāṭaṃ dīrghalocanam |
dīrghabāhuṃ subāhuṃ ca tathaiva kanakadhvajam || 26 ||
[Analyze grammar]

prapatanta sma te vīrā virejurbharatarṣabha |
vasante puṣpaśabalāścūtāḥ prapatitā iva || 27 ||
[Analyze grammar]

tataḥ pradudruvuḥ śeṣāḥ putrāstava viśāṃ pate |
taṃ kālamiva manyanto bhīmasenaṃ mahābalam || 28 ||
[Analyze grammar]

droṇastu samare vīraṃ nirdahantaṃ sutāṃstava |
yathādriṃ vāridhārābhiḥ samantādvyakiraccharaiḥ || 29 ||
[Analyze grammar]

tatrādbhutamapaśyāma kuntīputrasya pauruṣam |
droṇena vāryamāṇo'pi nijaghne yatsutāṃstava || 30 ||
[Analyze grammar]

yathā hi govṛṣo varṣaṃ saṃdhārayati khātpatat |
bhīmastathā droṇamuktaṃ śaravarṣamadīdharat || 31 ||
[Analyze grammar]

adbhutaṃ ca mahārāja tatra cakre vṛkodaraḥ |
yatputrāṃste'vadhītsaṃkhye droṇaṃ caiva nyayodhayat || 32 ||
[Analyze grammar]

putreṣu tava vīreṣu cikrīḍārjunapūrvajaḥ |
mṛgeṣviva mahārāja caranvyāghro mahābalaḥ || 33 ||
[Analyze grammar]

yathā vā paśumadhyastho drāvayeta paśūnvṛkaḥ |
vṛkodarastava sutāṃstathā vyadrāvayadraṇe || 34 ||
[Analyze grammar]

gāṅgeyo bhagadattaśca gautamaśca mahārathaḥ |
pāṇḍavaṃ rabhasaṃ yuddhe vārayāmāsurarjunam || 35 ||
[Analyze grammar]

astrairastrāṇi saṃvārya teṣāṃ so'tiratho raṇe |
pravīrāṃstava sainyeṣu preṣayāmāsa mṛtyave || 36 ||
[Analyze grammar]

abhimanyuśca rājānamambaṣṭhaṃ lokaviśrutam |
virathaṃ rathināṃ śreṣṭhaṃ kārayāmāsa sāyakaiḥ || 37 ||
[Analyze grammar]

viratho vadhyamānaḥ sa saubhadreṇa yaśasvinā |
avaplutya rathāttūrṇaṃ savrīḍo manujādhipaḥ || 38 ||
[Analyze grammar]

asiṃ cikṣepa samare saubhadrasya mahātmanaḥ |
āruroha rathaṃ caiva hārdikyasya mahātmanaḥ || 39 ||
[Analyze grammar]

āpatantaṃ tu nistriṃśaṃ yuddhamārgaviśāradaḥ |
lāghavādvyaṃsayāmāsa saubhadraḥ paravīrahā || 40 ||
[Analyze grammar]

vyaṃsitaṃ vīkṣya nistriṃśaṃ saubhadreṇa raṇe tadā |
sādhu sādhviti sainyānāṃ praṇādo'bhūdviśāṃ pate || 41 ||
[Analyze grammar]

dhṛṣṭadyumnamukhāstvanye tava sainyamayodhayan |
tathaiva tāvakāḥ sarve pāṇḍusainyamayodhayan || 42 ||
[Analyze grammar]

tatrākrando mahānāsīttava teṣāṃ ca bhārata |
nighnatāṃ bhṛśamanyonyaṃ kurvatāṃ karma duṣkaram || 43 ||
[Analyze grammar]

anyonyaṃ hi raṇe śūrāḥ keśeṣvākṣipya māriṣa |
nakhairdantairayudhyanta muṣṭibhirjānubhistathā || 44 ||
[Analyze grammar]

bāhubhiśca talaiścaiva nistriṃśaiśca susaṃśitaiḥ |
vivaraṃ prāpya cānyonyamanayanyamasādanam || 45 ||
[Analyze grammar]

nyahanacca pitā putraṃ putraśca pitaraṃ raṇe |
vyākulīkṛtasaṃkalpā yuyudhustatra mānavāḥ || 46 ||
[Analyze grammar]

raṇe cārūṇi cāpāni hemapṛṣṭhāni bhārata |
hatānāmapaviddhāni kalāpāśca mahādhanāḥ || 47 ||
[Analyze grammar]

jātarūpamayaiḥ puṅkhai rājataiśca śitāḥ śarāḥ |
tailadhautā vyarājanta nirmuktabhujagopamāḥ || 48 ||
[Analyze grammar]

hastidantatsarūnkhaḍgāñjātarūpapariṣkṛtān |
carmāṇi cāpaviddhāni rukmapṛṣṭhāni dhanvinām || 49 ||
[Analyze grammar]

suvarṇavikṛtaprāsānpaṭṭiśānhemabhūṣitān |
jātarūpamayāścarṣṭīḥ śaktyaśca kanakojjvalāḥ || 50 ||
[Analyze grammar]

apakṛttāśca patitā musalāni gurūṇi ca |
parighānpaṭṭiśāṃścaiva bhiṇḍipālāṃśca māriṣa || 51 ||
[Analyze grammar]

patitāṃstomarāṃścāpi citrā hemapariṣkṛtāḥ |
kuthāśca bahudhākārāścāmaravyajanāni ca || 52 ||
[Analyze grammar]

nānāvidhāni śastrāṇi visṛjya patitā narāḥ |
jīvanta iva dṛśyante gatasattvā mahārathāḥ || 53 ||
[Analyze grammar]

gadāvimathitairgātrairmusalairbhinnamastakāḥ |
gajavājirathakṣuṇṇāḥ śerate sma narāḥ kṣitau || 54 ||
[Analyze grammar]

tathaivāśvanṛnāgānāṃ śarīrairābabhau tadā |
saṃchannā vasudhā rājanparvatairiva sarvataḥ || 55 ||
[Analyze grammar]

samare patitaiścaiva śaktyṛṣṭiśaratomaraiḥ |
nistriṃśaiḥ paṭṭiśaiḥ prāsairayaskuntaiḥ paraśvadhaiḥ || 56 ||
[Analyze grammar]

parighairbhiṇḍipālaiśca śataghnībhistathaiva ca |
śarīraiḥ śastrabhinnaiśca samāstīryata medinī || 57 ||
[Analyze grammar]

niḥśabdairalpaśabdaiśca śoṇitaughapariplutaiḥ |
gatāsubhiramitraghna vibabhau saṃvṛtā mahī || 58 ||
[Analyze grammar]

satalatraiḥ sakeyūrairbāhubhiścandanokṣitaiḥ |
hastihastopamaiśchinnairūrubhiśca tarasvinām || 59 ||
[Analyze grammar]

baddhacūḍāmaṇidharaiḥ śirobhiśca sakuṇḍalaiḥ |
patitairvṛṣabhākṣāṇāṃ babhau bhārata medinī || 60 ||
[Analyze grammar]

kavacaiḥ śoṇitādigdhairviprakīrṇaiśca kāñcanaiḥ |
rarāja subhṛśaṃ bhūmiḥ śāntārcibhirivānalaiḥ || 61 ||
[Analyze grammar]

vipraviddhaiḥ kalāpaiśca patitaiśca śarāsanaiḥ |
viprakīrṇaiḥ śaraiścāpi rukmapuṅkhaiḥ samantataḥ || 62 ||
[Analyze grammar]

rathaiśca bahubhirbhagnaiḥ kiṅkiṇījālamālibhiḥ |
vājibhiśca hataiḥ kīrṇaiḥ srastajihvaiḥ saśoṇitaiḥ || 63 ||
[Analyze grammar]

anukarṣaiḥ patākābhirupāsaṅgairdhvajairapi |
pravīrāṇāṃ mahāśaṅkhairviprakīrṇaiśca pāṇḍuraiḥ || 64 ||
[Analyze grammar]

srastahastaiśca mātaṅgaiḥ śayānairvibabhau mahī |
nānārūpairalaṃkāraiḥ pramadevābhyalaṃkṛtā || 65 ||
[Analyze grammar]

dantibhiścāparaistatra saprāsairgāḍhavedanaiḥ |
karaiḥ śabdaṃ vimuñcadbhiḥ śīkaraṃ ca muhurmuhuḥ |
vibabhau tadraṇasthānaṃ dhamyamānairivācalaiḥ || 66 ||
[Analyze grammar]

nānārāgaiḥ kambalaiśca paristomaiśca dantinām |
vaiḍūryamaṇidaṇḍaiśca patitairaṅkuśaiḥ śubhaiḥ || 67 ||
[Analyze grammar]

ghaṇṭābhiśca gajendrāṇāṃ patitābhiḥ samantataḥ |
vighāṭitavicitrābhiḥ kuthābhī rāṅkavaistathā || 68 ||
[Analyze grammar]

graiveyaiścitrarūpaiśca rukmakakṣyābhireva ca |
yantraiśca bahudhā chinnaistomaraiśca sakampanaiḥ || 69 ||
[Analyze grammar]

aśvānāṃ reṇukapilai rukmacchannairuraśchadaiḥ |
sādināṃ ca bhujaiśchinnaiḥ patitaiḥ sāṅgadaistathā || 70 ||
[Analyze grammar]

prāsaiśca vimalaistīkṣṇairvimalābhistatharṣṭibhiḥ |
uṣṇīṣaiśca tathā chinnaiḥ praviddhaiśca tatastataḥ || 71 ||
[Analyze grammar]

vicitrairardhacandraiśca jātarūpapariṣkṛtaiḥ |
aśvāstaraparistomai rāṅkavairmṛditaistathā || 72 ||
[Analyze grammar]

narendracūḍāmaṇibhirvicitraiśca mahādhanaiḥ |
chatraistathāpaviddhaiśca cāmaravyajanairapi || 73 ||
[Analyze grammar]

padmendudyutibhiścaiva vadanaiścārukuṇḍalaiḥ |
kḷptaśmaśrubhiratyarthaṃ vīrāṇāṃ samalaṃkṛtaiḥ || 74 ||
[Analyze grammar]

apaviddhairmahārāja suvarṇojjvalakuṇḍalaiḥ |
grahanakṣatraśabalā dyaurivāsīdvasuṃdharā || 75 ||
[Analyze grammar]

evamete mahāsene mṛdite tatra bhārata |
parasparaṃ samāsādya tava teṣāṃ ca saṃyuge || 76 ||
[Analyze grammar]

teṣu śrānteṣu bhagneṣu mṛditeṣu ca bhārata |
rātriḥ samabhavadghorā nāpaśyāma tato raṇam || 77 ||
[Analyze grammar]

tato'vahāraṃ sainyānāṃ pracakruḥ kurupāṇḍavāḥ |
ghore niśāmukhe raudre vartamāne sudāruṇe || 78 ||
[Analyze grammar]

avahāraṃ tataḥ kṛtvā sahitāḥ kurupāṇḍavāḥ |
nyaviśanta yathākālaṃ gatvā svaśibiraṃ tadā || 79 ||
[Analyze grammar]