Chapter 91

saṃjaya uvāca |
tasminmahati saṃkrande rājā duryodhanastadā |
gāṅgeyamupasaṃgamya vinayenābhivādya ca || 1 ||
[Analyze grammar]

tasya sarvaṃ yathāvṛttamākhyātumupacakrame |
ghaṭotkacasya vijayamātmanaśca parājayam || 2 ||
[Analyze grammar]

kathayāmāsa durdharṣo viniḥśvasya punaḥ punaḥ |
abravīcca tadā rājanbhīṣmaṃ kurupitāmaham || 3 ||
[Analyze grammar]

bhavantaṃ samupāśritya vāsudevaṃ yathā paraiḥ |
pāṇḍavairvigraho ghoraḥ samārabdho mayā prabho || 4 ||
[Analyze grammar]

ekādaśa samākhyātā akṣauhiṇyaśca yā mama |
nideśe tava tiṣṭhanti mayā sārdhaṃ paraṃtapa || 5 ||
[Analyze grammar]

so'haṃ bharataśārdūla bhīmasenapurogamaiḥ |
ghaṭotkacaṃ samāśritya pāṇḍavairyudhi nirjitaḥ || 6 ||
[Analyze grammar]

tanme dahati gātrāṇi śuṣkavṛkṣamivānalaḥ |
tadicchāmi mahābhāga tvatprasādātparaṃtapa || 7 ||
[Analyze grammar]

rākṣasāpasadaṃ hantuṃ svayameva pitāmaha |
tvāṃ samāśritya durdharṣaṃ tanme kartuṃ tvamarhasi || 8 ||
[Analyze grammar]

etacchrutvā tu vacanaṃ rājño bharatasattama |
duryodhanamidaṃ vākyaṃ bhīṣmaḥ śāṃtanavo'bravīt || 9 ||
[Analyze grammar]

śṛṇu rājanmama vaco yattvā vakṣyāmi kaurava |
yathā tvayā mahārāja vartitavyaṃ paraṃtapa || 10 ||
[Analyze grammar]

ātmā rakṣyo raṇe tāta sarvāvasthāsvariṃdama |
dharmarājena saṃgrāmastvayā kāryaḥ sadānagha || 11 ||
[Analyze grammar]

arjunena yamābhyāṃ vā bhīmasenena vā punaḥ |
rājadharmaṃ puraskṛtya rājā rājānamṛcchati || 12 ||
[Analyze grammar]

ahaṃ droṇaḥ kṛpo drauṇiḥ kṛtavarmā ca sātvataḥ |
śalyaśca saumadattiśca vikarṇaśca mahārathaḥ || 13 ||
[Analyze grammar]

tava ca bhrātaraḥ śūrā duḥśāsanapurogamāḥ |
tvadarthaṃ pratiyotsyāmo rākṣasaṃ taṃ mahābalam || 14 ||
[Analyze grammar]

tasminraudre rākṣasendre yadi te hṛcchayo mahān |
ayaṃ vā gacchatu raṇe tasya yuddhāya durmateḥ |
bhagadatto mahīpālaḥ puraṃdarasamo yudhi || 15 ||
[Analyze grammar]

etāvaduktvā rājānaṃ bhagadattamathābravīt |
samakṣaṃ pārthivendrasya vākyaṃ vākyaviśāradaḥ || 16 ||
[Analyze grammar]

gaccha śīghraṃ mahārāja haiḍimbaṃ yuddhadurmadam |
vārayasva raṇe yatto miṣatāṃ sarvadhanvinām |
rākṣasaṃ krūrakarmāṇaṃ yathendrastārakaṃ purā || 17 ||
[Analyze grammar]

tava divyāni cāstrāṇi vikramaśca paraṃtapa |
samāgamaśca bahubhiḥ purābhūdasuraiḥ saha || 18 ||
[Analyze grammar]

tvaṃ tasya rājaśārdūla pratiyoddhā mahāhave |
svabalena vṛto rājañjahi rākṣasapuṃgavam || 19 ||
[Analyze grammar]

etacchrutvā tu vacanaṃ bhīṣmasya pṛtanāpateḥ |
prayayau siṃhanādena parānabhimukho drutam || 20 ||
[Analyze grammar]

tamādravantaṃ saṃprekṣya garjantamiva toyadam |
abhyavartanta saṃkruddhāḥ pāṇḍavānāṃ mahārathāḥ || 21 ||
[Analyze grammar]

bhīmaseno'bhimanyuśca rākṣasaśca ghaṭotkacaḥ |
draupadeyāḥ satyadhṛtiḥ kṣatradevaśca māriṣa || 22 ||
[Analyze grammar]

cedipo vasudānaśca daśārṇādhipatistathā |
supratīkena tāṃścāpi bhagadatto'pyupādravat || 23 ||
[Analyze grammar]

tataḥ samabhavadyuddhaṃ ghorarūpaṃ bhayānakam |
pāṇḍūnāṃ bhagadattena yamarāṣṭravivardhanam || 24 ||
[Analyze grammar]

pramuktā rathibhirbāṇā bhīmavegāḥ sutejanāḥ |
te nipeturmahārāja nāgeṣu ca ratheṣu ca || 25 ||
[Analyze grammar]

prabhinnāśca mahānāgā vinītā hastisādibhiḥ |
parasparaṃ samāsādya saṃnipeturabhītavat || 26 ||
[Analyze grammar]

madāndhā roṣasaṃrabdhā viṣāṇāgrairmahāhave |
bibhidurdantamusalaiḥ samāsādya parasparam || 27 ||
[Analyze grammar]

hayāśca cāmarāpīḍāḥ prāsapāṇibhirāsthitāḥ |
coditāḥ sādibhiḥ kṣipraṃ nipeturitaretaram || 28 ||
[Analyze grammar]

pādātāśca padātyoghaistāḍitāḥ śaktitomaraiḥ |
nyapatanta tadā bhūmau śataśo'tha sahasraśaḥ || 29 ||
[Analyze grammar]

rathinaśca tathā rājankarṇinālīkasāyakaiḥ |
nihatya samare vīrānsiṃhanādānvinedire || 30 ||
[Analyze grammar]

tasmiṃstathā vartamāne saṃgrāme lomaharṣaṇe |
bhagadatto maheṣvāso bhīmasenamathādravat || 31 ||
[Analyze grammar]

kuñjareṇa prabhinnena saptadhā sravatā madam |
parvatena yathā toyaṃ sravamāṇena sarvataḥ || 32 ||
[Analyze grammar]

kirañśarasahasrāṇi supratīkaśirogataḥ |
airāvatastho maghavānvāridhārā ivānagha || 33 ||
[Analyze grammar]

sa bhīmaṃ śaradhārābhistāḍayāmāsa pārthivaḥ |
parvataṃ vāridhārābhiḥ prāvṛṣīva balāhakaḥ || 34 ||
[Analyze grammar]

bhīmasenastu saṃkruddhaḥ pādarakṣānparaḥśatān |
nijaghāna maheṣvāsaḥ saṃkruddhaḥ śaravṛṣṭibhiḥ || 35 ||
[Analyze grammar]

tāndṛṣṭvā nihatānkruddho bhagadattaḥ pratāpavān |
codayāmāsa nāgendraṃ bhīmasenarathaṃ prati || 36 ||
[Analyze grammar]

sa nāgaḥ preṣitastena bāṇo jyācodito yathā |
abhyadhāvata vegena bhīmasenamariṃdamam || 37 ||
[Analyze grammar]

tamāpatantaṃ saṃprekṣya pāṇḍavānāṃ mahārathāḥ |
abhyavartanta vegena bhīmasenapurogamāḥ || 38 ||
[Analyze grammar]

kekayāścābhimanyuśca draupadeyāśca sarvaśaḥ |
daśārṇādhipatiḥ śūraḥ kṣatradevaśca māriṣa |
cedipaścitraketuśca saṃkruddhāḥ sarva eva te || 39 ||
[Analyze grammar]

uttamāstrāṇi divyāni darśayanto mahābalāḥ |
tamekaṃ kuñjaraṃ kruddhāḥ samantātparyavārayan || 40 ||
[Analyze grammar]

sa viddho bahubhirbāṇairvyarocata mahādvipaḥ |
saṃjātarudhirotpīḍo dhātucitra ivādrirāṭ || 41 ||
[Analyze grammar]

daśārṇādhipatiścāpi gajaṃ bhūmidharopamam |
samāsthito'bhidudrāva bhagadattasya vāraṇam || 42 ||
[Analyze grammar]

tamāpatantaṃ samare gajaṃ gajapatiḥ sa ca |
dadhāra supratīko'pi veleva makarālayam || 43 ||
[Analyze grammar]

vāritaṃ prekṣya nāgendraṃ daśārṇasya mahātmanaḥ |
sādhu sādhviti sainyāni pāṇḍaveyānyapūjayan || 44 ||
[Analyze grammar]

tataḥ prāgjyotiṣaḥ kruddhastomarānvai caturdaśa |
prāhiṇottasya nāgasya pramukhe nṛpasattama || 45 ||
[Analyze grammar]

tasya varma mukhatrāṇaṃ śātakumbhapariṣkṛtam |
vidārya prāviśankṣipraṃ valmīkamiva pannagāḥ || 46 ||
[Analyze grammar]

sa gāḍhaviddho vyathito nāgo bharatasattama |
upāvṛttamadaḥ kṣipraṃ sa nyavartata vegataḥ || 47 ||
[Analyze grammar]

pradudrāva ca vegena praṇadanbhairavaṃ svanam |
sa mardamānaḥ svabalaṃ vāyurvṛkṣānivaujasā || 48 ||
[Analyze grammar]

tasminparājite nāge pāṇḍavānāṃ mahārathāḥ |
siṃhanādaṃ vinadyoccairyuddhāyaivopatasthire || 49 ||
[Analyze grammar]

tato bhīmaṃ puraskṛtya bhagadattamupādravan |
kiranto vividhānbāṇāñśastrāṇi vividhāni ca || 50 ||
[Analyze grammar]

teṣāmāpatatāṃ rājansaṃkruddhānāmamarṣiṇām |
śrutvā sa ninadaṃ ghoramamarṣādgatasādhvasaḥ |
bhagadatto maheṣvāsaḥ svanāgaṃ pratyacodayat || 51 ||
[Analyze grammar]

aṅkuśāṅguṣṭhanuditaḥ sa gajapravaro yudhi |
tasminkṣaṇe samabhavatsaṃvartaka ivānalaḥ || 52 ||
[Analyze grammar]

rathasaṃghāṃstathā nāgānhayāṃśca saha sādibhiḥ |
pādātāṃśca susaṃkruddhaḥ śataśo'tha sahasraśaḥ |
amṛdnātsamare rājansaṃpradhāvaṃstatastataḥ || 53 ||
[Analyze grammar]

tena saṃloḍyamānaṃ tu pāṇḍūnāṃ tadbalaṃ mahat |
saṃcukoca mahārāja carmevāgnau samāhitam || 54 ||
[Analyze grammar]

bhagnaṃ tu svabalaṃ dṛṣṭvā bhagadattena dhīmatā |
ghaṭotkaco'tha saṃkruddho bhagadattamupādravat || 55 ||
[Analyze grammar]

vikaṭaḥ puruṣo rājandīptāsyo dīptalocanaḥ |
rūpaṃ vibhīṣaṇaṃ kṛtvā roṣeṇa prajvalanniva || 56 ||
[Analyze grammar]

jagrāha vipulaṃ śūlaṃ girīṇāmapi dāraṇam |
nāgaṃ jighāṃsuḥ sahasā cikṣepa ca mahābalaḥ |
saviṣphuliṅgajvālābhiḥ samantātpariveṣṭitam || 57 ||
[Analyze grammar]

tamāpatantaṃ sahasā dṛṣṭvā jvālākulaṃ raṇe |
cikṣepa ruciraṃ tīkṣṇamardhacandraṃ sa pārthivaḥ |
ciccheda sumahacchūlaṃ tena bāṇena vegavat || 58 ||
[Analyze grammar]

nipapāta dvidhā chinnaṃ śūlaṃ hemapariṣkṛtam |
mahāśaniryathā bhraṣṭā śakramuktā nabhogatā || 59 ||
[Analyze grammar]

śūlaṃ nipatitaṃ dṛṣṭvā dvidhā kṛttaṃ sa pārthivaḥ |
rukmadaṇḍāṃ mahāśaktiṃ jagrāhāgniśikhopamām |
cikṣepa tāṃ rākṣasasya tiṣṭha tiṣṭheti cābravīt || 60 ||
[Analyze grammar]

tāmāpatantīṃ saṃprekṣya viyatsthāmaśanīmiva |
utpatya rākṣasastūrṇaṃ jagrāha ca nanāda ca || 61 ||
[Analyze grammar]

babhañja caināṃ tvarito jānunyāropya bhārata |
paśyataḥ pārthivendrasya tadadbhutamivābhavat || 62 ||
[Analyze grammar]

tadavekṣya kṛtaṃ karma rākṣasena balīyasā |
divi devāḥ sagandharvā munayaścāpi vismitāḥ || 63 ||
[Analyze grammar]

pāṇḍavāśca maheṣvāsā bhīmasenapurogamāḥ |
sādhu sādhviti nādena pṛthivīmanunādayan || 64 ||
[Analyze grammar]

taṃ tu śrutvā mahānādaṃ prahṛṣṭānāṃ mahātmanām |
nāmṛṣyata maheṣvāso bhagadattaḥ pratāpavān || 65 ||
[Analyze grammar]

sa visphārya mahaccāpamindrāśanisamasvanam |
abhidudrāva vegena pāṇḍavānāṃ mahārathān |
visṛjanvimalāṃstīkṣṇānnārācāñjvalanaprabhān || 66 ||
[Analyze grammar]

bhīmamekena vivyādha rākṣasaṃ navabhiḥ śaraiḥ |
abhimanyuṃ tribhiścaiva kekayānpañcabhistathā || 67 ||
[Analyze grammar]

pūrṇāyatavisṛṣṭena svarṇapuṅkhena patriṇā |
bibheda dakṣiṇaṃ bāhuṃ kṣatradevasya cāhave |
papāta sahasā tasya saśaraṃ dhanuruttamam || 68 ||
[Analyze grammar]

draupadeyāṃstataḥ pañca pañcabhiḥ samatāḍayat |
bhīmasenasya ca krodhānnijaghāna turaṃgamān || 69 ||
[Analyze grammar]

dhvajaṃ kesariṇaṃ cāsya ciccheda viśikhaistribhiḥ |
nirbibheda tribhiścānyaiḥ sārathiṃ cāsya patribhiḥ || 70 ||
[Analyze grammar]

sa gāḍhaviddho vyathito rathopastha upāviśat |
viśoko bharataśreṣṭha bhagadattena saṃyuge || 71 ||
[Analyze grammar]

tato bhīmo mahārāja viratho rathināṃ varaḥ |
gadāṃ pragṛhya vegena pracaskanda mahārathāt || 72 ||
[Analyze grammar]

tamudyatagadaṃ dṛṣṭvā saśṛṅgamiva parvatam |
tāvakānāṃ bhayaṃ ghoraṃ samapadyata bhārata || 73 ||
[Analyze grammar]

etasminneva kāle tu pāṇḍavaḥ kṛṣṇasārathiḥ |
ājagāma mahārāja nighnañśatrūnsahasraśaḥ || 74 ||
[Analyze grammar]

yatra tau puruṣavyāghrau pitāputrau paraṃtapau |
prāgjyotiṣeṇa saṃsaktau bhīmasenaghaṭotkacau || 75 ||
[Analyze grammar]

dṛṣṭvā tu pāṇḍavo rājanyudhyamānānmahārathān |
tvarito bharataśreṣṭha tatrāyādvikirañśarān || 76 ||
[Analyze grammar]

tato duryodhano rājā tvaramāṇo mahārathaḥ |
senāmacodayatkṣipraṃ rathanāgāśvasaṃkulām || 77 ||
[Analyze grammar]

tāmāpatantīṃ sahasā kauravāṇāṃ mahācamūm |
abhidudrāva vegena pāṇḍavaḥ śvetavāhanaḥ || 78 ||
[Analyze grammar]

bhagadatto'pi samare tena nāgena bhārata |
vimṛdnanpāṇḍavabalaṃ yudhiṣṭhiramupādravat || 79 ||
[Analyze grammar]

tadāsīttumulaṃ yuddhaṃ bhagadattasya māriṣa |
pāñcālaiḥ sṛñjayaiścaiva kekayaiścodyatāyudhaiḥ || 80 ||
[Analyze grammar]

bhīmaseno'pi samare tāvubhau keśavārjunau |
āśrāvayadyathāvṛttamirāvadvadhamuttamam || 81 ||
[Analyze grammar]