Chapter 90

saṃjaya uvāca |
svasainyaṃ nihataṃ dṛṣṭvā rājā duryodhanaḥ svayam |
abhyadhāvata saṃkruddho bhīmasenamariṃdamam || 1 ||
[Analyze grammar]

pragṛhya sumahaccāpamindrāśanisamasvanam |
mahatā śaravarṣeṇa pāṇḍavaṃ samavākirat || 2 ||
[Analyze grammar]

ardhacandraṃ ca saṃdhāya sutīkṣṇaṃ lomavāhinam |
bhīmasenasya ciccheda cāpaṃ krodhasamanvitaḥ || 3 ||
[Analyze grammar]

tadantaraṃ ca saṃprekṣya tvaramāṇo mahārathaḥ |
saṃdadhe niśitaṃ bāṇaṃ girīṇāmapi dāraṇam |
tenorasi mahābāhurbhīmasenamatāḍayat || 4 ||
[Analyze grammar]

sa gāḍhaviddho vyathitaḥ sṛkkiṇī parisaṃlihan |
samālalambe tejasvī dhvajaṃ hemapariṣkṛtam || 5 ||
[Analyze grammar]

tathā vimanasaṃ dṛṣṭvā bhīmasenaṃ ghaṭotkacaḥ |
krodhenābhiprajajvāla didhakṣanniva pāvakaḥ || 6 ||
[Analyze grammar]

abhimanyumukhāścaiva pāṇḍavānāṃ mahārathāḥ |
samabhyadhāvankrośanto rājānaṃ jātasaṃbhramāḥ || 7 ||
[Analyze grammar]

saṃprekṣya tānāpatataḥ saṃkruddhāñjātasaṃbhramān |
bhāradvājo'bravīdvākyaṃ tāvakānāṃ mahārathān || 8 ||
[Analyze grammar]

kṣipraṃ gacchata bhadraṃ vo rājānaṃ parirakṣata |
saṃśayaṃ paramaṃ prāptaṃ majjantaṃ vyasanārṇave || 9 ||
[Analyze grammar]

ete kruddhā maheṣvāsāḥ pāṇḍavānāṃ mahārathāḥ |
bhīmasenaṃ puraskṛtya duryodhanamupadrutāḥ || 10 ||
[Analyze grammar]

nānāvidhāni śastrāṇi visṛjanto jaye ratāḥ |
nadanto bhairavānnādāṃstrāsayantaśca bhūmimām || 11 ||
[Analyze grammar]

tadācāryavacaḥ śrutvā somadattapurogamāḥ |
tāvakāḥ samavartanta pāṇḍavānāmanīkinīm || 12 ||
[Analyze grammar]

kṛpo bhūriśravāḥ śalyo droṇaputro viviṃśatiḥ |
citraseno vikarṇaśca saindhavo'tha bṛhadbalaḥ |
āvantyau ca maheṣvāsau kauravaṃ paryavārayan || 13 ||
[Analyze grammar]

te viṃśatipadaṃ gatvā saṃprahāraṃ pracakrire |
pāṇḍavā dhārtarāṣṭrāśca parasparajighāṃsavaḥ || 14 ||
[Analyze grammar]

evamuktvā mahābāhurmahadvisphārya kārmukam |
bhāradvājastato bhīmaṃ ṣaḍviṃśatyā samārpayat || 15 ||
[Analyze grammar]

bhūyaścainaṃ mahābāhuḥ śaraiḥ śīghramavākirat |
parvataṃ vāridhārābhiḥ śaradīva balāhakaḥ || 16 ||
[Analyze grammar]

taṃ pratyavidhyaddaśabhirbhīmasenaḥ śilīmukhaiḥ |
tvaramāṇo maheṣvāsaḥ savye pārśve mahābalaḥ || 17 ||
[Analyze grammar]

sa gāḍhaviddho vyathito vayovṛddhaśca bhārata |
pranaṣṭasaṃjñaḥ sahasā rathopastha upāviśat || 18 ||
[Analyze grammar]

guruṃ pravyathitaṃ dṛṣṭvā rājā duryodhanaḥ svayam |
drauṇāyaniśca saṃkruddhau bhīmasenamabhidrutau || 19 ||
[Analyze grammar]

tāvāpatantau saṃprekṣya kālāntakayamopamau |
bhīmaseno mahābāhurgadāmādāya satvaraḥ || 20 ||
[Analyze grammar]

avaplutya rathāttūrṇaṃ tasthau giririvācalaḥ |
samudyamya gadāṃ gurvīṃ yamadaṇḍopamāṃ raṇe || 21 ||
[Analyze grammar]

tamudyatagadaṃ dṛṣṭvā kailāsamiva śṛṅgiṇam |
kauravo droṇaputraśca sahitāvabhyadhāvatām || 22 ||
[Analyze grammar]

tāvāpatantau sahitau tvaritau balināṃ varau |
abhyadhāvata vegena tvaramāṇo vṛkodaraḥ || 23 ||
[Analyze grammar]

tamāpatantaṃ saṃprekṣya saṃkruddhaṃ bhīmadarśanam |
samabhyadhāvaṃstvaritāḥ kauravāṇāṃ mahārathāḥ || 24 ||
[Analyze grammar]

bhāradvājamukhāḥ sarve bhīmasenajighāṃsayā |
nānāvidhāni śastrāṇi bhīmasyorasyapātayan |
sahitāḥ pāṇḍavaṃ sarve pīḍayantaḥ samantataḥ || 25 ||
[Analyze grammar]

taṃ dṛṣṭvā saṃśayaṃ prāptaṃ pīḍyamānaṃ mahāratham |
abhimanyuprabhṛtayaḥ pāṇḍavānāṃ mahārathāḥ |
abhyadhāvanparīpsantaḥ prāṇāṃstyaktvā sudustyajān || 26 ||
[Analyze grammar]

anūpādhipatiḥ śūro bhīmasya dayitaḥ sakhā |
nīlo nīlāmbudaprakhyaḥ saṃkruddho drauṇimabhyayāt |
spardhate hi maheṣvāso nityaṃ droṇasutena yaḥ || 27 ||
[Analyze grammar]

sa visphārya mahaccāpaṃ drauṇiṃ vivyādha patriṇā |
yathā śakro mahārāja purā vivyādha dānavam || 28 ||
[Analyze grammar]

vipracittiṃ durādharṣaṃ devatānāṃ bhayaṃkaram |
yena lokatrayaṃ krodhāttrāsitaṃ svena tejasā || 29 ||
[Analyze grammar]

tathā nīlena nirbhinnaḥ sumukhena patatriṇā |
saṃjātarudhirotpīḍo drauṇiḥ krodhasamanvitaḥ || 30 ||
[Analyze grammar]

sa visphārya dhanuścitramindrāśanisamasvanam |
dadhre nīlavināśāya matiṃ matimatāṃ varaḥ || 31 ||
[Analyze grammar]

tataḥ saṃdhāya vimalānbhallānkarmārapāyitān |
jaghāna caturo vāhānpātayāmāsa ca dhvajam || 32 ||
[Analyze grammar]

saptamena ca bhallena nīlaṃ vivyādha vakṣasi |
sa gāḍhaviddho vyathito rathopastha upāviśat || 33 ||
[Analyze grammar]

mohitaṃ vīkṣya rājānaṃ nīlamabhracayopamam |
ghaṭotkaco'pi saṃkruddho bhrātṛbhiḥ parivāritaḥ || 34 ||
[Analyze grammar]

abhidudrāva vegena drauṇimāhavaśobhinam |
tathetare abhyadhāvanrākṣasā yuddhadurmadāḥ || 35 ||
[Analyze grammar]

tamāpatantaṃ saṃprekṣya rākṣasaṃ ghoradarśanam |
abhyadhāvata tejasvī bhāradvājātmajastvaran || 36 ||
[Analyze grammar]

nijaghāna ca saṃkruddho rākṣasānbhīmadarśanān |
ye'bhavannagrataḥ kruddhā rākṣasasya puraḥsarāḥ || 37 ||
[Analyze grammar]

vimukhāṃścaiva tāndṛṣṭvā drauṇicāpacyutaiḥ śaraiḥ |
akrudhyata mahākāyo bhaimasenirghaṭotkacaḥ || 38 ||
[Analyze grammar]

prāduścakre mahāmāyāṃ ghorarūpāṃ sudāruṇām |
mohayansamare drauṇiṃ māyāvī rākṣasādhipaḥ || 39 ||
[Analyze grammar]

tataste tāvakāḥ sarve māyayā vimukhīkṛtāḥ |
anyonyaṃ samapaśyanta nikṛttānmedinītale |
viceṣṭamānānkṛpaṇāñśoṇitena samukṣitān || 40 ||
[Analyze grammar]

droṇaṃ duryodhanaṃ śalyamaśvatthāmānameva ca |
prāyaśaśca maheṣvāsā ye pradhānāśca kauravāḥ || 41 ||
[Analyze grammar]

vidhvastā rathinaḥ sarve gajāśca vinipātitāḥ |
hayāśca sahayārohā vinikṛttāḥ sahasraśaḥ || 42 ||
[Analyze grammar]

taddṛṣṭvā tāvakaṃ sainyaṃ vidrutaṃ śibiraṃ prati |
mama prākrośato rājaṃstathā devavratasya ca || 43 ||
[Analyze grammar]

yudhyadhvaṃ mā palāyadhvaṃ māyaiṣā rākṣasī raṇe |
ghaṭotkacaprayukteti nātiṣṭhanta vimohitāḥ |
naiva te śraddadhurbhītā vadatorāvayorvacaḥ || 44 ||
[Analyze grammar]

tāṃśca pradravato dṛṣṭvā jayaṃ prāptāśca pāṇḍavāḥ |
ghaṭotkacena sahitāḥ siṃhanādānpracakrire |
śaṅkhadundubhighoṣāśca samantātsasvanurbhṛśam || 45 ||
[Analyze grammar]

evaṃ tava balaṃ sarvaṃ haiḍimbena durātmanā |
sūryāstamanavelāyāṃ prabhagnaṃ vidrutaṃ diśaḥ || 46 ||
[Analyze grammar]