Chapter 84

saṃjaya uvāca |
bhīṣmaṃ tu samare kruddhaṃ pratapantaṃ samantataḥ |
na śekuḥ pāṇḍavā draṣṭuṃ tapantamiva bhāskaram || 1 ||
[Analyze grammar]

tataḥ sarvāṇi sainyāni dharmaputrasya śāsanāt |
abhyadravanta gāṅgeyaṃ mardayantaṃ śitaiḥ śaraiḥ || 2 ||
[Analyze grammar]

sa tu bhīṣmo raṇaślāghī somakānsahasṛñjayān |
pāñcālāṃśca maheṣvāsānpātayāmāsa sāyakaiḥ || 3 ||
[Analyze grammar]

te vadhyamānā bhīṣmeṇa pāñcālāḥ somakaiḥ saha |
bhīṣmamevābhyayustūrṇaṃ tyaktvā mṛtyukṛtaṃ bhayam || 4 ||
[Analyze grammar]

sa teṣāṃ rathināṃ vīro bhīṣmaḥ śāṃtanavo yudhi |
ciccheda sahasā rājanbāhūnatha śirāṃsi ca || 5 ||
[Analyze grammar]

virathānrathinaścakre pitā devavratastava |
patitānyuttamāṅgāni hayebhyo hayasādinām || 6 ||
[Analyze grammar]

nirmanuṣyāṃśca mātaṅgāñśayānānparvatopamān |
apaśyāma mahārāja bhīṣmāstreṇa pramohitān || 7 ||
[Analyze grammar]

na tatrāsītpumānkaścitpāṇḍavānāṃ viśāṃ pate |
anyatra rathināṃ śreṣṭhādbhīmasenānmahābalāt || 8 ||
[Analyze grammar]

sa hi bhīṣmaṃ samāsādya tāḍayāmāsa saṃyuge |
tato niṣṭānako ghoro bhīṣmabhīmasamāgame || 9 ||
[Analyze grammar]

babhūva sarvasainyānāṃ ghorarūpo bhayānakaḥ |
tathaiva pāṇḍavā hṛṣṭāḥ siṃhanādamathānadan || 10 ||
[Analyze grammar]

tato duryodhano rājā sodaryaiḥ parivāritaḥ |
bhīṣmaṃ jugopa samare vartamāne janakṣaye || 11 ||
[Analyze grammar]

bhīmastu sārathiṃ hatvā bhīṣmasya rathināṃ varaḥ |
vidrutāśve rathe tasmindravamāṇe samantataḥ |
sunābhasya śareṇāśu śiraściccheda cārihā || 12 ||
[Analyze grammar]

kṣurapreṇa sutīkṣṇena sa hato nyapatadbhuvi |
hate tasminmahārāja tava putre mahārathe |
nāmṛṣyanta raṇe śūrāḥ sodaryāḥ sapta saṃyuge || 13 ||
[Analyze grammar]

ādityaketurbahvāśī kuṇḍadhāro mahodaraḥ |
aparājitaḥ paṇḍitako viśālākṣaḥ sudurjayaḥ || 14 ||
[Analyze grammar]

pāṇḍavaṃ citrasaṃnāhā vicitrakavacadhvajāḥ |
abhyadravanta saṃgrāme yoddhukāmārimardanāḥ || 15 ||
[Analyze grammar]

mahodarastu samare bhīmaṃ vivyādha patribhiḥ |
navabhirvajrasaṃkāśairnamuciṃ vṛtrahā yathā || 16 ||
[Analyze grammar]

ādityaketuḥ saptatyā bahvāśī cāpi pañcabhiḥ |
navatyā kuṇḍadhārastu viśālākṣaśca saptabhiḥ || 17 ||
[Analyze grammar]

aparājito mahārāja parājiṣṇurmahārathaḥ |
śarairbahubhirānarchadbhīmasenaṃ mahābalam || 18 ||
[Analyze grammar]

raṇe paṇḍitakaścainaṃ tribhirbāṇaiḥ samardayat |
sa tanna mamṛṣe bhīmaḥ śatrubhirvadhamāhave || 19 ||
[Analyze grammar]

dhanuḥ prapīḍya vāmena kareṇāmitrakarśanaḥ |
śiraściccheda samare śareṇa nataparvaṇā || 20 ||
[Analyze grammar]

aparājitasya sunasaṃ tava putrasya saṃyuge |
parājitasya bhīmena nipapāta śiro mahīm || 21 ||
[Analyze grammar]

athāpareṇa bhallena kuṇḍadhāraṃ mahāratham |
prāhiṇonmṛtyulokāya sarvalokasya paśyataḥ || 22 ||
[Analyze grammar]

tataḥ punarameyātmā prasaṃdhāya śilīmukham |
preṣayāmāsa samare paṇḍitaṃ prati bhārata || 23 ||
[Analyze grammar]

sa śaraḥ paṇḍitaṃ hatvā viveśa dharaṇītalam |
yathā naraṃ nihatyāśu bhujagaḥ kālacoditaḥ || 24 ||
[Analyze grammar]

viśālākṣaśiraśchittvā pātayāmāsa bhūtale |
tribhiḥ śarairadīnātmā smarankleśaṃ purātanam || 25 ||
[Analyze grammar]

mahodaraṃ maheṣvāsaṃ nārācena stanāntare |
vivyādha samare rājansa hato nyapatadbhuvi || 26 ||
[Analyze grammar]

ādityaketoḥ ketuṃ ca chittvā bāṇena saṃyuge |
bhallena bhṛśatīkṣṇena śiraściccheda cārihā || 27 ||
[Analyze grammar]

bahvāśinaṃ tato bhīmaḥ śareṇa nataparvaṇā |
preṣayāmāsa saṃkruddho yamasya sadanaṃ prati || 28 ||
[Analyze grammar]

pradudruvustataste'nye putrāstava viśāṃ pate |
manyamānā hi tatsatyaṃ sabhāyāṃ tasya bhāṣitam || 29 ||
[Analyze grammar]

tato duryodhano rājā bhrātṛvyasanakarśitaḥ |
abravīttāvakānyodhānbhīmo'yaṃ yudhi vadhyatām || 30 ||
[Analyze grammar]

evamete maheṣvāsāḥ putrāstava viśāṃ pate |
bhrātṝnsaṃdṛśya nihatānprāsmaraṃste hi tadvacaḥ || 31 ||
[Analyze grammar]

yaduktavānmahāprājñaḥ kṣattā hitamanāmayam |
tadidaṃ samanuprāptaṃ vacanaṃ divyadarśinaḥ || 32 ||
[Analyze grammar]

lobhamohasamāviṣṭaḥ putraprītyā janādhipa |
na budhyase purā yattattathyamuktaṃ vaco mahat || 33 ||
[Analyze grammar]

tathaiva hi vadhārthāya putrāṇāṃ pāṇḍavo balī |
nūnaṃ jāto mahābāhuryathā hanti sma kauravān || 34 ||
[Analyze grammar]

tato duryodhano rājā bhīṣmamāsādya māriṣa |
duḥkhena mahatāviṣṭo vilalāpātikarśitaḥ || 35 ||
[Analyze grammar]

nihatā bhrātaraḥ śūrā bhīmasenena me yudhi |
yatamānāstathānye'pi hanyante sarvasainikāḥ || 36 ||
[Analyze grammar]

bhavāṃśca madhyasthatayā nityamasmānupekṣate |
so'haṃ kāpathamārūḍhaḥ paśya daivamidaṃ mama || 37 ||
[Analyze grammar]

etacchrutvā vacaḥ krūraṃ pitā devavratastava |
duryodhanamidaṃ vākyamabravītsāśrulocanam || 38 ||
[Analyze grammar]

uktametanmayā pūrvaṃ droṇena vidureṇa ca |
gāndhāryā ca yaśasvinyā tattvaṃ tāta na buddhavān || 39 ||
[Analyze grammar]

samayaśca mayā pūrvaṃ kṛto vaḥ śatrukarśana |
nāhaṃ yudhi vimoktavyo nāpyācāryaḥ kathaṃcana || 40 ||
[Analyze grammar]

yaṃ yaṃ hi dhārtarāṣṭrāṇāṃ bhīmo drakṣyati saṃyuge |
haniṣyati raṇe taṃ taṃ satyametadbravīmi te || 41 ||
[Analyze grammar]

sa tvaṃ rājansthiro bhūtvā dṛḍhāṃ kṛtvā raṇe matim |
yodhayasva raṇe pārthānsvargaṃ kṛtvā parāyaṇam || 42 ||
[Analyze grammar]

na śakyāḥ pāṇḍavā jetuṃ sendrairapi surāsuraiḥ |
tasmādyuddhe matiṃ kṛtvā sthirāṃ yudhyasva bhārata || 43 ||
[Analyze grammar]