Chapter 81

saṃjaya uvāca |
sa tudyamānastu śarairdhanaṃjayaḥ padā hato nāga iva śvasanbalī |
bāṇena bāṇena mahārathānāṃ ciccheda cāpāni raṇe prasahya || 1 ||
[Analyze grammar]

saṃchidya cāpāni ca tāni rājñāṃ teṣāṃ raṇe vīryavatāṃ kṣaṇena |
vivyādha bāṇairyugapanmahātmā niḥśeṣatāṃ teṣvatha manyamānaḥ || 2 ||
[Analyze grammar]

nipeturājau rudhirapradigdhāste tāḍitāḥ śakrasutena rājan |
vibhinnagātrāḥ patitottamāṅgā gatāsavaśchinnatanutrakāyāḥ || 3 ||
[Analyze grammar]

mahīṃ gatāḥ pārthabalābhibhūtā vicitrarūpā yugapadvineśuḥ |
dṛṣṭvā hatāṃstānyudhi rājaputrāṃstrigartarājaḥ prayayau kṣaṇena || 4 ||
[Analyze grammar]

teṣāṃ rathānāmatha pṛṣṭhagopā dvātriṃśadanye'byapatanta pārtham |
tathaiva te saṃparivārya pārthaṃ vikṛṣya cāpāni mahāravāṇi |
avīvṛṣanbāṇamahaughavṛṣṭyā yathā giriṃ toyadharā jalaughaiḥ || 5 ||
[Analyze grammar]

saṃpīḍyamānastu śaraughavṛṣṭyā dhanaṃjayastānyudhi jātaroṣaḥ |
ṣaṣṭyā śaraiḥ saṃyati tailadhautairjaghāna tānapyatha pṛṣṭhagopān || 6 ||
[Analyze grammar]

ṣaṣṭiṃ rathāṃstānavajitya saṃkhye dhanaṃjayaḥ prītamanā yaśasvī |
athātvaradbhīṣmavadhāya jiṣṇurbalāni rājñāṃ samare nihatya || 7 ||
[Analyze grammar]

trigartarājo nihatānsamīkṣya mahārathāṃstānatha bandhuvargān |
raṇe puraskṛtya narādhipāṃstāñjagāma pārthaṃ tvarito vadhāya || 8 ||
[Analyze grammar]

abhidrutaṃ cāstrabhṛtāṃ variṣṭhaṃ dhanaṃjayaṃ vīkṣya śikhaṇḍimukhyāḥ |
abhyudyayuste śitaśastrahastā rirakṣiṣanto rathamarjunasya || 9 ||
[Analyze grammar]

pārtho'pi tānāpatataḥ samīkṣya trigartarājñā sahitānnṛvīrān |
vidhvaṃsayitvā samare dhanuṣmāngāṇḍīvamuktairniśitaiḥ pṛṣatkaiḥ |
bhīṣmaṃ yiyāsuryudhi saṃdadarśa duryodhanaṃ saindhavādīṃśca rājñaḥ || 10 ||
[Analyze grammar]

āvārayiṣṇūnabhisaṃprayāya muhūrtamāyodhya balena vīraḥ |
utsṛjya rājānamanantavīryo jayadrathādīṃśca nṛpānmahaujāḥ |
yayau tato bhīmabalo manasvī gāṅgeyamājau śaracāpapāṇiḥ || 11 ||
[Analyze grammar]

yudhiṣṭhiraścograbalo mahātmā samāyayau tvarito jātakopaḥ |
madrādhipaṃ samabhityajya saṃkhye svabhāgamāptaṃ tamanantakīrtiḥ |
sārdhaṃ sa mādrīsutabhīmasenairbhīṣmaṃ yayau śāṃtanavaṃ raṇāya || 12 ||
[Analyze grammar]

taiḥ saṃprayuktaḥ sa mahārathāgryairgaṅgāsutaḥ samare citrayodhī |
na vivyathe śāṃtanavo mahātmā samāgataiḥ pāṇḍusutaiḥ samastaiḥ || 13 ||
[Analyze grammar]

athaitya rājā yudhi satyasaṃdho jayadratho'tyugrabalo manasvī |
ciccheda cāpāni mahārathānāṃ prasahya teṣāṃ dhanuṣā vareṇa || 14 ||
[Analyze grammar]

yudhiṣṭhiraṃ bhīmasenaṃ yamau ca pārthaṃ tathā yudhi saṃjātakopaḥ |
duryodhanaḥ krodhaviṣo mahātmā jaghāna bāṇairanalaprakāśaiḥ || 15 ||
[Analyze grammar]

kṛpeṇa śalyena śalena caiva tathā vibho citrasenena cājau |
viddhāḥ śaraiste'tivivṛddhakopairdevā yathā daityagaṇaiḥ sametaiḥ || 16 ||
[Analyze grammar]

chinnāyudhaṃ śāṃtanavena rājā śikhaṇḍinaṃ prekṣya ca jātakopaḥ |
ajātaśatruḥ samare mahātmā śikhaṇḍinaṃ kruddha uvāca vākyam || 17 ||
[Analyze grammar]

uktvā tathā tvaṃ pituragrato māmahaṃ haniṣyāmi mahāvrataṃ tam |
bhīṣmaṃ śaraughairvimalārkavarṇaiḥ satyaṃ vadāmīti kṛtā pratijñā || 18 ||
[Analyze grammar]

tvayā na caināṃ saphalāṃ karoṣi devavrataṃ yanna nihaṃsi yuddhe |
mithyāpratijño bhava mā nṛvīra rakṣasva dharmaṃ ca kulaṃ yaśaśca || 19 ||
[Analyze grammar]

prekṣasva bhīṣmaṃ yudhi bhīmavegaṃ sarvāṃstapantaṃ mama sainyasaṃghān |
śaraughajālairatitigmatejaiḥ kālaṃ yathā mṛtyukṛtaṃ kṣaṇena || 20 ||
[Analyze grammar]

nikṛttacāpaḥ samarānapekṣaḥ parājitaḥ śāṃtanavena rājñā |
vihāya bandhūnatha sodarāṃśca kva yāsyase nānurūpaṃ tavedam || 21 ||
[Analyze grammar]

dṛṣṭvā hi bhīṣmaṃ tamanantavīryaṃ bhagnaṃ ca sainyaṃ dravamāṇamevam |
bhīto'si nūnaṃ drupadasya putra tathā hi te mukhavarṇo'prahṛṣṭaḥ || 22 ||
[Analyze grammar]

ājñāyamāne'pi dhanaṃjayena mahāhave saṃprasakte nṛvīra |
kathaṃ hi bhīṣmātprathitaḥ pṛthivyāṃ bhayaṃ tvamadya prakaroṣi vīra || 23 ||
[Analyze grammar]

sa dharmarājasya vaco niśamya rūkṣākṣaraṃ vipralāpānubaddham |
pratyādeśaṃ manyamāno mahātmā pratatvare bhīṣmavadhāya rājan || 24 ||
[Analyze grammar]

tamāpatantaṃ mahatā javena śikhaṇḍinaṃ bhīṣmamabhidravantam |
āvārayāmāsa hi śalya enaṃ śastreṇa ghoreṇa sudurjayena || 25 ||
[Analyze grammar]

sa cāpi dṛṣṭvā samudīryamāṇamastraṃ yugāntāgnisamaprabhāvam |
nāsau vyamuhyaddrupadasya putro rājanmahendrapratimaprabhāvaḥ || 26 ||
[Analyze grammar]

tasthau ca tatraiva mahādhanuṣmāñśaraistadastraṃ pratibādhamānaḥ |
athādade vāruṇamanyadastraṃ śikhaṇḍyathograṃ pratighātāya tasya |
tadastramastreṇa vidāryamāṇaṃ khasthāḥ surā dadṛśuḥ pārthivāśca || 27 ||
[Analyze grammar]

bhīṣmastu rājansamare mahātmā dhanuḥ sucitraṃ dhvajameva cāpi |
chittvānadatpāṇḍusutasya vīro yudhiṣṭhirasyājamīḍhasya rājñaḥ || 28 ||
[Analyze grammar]

tataḥ samutsṛjya dhanuḥ sabāṇaṃ yudhiṣṭhiraṃ vīkṣya bhayābhibhūtam |
gadāṃ pragṛhyābhipapāta saṃkhye jayadrathaṃ bhīmasenaḥ padātiḥ || 29 ||
[Analyze grammar]

tamāpatantaṃ mahatā javena jayadrathaḥ sagadaṃ bhīmasenam |
vivyādha ghorairyamadaṇḍakalpaiḥ śitaiḥ śaraiḥ pañcaśataiḥ samantāt || 30 ||
[Analyze grammar]

acintayitvā sa śarāṃstarasvī vṛkodaraḥ krodhaparītacetāḥ |
jaghāna vāhānsamare samastānāraṭṭajānsindhurājasya saṃkhye || 31 ||
[Analyze grammar]

tato'bhivīkṣyāpratimaprabhāvastavātmajastvaramāṇo rathena |
abhyāyayau bhīmasenaṃ nihantuṃ samudyatāstraḥ surarājakalpaḥ || 32 ||
[Analyze grammar]

bhīmo'pyathainaṃ sahasā vinadya pratyudyayau gadayā tarjamānaḥ |
samudyatāṃ tāṃ yamadaṇḍakalpāṃ dṛṣṭvā gadāṃ te kuravaḥ samantāt || 33 ||
[Analyze grammar]

vihāya sarve tava putramugraṃ pātaṃ gadāyāḥ parihartukāmāḥ |
apakrāntāstumule saṃvimarde sudāruṇe bhārata mohanīye || 34 ||
[Analyze grammar]

amūḍhacetāstvatha citraseno mahāgadāmāpatantīṃ nirīkṣya |
rathaṃ samutsṛjya padātirājau pragṛhya khaḍgaṃ vimalaṃ ca carma |
avaplutaḥ siṃha ivācalāgrājjagāma cānyaṃ bhuvi bhūmideśam || 35 ||
[Analyze grammar]

gadāpi sā prāpya rathaṃ sucitraṃ sāśvaṃ sasūtaṃ vinihatya saṃkhye |
jagāma bhūmiṃ jvalitā maholkā bhraṣṭāmbarādgāmiva saṃpatantī || 36 ||
[Analyze grammar]

āścaryabhūtaṃ sumahattvadīyā dṛṣṭvaiva tadbhārata saṃprahṛṣṭāḥ |
sarve vineduḥ sahitāḥ samantātpupūjire tava putraṃ sasainyāḥ || 37 ||
[Analyze grammar]