Chapter 75

saṃjaya uvāca |
tato duryodhano rājā lohitāyati bhāskare |
saṃgrāmarabhaso bhīmaṃ hantukāmo'bhyadhāvata || 1 ||
[Analyze grammar]

tamāyāntamabhiprekṣya nṛvīraṃ dṛḍhavairiṇam |
bhīmasenaḥ susaṃkruddha idaṃ vacanamabravīt || 2 ||
[Analyze grammar]

ayaṃ sa kālaḥ saṃprāpto varṣapūgābhikāṅkṣitaḥ |
adya tvāṃ nihaniṣyāmi yadi notsṛjase raṇam || 3 ||
[Analyze grammar]

adya kuntyāḥ parikleśaṃ vanavāsaṃ ca kṛtsnaśaḥ |
draupadyāśca parikleśaṃ praṇotsyāmi hate tvayi || 4 ||
[Analyze grammar]

yattvaṃ durodaro bhūtvā pāṇḍavānavamanyase |
tasya pāpasya gāndhāre paśya vyasanamāgatam || 5 ||
[Analyze grammar]

karṇasya matamājñāya saubalasya ca yatpurā |
acintya pāṇḍavānkāmādyatheṣṭaṃ kṛtavānasi || 6 ||
[Analyze grammar]

yācamānaṃ ca yanmohāddāśārhamavamanyase |
ulūkasya samādeśaṃ yaddadāsi ca hṛṣṭavat || 7 ||
[Analyze grammar]

adya tvā nihaniṣyāmi sānubandhaṃ sabāndhavam |
samīkariṣye tatpāpaṃ yatpurā kṛtavānasi || 8 ||
[Analyze grammar]

evamuktvā dhanurghoraṃ vikṛṣyodbhrāmya cāsakṛt |
samādāya śarānghorānmahāśanisamaprabhān || 9 ||
[Analyze grammar]

ṣaḍviṃśattarasā kruddho mumocāśu suyodhane |
jvalitāgniśikhākārānvajrakalpānajihmagān || 10 ||
[Analyze grammar]

tato'sya kārmukaṃ dvābhyāṃ sūtaṃ dvābhyāṃ ca vivyadhe |
caturbhiraśvāñjavanānanayadyamasādanam || 11 ||
[Analyze grammar]

dvābhyāṃ ca suvikṛṣṭābhyāṃ śarābhyāmarimardanaḥ |
chatraṃ ciccheda samare rājñastasya rathottamāt || 12 ||
[Analyze grammar]

tribhiśca tasya ciccheda jvalantaṃ dhvajamuttamam |
chittvā taṃ ca nanādoccaistava putrasya paśyataḥ || 13 ||
[Analyze grammar]

rathācca sa dhvajaḥ śrīmānnānāratnavibhūṣitaḥ |
papāta sahasā bhūmiṃ vidyujjaladharādiva || 14 ||
[Analyze grammar]

jvalantaṃ sūryasaṃkāśaṃ nāgaṃ maṇimayaṃ śubham |
dhvajaṃ kurupateśchinnaṃ dadṛśuḥ sarvapārthivāḥ || 15 ||
[Analyze grammar]

athainaṃ daśabhirbāṇaistottrairiva mahāgajam |
ājaghāna raṇe bhīmaḥ smayanniva mahārathaḥ || 16 ||
[Analyze grammar]

tatastu rājā sindhūnāṃ rathaśreṣṭho jayadrathaḥ |
duryodhanasya jagrāha pārṣṇiṃ satpuruṣocitām || 17 ||
[Analyze grammar]

kṛpaśca rathināṃ śreṣṭhaḥ kauravyamamitaujasam |
āropayadrathaṃ rājanduryodhanamamarṣaṇam || 18 ||
[Analyze grammar]

sa gāḍhaviddho vyathito bhīmasenena saṃyuge |
niṣasāda rathopasthe rājā duryodhanastadā || 19 ||
[Analyze grammar]

parivārya tato bhīmaṃ hantukāmo jayadrathaḥ |
rathairanekasāhasrairbhīmasyāvārayaddiśaḥ || 20 ||
[Analyze grammar]

dhṛṣṭaketustato rājannabhimanyuśca vīryavān |
kekayā draupadeyāśca tava putrānayodhayan || 21 ||
[Analyze grammar]

citrasenaḥ sucitraśca citrāśvaścitradarśanaḥ |
cārucitraḥ sucāruśca tathā nandopanandakau || 22 ||
[Analyze grammar]

aṣṭāvete maheṣvāsāḥ sukumārā yaśasvinaḥ |
abhimanyurathaṃ rājansamantātparyavārayan || 23 ||
[Analyze grammar]

ājaghāna tatastūrṇamabhimanyurmahāmanāḥ |
ekaikaṃ pañcabhirviddhvā śaraiḥ saṃnataparvabhiḥ |
vajramṛtyupratīkāśairvicitrāyudhaniḥsṛtaiḥ || 24 ||
[Analyze grammar]

amṛṣyamāṇāste sarve saubhadraṃ rathasattamam |
vavarṣurmārgaṇaistīkṣṇairgiriṃ merumivāmbudāḥ || 25 ||
[Analyze grammar]

sa pīḍyamānaḥ samare kṛtāstro yuddhadurmadaḥ |
abhimanyurmahārāja tāvakānsamakampayat |
yathā devāsure yuddhe vajrapāṇirmahāsurān || 26 ||
[Analyze grammar]

vikarṇasya tato bhallānpreṣayāmāsa bhārata |
caturdaśa rathaśreṣṭho ghorānāśīviṣopamān |
dhvajaṃ sūtaṃ hayāṃścāsya chittvā nṛtyannivāhave || 27 ||
[Analyze grammar]

punaścānyāñśarānpītānakuṇṭhāgrāñśilāśitān |
preṣayāmāsa saubhadro vikarṇāya mahābalaḥ || 28 ||
[Analyze grammar]

te vikarṇaṃ samāsādya kaṅkabarhiṇavāsasaḥ |
bhittvā dehaṃ gatā bhūmiṃ jvalanta iva pannagāḥ || 29 ||
[Analyze grammar]

te śarā hemapuṅkhāgrā vyadṛśyanta mahītale |
vikarṇarudhiraklinnā vamanta iva śoṇitam || 30 ||
[Analyze grammar]

vikarṇaṃ vīkṣya nirbhinnaṃ tasyaivānye sahodarāḥ |
abhyadravanta samare saubhadrapramukhānrathān || 31 ||
[Analyze grammar]

abhiyātvā tathaivāśu rathasthānsūryavarcasaḥ |
avidhyansamare'nyonyaṃ saṃrabdhā yuddhadurmadāḥ || 32 ||
[Analyze grammar]

durmukhaḥ śrutakarmāṇaṃ viddhvā saptabhirāśugaiḥ |
dhvajamekena ciccheda sārathiṃ cāsya saptabhiḥ || 33 ||
[Analyze grammar]

aśvāñjāmbūnadairjālaiḥ pracchannānvātaraṃhasaḥ |
jaghāna ṣaḍbhirāsādya sārathiṃ cābhyapātayat || 34 ||
[Analyze grammar]

sa hatāśve rathe tiṣṭhañśrutakarmā mahārathaḥ |
śaktiṃ cikṣepa saṃkruddho maholkāṃ jvalitāmiva || 35 ||
[Analyze grammar]

sā durmukhasya vipulaṃ varma bhittvā yaśasvinaḥ |
vidārya prāviśadbhūmiṃ dīpyamānā sutejanā || 36 ||
[Analyze grammar]

taṃ dṛṣṭvā virathaṃ tatra sutasomo mahābalaḥ |
paśyatāṃ sarvasainyānāṃ rathamāropayatsvakam || 37 ||
[Analyze grammar]

śrutakīrtistathā vīro jayatsenaṃ sutaṃ tava |
abhyayātsamare rājanhantukāmo yaśasvinam || 38 ||
[Analyze grammar]

tasya vikṣipataścāpaṃ śrutakīrtermahātmanaḥ |
ciccheda samare rājañjayatsenaḥ sutastava |
kṣurapreṇa sutīkṣṇena prahasanniva bhārata || 39 ||
[Analyze grammar]

taṃ dṛṣṭvā chinnadhanvānaṃ śatānīkaḥ sahodaram |
abhyapadyata tejasvī siṃhavadvinadanmuhuḥ || 40 ||
[Analyze grammar]

śatānīkastu samare dṛḍhaṃ visphārya kārmukam |
vivyādha daśabhistūrṇaṃ jayatsenaṃ śilīmukhaiḥ || 41 ||
[Analyze grammar]

athānyena sutīkṣṇena sarvāvaraṇabhedinā |
śatānīko jayatsenaṃ vivyādha hṛdaye bhṛśam || 42 ||
[Analyze grammar]

tathā tasminvartamāne duṣkarṇo bhrāturantike |
ciccheda samare cāpaṃ nākuleḥ krodhamūrchitaḥ || 43 ||
[Analyze grammar]

athānyaddhanurādāya bhārasādhanamuttamam |
samādatta śitānbāṇāñśatānīko mahābalaḥ || 44 ||
[Analyze grammar]

tiṣṭha tiṣṭheti cāmantrya duṣkarṇaṃ bhrāturagrataḥ |
mumoca niśitānbāṇāñjvalitānpannagāniva || 45 ||
[Analyze grammar]

tato'sya dhanurekena dvābhyāṃ sūtaṃ ca māriṣa |
ciccheda samare tūrṇaṃ taṃ ca vivyādha saptabhiḥ || 46 ||
[Analyze grammar]

aśvānmanojavāṃścāsya kalmāṣānvītakalmaṣaḥ |
jaghāna niśitaistūrṇaṃ sarvāndvādaśabhiḥ śaraiḥ || 47 ||
[Analyze grammar]

athāpareṇa bhallena sumuktena nipātinā |
duṣkarṇaṃ samare kruddho vivyādha hṛdaye bhṛśam || 48 ||
[Analyze grammar]

duṣkarṇaṃ nihataṃ dṛṣṭvā pañca rājanmahārathāḥ |
jighāṃsantaḥ śatānīkaṃ sarvataḥ paryavārayan || 49 ||
[Analyze grammar]

chādyamānaṃ śaravrātaiḥ śatānīkaṃ yaśasvinam |
abhyadhāvanta saṃrabdhāḥ kekayāḥ pañca sodarāḥ || 50 ||
[Analyze grammar]

tānabhyāpatataḥ prekṣya tava putrā mahārathāḥ |
pratyudyayurmahārāja gajā iva mahāgajān || 51 ||
[Analyze grammar]

durmukho durjayaścaiva tathā durmarṣaṇo yuvā |
śatruṃjayaḥ śatrusahaḥ sarve kruddhā yaśasvinaḥ |
pratyudyātā mahārāja kekayānbhrātaraḥ samam || 52 ||
[Analyze grammar]

rathairnagarasaṃkāśairhayairyuktairmanojavaiḥ |
nānāvarṇavicitrābhiḥ patākābhiralaṃkṛtaiḥ || 53 ||
[Analyze grammar]

varacāpadharā vīrā vicitrakavacadhvajāḥ |
viviśuste paraṃ sainyaṃ siṃhā iva vanādvanam || 54 ||
[Analyze grammar]

teṣāṃ sutumulaṃ yuddhaṃ vyatiṣaktarathadvipam |
avartata mahāraudraṃ nighnatāmitaretaram |
anyonyāgaskṛtāṃ rājanyamarāṣṭravivardhanam || 55 ||
[Analyze grammar]

muhūrtāstamite sūrye cakruryuddhaṃ sudāruṇam |
rathinaḥ sādinaścaiva vyakīryanta sahasraśaḥ || 56 ||
[Analyze grammar]

tataḥ śāṃtanavaḥ kruddhaḥ śaraiḥ saṃnataparvabhiḥ |
nāśayāmāsa senāṃ vai bhīṣmasteṣāṃ mahātmanām |
pāñcālānāṃ ca sainyāni śarairninye yamakṣayam || 57 ||
[Analyze grammar]

evaṃ bhittvā maheṣvāsaḥ pāṇḍavānāmanīkinīm |
kṛtvāvahāraṃ sainyānāṃ yayau svaśibiraṃ nṛpa || 58 ||
[Analyze grammar]

dharmarājo'pi saṃprekṣya dhṛṣṭadyumnavṛkodarau |
mūrdhni caitāvupāghrāya saṃhṛṣṭaḥ śibiraṃ yayau || 59 ||
[Analyze grammar]