Chapter 73

saṃjaya uvāca |
ātmadoṣāttvayā rājanprāptaṃ vyasanamīdṛśam |
na hi duryodhanastāni paśyate bharatarṣabha |
yāni tvaṃ dṛṣṭavānrājandharmasaṃkarakārite || 1 ||
[Analyze grammar]

tava doṣātpurā vṛttaṃ dyūtametadviśāṃ pate |
tava doṣeṇa yuddhaṃ ca pravṛttaṃ saha pāṇḍavaiḥ |
tvamevādya phalaṃ bhuṅkṣva kṛtvā kilbiṣamātmanā || 2 ||
[Analyze grammar]

ātmanā hi kṛtaṃ karma ātmanaivopabhujyate |
iha vā pretya vā rājaṃstvayā prāptaṃ yathātatham || 3 ||
[Analyze grammar]

tasmādrājansthiro bhūtvā prāpyedaṃ vyasanaṃ mahat |
śṛṇu yuddhaṃ yathāvṛttaṃ śaṃsato mama māriṣa || 4 ||
[Analyze grammar]

bhīmasenastu niśitairbāṇairbhittvā mahācamūm |
āsasāda tato vīraḥ sarvānduryodhanānujān || 5 ||
[Analyze grammar]

duḥśāsanaṃ durviṣahaṃ duḥsahaṃ durmadaṃ jayam |
jayatsenaṃ vikarṇaṃ ca citrasenaṃ sudarśanam || 6 ||
[Analyze grammar]

cārucitraṃ suvarmāṇaṃ duṣkarṇaṃ karṇameva ca |
etānanyāṃśca subahūnsamīpasthānmahārathān || 7 ||
[Analyze grammar]

dhārtarāṣṭrānsusaṃkruddhāndṛṣṭvā bhīmo mahābalaḥ |
bhīṣmeṇa samare guptāṃ praviveśa mahācamūm || 8 ||
[Analyze grammar]

athāhvayanta te'nyonyamayaṃ prāpto vṛkodaraḥ |
jīvagrāhaṃ nigṛhṇīmo vayamenaṃ narādhipāḥ || 9 ||
[Analyze grammar]

sa taiḥ parivṛtaḥ pārtho bhrātṛbhiḥ kṛtaniścayaiḥ |
prajāsaṃharaṇe sūryaḥ krūrairiva mahāgrahaiḥ || 10 ||
[Analyze grammar]

saṃprāpya madhyaṃ vyūhasya na bhīḥ pāṇḍavamāviśat |
yathā devāsure yuddhe mahendraḥ prāpya dānavān || 11 ||
[Analyze grammar]

tataḥ śatasahasrāṇi rathināṃ sarvaśaḥ prabho |
chādayānaṃ śarairghoraistamekamanuvavrire || 12 ||
[Analyze grammar]

sa teṣāṃ pravarānyodhānhastyaśvarathasādinaḥ |
jaghāna samare śūro dhārtarāṣṭrānacintayan || 13 ||
[Analyze grammar]

teṣāṃ vyavasitaṃ jñātvā bhīmaseno jighṛkṣatām |
samastānāṃ vadhe rājanmatiṃ cakre mahāmanāḥ || 14 ||
[Analyze grammar]

tato rathaṃ samutsṛjya gadāmādāya pāṇḍavaḥ |
jaghāna dhārtarāṣṭrāṇāṃ taṃ balaughamahārṇavam || 15 ||
[Analyze grammar]

bhīmasene praviṣṭe tu dhṛṣṭadyumno'pi pārṣataḥ |
droṇamutsṛjya tarasā prayayau yatra saubalaḥ || 16 ||
[Analyze grammar]

vidārya mahatīṃ senāṃ tāvakānāṃ nararṣabhaḥ |
āsasāda rathaṃ śūnyaṃ bhīmasenasya saṃyuge || 17 ||
[Analyze grammar]

dṛṣṭvā viśokaṃ samare bhīmasenasya sārathim |
dhṛṣṭadyumno mahārāja durmanā gatacetanaḥ || 18 ||
[Analyze grammar]

apṛcchadbāṣpasaṃruddho nisvanāṃ vācamīrayan |
mama prāṇaiḥ priyatamaḥ kva bhīma iti duḥkhitaḥ || 19 ||
[Analyze grammar]

viśokastamuvācedaṃ dhṛṣṭadyumnaṃ kṛtāñjaliḥ |
saṃsthāpya māmiha balī pāṇḍaveyaḥ pratāpavān || 20 ||
[Analyze grammar]

praviṣṭo dhārtarāṣṭrāṇāmetadbalamahārṇavam |
māmuktvā puruṣavyāghra prītiyuktamidaṃ vacaḥ || 21 ||
[Analyze grammar]

pratipālaya māṃ sūta niyamyāśvānmuhūrtakam |
yāvadetānnihanmyāśu ya ime madvadhodyatāḥ || 22 ||
[Analyze grammar]

tato dṛṣṭvā gadāhastaṃ pradhāvantaṃ mahābalam |
sarveṣāmeva sainyānāṃ saṃgharṣaḥ samajāyata || 23 ||
[Analyze grammar]

tasmiṃstu tumule yuddhe vartamāne bhayānake |
bhittvā rājanmahāvyūhaṃ praviveśa sakhā tava || 24 ||
[Analyze grammar]

viśokasya vacaḥ śrutvā dhṛṣṭadyumno'pi pārṣataḥ |
pratyuvāca tataḥ sūtaṃ raṇamadhye mahābalaḥ || 25 ||
[Analyze grammar]

na hi me vidyate sūta jīvite'dya prayojanam |
bhīmasenaṃ raṇe hitvā snehamutsṛjya pāṇḍavaiḥ || 26 ||
[Analyze grammar]

yadi yāmi vinā bhīmaṃ kiṃ māṃ kṣatraṃ vadiṣyati |
ekāyanagate bhīme mayi cāvasthite yudhi || 27 ||
[Analyze grammar]

asvasti tasya kurvanti devāḥ sāgnipurogamāḥ |
yaḥ sahāyānparityajya svastimānāvrajedgṛhān || 28 ||
[Analyze grammar]

mama bhīmaḥ sakhā caiva saṃbandhī ca mahābalaḥ |
bhakto'smānbhaktimāṃścāhaṃ tamapyariniṣūdanam || 29 ||
[Analyze grammar]

so'haṃ tatra gamiṣyāmi yatra yāto vṛkodaraḥ |
nighnantaṃ māmarīnpaśya dānavāniva vāsavam || 30 ||
[Analyze grammar]

evamuktvā tato vīro yayau madhyena bhāratīm |
bhīmasenasya mārgeṣu gadāpramathitairgajaiḥ || 31 ||
[Analyze grammar]

sa dadarśa tato bhīmaṃ dahantaṃ ripuvāhinīm |
vātaṃ vṛkṣāniva balātprabhañjantaṃ raṇe nṛpān || 32 ||
[Analyze grammar]

te hanyamānāḥ samare rathinaḥ sādinastathā |
pādātā dantinaścaiva cakrurārtasvaraṃ mahat || 33 ||
[Analyze grammar]

hāhākāraśca saṃjajñe tava sainyasya māriṣa |
vadhyato bhīmasenena kṛtinā citrayodhinā || 34 ||
[Analyze grammar]

tataḥ kṛtāstrāste sarve parivārya vṛkodaram |
abhītāḥ samavartanta śastravṛṣṭyā samantataḥ || 35 ||
[Analyze grammar]

abhidrutaṃ śastrabhṛtāṃ variṣṭhaṃ samantataḥ pāṇḍavaṃ lokavīraiḥ |
sainyena ghoreṇa susaṃgatena dṛṣṭvā balī pārṣato bhīmasenam || 36 ||
[Analyze grammar]

athopagacchaccharavikṣatāṅgaṃ padātinaṃ krodhaviṣaṃ vamantam |
āśvāsayanpārṣato bhīmasenaṃ gadāhastaṃ kālamivāntakāle || 37 ||
[Analyze grammar]

niḥśalyamenaṃ ca cakāra tūrṇamāropayaccātmarathaṃ mahātmā |
bhṛśaṃ pariṣvajya ca bhīmasenamāśvāsayāmāsa ca śatrumadhye || 38 ||
[Analyze grammar]

bhrātṝnathopetya tavāpi putrastasminvimarde mahati pravṛtte |
ayaṃ durātmā drupadasya putraḥ samāgato bhīmasenena sārdham |
taṃ yāta sarve sahitā nihantuṃ mā vo ripuḥ prārthayatāmanīkam || 39 ||
[Analyze grammar]

śrutvā tu vākyaṃ tamamṛṣyamāṇā jyeṣṭhājñayā coditā dhārtarāṣṭrāḥ |
vadhāya niṣpeturudāyudhāste yugakṣaye ketavo yadvadugrāḥ || 40 ||
[Analyze grammar]

pragṛhya citrāṇi dhanūṃṣi vīrā jyānemighoṣaiḥ pravikampayantaḥ |
śarairavarṣandrupadasya putraṃ yathāmbudā bhūdharaṃ vārijālaiḥ |
nihatya tāṃścāpi śaraiḥ sutīkṣṇairna vivyathe samare citrayodhī || 41 ||
[Analyze grammar]

samabhyudīrṇāṃśca tavātmajāṃstathā niśāmya vīrānabhitaḥ sthitānraṇe |
jighāṃsurugraṃ drupadātmajo yuvā pramohanāstraṃ yuyuje mahārathaḥ |
kruddho bhṛśaṃ tava putreṣu rājandaityeṣu yadvatsamare mahendraḥ || 42 ||
[Analyze grammar]

tato vyamuhyanta raṇe nṛvīrāḥ pramohanāstrāhatabuddhisattvāḥ |
pradudruvuḥ kuravaścaiva sarve savājināgāḥ sarathāḥ samantāt |
parītakālāniva naṣṭasaṃjñānmohopetāṃstava putrānniśamya || 43 ||
[Analyze grammar]

etasminneva kāle tu droṇaḥ śastrabhṛtāṃ varaḥ |
drupadaṃ tribhirāsādya śarairvivyādha dāruṇaiḥ || 44 ||
[Analyze grammar]

so'tividdhastadā rājanraṇe droṇena pārthivaḥ |
apāyāddrupado rājanpūrvavairamanusmaran || 45 ||
[Analyze grammar]

jitvā tu drupadaṃ droṇaḥ śaṅkhaṃ dadhmau pratāpavān |
tasya śaṅkhasvanaṃ śrutvā vitresuḥ sarvasomakāḥ || 46 ||
[Analyze grammar]

atha śuśrāva tejasvī droṇaḥ śastrabhṛtāṃ varaḥ |
pramohanāstreṇa raṇe mohitānātmajāṃstava || 47 ||
[Analyze grammar]

tato droṇo rājagṛddhī tvarito'bhiyayau raṇāt |
tatrāpaśyanmaheṣvāso bhāradvājaḥ pratāpavān |
dhṛṣṭadyumnaṃ ca bhīmaṃ ca vicarantau mahāraṇe || 48 ||
[Analyze grammar]

mohāviṣṭāṃśca te putrānapaśyatsa mahārathaḥ |
tataḥ prajñāstramādāya mohanāstraṃ vyaśātayat || 49 ||
[Analyze grammar]

atha pratyāgataprāṇāstava putrā mahārathāḥ |
punaryuddhāya samare prayayurbhīmapārṣatau || 50 ||
[Analyze grammar]

tato yudhiṣṭhiraḥ prāha samāhūya svasainikān |
gacchantu padavīṃ śaktyā bhīmapārṣatayoryudhi || 51 ||
[Analyze grammar]

saubhadrapramukhā vīrā rathā dvādaśa daṃśitāḥ |
pravṛttimadhigacchantu na hi śudhyati me manaḥ || 52 ||
[Analyze grammar]

ta evaṃ samanujñātāḥ śūrā vikrāntayodhinaḥ |
bāḍhamityevamuktvā tu sarve puruṣamāninaḥ |
madhyaṃdinagate sūrye prayayuḥ sarva eva hi || 53 ||
[Analyze grammar]

kekayā draupadeyāśca dhṛṣṭaketuśca vīryavān |
abhimanyuṃ puraskṛtya mahatyā senayā vṛtāḥ || 54 ||
[Analyze grammar]

te kṛtvā samare vyūhaṃ sūcīmukhamariṃdamāḥ |
bibhidurdhārtarāṣṭrāṇāṃ tadrathānīkamāhave || 55 ||
[Analyze grammar]

tānprayātānmaheṣvāsānabhimanyupurogamān |
bhīmasenabhayāviṣṭā dhṛṣṭadyumnavimohitā || 56 ||
[Analyze grammar]

na saṃdhārayituṃ śaktā tava senā janādhipa |
madamūrchānvitātmānaṃ pramadevādhvani sthitā || 57 ||
[Analyze grammar]

te'bhiyātā maheṣvāsāḥ suvarṇavikṛtadhvajāḥ |
parīpsanto'bhyadhāvanta dhṛṣṭadyumnavṛkodarau || 58 ||
[Analyze grammar]

tau ca dṛṣṭvā maheṣvāsānabhimanyupurogamān |
babhūvaturmudā yuktau nighnantau tava vāhinīm || 59 ||
[Analyze grammar]

dṛṣṭvā ca sahasāyāntaṃ pāñcālyo gurumātmanaḥ |
nāśaṃsata vadhaṃ vīraḥ putrāṇāṃ tava pārṣataḥ || 60 ||
[Analyze grammar]

tato rathaṃ samāropya kekayasya vṛkodaram |
abhyadhāvatsusaṃkruddho droṇamiṣvastrapāragam || 61 ||
[Analyze grammar]

tasyābhipatatastūrṇaṃ bhāradvājaḥ pratāpavān |
kruddhaściccheda bhallena dhanuḥ śatruniṣūdanaḥ || 62 ||
[Analyze grammar]

anyāṃśca śataśo bāṇānpreṣayāmāsa pārṣate |
duryodhanahitārthāya bhartṛpiṇḍamanusmaran || 63 ||
[Analyze grammar]

athānyaddhanurādāya pārṣataḥ paravīrahā |
droṇaṃ vivyādha saptatyā rukmapuṅkhaiḥ śilāśitaiḥ || 64 ||
[Analyze grammar]

tasya droṇaḥ punaścāpaṃ cicchedāmitrakarśanaḥ |
hayāṃśca caturastūrṇaṃ caturbhiḥ sāyakottamaiḥ || 65 ||
[Analyze grammar]

vaivasvatakṣayaṃ ghoraṃ preṣayāmāsa vīryavān |
sārathiṃ cāsya bhallena preṣayāmāsa mṛtyave || 66 ||
[Analyze grammar]

hatāśvātsa rathāttūrṇamavaplutya mahārathaḥ |
āruroha mahābāhurabhimanyormahāratham || 67 ||
[Analyze grammar]

tataḥ sarathanāgāśvā samakampata vāhinī |
paśyato bhīmasenasya pārṣatasya ca paśyataḥ || 68 ||
[Analyze grammar]

tatprabhagnaṃ balaṃ dṛṣṭvā droṇenāmitatejasā |
nāśaknuvanvārayituṃ samastāste mahārathāḥ || 69 ||
[Analyze grammar]

vadhyamānaṃ tu tatsainyaṃ droṇena niśitaiḥ śaraiḥ |
vyabhramattatra tatraiva kṣobhyamāṇa ivārṇavaḥ || 70 ||
[Analyze grammar]

tathā dṛṣṭvā ca tatsainyaṃ jahṛṣe ca balaṃ tava |
dṛṣṭvācāryaṃ ca saṃkruddhaṃ dahantaṃ ripuvāhinīm |
cukruśuḥ sarvato yodhāḥ sādhu sādhviti bhārata || 71 ||
[Analyze grammar]