Chapter 69

saṃjaya uvāca |
virāṭo'tha tribhirbāṇairbhīṣmamārchanmahāratham |
vivyādha turagāṃścāsya tribhirbāṇairmahārathaḥ || 1 ||
[Analyze grammar]

taṃ pratyavidhyaddaśabhirbhīṣmaḥ śāṃtanavaḥ śaraiḥ |
rukmapuṅkhairmaheṣvāsaḥ kṛtahasto mahābalaḥ || 2 ||
[Analyze grammar]

drauṇirgāṇḍīvadhanvānaṃ bhīmadhanvā mahārathaḥ |
avidhyadiṣubhiḥ ṣaḍbhirdṛḍhahastaḥ stanāntare || 3 ||
[Analyze grammar]

kārmukaṃ tasya ciccheda phalgunaḥ paravīrahā |
avidhyacca bhṛśaṃ tīkṣṇaiḥ patribhiḥ śatrukarśanaḥ || 4 ||
[Analyze grammar]

so'nyatkārmukamādāya vegavatkrodhamūrchitaḥ |
amṛṣyamāṇaḥ pārthena kārmukacchedamāhave || 5 ||
[Analyze grammar]

avidhyatphalgunaṃ rājannavatyā niśitaiḥ śaraiḥ |
vāsudevaṃ ca saptatyā vivyādha parameṣubhiḥ || 6 ||
[Analyze grammar]

tataḥ krodhābhitāmrākṣaḥ saha kṛṣṇena phalgunaḥ |
dīrghamuṣṇaṃ ca niḥśvasya cintayitvā muhurmuhuḥ || 7 ||
[Analyze grammar]

dhanuḥ prapīḍya vāmena kareṇāmitrakarśanaḥ |
gāṇḍīvadhanvā saṃkruddhaḥ śitānsaṃnataparvaṇaḥ |
jīvitāntakarānghorānsamādatta śilīmukhān || 8 ||
[Analyze grammar]

taistūrṇaṃ samare'vidhyaddrauṇiṃ balavatāṃ varam |
tasya te kavacaṃ bhittvā papuḥ śoṇitamāhave || 9 ||
[Analyze grammar]

na vivyathe ca nirbhinno drauṇirgāṇḍīvadhanvanā |
tathaiva śaravarṣāṇi pratimuñcannavihvalaḥ |
tasthau sa samare rājaṃstrātumicchanmahāvratam || 10 ||
[Analyze grammar]

tasya tatsumahatkarma śaśaṃsuḥ puruṣarṣabhāḥ |
yatkṛṣṇābhyāṃ sametābhyāṃ nāpatrapata saṃyuge || 11 ||
[Analyze grammar]

sa hi nityamanīkeṣu yudhyate'bhayamāsthitaḥ |
astragrāmaṃ sasaṃhāraṃ droṇātprāpya sudurlabham || 12 ||
[Analyze grammar]

mamāyamācāryasuto droṇasyātipriyaḥ sutaḥ |
brāhmaṇaśca viśeṣeṇa mānanīyo mameti ca || 13 ||
[Analyze grammar]

samāsthāya matiṃ vīro bībhatsuḥ śatrutāpanaḥ |
kṛpāṃ cakre rathaśreṣṭho bhāradvājasutaṃ prati || 14 ||
[Analyze grammar]

drauṇiṃ tyaktvā tato yuddhe kaunteyaḥ śatrutāpanaḥ |
yuyudhe tāvakānnighnaṃstvaramāṇaḥ parākramī || 15 ||
[Analyze grammar]

duryodhanastu daśabhirgārdhrapatraiḥ śilāśitaiḥ |
bhīmasenaṃ maheṣvāsaṃ rukmapuṅkhaiḥ samarpayat || 16 ||
[Analyze grammar]

bhīmasenastu saṃkruddhaḥ parāsukaraṇaṃ dṛḍham |
citraṃ kārmukamādatta śarāṃśca niśitāndaśa || 17 ||
[Analyze grammar]

ākarṇaprahitaistīkṣṇairvegitaistigmatejanaiḥ |
avidhyattūrṇamavyagraḥ kururājaṃ mahorasi || 18 ||
[Analyze grammar]

tasya kāñcanasūtrastu śaraiḥ parivṛto maṇiḥ |
rarājorasi vai sūryo grahairiva samāvṛtaḥ || 19 ||
[Analyze grammar]

putrastu tava tejasvī bhīmasenena tāḍitaḥ |
nāmṛṣyata yathā nāgastalaśabdaṃ samīritam || 20 ||
[Analyze grammar]

tataḥ śarairmahārāja rukmapuṅkhaiḥ śilāśitaiḥ |
bhīmaṃ vivyādha saṃkruddhastrāsayāno varūthinīm || 21 ||
[Analyze grammar]

tau yudhyamānau samare bhṛśamanyonyavikṣatau |
putrau te devasaṃkāśau vyarocetāṃ mahābalau || 22 ||
[Analyze grammar]

citrasenaṃ naravyāghraṃ saubhadraḥ paravīrahā |
avidhyaddaśabhirbāṇaiḥ purumitraṃ ca saptabhiḥ || 23 ||
[Analyze grammar]

satyavrataṃ ca saptatyā viddhvā śakrasamo yudhi |
nṛtyanniva raṇe vīra ārtiṃ naḥ samajījanat || 24 ||
[Analyze grammar]

taṃ pratyavidyaddaśabhiścitrasenaḥ śilīmukhaiḥ |
satyavrataśca navabhiḥ purumitraśca saptabhiḥ || 25 ||
[Analyze grammar]

sa viddho vikṣaranraktaṃ śatrusaṃvāraṇaṃ mahat |
ciccheda citrasenasya citraṃ kārmukamārjuniḥ |
bhittvā cāsya tanutrāṇaṃ śareṇorasyatāḍayat || 26 ||
[Analyze grammar]

tataste tāvakā vīrā rājaputrā mahārathāḥ |
sametya yudhi saṃrabdhā vivyadhurniśitaiḥ śaraiḥ |
tāṃśca sarvāñśaraistīkṣṇairjaghāna paramāstravit || 27 ||
[Analyze grammar]

tasya dṛṣṭvā tu tatkarma parivavruḥ sutāstava |
dahantaṃ samare sainyaṃ tava kakṣaṃ yatholbaṇam || 28 ||
[Analyze grammar]

apetaśiśire kāle samiddhamiva pāvakaḥ |
atyarocata saubhadrastava sainyāni śātayan || 29 ||
[Analyze grammar]

tattasya caritaṃ dṛṣṭvā pautrastava viśāṃ pate |
lakṣmaṇo'bhyapatattūrṇaṃ sātvatīputramāhave || 30 ||
[Analyze grammar]

abhimanyustu saṃkruddho lakṣmaṇaṃ śubhalakṣaṇam |
vivyādha viśikhaiḥ ṣaḍbhiḥ sārathiṃ ca tribhiḥ śaraiḥ || 31 ||
[Analyze grammar]

tathaiva lakṣmaṇo rājansaubhadraṃ niśitaiḥ śaraiḥ |
avidhyata mahārāja tadadbhutamivābhavat || 32 ||
[Analyze grammar]

tasyāśvāṃścaturo hatvā sārathiṃ ca mahābalaḥ |
abhyadravata saubhadro lakṣmaṇaṃ niśitaiḥ śaraiḥ || 33 ||
[Analyze grammar]

hatāśve tu rathe tiṣṭhaṃllakṣmaṇaḥ paravīrahā |
śaktiṃ cikṣepa saṃkruddhaḥ saubhadrasya rathaṃ prati || 34 ||
[Analyze grammar]

tāmāpatantīṃ sahasā ghorarūpāṃ durāsadām |
abhimanyuḥ śaraistīkṣṇaiściccheda bhujagopamām || 35 ||
[Analyze grammar]

tataḥ svarathamāropya lakṣmaṇaṃ gautamastadā |
apovāha rathenājau sarvasainyasya paśyataḥ || 36 ||
[Analyze grammar]

tataḥ samākule tasminvartamāne mahābhaye |
abhyadravañjighāṃsantaḥ parasparavadhaiṣiṇaḥ || 37 ||
[Analyze grammar]

tāvakāśca maheṣvāsāḥ pāṇḍavāśca mahārathāḥ |
juhvantaḥ samare prāṇānnijaghnuritaretaram || 38 ||
[Analyze grammar]

muktakeśā vikavacā virathāśchinnakārmukāḥ |
bāhubhiḥ samayudhyanta sṛñjayāḥ kurubhiḥ saha || 39 ||
[Analyze grammar]

tato bhīṣmo mahābāhuḥ pāṇḍavānāṃ mahātmanām |
senāṃ jaghāna saṃkruddho divyairastrairmahābalaḥ || 40 ||
[Analyze grammar]

hateśvarairgajaistatra narairaśvaiśca pātitaiḥ |
rathibhiḥ sādibhiścaiva samāstīryata medinī || 41 ||
[Analyze grammar]