Chapter 65

saṃjaya uvāca |
vyuṣitāyāṃ ca śarvaryāmudite ca divākare |
ubhe sene mahārāja yuddhāyaiva samīyatuḥ || 1 ||
[Analyze grammar]

abhyadhāvaṃśca saṃkruddhāḥ parasparajigīṣavaḥ |
te sarve sahitā yuddhe samālokya parasparam || 2 ||
[Analyze grammar]

pāṇḍavā dhārtarāṣṭrāśca rājandurmantrite tava |
vyūhau ca vyūhya saṃrabdhāḥ saṃprayuddhāḥ prahāriṇaḥ || 3 ||
[Analyze grammar]

arakṣanmakaravyūhaṃ bhīṣmo rājansamantataḥ |
tathaiva pāṇḍavā rājannarakṣanvyūhamātmanaḥ || 4 ||
[Analyze grammar]

sa niryayau rathānīkaṃ pitā devavratastava |
mahatā rathavaṃśena saṃvṛto rathināṃ varaḥ || 5 ||
[Analyze grammar]

itaretaramanvīyuryathābhāgamavasthitāḥ |
rathinaḥ pattayaścaiva dantinaḥ sādinastathā || 6 ||
[Analyze grammar]

tāndṛṣṭvā prodyatānsaṃkhye pāṇḍavāśca yaśasvinaḥ |
śyenena vyūharājena tenājayyena saṃyuge || 7 ||
[Analyze grammar]

aśobhata mukhe tasya bhīmaseno mahābalaḥ |
netre śikhaṇḍī durdharṣo dhṛṣṭadyumnaśca pārṣataḥ || 8 ||
[Analyze grammar]

śīrṣaṃ tasyābhavadvīraḥ sātyakiḥ satyavikramaḥ |
vidhunvangāṇḍivaṃ pārtho grīvāyāmabhavattadā || 9 ||
[Analyze grammar]

akṣauhiṇyā samagrā yā vāmapakṣo'bhavattadā |
mahātmā drupadaḥ śrīmānsaha putreṇa saṃyuge || 10 ||
[Analyze grammar]

dakṣiṇaścābhavatpakṣaḥ kaikeyo'kṣauhiṇīpatiḥ |
pṛṣṭhato draupadeyāśca saubhadraścāpi vīryavān || 11 ||
[Analyze grammar]

pṛṣṭhe samabhavacchrīmānsvayaṃ rājā yudhiṣṭhiraḥ |
bhrātṛbhyāṃ sahito dhīmānyamābhyāṃ cāruvikramaḥ || 12 ||
[Analyze grammar]

praviśya tu raṇe bhīmo makaraṃ mukhatastadā |
bhīṣmamāsādya saṃgrāme chādayāmāsa sāyakaiḥ || 13 ||
[Analyze grammar]

tato bhīṣmo mahāstrāṇi pātayāmāsa bhārata |
mohayanpāṇḍuputrāṇāṃ vyūḍhaṃ sainyaṃ mahāhave || 14 ||
[Analyze grammar]

saṃmuhyati tadā sainye tvaramāṇo dhanaṃjayaḥ |
bhīṣmaṃ śarasahasreṇa vivyādha raṇamūrdhani || 15 ||
[Analyze grammar]

parisaṃvārya cāstrāṇi bhīṣmamuktāni saṃyuge |
svenānīkena hṛṣṭena yuddhāya samavasthitaḥ || 16 ||
[Analyze grammar]

tato duryodhano rājā bhāradvājamabhāṣata |
pūrvaṃ dṛṣṭvā vadhaṃ ghoraṃ balasya balināṃ varaḥ |
bhrātṝṇāṃ ca vadhaṃ yuddhe smaramāṇo mahārathaḥ || 17 ||
[Analyze grammar]

ācārya satataṃ tvaṃ hi hitakāmo mamānagha |
vayaṃ hi tvāṃ samāśritya bhīṣmaṃ caiva pitāmaham || 18 ||
[Analyze grammar]

devānapi raṇe jetuṃ prārthayāmo na saṃśayaḥ |
kimu pāṇḍusutānyuddhe hīnavīryaparākramān || 19 ||
[Analyze grammar]

evamuktastato droṇastava putreṇa māriṣa |
abhinatpāṇḍavānīkaṃ prekṣamāṇasya sātyakeḥ || 20 ||
[Analyze grammar]

sātyakistu tadā droṇaṃ vārayāmāsa bhārata |
tataḥ pravavṛte yuddhaṃ tumulaṃ lomaharṣaṇam || 21 ||
[Analyze grammar]

śaineyaṃ tu raṇe kruddho bhāradvājaḥ pratāpavān |
avidhyanniśitairbāṇairjatrudeśe hasanniva || 22 ||
[Analyze grammar]

bhīmasenastataḥ kruddho bhāradvājamavidhyata |
saṃrakṣansātyakiṃ rājandroṇācchastrabhṛtāṃ varāt || 23 ||
[Analyze grammar]

tato droṇaśca bhīṣmaśca tathā śalyaśca māriṣa |
bhīmasenaṃ raṇe kruddhāśchādayāṃ cakrire śaraiḥ || 24 ||
[Analyze grammar]

tatrābhimanyuḥ saṃkruddho draupadeyāśca māriṣa |
vivyadhurniśitairbāṇaiḥ sarvāṃstānudyatāyudhān || 25 ||
[Analyze grammar]

bhīṣmadroṇau ca saṃkruddhāvāpatantau mahābalau |
pratyudyayau śikhaṇḍī tu maheṣvāso mahāhave || 26 ||
[Analyze grammar]

pragṛhya balavadvīro dhanurjaladanisvanam |
abhyavarṣaccharaistūrṇaṃ chādayāno divākaram || 27 ||
[Analyze grammar]

śikhaṇḍinaṃ samāsādya bharatānāṃ pitāmahaḥ |
avarjayata saṃgrāme strītvaṃ tasyānusaṃsmaran || 28 ||
[Analyze grammar]

tato droṇo mahārāja abhyadravata taṃ raṇe |
rakṣamāṇastato bhīṣmaṃ tava putreṇa coditaḥ || 29 ||
[Analyze grammar]

śikhaṇḍī tu samāsādya droṇaṃ śastrabhṛtāṃ varam |
avarjayata saṃgrāme yugāntāgnimivolbaṇam || 30 ||
[Analyze grammar]

tato balena mahatā putrastava viśāṃ pate |
jugopa bhīṣmamāsādya prārthayāno mahadyaśaḥ || 31 ||
[Analyze grammar]

tathaiva pāṇḍavā rājanpuraskṛtya dhanaṃjayam |
bhīṣmamevābhyavartanta jaye kṛtvā dṛḍhāṃ matim || 32 ||
[Analyze grammar]

tadyuddhamabhavadghoraṃ devānāṃ dānavairiva |
jayaṃ ca kāṅkṣatāṃ nityaṃ yaśaśca paramādbhutam || 33 ||
[Analyze grammar]