Chapter 55

dhṛtarāṣṭra uvāca |
pratijñāte tu bhīṣmeṇa tasminyuddhe sudāruṇe |
krodhito mama putreṇa duḥkhitena viśeṣataḥ || 1 ||
[Analyze grammar]

bhīṣmaḥ kimakarottatra pāṇḍaveyeṣu saṃjaya |
pitāmahe vā pāñcālāstanmamācakṣva saṃjaya || 2 ||
[Analyze grammar]

saṃjaya uvāca |
gatapūrvāhṇabhūyiṣṭhe tasminnahani bhārata |
jayaṃ prāpteṣu hṛṣṭeṣu pāṇḍaveṣu mahātmasu || 3 ||
[Analyze grammar]

sarvadharmaviśeṣajñaḥ pitā devavratastava |
abhyayājjavanairaśvaiḥ pāṇḍavānāmanīkinīm |
mahatyā senayā guptastava putraiśca sarvaśaḥ || 4 ||
[Analyze grammar]

prāvartata tato yuddhaṃ tumulaṃ lomaharṣaṇam |
asmākaṃ pāṇḍavaiḥ sārdhamanayāttava bhārata || 5 ||
[Analyze grammar]

dhanuṣāṃ kūjatāṃ tatra talānāṃ cābhihanyatām |
mahānsamabhavacchabdo girīṇāmiva dīryatām || 6 ||
[Analyze grammar]

tiṣṭha sthito'smi viddhyenaṃ nivartasva sthiro bhava |
sthito'smi praharasveti śabdāḥ śrūyanta sarvaśaḥ || 7 ||
[Analyze grammar]

kāñcaneṣu tanutreṣu kirīṭeṣu dhvajeṣu ca |
śilānāmiva śaileṣu patitānāmabhūtsvanaḥ || 8 ||
[Analyze grammar]

patitānyuttamāṅgāni bāhavaśca vibhūṣitāḥ |
vyaceṣṭanta mahīṃ prāpya śataśo'tha sahasraśaḥ || 9 ||
[Analyze grammar]

hṛtottamāṅgāḥ kecittu tathaivodyatakārmukāḥ |
pragṛhītāyudhāścāpi tasthuḥ puruṣasattamāḥ || 10 ||
[Analyze grammar]

prāvartata mahāvegā nadī rudhiravāhinī |
mātaṅgāṅgaśilāraudrā māṃsaśoṇitakardamā || 11 ||
[Analyze grammar]

varāśvanaranāgānāṃ śarīraprabhavā tadā |
paralokārṇavamukhī gṛdhragomāyumodinī || 12 ||
[Analyze grammar]

na dṛṣṭaṃ na śrutaṃ cāpi yuddhametādṛśaṃ nṛpa |
yathā tava sutānāṃ ca pāṇḍavānāṃ ca bhārata || 13 ||
[Analyze grammar]

nāsīdrathapathastatra yodhairyudhi nipātitaiḥ |
gajaiśca patitairnīlairgiriśṛṅgairivāvṛtam || 14 ||
[Analyze grammar]

vikīrṇaiḥ kavacaiścitrairdhvajaiśchatraiśca māriṣa |
śuśubhe tadraṇasthānaṃ śaradīva nabhastalam || 15 ||
[Analyze grammar]

vinirbhinnāḥ śaraiḥ kecidantapīḍāvikarṣiṇaḥ |
abhītāḥ samare śatrūnabhyadhāvanta daṃśitāḥ || 16 ||
[Analyze grammar]

tāta bhrātaḥ sakhe bandho vayasya mama mātula |
mā māṃ parityajetyanye cukruśuḥ patitā raṇe || 17 ||
[Analyze grammar]

ādhāvābhyehi mā gaccha kiṃ bhīto'si kva yāsyasi |
sthito'haṃ samare mā bhairiti cānye vicukruśuḥ || 18 ||
[Analyze grammar]

tatra bhīṣmaḥ śāṃtanavo nityaṃ maṇḍalakārmukaḥ |
mumoca bāṇāndīptāgrānahīnāśīviṣāniva || 19 ||
[Analyze grammar]

śarairekāyanīkurvandiśaḥ sarvā yatavrataḥ |
jaghāna pāṇḍavarathānādiśyādiśya bhārata || 20 ||
[Analyze grammar]

sa nṛtyanvai rathopasthe darśayanpāṇilāghavam |
alātacakravadrājaṃstatra tatra sma dṛśyate || 21 ||
[Analyze grammar]

tamekaṃ samare śūraṃ pāṇḍavāḥ sṛñjayāstathā |
anekaśatasāhasraṃ samapaśyanta lāghavāt || 22 ||
[Analyze grammar]

māyākṛtātmānamiva bhīṣmaṃ tatra sma menire |
pūrvasyāṃ diśi taṃ dṛṣṭvā pratīcyāṃ dadṛśurjanāḥ || 23 ||
[Analyze grammar]

udīcyāṃ cainamālokya dakṣiṇasyāṃ punaḥ prabho |
evaṃ sa samare vīro gāṅgeyaḥ pratyadṛśyata || 24 ||
[Analyze grammar]

na cainaṃ pāṇḍaveyānāṃ kaścicchaknoti vīkṣitum |
viśikhāneva paśyanti bhīṣmacāpacyutānbahūn || 25 ||
[Analyze grammar]

kurvāṇaṃ samare karma sūdayānaṃ ca vāhinīm |
vyākrośanta raṇe tatra vīrā bahuvidhaṃ bahu |
amānuṣeṇa rūpeṇa carantaṃ pitaraṃ tava || 26 ||
[Analyze grammar]

śalabhā iva rājānaḥ patanti vidhicoditāḥ |
bhīṣmāgnimabhi saṃkruddhaṃ vināśāya sahasraśaḥ || 27 ||
[Analyze grammar]

na hi moghaḥ śaraḥ kaścidāsīdbhīṣmasya saṃyuge |
naranāgāśvakāyeṣu bahutvāllaghuvedhinaḥ || 28 ||
[Analyze grammar]

bhinattyekena bāṇena sumuktena patatriṇā |
gajakaṅkaṭasaṃnāhaṃ vajreṇevācalottamam || 29 ||
[Analyze grammar]

dvau trīnapi gajārohānpiṇḍitānvarmitānapi |
nārācena sutīkṣṇena nijaghāna pitā tava || 30 ||
[Analyze grammar]

yo yo bhīṣmaṃ naravyāghramabhyeti yudhi kaścana |
muhūrtadṛṣṭaḥ sa mayā pātito bhuvi dṛśyate || 31 ||
[Analyze grammar]

evaṃ sā dharmarājasya vadhyamānā mahācamūḥ |
bhīṣmeṇātulavīryeṇa vyaśīryata sahasradhā || 32 ||
[Analyze grammar]

prakīryata mahāsenā śaravarṣābhitāpitā |
paśyato vāsudevasya pārthasya ca mahātmanaḥ || 33 ||
[Analyze grammar]

yatamānāpi te vīrā dravamāṇānmahārathān |
nāśaknuvanvārayituṃ bhīṣmabāṇaprapīḍitāḥ || 34 ||
[Analyze grammar]

mahendrasamavīryeṇa vadhyamānā mahācamūḥ |
abhajyata mahārāja na ca dvau saha dhāvataḥ || 35 ||
[Analyze grammar]

āviddhanaranāgāśvaṃ patitadhvajakūbaram |
anīkaṃ pāṇḍuputrāṇāṃ hāhābhūtamacetanam || 36 ||
[Analyze grammar]

jaghānātra pitā putraṃ putraśca pitaraṃ tathā |
priyaṃ sakhāyaṃ cākrande sakhā daivabalātkṛtaḥ || 37 ||
[Analyze grammar]

vimucya kavacānanye pāṇḍuputrasya sainikāḥ |
prakīrya keśāndhāvantaḥ pratyadṛśyanta bhārata || 38 ||
[Analyze grammar]

tadgokulamivodbhrāntamudbhrāntarathayūthapam |
dadṛśe pāṇḍuputrasya sainyamārtasvaraṃ tadā || 39 ||
[Analyze grammar]

prabhajyamānaṃ tatsainyaṃ dṛṣṭvā devakinandanaḥ |
uvāca pārthaṃ bībhatsuṃ nigṛhya rathamuttamam || 40 ||
[Analyze grammar]

ayaṃ sa kālaḥ saṃprāptaḥ pārtha yaḥ kāṅkṣitastvayā |
praharāsmai naravyāghra na cenmohādvimuhyase || 41 ||
[Analyze grammar]

yattvayā kathitaṃ vīra purā rājñāṃ samāgame |
bhīṣmadroṇamukhānsarvāndhārtarāṣṭrasya sainikān || 42 ||
[Analyze grammar]

sānubandhānhaniṣyāmi ye māṃ yotsyanti saṃyuge |
iti tatkuru kaunteya satyaṃ vākyamariṃdama || 43 ||
[Analyze grammar]

bībhatso paśya sainyaṃ svaṃ bhajyamānaṃ samantataḥ |
dravataśca mahīpālānsarvānyaudhiṣṭhire bale || 44 ||
[Analyze grammar]

dṛṣṭvā hi samare bhīṣmaṃ vyāttānanamivāntakam |
bhayārtāḥ saṃpraṇaśyanti siṃhaṃ kṣudramṛgā iva || 45 ||
[Analyze grammar]

evamuktaḥ pratyuvāca vāsudevaṃ dhanaṃjayaḥ |
codayāśvānyato bhīṣmo vigāhyaitadbalārṇavam || 46 ||
[Analyze grammar]

tato'śvānrajataprakhyāṃścodayāmāsa mādhavaḥ |
yato bhīṣmaratho rājanduṣprekṣyo raśmimāniva || 47 ||
[Analyze grammar]

tatastatpunarāvṛttaṃ yudhiṣṭhirabalaṃ mahat |
dṛṣṭvā pārthaṃ mahābāhuṃ bhīṣmāyodyantamāhave || 48 ||
[Analyze grammar]

tato bhīṣmaḥ kuruśreṣṭhaḥ siṃhavadvinadanmuhuḥ |
dhanaṃjayarathaṃ tūrṇaṃ śaravarṣairavākirat || 49 ||
[Analyze grammar]

kṣaṇena sa rathastasya sahayaḥ sahasārathiḥ |
śaravarṣeṇa mahatā saṃchanno na prakāśate || 50 ||
[Analyze grammar]

vāsudevastvasaṃbhrānto dhairyamāsthāya sattvavān |
codayāmāsa tānaśvānvitunnānbhīṣmasāyakaiḥ || 51 ||
[Analyze grammar]

tataḥ pārtho dhanurgṛhya divyaṃ jaladanisvanam |
pātayāmāsa bhīṣmasya dhanuśchittvā tribhiḥ śaraiḥ || 52 ||
[Analyze grammar]

sa cchinnadhanvā kauravyaḥ punaranyanmahaddhanuḥ |
nimeṣāntaramātreṇa sajyaṃ cakre pitā tava || 53 ||
[Analyze grammar]

vicakarṣa tato dorbhyāṃ dhanurjaladanisvanam |
athāsya tadapi kruddhaściccheda dhanurarjunaḥ || 54 ||
[Analyze grammar]

tasya tatpūjayāmāsa lāghavaṃ śaṃtanoḥ sutaḥ |
sādhu pārtha mahābāho sādhu bho pāṇḍunandana || 55 ||
[Analyze grammar]

tvayyevaitadyuktarūpaṃ mahatkarma dhanaṃjaya |
prīto'smi sudṛḍhaṃ putra kuru yuddhaṃ mayā saha || 56 ||
[Analyze grammar]

iti pārthaṃ praśasyātha pragṛhyānyanmahaddhanuḥ |
mumoca samare vīraḥ śarānpārtharathaṃ prati || 57 ||
[Analyze grammar]

adarśayadvāsudevo hayayāne paraṃ balam |
moghānkurvañśarāṃstasya maṇḍalānyacarallaghu || 58 ||
[Analyze grammar]

tathāpi bhīṣmaḥ sudṛḍhaṃ vāsudevadhanaṃjayau |
vivyādha niśitairbāṇaiḥ sarvagātreṣu māriṣa || 59 ||
[Analyze grammar]

śuśubhāte naravyāghrau tau bhīṣmaśaravikṣatau |
govṛṣāviva nardantau viṣāṇollikhitāṅkitau || 60 ||
[Analyze grammar]

punaścāpi susaṃkruddhaḥ śaraiḥ saṃnataparvabhiḥ |
kṛṣṇayoryudhi saṃrabdho bhīṣmo vyāvārayaddiśaḥ || 61 ||
[Analyze grammar]

vārṣṇeyaṃ ca śaraistīkṣṇaiḥ kampayāmāsa roṣitaḥ |
muhurabhyutsmayanbhīṣmaḥ prahasya svanavattadā || 62 ||
[Analyze grammar]

tataḥ kṛṣṇastu samare dṛṣṭvā bhīṣmaparākramam |
saṃprekṣya ca mahābāhuḥ pārthasya mṛduyuddhatām || 63 ||
[Analyze grammar]

bhīṣmaṃ ca śaravarṣāṇi sṛjantamaniśaṃ yudhi |
pratapantamivādityaṃ madhyamāsādya senayoḥ || 64 ||
[Analyze grammar]

varānvarānvinighnantaṃ pāṇḍuputrasya sainikān |
yugāntamiva kurvāṇaṃ bhīṣmaṃ yaudhiṣṭhire bale || 65 ||
[Analyze grammar]

amṛṣyamāṇo bhagavānkeśavaḥ paravīrahā |
acintayadameyātmā nāsti yaudhiṣṭhiraṃ balam || 66 ||
[Analyze grammar]

ekāhnā hi raṇe bhīṣmo nāśayeddevadānavān |
kimu pāṇḍusutānyuddhe sabalānsapadānugān || 67 ||
[Analyze grammar]

dravate ca mahatsainyaṃ pāṇḍavasya mahātmanaḥ |
ete ca kauravāstūrṇaṃ prabhagnāndṛśya somakān |
ādravanti raṇe hṛṣṭā harṣayantaḥ pitāmaham || 68 ||
[Analyze grammar]

so'haṃ bhīṣmaṃ nihanmyadya pāṇḍavārthāya daṃśitaḥ |
bhārametaṃ vineṣyāmi pāṇḍavānāṃ mahātmanām || 69 ||
[Analyze grammar]

arjuno'pi śaraistīkṣṇairvadhyamāno hi saṃyuge |
kartavyaṃ nābhijānāti raṇe bhīṣmasya gauravāt || 70 ||
[Analyze grammar]

tathā cintayatastasya bhūya eva pitāmahaḥ |
preṣayāmāsa saṃkruddhaḥ śarānpārtharathaṃ prati || 71 ||
[Analyze grammar]

teṣāṃ bahutvāddhi bhṛśaṃ śarāṇāṃ diśo'tha sarvāḥ pihitā babhūvuḥ |
na cāntarikṣaṃ na diśo na bhūmirna bhāskaro'dṛśyata raśmimālī |
vavuśca vātāstumulāḥ sadhūmā diśaśca sarvāḥ kṣubhitā babhūvuḥ || 72 ||
[Analyze grammar]

droṇo vikarṇo'tha jayadrathaśca bhūriśravāḥ kṛtavarmā kṛpaśca |
śrutāyurambaṣṭhapatiśca rājā vindānuvindau ca sudakṣiṇaśca || 73 ||
[Analyze grammar]

prācyāśca sauvīragaṇāśca sarve vasātayaḥ kṣudrakamālavāśca |
kirīṭinaṃ tvaramāṇābhisasrurnideśagāḥ śāṃtanavasya rājñaḥ || 74 ||
[Analyze grammar]

taṃ vājipādātarathaughajālairanekasāhasraśatairdadarśa |
kirīṭinaṃ saṃparivāryamāṇaṃ śinernaptā vāraṇayūthapaiśca || 75 ||
[Analyze grammar]

tatastu dṛṣṭvārjunavāsudevau padātināgāśvarathaiḥ samantāt |
abhidrutau śastrabhṛtāṃ variṣṭhau śinipravīro'bhisasāra tūrṇam || 76 ||
[Analyze grammar]

sa tānyanīkāni mahādhanuṣmāñśinipravīraḥ sahasābhipatya |
cakāra sāhāyyamathārjunasya viṣṇuryathā vṛtraniṣūdanasya || 77 ||
[Analyze grammar]

viśīrṇanāgāśvarathadhvajaughaṃ bhīṣmeṇa vitrāsitasarvayodham |
yudhiṣṭhirānīkamabhidravantaṃ provāca saṃdṛśya śinipravīraḥ || 78 ||
[Analyze grammar]

kva kṣatriyā yāsyatha naiṣa dharmaḥ satāṃ purastātkathitaḥ purāṇaiḥ |
mā svāṃ pratijñāṃ jahata pravīrāḥ svaṃ vīradharmaṃ paripālayadhvam || 79 ||
[Analyze grammar]

tānvāsavānantarajo niśamya narendramukhyāndravataḥ samantāt |
pārthasya dṛṣṭvā mṛduyuddhatāṃ ca bhīṣmaṃ ca saṃkhye samudīryamāṇam || 80 ||
[Analyze grammar]

amṛṣyamāṇaḥ sa tato mahātmā yaśasvinaṃ sarvadaśārhabhartā |
uvāca śaineyamabhipraśaṃsandṛṣṭvā kurūnāpatataḥ samantāt || 81 ||
[Analyze grammar]

ye yānti yāntveva śinipravīra ye'pi sthitāḥ sātvata te'pi yāntu |
bhīṣmaṃ rathātpaśya nipātyamānaṃ droṇaṃ ca saṃkhye sagaṇaṃ mayādya || 82 ||
[Analyze grammar]

nāsau rathaḥ sātvata kauravāṇāṃ kruddhasya mucyeta raṇe'dya kaścit |
tasmādahaṃ gṛhya rathāṅgamugraṃ prāṇaṃ hariṣyāmi mahāvratasya || 83 ||
[Analyze grammar]

nihatya bhīṣmaṃ sagaṇaṃ tathājau droṇaṃ ca śaineya rathapravīram |
prītiṃ kariṣyāmi dhanaṃjayasya rājñaśca bhīmasya tathāśvinośca || 84 ||
[Analyze grammar]

nihatya sarvāndhṛtarāṣṭraputrāṃstatpakṣiṇo ye ca narendramukhyāḥ |
rājyena rājānamajātaśatruṃ saṃpādayiṣyāmyahamadya hṛṣṭaḥ || 85 ||
[Analyze grammar]

tataḥ sunābhaṃ vasudevaputraḥ sūryaprabhaṃ vajrasamaprabhāvam |
kṣurāntamudyamya bhujena cakraṃ rathādavaplutya visṛjya vāhān || 86 ||
[Analyze grammar]

saṃkampayangāṃ caraṇairmahātmā vegena kṛṣṇaḥ prasasāra bhīṣmam |
madāndhamājau samudīrṇadarpaḥ siṃho jighāṃsanniva vāraṇendram || 87 ||
[Analyze grammar]

so'bhyadravadbhīṣmamanīkamadhye kruddho mahendrāvarajaḥ pramāthī |
vyālambipītāntapaṭaścakāśe ghano yathā khe'cirabhāpinaddhaḥ || 88 ||
[Analyze grammar]

sudarśanaṃ cāsya rarāja śaurestaccakrapadmaṃ subhujorunālam |
yathādipadmaṃ taruṇārkavarṇaṃ rarāja nārāyaṇanābhijātam || 89 ||
[Analyze grammar]

tatkṛṣṇakopodayasūryabuddhaṃ kṣurāntatīkṣṇāgrasujātapatram |
tasyaiva dehorusaraḥprarūḍhaṃ rarāja nārāyaṇabāhunālam || 90 ||
[Analyze grammar]

tamāttacakraṃ praṇadantamuccaiḥ kruddhaṃ mahendrāvarajaṃ samīkṣya |
sarvāṇi bhūtāni bhṛśaṃ vineduḥ kṣayaṃ kurūṇāmiti cintayitvā || 91 ||
[Analyze grammar]

sa vāsudevaḥ pragṛhītacakraḥ saṃvartayiṣyanniva jīvalokam |
abhyutpataṃllokagururbabhāse bhūtāni dhakṣyanniva kālavahniḥ || 92 ||
[Analyze grammar]

tamāpatantaṃ pragṛhītacakraṃ samīkṣya devaṃ dvipadāṃ variṣṭham |
asaṃbhramātkārmukabāṇapāṇī rathe sthitaḥ śāṃtanavo'bhyuvāca || 93 ||
[Analyze grammar]

ehyehi deveśa jagannivāsa namo'stu te śārṅgarathāṅgapāṇe |
prasahya māṃ pātaya lokanātha rathottamādbhūtaśaraṇya saṃkhye || 94 ||
[Analyze grammar]

tvayā hatasyeha mamādya kṛṣṇa śreyaḥ parasminniha caiva loke |
saṃbhāvito'smyandhakavṛṣṇinātha lokaistribhirvīra tavābhiyānāt || 95 ||
[Analyze grammar]

rathādavaplutya tatastvarāvānpārtho'pyanudrutya yadupravīram |
jagrāha pīnottamalambabāhuṃ bāhvorhariṃ vyāyatapīnabāhuḥ || 96 ||
[Analyze grammar]

nigṛhyamāṇaśca tadādidevo bhṛśaṃ saroṣaḥ kila nāma yogī |
ādāya vegena jagāma viṣṇurjiṣṇuṃ mahāvāta ivaikavṛkṣam || 97 ||
[Analyze grammar]

pārthastu viṣṭabhya balena pādau bhīṣmāntikaṃ tūrṇamabhidravantam |
balānnijagrāha kirīṭamālī pade'tha rājandaśame kathaṃcit || 98 ||
[Analyze grammar]

avasthitaṃ ca praṇipatya kṛṣṇaṃ prīto'rjunaḥ kāñcanacitramālī |
uvāca kopaṃ pratisaṃhareti gatirbhavānkeśava pāṇḍavānām || 99 ||
[Analyze grammar]

na hāsyate karma yathāpratijñaṃ putraiḥ śape keśava sodaraiśca |
antaṃ kariṣyāmi yathā kurūṇāṃ tvayāhamindrānuja saṃprayuktaḥ || 100 ||
[Analyze grammar]

tataḥ pratijñāṃ samayaṃ ca tasmai janārdanaḥ prītamanā niśamya |
sthitaḥ priye kauravasattamasya rathaṃ sacakraḥ punarāruroha || 101 ||
[Analyze grammar]

sa tānabhīṣūnpunarādadānaḥ pragṛhya śaṅkhaṃ dviṣatāṃ nihantā |
vinādayāmāsa tato diśaśca sa pāñcajanyasya raveṇa śauriḥ || 102 ||
[Analyze grammar]

vyāviddhaniṣkāṅgadakuṇḍalaṃ taṃ rajovikīrṇāñcitapakṣmanetram |
viśuddhadaṃṣṭraṃ pragṛhītaśaṅkhaṃ vicukruśuḥ prekṣya kurupravīrāḥ || 103 ||
[Analyze grammar]

mṛdaṅgabherīpaṭahapraṇādā nemisvanā dundubhinisvanāśca |
sasiṃhanādāśca babhūvurugrāḥ sarveṣvanīkeṣu tataḥ kurūṇām || 104 ||
[Analyze grammar]

gāṇḍīvaghoṣaḥ stanayitnukalpo jagāma pārthasya nabho diśaśca |
jagmuśca bāṇā vimalāḥ prasannāḥ sarvā diśaḥ pāṇḍavacāpamuktāḥ || 105 ||
[Analyze grammar]

taṃ kauravāṇāmadhipo balena bhīṣmeṇa bhūriśravasā ca sārdham |
abhyudyayāvudyatabāṇapāṇiḥ kakṣaṃ didhakṣanniva dhūmaketuḥ || 106 ||
[Analyze grammar]

athārjunāya prajahāra bhallānbhūriśravāḥ sapta suvarṇapuṅkhān |
duryodhanastomaramugravegaṃ śalyo gadāṃ śāṃtanavaśca śaktim || 107 ||
[Analyze grammar]

sa saptabhiḥ sapta śarapravekānsaṃvārya bhūriśravasā visṛṣṭān |
śitena duryodhanabāhumuktaṃ kṣureṇa tattomaramunmamātha || 108 ||
[Analyze grammar]

tataḥ śubhāmāpatatīṃ sa śaktiṃ vidyutprabhāṃ śāṃtanavena muktām |
gadāṃ ca madrādhipabāhumuktāṃ dvābhyāṃ śarābhyāṃ nicakarta vīraḥ || 109 ||
[Analyze grammar]

tato bhujābhyāṃ balavadvikṛṣya citraṃ dhanurgāṇḍivamaprameyam |
māhendramastraṃ vidhivatsughoraṃ prāduścakārādbhutamantarikṣe || 110 ||
[Analyze grammar]

tenottamāstreṇa tato mahātmā sarvāṇyanīkāni mahādhanuṣmān |
śaraughajālairvimalāgnivarṇairnivārayāmāsa kirīṭamālī || 111 ||
[Analyze grammar]

śilīmukhāḥ pārthadhanuḥpramuktā rathāndhvajāgrāṇi dhanūṃṣi bāhūn |
nikṛtya dehānviviśuḥ pareṣāṃ narendranāgendraturaṃgamāṇām || 112 ||
[Analyze grammar]

tato diśaścānudiśaśca pārthaḥ śaraiḥ sudhārairniśitairvitatya |
gāṇḍīvaśabdena manāṃsi teṣāṃ kirīṭamālī vyathayāṃ cakāra || 113 ||
[Analyze grammar]

tasmiṃstathā ghoratame pravṛtte śaṅkhasvanā dundubhinisvanāśca |
antarhitā gāṇḍivanisvanena babhūvurugrāśca raṇapraṇādāḥ || 114 ||
[Analyze grammar]

gāṇḍīvaśabdaṃ tamatho viditvā virāṭarājapramukhā nṛvīrāḥ |
pāñcālarājo drupadaśca vīrastaṃ deśamājagmuradīnasattvāḥ || 115 ||
[Analyze grammar]

sarvāṇi sainyāni tu tāvakāni yato yato gāṇḍivajaḥ praṇādaḥ |
tatastataḥ saṃnatimeva jagmurna taṃ pratīpo'bhisasāra kaścit || 116 ||
[Analyze grammar]

tasminsughore nṛpasaṃprahāre hatāḥ pravīrāḥ sarathāḥ sasūtāḥ |
gajāśca nārācanipātataptā mahāpatākāḥ śubharukmakakṣyāḥ || 117 ||
[Analyze grammar]

parītasattvāḥ sahasā nipetuḥ kirīṭinā bhinnatanutrakāyāḥ |
dṛḍhāhatāḥ patribhirugravegaiḥ pārthena bhallairniśitaiḥ śitāgraiḥ || 118 ||
[Analyze grammar]

nikṛttayantrā nihatendrakīlā dhvajā mahānto dhvajinīmukheṣu |
padātisaṃghāśca rathāśca saṃkhye hayāśca nāgāśca dhanaṃjayena || 119 ||
[Analyze grammar]

bāṇāhatāstūrṇamapetasattvā viṣṭabhya gātrāṇi nipetururvyām |
aindreṇa tenāstravareṇa rājanmahāhave bhinnatanutradehāḥ || 120 ||
[Analyze grammar]

tataḥ śaraughairniśitaiḥ kirīṭinā nṛdehaśastrakṣatalohitodā |
nadī sughorā naradehaphenā pravartitā tatra raṇājire vai || 121 ||
[Analyze grammar]

vegena sātīva pṛthupravāhā prasusrutā bhairavārāvarūpā |
paretanāgāśvaśarīrarodhā narāntramajjābhṛtamāṃsapaṅkā || 122 ||
[Analyze grammar]

prabhūtarakṣogaṇabhūtasevitā śiraḥkapālākulakeśaśādvalā |
śarīrasaṃghātasahasravāhinī viśīrṇanānākavacormisaṃkulā || 123 ||
[Analyze grammar]

narāśvanāgāsthinikṛttaśarkarā vināśapātālavatī bhayāvahā |
tāṃ kaṅkamālāvṛtagṛdhrakahvaiḥ kravyādasaṃghaiśca tarakṣubhiśca || 124 ||
[Analyze grammar]

upetakūlāṃ dadṛśuḥ samantātkrūrāṃ mahāvaitaraṇīprakāśām |
pravartitāmarjunabāṇasaṃghairmedovasāsṛkpravahāṃ subhīmām || 125 ||
[Analyze grammar]

te cedipāñcālakarūṣamatsyāḥ pārthāśca sarve sahitāḥ praṇeduḥ |
vitrāsya senāṃ dhvajinīpatīnāṃ siṃho mṛgāṇāmiva yūthasaṃghān |
vinedatustāvatiharṣayuktau gāṇḍīvadhanvā ca janārdanaśca || 126 ||
[Analyze grammar]

tato raviṃ saṃhṛtaraśmijālaṃ dṛṣṭvā bhṛśaṃ śastraparikṣatāṅgāḥ |
tadaindramastraṃ vitataṃ sughoramasahyamudvīkṣya yugāntakalpam || 127 ||
[Analyze grammar]

athāpayānaṃ kuravaḥ sabhīṣmāḥ sadroṇaduryodhanabāhlikāśca |
cakrurniśāṃ saṃdhigatāṃ samīkṣya vibhāvasorlohitarājiyuktām || 128 ||
[Analyze grammar]

avāpya kīrtiṃ ca yaśaśca loke vijitya śatrūṃśca dhanaṃjayo'pi |
yayau narendraiḥ saha sodaraiśca samāptakarmā śibiraṃ niśāyām |
tataḥ prajajñe tumulaḥ kurūṇāṃ niśāmukhe ghorataraḥ praṇādaḥ || 129 ||
[Analyze grammar]

raṇe rathānāmayutaṃ nihatya hatā gajāḥ saptaśatārjunena |
prācyāśca sauvīragaṇāśca sarve nipātitāḥ kṣudrakamālavāśca |
mahatkṛtaṃ karma dhanaṃjayena kartuṃ yathā nārhati kaścidanyaḥ || 130 ||
[Analyze grammar]

śrutāyurambaṣṭhapatiśca rājā tathaiva durmarṣaṇacitrasenau |
droṇaḥ kṛpaḥ saindhavabāhlikau ca bhūriśravāḥ śalyaśalau ca rājan |
svabāhuvīryeṇa jitāḥ sabhīṣmāḥ kirīṭinā lokamahārathena || 131 ||
[Analyze grammar]

iti bruvantaḥ śibirāṇi jagmuḥ sarve gaṇā bhārata ye tvadīyāḥ |
ulkāsahasraiśca susaṃpradīptairvibhrājamānaiśca tathā pradīpaiḥ |
kirīṭivitrāsitasarvayodhā cakre niveśaṃ dhvajinī kurūṇām || 132 ||
[Analyze grammar]