Chapter 51

saṃjaya uvāca |
gatāparāhṇabhūyiṣṭhe tasminnahani bhārata |
rathanāgāśvapattīnāṃ sādināṃ ca mahākṣaye || 1 ||
[Analyze grammar]

droṇaputreṇa śalyena kṛpeṇa ca mahātmanā |
samasajjata pāñcālyastribhiretairmahārathaiḥ || 2 ||
[Analyze grammar]

sa lokaviditānaśvānnijaghāna mahābalaḥ |
drauṇeḥ pāñcāladāyādaḥ śitairdaśabhirāśugaiḥ || 3 ||
[Analyze grammar]

tataḥ śalyarathaṃ tūrṇamāsthāya hatavāhanaḥ |
drauṇiḥ pāñcāladāyādamabhyavarṣadatheṣubhiḥ || 4 ||
[Analyze grammar]

dhṛṣṭadyumnaṃ tu saṃsaktaṃ drauṇinā dṛśya bhārata |
saubhadro'bhyapatattūrṇaṃ vikiranniśitāñśarān || 5 ||
[Analyze grammar]

sa śalyaṃ pañcaviṃśatyā kṛpaṃ ca navabhiḥ śaraiḥ |
aśvatthāmānamaṣṭābhirvivyādha puruṣarṣabha || 6 ||
[Analyze grammar]

ārjuniṃ tu tatastūrṇaṃ drauṇirvivyādha patriṇā |
śalyo dvādaśabhiścaiva kṛpaśca niśitaistribhiḥ || 7 ||
[Analyze grammar]

lakṣmaṇastava pautrastu tava pautramavasthitam |
abhyavartata saṃhṛṣṭastato yuddhamavartata || 8 ||
[Analyze grammar]

dauryodhanistu saṃkruddhaḥ saubhadraṃ navabhiḥ śaraiḥ |
vivyādha samare rājaṃstadadbhutamivābhavat || 9 ||
[Analyze grammar]

abhimanyustu saṃkruddho bhrātaraṃ bharatarṣabha |
śaraiḥ pañcāśatā rājankṣiprahasto'bhyavidhyata || 10 ||
[Analyze grammar]

lakṣmaṇo'pi tatastasya dhanuściccheda patriṇā |
muṣṭideśe mahārāja tata uccukruśurjanāḥ || 11 ||
[Analyze grammar]

tadvihāya dhanuśchinnaṃ saubhadraḥ paravīrahā |
anyadādattavāṃścitraṃ kārmukaṃ vegavattaram || 12 ||
[Analyze grammar]

tau tatra samare hṛṣṭau kṛtapratikṛtaiṣiṇau |
anyonyaṃ viśikhaistīkṣṇairjaghnatuḥ puruṣarṣabhau || 13 ||
[Analyze grammar]

tato duryodhano rājā dṛṣṭvā putraṃ mahāratham |
pīḍitaṃ tava pautreṇa prāyāttatra janeśvaraḥ || 14 ||
[Analyze grammar]

saṃnivṛtte tava sute sarva eva janādhipāḥ |
ārjuniṃ rathavaṃśena samantātparyavārayan || 15 ||
[Analyze grammar]

sa taiḥ parivṛtaḥ śūraiḥ śūro yudhi sudurjayaiḥ |
na sma vivyathate rājankṛṣṇatulyaparākramaḥ || 16 ||
[Analyze grammar]

saubhadramatha saṃsaktaṃ tatra dṛṣṭvā dhanaṃjayaḥ |
abhidudrāva saṃkruddhastrātukāmaḥ svamātmajam || 17 ||
[Analyze grammar]

tataḥ sarathanāgāśvā bhīṣmadroṇapurogamāḥ |
abhyavartanta rājānaḥ sahitāḥ savyasācinam || 18 ||
[Analyze grammar]

uddhūtaṃ sahasā bhaumaṃ nāgāśvarathasādibhiḥ |
divākarapathaṃ prāpya rajastīvramadṛśyata || 19 ||
[Analyze grammar]

tāni nāgasahasrāṇi bhūmipālaśatāni ca |
tasya bāṇapathaṃ prāpya nābhyavartanta sarvaśaḥ || 20 ||
[Analyze grammar]

praṇeduḥ sarvabhūtāni babhūvustimirā diśaḥ |
kurūṇāmanayastīvraḥ samadṛśyata dāruṇaḥ || 21 ||
[Analyze grammar]

nāpyantarikṣaṃ na diśo na bhūmirna ca bhāskaraḥ |
prajajñe bharataśreṣṭha śarasaṃghaiḥ kirīṭinaḥ || 22 ||
[Analyze grammar]

sāditadhvajanāgāstu hatāśvā rathino bhṛśam |
vipradrutarathāḥ keciddṛśyante rathayūthapāḥ || 23 ||
[Analyze grammar]

virathā rathinaścānye dhāvamānāḥ samantataḥ |
tatra tatraiva dṛśyante sāyudhāḥ sāṅgadairbhujaiḥ || 24 ||
[Analyze grammar]

hayārohā hayāṃstyaktvā gajārohāśca dantinaḥ |
arjunasya bhayādrājansamantādvipradudruvuḥ || 25 ||
[Analyze grammar]

rathebhyaśca gajebhyaśca hayebhyaśca narādhipāḥ |
patitāḥ pātyamānāśca dṛśyante'rjunatāḍitāḥ || 26 ||
[Analyze grammar]

sagadānudyatānbāhūnsakhaḍgāṃśca viśāṃ pate |
saprāsāṃśca satūṇīrānsaśarānsaśarāsanān || 27 ||
[Analyze grammar]

sāṅkuśānsapatākāṃśca tatra tatrārjuno nṛṇām |
nicakarta śarairugrai raudraṃ bibhradvapustadā || 28 ||
[Analyze grammar]

parighāṇāṃ pravṛddhānāṃ mudgarāṇāṃ ca māriṣa |
prāsānāṃ bhiṇḍipālānāṃ nistriṃśānāṃ ca saṃyuge || 29 ||
[Analyze grammar]

paraśvadhānāṃ tīkṣṇānāṃ tomarāṇāṃ ca bhārata |
varmaṇāṃ cāpaviddhānāṃ kavacānāṃ ca bhūtale || 30 ||
[Analyze grammar]

dhvajānāṃ carmaṇāṃ caiva vyajanānāṃ ca sarvaśaḥ |
chatrāṇāṃ hemadaṇḍānāṃ cāmarāṇāṃ ca bhārata || 31 ||
[Analyze grammar]

pratodānāṃ kaśānāṃ ca yoktrāṇāṃ caiva māriṣa |
rāśayaścātra dṛśyante vinikīrṇā raṇakṣitau || 32 ||
[Analyze grammar]

nāsīttatra pumānkaścittava sainyasya bhārata |
yo'rjunaṃ samare śūraṃ pratyudyāyātkathaṃcana || 33 ||
[Analyze grammar]

yo yo hi samare pārthaṃ pratyudyāti viśāṃ pate |
sa sa vai viśikhaistīkṣṇaiḥ paralokāya nīyate || 34 ||
[Analyze grammar]

teṣu vidravamāṇeṣu tava yodheṣu sarvaśaḥ |
arjuno vāsudevaśca dadhmaturvārijottamau || 35 ||
[Analyze grammar]

tatprabhagnaṃ balaṃ dṛṣṭvā pitā devavratastava |
abravītsamare śūraṃ bhāradvājaṃ smayanniva || 36 ||
[Analyze grammar]

eṣa pāṇḍusuto vīraḥ kṛṣṇena sahito balī |
tathā karoti sainyāni yathā kuryāddhanaṃjayaḥ || 37 ||
[Analyze grammar]

na hyeṣa samare śakyo jetumadya kathaṃcana |
yathāsya dṛśyate rūpaṃ kālāntakayamopamam || 38 ||
[Analyze grammar]

na nivartayituṃ cāpi śakyeyaṃ mahatī camūḥ |
anyonyaprekṣayā paśya dravatīyaṃ varūthinī || 39 ||
[Analyze grammar]

eṣa cāstaṃ giriśreṣṭhaṃ bhānumānpratipadyate |
vapūṃṣi sarvalokasya saṃharanniva sarvathā || 40 ||
[Analyze grammar]

tatrāvahāraṃ saṃprāptaṃ manye'haṃ puruṣarṣabha |
śrāntā bhītāśca no yodhā na yotsyanti kathaṃcana || 41 ||
[Analyze grammar]

evamuktvā tato bhīṣmo droṇamācāryasattamam |
avahāramatho cakre tāvakānāṃ mahārathaḥ || 42 ||
[Analyze grammar]

tato'vahāraḥ sainyānāṃ tava teṣāṃ ca bhārata |
astaṃ gacchati sūrye'bhūtsaṃdhyākāle ca vartati || 43 ||
[Analyze grammar]