Chapter 50

dhṛtarāṣṭra uvāca |
tathā pratisamādiṣṭaḥ kaliṅgo vāhinīpatiḥ |
kathamadbhutakarmāṇaṃ bhīmasenaṃ mahābalam || 1 ||
[Analyze grammar]

carantaṃ gadayā vīraṃ daṇḍapāṇimivāntakam |
yodhayāmāsa samare kaliṅgaḥ saha senayā || 2 ||
[Analyze grammar]

saṃjaya uvāca |
putreṇa tava rājendra sa tathokto mahābalaḥ |
mahatyā senayā guptaḥ prāyādbhīmarathaṃ prati || 3 ||
[Analyze grammar]

tāmāpatantīṃ sahasā kaliṅgānāṃ mahācamūm |
rathanāgāśvakalilāṃ pragṛhītamahāyudhām || 4 ||
[Analyze grammar]

bhīmasenaḥ kaliṅgānāmārchadbhārata vāhinīm |
ketumantaṃ ca naiṣādimāyāntaṃ saha cedibhiḥ || 5 ||
[Analyze grammar]

tataḥ śrutāyuḥ saṃkruddho rājñā ketumatā saha |
āsasāda raṇe bhīmaṃ vyūḍhānīkeṣu cediṣu || 6 ||
[Analyze grammar]

rathairanekasāhasraiḥ kaliṅgānāṃ janādhipaḥ |
ayutena gajānāṃ ca niṣādaiḥ saha ketumān |
bhīmasenaṃ raṇe rājansamantātparyavārayat || 7 ||
[Analyze grammar]

cedimatsyakarūṣāśca bhīmasenapurogamāḥ |
abhyavartanta sahasā niṣādānsaha rājabhiḥ || 8 ||
[Analyze grammar]

tataḥ pravavṛte yuddhaṃ ghorarūpaṃ bhayānakam |
prajānanna ca yodhānsvānparasparajighāṃsayā || 9 ||
[Analyze grammar]

ghoramāsīttato yuddhaṃ bhīmasya sahasā paraiḥ |
yathendrasya mahārāja mahatyā daityasenayā || 10 ||
[Analyze grammar]

tasya sainyasya saṃgrāme yudhyamānasya bhārata |
babhūva sumahāñśabdaḥ sāgarasyeva garjataḥ || 11 ||
[Analyze grammar]

anyonyasya tadā yodhā nikṛntanto viśāṃ pate |
mahīṃ cakruścitāṃ sarvāṃ śaśaśoṇitasaṃnibhām || 12 ||
[Analyze grammar]

yodhāṃśca svānparānvāpi nābhyajānañjighāṃsayā |
svānapyādadate svāśca śūrāḥ samaradurjayāḥ || 13 ||
[Analyze grammar]

vimardaḥ sumahānāsīdalpānāṃ bahubhiḥ saha |
kaliṅgaiḥ saha cedīnāṃ niṣādaiśca viśāṃ pate || 14 ||
[Analyze grammar]

kṛtvā puruṣakāraṃ tu yathāśakti mahābalāḥ |
bhīmasenaṃ parityajya saṃnyavartanta cedayaḥ || 15 ||
[Analyze grammar]

sarvaiḥ kaliṅgairāsannaḥ saṃnivṛtteṣu cediṣu |
svabāhubalamāsthāya na nyavartata pāṇḍavaḥ || 16 ||
[Analyze grammar]

na cacāla rathopasthādbhīmaseno mahābalaḥ |
śitairavākiranbāṇaiḥ kaliṅgānāṃ varūthinīm || 17 ||
[Analyze grammar]

kaliṅgastu maheṣvāsaḥ putraścāsya mahārathaḥ |
śakradeva iti khyāto jaghnatuḥ pāṇḍavaṃ śaraiḥ || 18 ||
[Analyze grammar]

tato bhīmo mahābāhurvidhunvanruciraṃ dhanuḥ |
yodhayāmāsa kāliṅgānsvabāhubalamāśritaḥ || 19 ||
[Analyze grammar]

śakradevastu samare visṛjansāyakānbahūn |
aśvāñjaghāna samare bhīmasenasya sāyakaiḥ |
vavarṣa śaravarṣāṇi tapānte jalado yathā || 20 ||
[Analyze grammar]

hatāśve tu rathe tiṣṭhanbhīmaseno mahābalaḥ |
śakradevāya cikṣepa sarvaśaikyāyasīṃ gadām || 21 ||
[Analyze grammar]

sa tayā nihato rājankaliṅgasya suto rathāt |
sadhvajaḥ saha sūtena jagāma dharaṇītalam || 22 ||
[Analyze grammar]

hatamātmasutaṃ dṛṣṭvā kaliṅgānāṃ janādhipaḥ |
rathairanekasāhasrairbhīmasyāvārayaddiśaḥ || 23 ||
[Analyze grammar]

tato bhīmo mahābāhurgurvīṃ tyaktvā mahāgadām |
udbabarhātha nistriṃśaṃ cikīrṣuḥ karma dāruṇam || 24 ||
[Analyze grammar]

carma cāpratimaṃ rājannārṣabhaṃ puruṣarṣabha |
nakṣatrairardhacandraiśca śātakumbhamayaiścitam || 25 ||
[Analyze grammar]

kaliṅgastu tataḥ kruddho dhanurjyāmavamṛjya ha |
pragṛhya ca śaraṃ ghoramekaṃ sarpaviṣopamam |
prāhiṇodbhīmasenāya vadhākāṅkṣī janeśvaraḥ || 26 ||
[Analyze grammar]

tamāpatantaṃ vegena preritaṃ niśitaṃ śaram |
bhīmaseno dvidhā rājaṃściccheda vipulāsinā |
udakrośacca saṃhṛṣṭastrāsayāno varūthinīm || 27 ||
[Analyze grammar]

kaliṅgastu tataḥ kruddho bhīmasenāya saṃyuge |
tomarānprāhiṇocchīghraṃ caturdaśa śilāśitān || 28 ||
[Analyze grammar]

tānaprāptānmahābāhuḥ khagatāneva pāṇḍavaḥ |
ciccheda sahasā rājannasaṃbhrānto varāsinā || 29 ||
[Analyze grammar]

nikṛtya tu raṇe bhīmastomarānvai caturdaśa |
bhānumantamabhiprekṣya prādravatpuruṣarṣabhaḥ || 30 ||
[Analyze grammar]

bhānumāṃstu tato bhīmaṃ śaravarṣeṇa chādayan |
nanāda balavannādaṃ nādayāno nabhastalam || 31 ||
[Analyze grammar]

na taṃ sa mamṛṣe bhīmaḥ siṃhanādaṃ mahāraṇe |
tataḥ svareṇa mahatā vinanāda mahāsvanam || 32 ||
[Analyze grammar]

tena śabdena vitrastā kaliṅgānāṃ varūthinī |
na bhīmaṃ samare mene mānuṣaṃ bharatarṣabha || 33 ||
[Analyze grammar]

tato bhīmo mahārāja naditvā vipulaṃ svanam |
sāsirvegādavaplutya dantābhyāṃ vāraṇottamam || 34 ||
[Analyze grammar]

āruroha tato madhyaṃ nāgarājasya māriṣa |
khaḍgena pṛthunā madhye bhānumantamathācchinat || 35 ||
[Analyze grammar]

so'ntarāyudhinaṃ hatvā rājaputramariṃdamaḥ |
gurubhārasahaskandhe nāgasyāsimapātayat || 36 ||
[Analyze grammar]

chinnaskandhaḥ sa vinadanpapāta gajayūthapaḥ |
ārugṇaḥ sindhuvegena sānumāniva parvataḥ || 37 ||
[Analyze grammar]

tatastasmādavaplutya gajādbhārata bhārataḥ |
khaḍgapāṇiradīnātmā atiṣṭhadbhuvi daṃśitaḥ || 38 ||
[Analyze grammar]

sa cacāra bahūnmārgānabhītaḥ pātayangajān |
agnicakramivāviddhaṃ sarvataḥ pratyadṛśyata || 39 ||
[Analyze grammar]

aśvavṛndeṣu nāgeṣu rathānīkeṣu cābhibhūḥ |
padātīnāṃ ca saṃgheṣu vinighnañśoṇitokṣitaḥ |
śyenavadvyacaradbhīmo raṇe ripubalotkaṭaḥ || 40 ||
[Analyze grammar]

chindaṃsteṣāṃ śarīrāṇi śirāṃsi ca mahājavaḥ |
khaḍgena śitadhāreṇa saṃyuge gajayodhinām || 41 ||
[Analyze grammar]

padātirekaḥ saṃkruddhaḥ śatrūṇāṃ bhayavardhanaḥ |
mohayāmāsa ca tadā kālāntakayamopamaḥ || 42 ||
[Analyze grammar]

mūḍhāśca te tamevājau vinadantaḥ samādravan |
sāsimuttamavegena vicarantaṃ mahāraṇe || 43 ||
[Analyze grammar]

nikṛtya rathināmājau ratheṣāśca yugāni ca |
jaghāna rathinaścāpi balavānarimardanaḥ || 44 ||
[Analyze grammar]

bhīmasenaścaranmārgānsubahūnpratyadṛśyata |
bhrāntamudbhrāntamāviddhamāplutaṃ prasṛtaṃ sṛtam |
saṃpātaṃ samudīryaṃ ca darśayāmāsa pāṇḍavaḥ || 45 ||
[Analyze grammar]

kecidagrāsinā chinnāḥ pāṇḍavena mahātmanā |
vinedurbhinnamarmāṇo nipetuśca gatāsavaḥ || 46 ||
[Analyze grammar]

chinnadantāgrahastāśca bhinnakumbhāstathāpare |
viyodhāḥ svānyanīkāni jaghnurbhārata vāraṇāḥ |
nipetururvyāṃ ca tathā vinadanto mahāravān || 47 ||
[Analyze grammar]

chinnāṃśca tomarāṃścāpānmahāmātraśirāṃsi ca |
paristomāni citrāṇi kakṣyāśca kanakojjvalāḥ || 48 ||
[Analyze grammar]

graiveyāṇyatha śaktīśca patākāḥ kaṇapāṃstathā |
tūṇīrāṇyatha yantrāṇi vicitrāṇi dhanūṃṣi ca || 49 ||
[Analyze grammar]

agnikuṇḍāni śubhrāṇi tottrāṃścaivāṅkuśaiḥ saha |
ghaṇṭāśca vividhā rājanhemagarbhāṃstsarūnapi |
patataḥ patitāṃścaiva paśyāmaḥ saha sādibhiḥ || 50 ||
[Analyze grammar]

chinnagātrāvarakarairnihataiścāpi vāraṇaiḥ |
āsīttasminsamāstīrṇā patitairbhūrnagairiva || 51 ||
[Analyze grammar]

vimṛdyaivaṃ mahānāgānmamardāśvānnararṣabhaḥ |
aśvārohavarāṃścāpi pātayāmāsa bhārata |
tadghoramabhavadyuddhaṃ tasya teṣāṃ ca bhārata || 52 ||
[Analyze grammar]

khalīnānyatha yoktrāṇi kaśāśca kanakojjvalāḥ |
paristomāśca prāsāśca ṛṣṭayaśca mahādhanāḥ || 53 ||
[Analyze grammar]

kavacānyatha carmāṇi citrāṇyāstaraṇāni ca |
tatra tatrāpaviddhāni vyadṛśyanta mahāhave || 54 ||
[Analyze grammar]

prothayantrairvicitraiśca śastraiśca vimalaistathā |
sa cakre vasudhāṃ kīrṇāṃ śabalaiḥ kusumairiva || 55 ||
[Analyze grammar]

āplutya rathinaḥ kāṃścitparāmṛśya mahābalaḥ |
pātayāmāsa khaḍgena sadhvajānapi pāṇḍavaḥ || 56 ||
[Analyze grammar]

muhurutpatato dikṣu dhāvataśca yaśasvinaḥ |
mārgāṃśca carataścitrānvyasmayanta raṇe janāḥ || 57 ||
[Analyze grammar]

nijaghāna padā kāṃścidākṣipyānyānapothayat |
khaḍgenānyāṃśca ciccheda nādenānyāṃśca bhīṣayan || 58 ||
[Analyze grammar]

ūruvegena cāpyanyānpātayāmāsa bhūtale |
apare cainamālokya bhayātpañcatvamāgatāḥ || 59 ||
[Analyze grammar]

evaṃ sā bahulā senā kaliṅgānāṃ tarasvinām |
parivārya raṇe bhīṣmaṃ bhīmasenamupādravat || 60 ||
[Analyze grammar]

tataḥ kaliṅgasainyānāṃ pramukhe bharatarṣabha |
śrutāyuṣamabhiprekṣya bhīmasenaḥ samabhyayāt || 61 ||
[Analyze grammar]

tamāyāntamabhiprekṣya kaliṅgo navabhiḥ śaraiḥ |
bhīmasenamameyātmā pratyavidhyatstanāntare || 62 ||
[Analyze grammar]

kaliṅgabāṇābhihatastottrārdita iva dvipaḥ |
bhīmasenaḥ prajajvāla krodhenāgnirivendhanaiḥ || 63 ||
[Analyze grammar]

athāśokaḥ samādāya rathaṃ hemapariṣkṛtam |
bhīmaṃ saṃpādayāmāsa rathena rathasārathiḥ || 64 ||
[Analyze grammar]

tamāruhya rathaṃ tūrṇaṃ kaunteyaḥ śatrusūdanaḥ |
kaliṅgamabhidudrāva tiṣṭha tiṣṭheti cābravīt || 65 ||
[Analyze grammar]

tataḥ śrutāyurbalavānbhīmāya niśitāñśarān |
preṣayāmāsa saṃkruddho darśayanpāṇilāghavam || 66 ||
[Analyze grammar]

sa kārmukavarotsṛṣṭairnavabhirniśitaiḥ śaraiḥ |
samāhato bhṛśaṃ rājankaliṅgena mahāyaśāḥ |
saṃcukrudhe bhṛśaṃ bhīmo daṇḍāhata ivoragaḥ || 67 ||
[Analyze grammar]

kruddhaśca cāpamāyamya balavadbalināṃ varaḥ |
kaliṅgamavadhītpārtho bhīmaḥ saptabhirāyasaiḥ || 68 ||
[Analyze grammar]

kṣurābhyāṃ cakrarakṣau ca kaliṅgasya mahābalau |
satyadevaṃ ca satyaṃ ca prāhiṇodyamasādanam || 69 ||
[Analyze grammar]

tataḥ punarameyātmā nārācairniśitaistribhiḥ |
ketumantaṃ raṇe bhīmo'gamayadyamasādanam || 70 ||
[Analyze grammar]

tataḥ kaliṅgāḥ saṃkruddhā bhīmasenamamarṣaṇam |
anīkairbahusāhasraiḥ kṣatriyāḥ samavārayan || 71 ||
[Analyze grammar]

tataḥ śaktigadākhaḍgatomararṣṭiparaśvadhaiḥ |
kaliṅgāśca tato rājanbhīmasenamavākiran || 72 ||
[Analyze grammar]

saṃnivārya sa tāṃ ghorāṃ śaravṛṣṭiṃ samutthitām |
gadāmādāya tarasā pariplutya mahābalaḥ |
bhīmaḥ saptaśatānvīrānanayadyamasādanam || 73 ||
[Analyze grammar]

punaścaiva dvisāhasrānkaliṅgānarimardanaḥ |
prāhiṇonmṛtyulokāya tadadbhutamivābhavat || 74 ||
[Analyze grammar]

evaṃ sa tānyanīkāni kaliṅgānāṃ punaḥ punaḥ |
bibheda samare vīraḥ prekṣya bhīṣmaṃ mahāvratam || 75 ||
[Analyze grammar]

hatārohāśca mātaṅgāḥ pāṇḍavena mahātmanā |
viprajagmuranīkeṣu meghā vātahatā iva |
mṛdnantaḥ svānyanīkāni vinadantaḥ śarāturāḥ || 76 ||
[Analyze grammar]

tato bhīmo mahābāhuḥ śaṅkhaṃ prādhmāpayadbalī |
sarvakāliṅgasainyānāṃ manāṃsi samakampayat || 77 ||
[Analyze grammar]

mohaścāpi kaliṅgānāmāviveśa paraṃtapa |
prākampanta ca sainyāni vāhanāni ca sarvaśaḥ || 78 ||
[Analyze grammar]

bhīmena samare rājangajendreṇeva sarvataḥ |
mārgānbahūnvicaratā dhāvatā ca tatastataḥ |
muhurutpatatā caiva saṃmohaḥ samajāyata || 79 ||
[Analyze grammar]

bhīmasenabhayatrastaṃ sainyaṃ ca samakampata |
kṣobhyamāṇamasaṃbādhaṃ grāheṇeva mahatsaraḥ || 80 ||
[Analyze grammar]

trāsiteṣu ca vīreṣu bhīmenādbhutakarmaṇā |
punarāvartamāneṣu vidravatsu ca saṃghaśaḥ || 81 ||
[Analyze grammar]

sarvakāliṅgayodheṣu pāṇḍūnāṃ dhvajinīpatiḥ |
abravītsvānyanīkāni yudhyadhvamiti pārṣataḥ || 82 ||
[Analyze grammar]

senāpativacaḥ śrutvā śikhaṇḍipramukhā gaṇāḥ |
bhīmamevābhyavartanta rathānīkaiḥ prahāribhiḥ || 83 ||
[Analyze grammar]

dharmarājaśca tānsarvānupajagrāha pāṇḍavaḥ |
mahatā meghavarṇena nāgānīkena pṛṣṭhataḥ || 84 ||
[Analyze grammar]

evaṃ saṃcodya sarvāṇi svānyanīkāni pārṣataḥ |
bhīmasenasya jagrāha pārṣṇiṃ satpuruṣocitām || 85 ||
[Analyze grammar]

na hi pāñcālarājasya loke kaścana vidyate |
bhīmasātyakayoranyaḥ prāṇebhyaḥ priyakṛttamaḥ || 86 ||
[Analyze grammar]

so'paśyattaṃ kaliṅgeṣu carantamarisūdanam |
bhīmasenaṃ mahābāhuṃ pārṣataḥ paravīrahā || 87 ||
[Analyze grammar]

nanarda bahudhā rājanhṛṣṭaścāsītparaṃtapaḥ |
śaṅkhaṃ dadhmau ca samare siṃhanādaṃ nanāda ca || 88 ||
[Analyze grammar]

sa ca pārāvatāśvasya rathe hemapariṣkṛte |
kovidāradhvajaṃ dṛṣṭvā bhīmasenaḥ samāśvasat || 89 ||
[Analyze grammar]

dhṛṣṭadyumnastu taṃ dṛṣṭvā kaliṅgaiḥ samabhidrutam |
bhīmasenamameyātmā trāṇāyājau samabhyayāt || 90 ||
[Analyze grammar]

tau dūrātsātyakirdṛṣṭvā dhṛṣṭadyumnavṛkodarau |
kaliṅgānsamare vīrau yodhayantau manasvinau || 91 ||
[Analyze grammar]

sa tatra gatvā śaineyo javena jayatāṃ varaḥ |
pārthapārṣatayoḥ pārṣṇiṃ jagrāha puruṣarṣabhaḥ || 92 ||
[Analyze grammar]

sa kṛtvā kadanaṃ tatra pragṛhītaśarāsanaḥ |
āsthito raudramātmānaṃ jaghāna samare parān || 93 ||
[Analyze grammar]

kaliṅgaprabhavāṃ caiva māṃsaśoṇitakardamām |
rudhirasyandinīṃ tatra bhīmaḥ prāvartayannadīm || 94 ||
[Analyze grammar]

antareṇa kaliṅgānāṃ pāṇḍavānāṃ ca vāhinīm |
saṃtatāra sudustārāṃ bhīmaseno mahābalaḥ || 95 ||
[Analyze grammar]

bhīmasenaṃ tathā dṛṣṭvā prākrośaṃstāvakā nṛpa |
kālo'yaṃ bhīmarūpeṇa kaliṅgaiḥ saha yudhyate || 96 ||
[Analyze grammar]

tataḥ śāṃtanavo bhīṣmaḥ śrutvā taṃ ninadaṃ raṇe |
abhyayāttvarito bhīmaṃ vyūḍhānīkaḥ samantataḥ || 97 ||
[Analyze grammar]

taṃ sātyakirbhīmaseno dhṛṣṭadyumnaśca pārṣataḥ |
abhyadravanta bhīṣmasya rathaṃ hemapariṣkṛtam || 98 ||
[Analyze grammar]

parivārya ca te sarve gāṅgeyaṃ rabhasaṃ raṇe |
tribhistribhiḥ śarairghorairbhīṣmamānarchurañjasā || 99 ||
[Analyze grammar]

pratyavidhyata tānsarvānpitā devavratastava |
yatamānānmaheṣvāsāṃstribhistribhirajihmagaiḥ || 100 ||
[Analyze grammar]

tataḥ śarasahasreṇa saṃnivārya mahārathān |
hayānkāñcanasaṃnāhānbhīmasya nyahanaccharaiḥ || 101 ||
[Analyze grammar]

hatāśve tu rathe tiṣṭhanbhīmasenaḥ pratāpavān |
śaktiṃ cikṣepa tarasā gāṅgeyasya rathaṃ prati || 102 ||
[Analyze grammar]

aprāptāmeva tāṃ śaktiṃ pitā devavratastava |
tridhā ciccheda samare sā pṛthivyāmaśīryata || 103 ||
[Analyze grammar]

tataḥ śaikyāyasīṃ gurvīṃ pragṛhya balavadgadām |
bhīmaseno rathāttūrṇaṃ pupluve manujarṣabha || 104 ||
[Analyze grammar]

sātyako'pi tatastūrṇaṃ bhīmasya priyakāmyayā |
sārathiṃ kuruvṛddhasya pātayāmāsa sāyakaiḥ || 105 ||
[Analyze grammar]

bhīṣmastu nihate tasminsārathau rathināṃ varaḥ |
vātāyamānaistairaśvairapanīto raṇājirāt || 106 ||
[Analyze grammar]

bhīmasenastato rājannapanīte mahāvrate |
prajajvāla yathā vahnirdahankakṣamivaidhitaḥ || 107 ||
[Analyze grammar]

sa hatvā sarvakāliṅgānsenāmadhye vyatiṣṭhata |
nainamabhyutsahankecittāvakā bharatarṣabha || 108 ||
[Analyze grammar]

dhṛṣṭadyumnastamāropya svarathe rathināṃ varaḥ |
paśyatāṃ sarvasainyānāmapovāha yaśasvinam || 109 ||
[Analyze grammar]

saṃpūjyamānaḥ pāñcālyairmatsyaiśca bharatarṣabha |
dhṛṣṭadyumnaṃ pariṣvajya sameyādatha sātyakim || 110 ||
[Analyze grammar]

athābravīdbhīmasenaṃ sātyakiḥ satyavikramaḥ |
praharṣayanyaduvyāghro dhṛṣṭadyumnasya paśyataḥ || 111 ||
[Analyze grammar]

diṣṭyā kaliṅgarājaśca rājaputraśca ketumān |
śakradevaśca kāliṅgaḥ kaliṅgāśca mṛdhe hatāḥ || 112 ||
[Analyze grammar]

svabāhubalavīryeṇa nāgāśvarathasaṃkulaḥ |
mahāvyūhaḥ kaliṅgānāmekena mṛditastvayā || 113 ||
[Analyze grammar]

evamuktvā śinernaptā dīrghabāhurariṃdamaḥ |
rathādrathamabhidrutya paryaṣvajata pāṇḍavam || 114 ||
[Analyze grammar]

tataḥ svarathamāruhya punareva mahārathaḥ |
tāvakānavadhītkruddho bhīmasya balamādadhat || 115 ||
[Analyze grammar]