Chapter 46

saṃjaya uvāca |
kṛte'vahāre sainyānāṃ prathame bharatarṣabha |
bhīṣme ca yudhi saṃrabdhe hṛṣṭe duryodhane tathā || 1 ||
[Analyze grammar]

dharmarājastatastūrṇamabhigamya janārdanam |
bhrātṛbhiḥ sahitaḥ sarvaiḥ sarvaiścaiva janeśvaraiḥ || 2 ||
[Analyze grammar]

śucā paramayā yuktaścintayānaḥ parājayam |
vārṣṇeyamabravīdrājandṛṣṭvā bhīṣmasya vikramam || 3 ||
[Analyze grammar]

kṛṣṇa paśya maheṣvāsaṃ bhīṣmaṃ bhīmaparākramam |
śarairdahantaṃ sainyaṃ me grīṣme kakṣamivānalam || 4 ||
[Analyze grammar]

kathamenaṃ mahātmānaṃ śakṣyāmaḥ prativīkṣitum |
lelihyamānaṃ sainyaṃ me haviṣmantamivānalam || 5 ||
[Analyze grammar]

etaṃ hi puruṣavyāghraṃ dhanuṣmantaṃ mahābalam |
dṛṣṭvā vipradrutaṃ sainyaṃ madīyaṃ mārgaṇāhatam || 6 ||
[Analyze grammar]

śakyo jetuṃ yamaḥ kruddho vajrapāṇiśca saṃyuge |
varuṇaḥ pāśabhṛccāpi kubero vā gadādharaḥ || 7 ||
[Analyze grammar]

na tu bhīṣmo mahātejāḥ śakyo jetuṃ mahābalaḥ |
so'hamevaṃ gate magno bhīṣmāgādhajale'plavaḥ || 8 ||
[Analyze grammar]

ātmano buddhidaurbalyādbhīṣmamāsādya keśava |
vanaṃ yāsyāmi govinda śreyo me tatra jīvitum || 9 ||
[Analyze grammar]

na tvimānpṛthivīpālāndātuṃ bhīṣmāya mṛtyave |
kṣapayiṣyati senāṃ me kṛṣṇa bhīṣmo mahāstravit || 10 ||
[Analyze grammar]

yathānalaṃ prajvalitaṃ pataṃgāḥ samabhidrutāḥ |
vināśāyaiva gacchanti tathā me sainiko janaḥ || 11 ||
[Analyze grammar]

kṣayaṃ nīto'smi vārṣṇeya rājyahetoḥ parākramī |
bhrātaraścaiva me vīrāḥ karśitāḥ śarapīḍitāḥ || 12 ||
[Analyze grammar]

matkṛte bhrātṛsauhārdādrājyādbhraṣṭāstathā sukhāt |
jīvitaṃ bahu manye'haṃ jīvitaṃ hyadya durlabham || 13 ||
[Analyze grammar]

jīvitasya hi śeṣeṇa tapastapsyāmi duścaram |
na ghātayiṣyāmi raṇe mitrāṇīmāni keśava || 14 ||
[Analyze grammar]

rathānme bahusāhasrāndivyairastrairmahābalaḥ |
ghātayatyaniśaṃ bhīṣmaḥ pravarāṇāṃ prahāriṇām || 15 ||
[Analyze grammar]

kiṃ nu kṛtvā kṛtaṃ me syādbrūhi mādhava māciram |
madhyasthamiva paśyāmi samare savyasācinam || 16 ||
[Analyze grammar]

eko bhīmaḥ paraṃ śaktyā yudhyatyeṣa mahābhujaḥ |
kevalaṃ bāhuvīryeṇa kṣatradharmamanusmaran || 17 ||
[Analyze grammar]

gadayā vīraghātinyā yathotsāhaṃ mahāmanāḥ |
karotyasukaraṃ karma gajāśvarathapattiṣu || 18 ||
[Analyze grammar]

nālameṣa kṣayaṃ kartuṃ parasainyasya māriṣa |
ārjavenaiva yuddhena vīra varṣaśatairapi || 19 ||
[Analyze grammar]

eko'stravitsakhā te'yaṃ so'pyasmānsamupekṣate |
nirdahyamānānbhīṣmeṇa droṇena ca mahātmanā || 20 ||
[Analyze grammar]

divyānyastrāṇi bhīṣmasya droṇasya ca mahātmanaḥ |
dhakṣyanti kṣatriyānsarvānprayuktāni punaḥ punaḥ || 21 ||
[Analyze grammar]

kṛṣṇa bhīṣmaḥ susaṃrabdhaḥ sahitaḥ sarvapārthivaiḥ |
kṣapayiṣyati no nūnaṃ yādṛśo'sya parākramaḥ || 22 ||
[Analyze grammar]

sa tvaṃ paśya maheṣvāsaṃ yogīṣvara mahāratham |
yo bhīṣmaṃ śamayetsaṃkhye dāvāgniṃ jalado yathā || 23 ||
[Analyze grammar]

tava prasādādgovinda pāṇḍavā nihatadviṣaḥ |
svarājyamanusaṃprāptā modiṣyanti sabāndhavāḥ || 24 ||
[Analyze grammar]

evamuktvā tataḥ pārtho dhyāyannāste mahāmanāḥ |
ciramantarmanā bhūtvā śokopahatacetanaḥ || 25 ||
[Analyze grammar]

śokārtaṃ pāṇḍavaṃ jñātvā duḥkhena hatacetasam |
abravīttatra govindo harṣayansarvapāṇḍavān || 26 ||
[Analyze grammar]

mā śuco bharataśreṣṭha na tvaṃ śocitumarhasi |
yasya te bhrātaraḥ śūrāḥ sarvalokasya dhanvinaḥ || 27 ||
[Analyze grammar]

ahaṃ ca priyakṛdrājansātyakiśca mahārathaḥ |
virāṭadrupadau vṛddhau dhṛṣṭadyumnaśca pārṣataḥ || 28 ||
[Analyze grammar]

tathaiva sabalāḥ sarve rājāno rājasattama |
tvatprasādaṃ pratīkṣante tvadbhaktāśca viśāṃ pate || 29 ||
[Analyze grammar]

eṣa te pārṣato nityaṃ hitakāmaḥ priye rataḥ |
senāpatyamanuprāpto dhṛṣṭadyumno mahābalaḥ |
śikhaṇḍī ca mahābāho bhīṣmasya nidhanaṃ kila || 30 ||
[Analyze grammar]

etacchrutvā tato rājā dhṛṣṭadyumnaṃ mahāratham |
abravītsamitau tasyāṃ vāsudevasya śṛṇvataḥ || 31 ||
[Analyze grammar]

dhṛṣṭadyumna nibodhedaṃ yattvā vakṣyāmi māriṣa |
nātikramyaṃ bhavettacca vacanaṃ mama bhāṣitam || 32 ||
[Analyze grammar]

bhavānsenāpatirmahyaṃ vāsudevena saṃmataḥ |
kārttikeyo yathā nityaṃ devānāmabhavatpurā |
tathā tvamapi pāṇḍūnāṃ senānīḥ puruṣarṣabha || 33 ||
[Analyze grammar]

sa tvaṃ puruṣaśārdūla vikramya jahi kauravān |
ahaṃ ca tvānuyāsyāmi bhīmaḥ kṛṣṇaśca māriṣa || 34 ||
[Analyze grammar]

mādrīputrau ca sahitau draupadeyāśca daṃśitāḥ |
ye cānye pṛthivīpālāḥ pradhānāḥ puruṣarṣabha || 35 ||
[Analyze grammar]

tata uddharṣayansarvāndhṛṣṭadyumno'bhyabhāṣata |
ahaṃ droṇāntakaḥ pārtha vihitaḥ śaṃbhunā purā || 36 ||
[Analyze grammar]

raṇe bhīṣmaṃ tathā droṇaṃ kṛpaṃ śalyaṃ jayadratham |
sarvānadya raṇe dṛptānpratiyotsyāmi pārthiva || 37 ||
[Analyze grammar]

athotkruṣṭaṃ maheṣvāsaiḥ pāṇḍavairyuddhadurmadaiḥ |
samudyate pārthivendre pārṣate śatrusūdane || 38 ||
[Analyze grammar]

tamabravīttataḥ pārthaḥ pārṣataṃ pṛtanāpatim |
vyūhaḥ krauñcāruṇo nāma sarvaśatrunibarhaṇaḥ || 39 ||
[Analyze grammar]

yaṃ bṛhaspatirindrāya tadā devāsure'bravīt |
taṃ yathāvatprativyūha parānīkavināśanam |
adṛṣṭapūrvaṃ rājānaḥ paśyantu kurubhiḥ saha || 40 ||
[Analyze grammar]

tathoktaḥ sa nṛdevena viṣṇurvajrabhṛtā iva |
prabhāte sarvasainyānāmagre cakre dhanaṃjayam || 41 ||
[Analyze grammar]

ādityapathagaḥ ketustasyādbhutamanoramaḥ |
śāsanātpuruhūtasya nirmito viśvakarmaṇā || 42 ||
[Analyze grammar]

indrāyudhasavarṇābhiḥ patākābhiralaṃkṛtaḥ |
ākāśaga ivākāśe gandharvanagaropamaḥ |
nṛtyamāna ivābhāti rathacaryāsu māriṣa || 43 ||
[Analyze grammar]

tena ratnavatā pārthaḥ sa ca gāṇḍīvadhanvanā |
babhūva paramopetaḥ svayaṃbhūriva bhānunā || 44 ||
[Analyze grammar]

śiro'bhūddrupado rājā mahatyā senayā vṛtaḥ |
kuntibhojaśca caidyaśca cakṣuṣyāstāṃ janeśvara || 45 ||
[Analyze grammar]

dāśārṇakāḥ prayāgāśca dāśerakagaṇaiḥ saha |
anūpagāḥ kirātāśca grīvāyāṃ bharatarṣabha || 46 ||
[Analyze grammar]

paṭaccaraiśca huṇḍaiśca rājanpauravakaistathā |
niṣādaiḥ sahitaścāpi pṛṣṭhamāsīdyudhiṣṭhiraḥ || 47 ||
[Analyze grammar]

pakṣau tu bhīmasenaśca dhṛṣṭadyumnaśca pārṣataḥ |
draupadeyābhimanyuśca sātyakiśca mahārathaḥ || 48 ||
[Analyze grammar]

piśācā daradāścaiva puṇḍrāḥ kuṇḍīviṣaiḥ saha |
maḍakā laḍakāścaiva taṅgaṇāḥ parataṅgaṇāḥ || 49 ||
[Analyze grammar]

bāhlikāstittirāścaiva colāḥ pāṇḍyāśca bhārata |
ete janapadā rājandakṣiṇaṃ pakṣamāśritāḥ || 50 ||
[Analyze grammar]

agniveṣyā jagattuṇḍāḥ paladāśāśca bhārata |
śabarāstumbupāścaiva vatsāśca saha nākulaiḥ |
nakulaḥ sahadevaśca vāmaṃ pārśvaṃ samāśritāḥ || 51 ||
[Analyze grammar]

rathānāmayutaṃ pakṣau śiraśca niyutaṃ tathā |
pṛṣṭhamarbudamevāsītsahasrāṇi ca viṃśatiḥ |
grīvāyāṃ niyutaṃ cāpi sahasrāṇi ca saptatiḥ || 52 ||
[Analyze grammar]

pakṣakoṭiprapakṣeṣu pakṣānteṣu ca vāraṇāḥ |
jagmuḥ parivṛtā rājaṃścalanta iva parvatāḥ || 53 ||
[Analyze grammar]

jaghanaṃ pālayāmāsa virāṭaḥ saha kekayaiḥ |
kāśirājaśca śaibyaśca rathānāmayutaistribhiḥ || 54 ||
[Analyze grammar]

evametaṃ mahāvyūhaṃ vyūhya bhārata pāṇḍavāḥ |
sūryodayanamicchantaḥ sthitā yuddhāya daṃśitāḥ || 55 ||
[Analyze grammar]

teṣāmādityavarṇāni vimalāni mahānti ca |
śvetacchatrāṇyaśobhanta vāraṇeṣu ratheṣu ca || 56 ||
[Analyze grammar]